ლექსო ლაშქარავა

დამოუკიდებელი ექსპერტი ტელეოპერატორის გარდაცვალების თაობაზე შსს-ს ვერსიას ეჭვქვეშ აყენებს

97
(განახლებულია 14:03 14.07.2021)
ლექსო ლაშქარავას გარდაცვალების შემდეგ შსს-მ უმოკლეს ვადაში დადო პირველადი დასკვნა, სადაც მის სისხლში ნარკოტიკული ნივთიერების კვალზე საუბრობს.

თბილისი, 14 ივლისი — Sputnik. ნებისმიერი პირის, ამ შემთხვევაში კი ტელეოპერატორ ლექსო ლაშქარავას გარდაცვალების მიზეზებზე ასეთ მოკლე დროში რაიმე სახის დასკვნის გაკეთება წარმოუდგენელია, განაცხადა დამოუკიდებელმა ექსპერტმა ვახტანგ კალოიანმა.

როგორც ექსპერტმა ტელეკომპანია „ტვ პირველის" ეთერში განაცხადა, ეჭვს იწვევს ის ფაქტიც, რომ ექსპერტიზის წინასწარი დასკვნა საზოგადოებას გააცნო არა კომპეტენტურმა პირმა, არამედ შსს-ს თანამდებობის პირმა.

"„ამ დასკვნაში რამდენიმე უცნაური და საეჭვო მომენტი შეიძლება ვიპოვოთ. პირველი არის დრო. ასეთ მცირე დროში რაიმე სახის დასკვნის გაკეთება ექსპერტიზის თვალსაზრისით წარმოუდგენელია. სამედიცინო ექსპერტები შუალედურ პირველად დასკვნას, პირველად განხილვასაც ვერ მოასწრებდნენ... რაიმე სახის პროფესიული მსჯელობა ასეთ მოკლე დროში წარმოუდგენელია", - აღნიშნა კალოიანმა.

ის ფაქტი, რომ ექსპერტიზის წინასწარი დასკვნა საზოგადოებას არა ექსპერტმა, არამედ შსს-ს თაანმშრომელმა გააცნო, კალოიანმა იმით ახსნა, რომ არც ერთი პროფესიონალი საკუთარ თავს წინასწარი დასკვნების გაკეთების უფლებას არ მისცემდა.

კალოიანის თქმით, ეჭვს იწვევს შსს-ს მიერ გავრცელებული ვიდეოც, სადაც ლექსო ლაშქარავა თავიდან თითქოს ეძებს, შემდეგ კი ყიდულობს ნარკოტიკს.

„მინდა განსაკუთრებით აღვნიშნო, რომ ეს ხელისუფლების დადგმული სცენარია. დავუშვათ, მომხმარებელი იყო ახალგაზრდა კაცი, ყველა მომხმარებელმა იცის, რომ ინტონსიკაციის დროს კლინიკა არ არის ვალდებული აცნობოს პოლიციას, ეს ყველა გამოცდილმა თუ გამოუცდელმა მომხმარებელმა იცის", - განაცხადა ექსპერტმა.

ტელეკომპანია „ტვ პირველის" ოპერატორი ლექსო ლაშქარავა, რომელიც 5 ივლისს ლგბტ-თემის მოწინააღმდეგეებმა სასტიკად სცემეს, მომხდარი ფაქტიდან მეექვსე დღეს, 11 ივლისს გარდაიცვალა. გარდაცვალების ზუსტი მიზეზი ექსპერტიზის დასრულების შემდეგ გახდება ცნობილი, თუმცა, ქიმიური ანალიზის წინასწარი მონაცემებიდან გამომდინარე, შსს არ გამორიცხავს, რომ გარდაცვალების მიზეზი ნარკოტიკული პრეპარატით ზედოზირებაა.

ლაშქარავას გარდაცვალებამ საზოგადოებაში დიდი რეზონანსი გამოიწვია, რამდენადაც ტელეოპერატორი გარდაცვალებამდე რამდენიმე დღით ადრე, პროფესიული მოვალეობის შესრულებისას 5 ივლისს ლგბტ-თემის მოწინააღმდეგეთა თავდასხმის ობიექტი გახდა. იმ დღეს აქციაზე მთლიანობაში მასმედიის 53 წარმომადგენელი დაშავდა.

მისი გარდაცვალების შემდეგ ოპოზიციური ტელეკომპანიების ჟურნალისტები საპროტესტო აქციაზე გამოვიდნენ და პრემიერ-მინისტრ ირაკლი ღარიბაშვილისა და მთავრობის სრული შემადგენლობის გადადგომა მოითხოვეს. მათი მტკიცებით, ლაშქარავა თბილისის ცენტრში მომხდარი არეულობის დროს მიღებული ტრავმების შედეგად გარდაიცვალა.

