თამარ გაბუნია

არის თუ არა პედიატრიული საწოლების დეფიციტი ქვეყანაში: გაბუნიას განმარტება

73
(განახლებულია 20:44 20.07.2021)
საქართველოში კორონავირუსის მეოთხე ტალღა აქტიურ ფაზაში შედის. იზრდება „დელტა“ შტამით ინფიცირებულთა რაოდენობა, შესაბამისად, უფრო მეტი ადამიანი საჭიროებს ჰოსპიტალიზაციას.

თბილისი, 20 ივლისი – Sputnik. კორონავირუსისგან მოზარდების დაცვის ერთადერთი პრევენციული მექანიზმი ოჯახის წევრების ვაქცინაცია და მათი მხრიდან კოვიდ-რეგულაციების დაცვაა, განაცხადა ჯანდაცვის მინისტრის მოადგილემ თამარ გაბუნიამ უწყებათშორისი საკოორდინაციო საბჭოს სხდომის შემდეგ გამართულ ბრიფინგზე. 

საქართველოში ამ ეტაპზე ე.წ. ინდური („დელტა") და ბრიტანული შტამები ცირკულირებს. „დელტა" შტამი ყველაზე მეტად ბავშვებსა და ახალგაზრდებში ვრცელდება და იგი 50%-ით უფრო ვერაგია „ბრიტანულ“ შტამთან შედარებით.

„ქვეყანაში „დელტა“ შტამის ცირკულაცია იმატებს, გახშირდა ბავშვებში ინფიცირების შემთხვევებიც. აქედან გამომდინარე, მნიშვნელოვანია ოჯახის წევრები მაქსიმალურად ჩაერთონ ვაქცინაციის პროცესში და ზედმიწევნით დაიცვან რეგულაციები“, – განაცხადა გაბუნიამ.

ეპიდემიოლოგების აზრით, სწორედ „ინდური“ შტამის გავრცელების გამო შეიქმნა საქართველოს კლინიკებში საწოლფონდის პრობლემა. ჯანდაცვის მინისტრის მოადგილის განმარტებით, მიუხედავად კლინიკებში მიმართვიანობის გაზრდისა, ამ ეტაპზე საწოლფონდის პრობლემა არ არის.

„ამ დროისათვის ქვეყანაში 1.328 თავისუფალი საწოლია. ბოლო პერიოდში აქტიურად მიმდინარეობს პედიატრიული საწოლების მობილიზება და ამ ეტაპზე დეფიციტი არ აღინიშნება“, – განაცხადა გაბუნიამ. 

ბოლო დღეებში გაჩნდა ინფორმაცია, რომ საქართველოში პედიატრიული საწოლების თითქმის 100% ათვისებულია, ასევე რეანიმაციულ განყოფილებებში კორონავირუსით ინფიცირებული ბავშვების რაოდენობა მკვეთრად გაზრდილია. სპეციალისტების განცხადებით, მეორე ტალღასთან შედარებით, მდგომარეობის სიმძიმიდან გამომდინარე, ახლა ძალიან ბევრი ბავშვი საჭიროებს ჰოსპიტალიზაციას და სწორედ ამან განაპირობა პედიატრიული საწოლების პრაქტიკულად სრულად ათვისება.

პედიატრების განცხადებით, ე.წ. ინდური შტამით ინფიცირებულ ბავშვებში დაავადება რთულად მიმდინარეობს, განსაკუთრებით წლამდე ასაკის ბავშვებში. იკვეთება გახანგრძლივებული ჰიპერთერმია და ამას შეიძლება თან ახლდეს ქვედა სასუნთქი გზების გართულება. ასევე ზიანდება ფილტვები, ბავშვებს ახასიათებთ ზოგადი, საერთო სისუსტე.

საქართველოში პანდემიის დაწყებიდან დღემდე ბავშვებს შორის კორონავირუსის 41 ათასზე მეტი შემთხვევა გამოვლინდა, რაც ინფიცირებულთა საერთო რაოდენობის დაახლოებით 9%-ს შეადგენს.