ამაზე პასუხად პრემიერმა ტელეკოპანიები და ოპოზიცია ლაშქარავას სიკვდილით სპეკულაციაში დაადანაშაულა და მოუწოდა, დალოდებოდნენ ექსპერტიზის საბოლოო შედეგებს.

შსს-მ ლაშქარავაზე თავდასხმის ბრალდებით ხუთი პირი უკვე დააკავა. ისინი განაჩენს საპატიმროში დაელოდებიან.

97
თემები:
კორონავირუსი საქართველოში: ბოლო ცნობები (989)
 ვაზიანის სამხედრო ბაზა

Agile Spirit 2021–ის ფარგლებში საჰაერო-სადესანტო წვრთნა გაიმართა

143
(განახლებულია 13:15 01.08.2021)
Agile Spirit-ის მიზანია ერთობლივი სამხედრო ოპერაციების ჩატარება ნატოს წევრი ქვეყნებისა და პარტნიორების სამხედრო მოსამსახურეების საბრძოლო უნარების ასამაღლებლად.

თბილისი, 1 აგვისტო - Sputnik. საქართველოში ჩატარებული მრავალეროვნული სწავლებების ისტორიაში პირველად, ქართველი და ამერიკელი სამხედროების მონაწილეობით ერთობლივი საჰაერო-სადესანტო კომპონენტის საჩვენებელი სწავლება გაიმართა, ნათქვამია საქართველოს თავდაცვის სამინისტროს მიერ გავრცელებულ განცხადებაში.

ნატოს მრავალეროვნული სამხედრო სწავლება Agile Spirit 2021 („მტკიცე სული") 26 ივლისს გაიხსნა. საქართველო  სამხედრო სწავლებას, რომელიც წელს უკვე მეათედ ტარდება, 6 აგვისტოს ჩათვლით უმასპინძლებს. წვრთნებში მონაწილეობს 700 ამერიკელი, 1.600 ქართველი და სხვადასხვა ქვეყნის 250 სამხედრო მოსამსახურე.

Agile Spirit 2021-ის ფარგლებში ვაზიანის სამხედრო აეროდრომზე საჰაერო სადესანტო წვრთნა საქართველოს თავდაცვის ძალების, ევროპასა და აფრიკაში აშშ-ის არმიისა და ევროპაში აშშ-ის საჰაერო ძალების ერთობლივი მონაწილეობით ჩატარდა. საჰაერო-სადესანტო კომპონენტის საჩვენებელი სწავლება ევროპაში აშშ-ის საჰაერო ძალების სამი ერთეული C-130 ჰერკულესის ტიპის თვითმფრინავით განხორციელდა. 

საჰაერო-სადესანტო კომპონენტის საჩვენებელი სწავლება ვაზიანის აეროდრომის ტერიტორიაზე C-130 თვითმფრინავიდან სამხედრო მძიმე ტექნიკის გადმოსროლით დაიწყო, რის შემდეგაც დანარჩენი ორი თვითმფრინავიდან პირადი შემადგენლობის დესანტირება განხორციელდა.

„პარაშუტებით გადმოხტომისას სამხედროებმა Agile Spirit 2021-ში მონაწილე ქვეყნების დროშები გაშალეს. საჰაერო დესანტირების შემდეგ სადესანტო ჯგუფების ქართველმა და ამერიკელმა ხელმძღვანელებმა პარტნიორობისა და მეგობრობის ნიშნად ერთმანეთს პარაშუტისტების ბეჯები გაუცვალეს“, - აღნიშნულია განცხადებაში.

სცენარის მიხედვით, მედესანტეებმა სამხედრო აეროდრომის დაკავების ოპერაცია შემდგომში მომყოლი მოკავშირე მრავალეროვნული ძალების მიღებისა და მათ მიერ აეროდრომის დაკავების მიზნით ჩაატარეს.

Agile Spirit 2021 ხელს უწყობს რეგიონულ სტაბილურობასა და უსაფრთხოებას, ასევე ავითარებს ნატოს წევრი და პარტნიორი ქვეყნების შესაძლებლობებს, რათა კიდევ უფრო ეფექტიანად შეძლონ რეგიონულ კრიზისებსა და გამოწვევებზე რეაგირება. სწავლების მთავარი გზავნილია – „ძალა პარტნიორობაშია".

წვრთნები Agile Spirit 2011 წლიდან ტარდება და იგი აშშ-თან და ნატოსთან საქართველოს თანამშრომლობის ერთ-ერთი კომპონენტია. 2020 წელს კორონავირუსის პანდემიის გამო სწავლება არ ჩატარებულა.