73
თემები:
კორონავირუსი საქართველოში: ბოლო ცნობები (976)
ვაქცინაციის ცენტრი სავაჭრო ცენტრ Hualing Plaza-ში

საქართველოში უცხოელთათვის ვაქცინაციის პუნქტები გაიხსნა: ვინ შეძლებს აცრას

23
უცხო ქვეყნის მოქალაქემ/მოქალაქეობის არმქონე პირმა ვაქცინაციის პუნქტში უნდა წარადგინოს დოკუმენტი, რომელიც რომელიმე კატეგორიასთან შესაბამისობას ადასტურებს.

თბილისი, 29 ივლისი — Sputnik. საქართველოში მყოფ უცხო ქვეყნის მოქალაქეები, რომლებიც არ ფლობენ ბინადრობის მოწმობას, ვაქცინაცია თბილისის, ქუთაისის და ბათუმის სამ კლინიკაში შეძლებენ, იუწყება ჯანდაცვის სამინისტრო.

უწყების ინფორმაციით, უცხოელები კორონავირუსის საწინააღმდეგო აცრის გაკეთებას შეძლებენ თბილისში, აკადემიკოს ნიკოლოზ ყიფშიძის სახელობის ცენტრალურ საუნივერსიტეტო კლინიკაში; ბათუმში, რესპუბლიკურ საავადმყოფოში; ქუთაისში, ჩხობაძის სახელობის ინვალიდთა და ხანდაზმულთა სამკურნალო-სარეაბილიტაციო კლინიკურ ცენტრში.

ჯანდაცვის სამინისტრო ბენეფიციართა იმ ჩამონათვალს აქვეყნებს, რომელთაც ვაქცინაციის პროგრამაში ჩართვა შეუძლიათ.

  • საქართველოს ტერიტორიაზე ლეგალურად მყოფი უცხო ქვეყნის მოქალაქე/მოქალაქეობის არმქონე პირი (რომელთა ლეგალურად ყოფნა დასტურდება შესაბამისი ვიზის, ბინადრობის ნებართვით ან უვიზო რეჟიმის ხანგრძლივობით), რომელიც საქართველოში მინიმუმ 3 თვის წინ შემოვიდა.
  • სახელმწიფო პროგრამის „იმუშავე საქართველოდან” მონაწილე უცხო ქვეყნის მოქალაქეები და მათი ოჯახის წევრები.
  • საქართველოში განათლების მიღების მიზნით მყოფი უცხო ქვეყნის მოქალაქე სტუდენტები (რომლებმაც ვერ მოახერხეს ქვეყნის დატოვება), შესაბამისი საგანმანათლებლო დაწესებულების მიერ წარმოდგენილი სიის საფუძველზე.
  • საქართველოში აკრედიტირებული დიპლომატიური წარმომადგენლობების, საკონსულო დაწესებულებების, საერთაშორისო ორგანიზაციების წარმომადგენლობების, აგრეთვე მათთან გათანაბრებული წარმომადგენლობების უცხოელი თანამშრომლები და მათი ოჯახის წევრები.
  • პენიტენციურ დაწესებულებებში მყოფი პირები, იდენტიფიკაციის დამადასტურებელი ოფიციალური დოკუმენტის არქონის მიუხედავად.
  • საქართველოს მოქალაქეთა ოჯახების არარეზიდენტი წევრები;
  • ცხინვალის რეგიონის და აფხაზეთის მცხოვრებნი;
  • სადამკვირვებლო მისიების თანამშრომლები და საერთაშორისო დონორების მისიები.

როგორ უნდა დარეგისტრირდეს უცხოელი

უცხო ქვეყნის მოქალაქემ/მოქალაქეობის არმქონე პირმა ვაქცინაციის პუნქტში უნდა წარადგინოს დოკუმენტი, რომელიც რომელიმე კატეგორიასთან შესაბამისობას ადასტურებს.

აღნიშნული კატეგორიების უცხოელების რეგისტრაცია ელექტრონულ სისტემაში მხოლოდ ვაქცინაციის შემდეგ განხორციელდება.

23
ლგბტ-მოწინააღმდეგეების აქცია ბათუმში

კომუნიკაციების კომისიამ „ალტ-ინფო“ სამართალდამრღვევად ცნო

34
დარღვევის დაფიქსირება უმნიშვნელოვანესი ეტაპია, რათა საზოგადოებამ და მედიამ სწორად გაითავისოს კანონის პრინციპები და მოხდეს მისი აღსრულება, აცადებენ კომუნიკაციების კომისიაში.

თბილისი, 29 ივლისი - Sputnik. საქართველოს კომუნიკაციების ეროვნულმა კომისიამ საინფორმაციო პლატფორმა „ალტ-ინფო“ ეთერში გასული უხამსო შინაარსის შემცველი გადაცემების გამო სამართალდამრღვევად ცნო.

კომუნიკაციების კომისიის მიერ გავრცელებულ ინფორმაციაში ნათქვამია, რომ საქმე ეხება 5, 6, 7 და 12 ივლისს „ალტ-ინფოს“ სამაუწყებლო ბადეში განთავსებულ გადაცემებს „ალტ-ინტერვიუ“ და „ალტ-ანალიტიკა“. კომისიის ცნობით, აღნიშნულ გადაცემებში გამოყენებული იყო უცენზურო ლექსიკა და ხდებოდა უხამსობის ტირაჟირება როგორც წამყვანების, ისე მიწვეული სტუმრების მხრიდან, რაც ეწინააღმდეგება საზოგადოებაში დამკვიდრებულ ეთიკის ნორმებს.

„გამომდინარე იქიდან, რომ უხამსობის შემცველი გამონათქვამები განთავსდა საზოგადოებრივ-პოლიტიკურ პროგრამაში, დაირღვა იმ აუდიტორიის უფლებები, ვისთვისაც მიუღებელი და განსაკუთრებით შემაწუხებელია უხამსობის შემცველი გადაცემის ნახვა და მოსმენა“, - წერია ინფორმაციაში.

როგორც ინფორმაციაშია ნათქვამი, კანონმდებლობის მიხედვით, საზოგადოებრივ-პოლიტიკურ გადაცემებში უხამსობის განთავსება ეწინააღმდეგება მაუწყებლის სრულწლოვანი და არასრულწლოვანი აუდიტორიის უფლებებს.

კომისიაში ასევე აცხადებენ, რომ მათ მიზანს წარმოადგენს სტანდარტების დადგენა და არა მათი სანქცირება.

„დარღვევის დაფიქსირება უმნიშვნელოვანესი ეტაპია, რათა საზოგადოებამ და მედიამ სწორად გაითავისოს კანონის პრინციპები და მოხდეს მისი აღსრულება“, - აცხადებენ კომუნიკაციების კომისიაში.

თბილისში 16 ივლისს პოლიციაში გამოკითხვაზე დაიბარეს „ალტ-ინფოს“ წევრები და სხვა ლგბტ-საზოგადოების მოწინააღმდგეები. მათ დაუსვეს კითხვები თბილისში 5–6 ივლისს განვითარებულ მოვლენებზე, როდესაც მასმედიის 53 წარმომადგენელი სცემეს, დაარბიეს არასამთავრობო ორგანიზაციების „თბილისი პრაიდისა“ და „სირცხვილიას“ ოფისები.

გამოკითხვამდე ლგბტ–თემის წინააღმდეგ კონტრაქციის ორგანიზატორების სახლებსა და ოფისებში ჩხრეკა ჩაატარეს. კონტრაქციის ორგანიზატორები არ დაუკავებიათ.

აღსანიშნავია, რომ 5 ივლისის შემდეგ ათასობით ჟურნალისტი გამოვიდა ქუჩაში და მთავრობის გადადგომასთან ერთად არეულობების ორგანიზატორების დასჯა მოითხოვა.