143
თემები:
საქართველოს თავდაცვა
შანაე ბრუკი

წარმოუდგენელი სისასტიკის მსხვერპლია: „საერთაშორისო სახლი“ შანაი ბრუკის დაღუპვის ფაქტზე

102
(განახლებულია 12:59 01.08.2021)
შსს-ს ცნობით, ავსტრალიელი ქალის გარდაცვალების საქმეზე აქტიურად გრძელდება ოპერატიულ-სამძებრო და საგამოძიებო მოქმედებები  დამნაშავე პირის დადგენისა და დაკავების მიზნით.

თბილისი, 1 აგვისტო - Sputnik. თბილისში 31 წლის ავსტრალიელი ქალის შანაი ბრუკის გარდაცვალებას ინგლისური ენის შემსწავლელი ცენტრი „საერთაშორისო სახლი“ (International House Tbilisi), სადაც ქალი მასწავლებლად მუშაობდა, სპეციალური განცხადებით ეხმაურება.

„ძალიან გვიმძიმს ამ სიტყვების დაწერა. ღრმა მწუხარებას გამოვთქვავთ ჩვენი მასწავლებელის, შანაე ბრუქს ედვარდსის ტრაგიკულად დაღუპვის გამო. იგი წარმოუდგენელი სისასტიკის მსხვერპლია. დავკარგეთ გულისხმიერი ახალგაზრდა ადამიანი და კარგი მასწავლებელი. ვუსამძიმრებთ ყველას –ოჯახს, კოლეგებს, სტუდენტებს",- აღნიშნულია განცხადებაში. 

თბილისში, მთაწმინდის ფერდობზე გარდაცვლილი ქალის ცხედარი რამდენიმესაათიანი ინტენსიური სამძებრო და საგამოძიებო ღონისძიებების შედეგად სამართალდამცველებმა გუშინ იპოვეს.

ერთ-ერთი ვერსიით, ახალგაზრდა ქალი მოკლეს. მისი ცხედარი  მთაწმინდის ფერდობზე „ეშმაკის ბორბლის“ ქვემოთ ხეობაში იპოვეს. იგი ტოტებით და ფოთლებით იყო დაფარული. ავსტრალიის მოქალაქე სათვალთვალო კამერებმა ბოლოს 30 ივლისს, დაახლოებით 15:30 საათზე ვერაზე, საცხოვრებელ სახლთან დააფიქსირეს.

დაკარგულის შესახებ ინფორმაცია Facebook-ზე მისმა მეგობარმა გაავრცელა. მისი განცხადებით, როდესაც შანაი ბრუკს ბოლოს ტელეფონით ესაუბრებოდა, ის მთაწმინდაზე იმყოფებოდა. მისივე ინფორმაციით, სატელეფონო საუბრის დროს, ქალს მოულოდნელად თავს დაესხნენ და ის დახმარებას ითხოვდა.

როგორც დაღუპულის მეგობრები აცხადებენ, ახალგაზრდა ქალი სპორტით იყო დაკავებული და მთაწმინდაზე ხშირად სეირნობდა.

ავსტრალიის მოქალაქის სამძებრო სამუშაოებში ჩართული იყვნენ კრიმინალური პოლიციის, საგანგებო სიტუაციების მართვის სამსახურისა და განსაკუთრებულ დავალებათა დეპარტამენტის თანამშრომლები.

ქალის გარდაცვალების საქმეზე თავდაპირველად საქმე საქართველოს სსკ-ის 143-ე მუხლით დაიწყო, რაც თავისუფლების უკანონო აღკვეთას გულისხმობს, მოგვიანებით კი 108-ე მუხლით (განზრახ მკვლელობა) შეიცვალა.

102
თემები:
თბილისი დღეს
სეისმოგრაფი

საქართველოში მიწისძვრა მოხდა კვლავ სოფელ სამებასთან

0
მიწისძვრის ეპიცენტრი დმანისის მუნიციპალიტეტში, სოფელ სამებასთან ახლოს, ცხრა კილომეტრ სიღრმეში მდებარეობდა

თბილისი, 1 აგვისტო – Sputnik. დმანისიდან 24 კილომეტრში, სოფელ სამებასთან 3,1 მაგნიტუდის მიწისძვრა დაფიქსირდა, იუწყება სეისმური მონიტორინგის ეროვნული ცენტრი.

სეისმოლოგი: გახშირებული მიწისძვრები საქართველოში საყურადღებოა>>

მიწისქვეშა ბიძგები თბილისის დროით 21:09 საათზე დაფიქსირდა. ეპიცენტრი 9 კმ სიღრმეში მდებარეობდა.

ივნისსა და ივლისში სეისმოლოგებმა ამ ტერიტორიაზე 3,0–4,0 მაგნიტუდის ორ ათეულამდე მიწისძვრა დააფიქსირეს.

0
თემები:
შემთხვევები საქართველოში