 

34
ტურისტული საინფოემაციო ცენტრი აჭარაში

აჭარაში ცხრა საინფორმაციო ცენტრი მუშაობს: რა სერვისებს სთავაზობენ ტურისტებს

0
რეგიონში მყოფ ვიზიტორებს მოგზაურობასთან დაკავშირებით ინფორმაციის მიღება ცხელი ხაზის მეშვეობით შეუძლიათ.

თბილისი, 29 ივლისი - Sputnik. აჭარაში ჩამოსულ საერთაშორისო ვიზიტორებს ცხრა ტურისტული საინფორმაციო ცენტრი ემსახურება, ინფორმაციას აჭარის ტურიზმისა და კურორტების დეპარტამენტი ავრცელებს.

აჭარაში ტურისტული სეზონი 15 ივნისს გაიხსნა. მუშაობა განაახლეს აგრეთვე პანდემიის გამო შეჩერებულმა ტურიზმის საინფორმაციო ცენტრებმა.

დეპარტამენტის ცნობით, საინფორმაციო ცენტრები აჭარის სხვადასხვა მუნიციპალიტეტში მდებარეობს, მათ შორის ბათუმსა და ქობულეთში.

საინფორმაციო ცენტრები მოგზაურებს სხვადასხვა სერვისს სთავაზობს - უფასო რუკები, ტურისტული გზამკვლევები, მარშრუტები, ტურები მაღალმთიანი აჭარის მიმართულებით, სუვენირები, ადგილობრივი წარმოების პროდუქცია, ფასდაკლების ბარათი Batumi Discount Card.

ვიზიტორებს რეგიონში მოგზაურობასთან დაკავშირებით ნებისმიერი ინფორმაციის მიღება შეუძლიათ ცხელ ხაზზე.

კორონავირუსის პანდემიამდე აჭარის რეგიონი ერთ-ერთი ყველაზე პოპულარული ტურისტული მიმართულება იყო. პანდემიის გამო აჭარაში, როგორც მთლიანად საქართველოში, 2020 წლის ზაფხულის ტურისტული სეზონი ფაქტობრივად ჩავარდა.

ტურიზმის სფერო ყველაზე მეტად დაზარალდა კორონავირუსის პანდემიის შედეგად. საქართველოს რეკორდულმა წარმატებამ 2019 წელს, როდესაც საერთაშორისო მოგზაურთა რიცხვმა 9,3 მილიონს გადააჭარბა, ხოლო მიღებულმა შემოსავლებმა 3,3 მილიარდი დოლარი შეადგინა, აიძულა ამ დარგში დასაქმებული ადამიანები უფრო საფუძვლიანად მომზადებულიყვნენ 2020 წლისთვის. მაგრამ პანდემიამ ტურიზმის ინდუსტრიის ყველა გეგმა და იმედი ჩაშალა. ტურიზმისგან მიღებული შემოსავლები 2020 წელს 427,7 ათას დოლარამდე შემცირდა, ხოლო საერთაშორისო მოგზაურთა რაოდენობა - 1,7 მილიონამდე.

მიმდინარე წლის ივნისში საერთაშორისო ვიზიტორების რიცხვი, გასული წლის ანალოგიურ პერიოდთან შედარებით, 294,2%-ით გაიზარდა. ამასთან, ტურისტული ვიზიტების რაოდენობა გასული წლის ანალოგიურ პერიოდთან შედარებით 286,8%-ით გაიზარდა.

2021 წლის იანვრიდან ივნისის ჩათვლით პერიოდში ვიზიტების რაოდენობამ 446,1 ათასი შეადგინა, რაც 2020 წლის ანალოგიური პერიოდის მაჩვენებელზე 66,4%-ით ნაკლებია.

რეგულარული ავიამიმოსვლა, რომელიც კორონავირუსის პანდემიის გამო იყო შეჩერებული 2020 წლის მარტიდან, საქართველომ 1 თებერვლიდან აღადგინა, ეკონომიკის სამინისტროს მონაცემებით, მაისში, პანდემიამდე პერიოდთან შედარებით, ფრენების რაოდენობა 65%-ით აღდგა. 1 ივნისიდან კი საქართველომ სახმელეთო საზღვრებიც გახსნა.

 

0