გურამ შეროზია

როგორ იმოგზაუროთ ჩერნობილში მარტივად გურამ შეროზიას 10 რჩევა

80
(განახლებულია 21:44 11.06.2021)
ცნობილმა მოგზაურმა გურამ შეროზიამ რამდენიმე კვირის წინ ჩერნობილში იმოგზაურა, რომელსაც უამრავი ტურისტი სტუმრობს.

თბილისი, 11 ივნისი – Sputnik. გურამ შეროზიამ, რომელიც საზოგადოებამ გაიცნო როგორც მოგზაური ბლოგერი, ჩერნობილის ცნობილი კატასტროფიდან 35 წლის შემდეგ ჩერნობილში იმოგზაურა, სადაც ქალაქი პრიპიატი ისევ ცარიელია, რადიაციით დაბინძურებული ზონა კი დაკეტილი. ადგილი ტურისტებისთვის ნაწილობრივ ღიაა და იქ მოსახვედრად საჭირო ინფორმაციას შეროზია მსურველებს „ფეისბუქის“ ერთ-ერთ ჯგუფში უზიარებს.

მოგზაური დეტალურად ჰყვება, როგორ შეიძლება მოხვედრა იმ ტერიტორიაზე, სადაც წლების წინ ატომური ელექტროსადგურის აფეთქებამ უამრავი ადამიანის სიცოცხლე შეიწირა. გთავაზობთ მოგზაურის რჩევებს:

1. ტური ტარდება კიევიდან. სანამ ადგილზე მივედი, ცოტა მეშინოდა, მაინც რისკია-ს ამბავში. როცა გასვლის ადგილზე 5 ავტობუსი და 300-მდე ტურისტი დავინახე – ცოტა მომეშვა.

2. ავტობუსში ასვლისას ვიკი გაგვეცნო, ჩვენი გიდი (ტურები მხოლოდ ორ ენაზეა, ინგლისური და უკრაინული), რომელიც სამი წელია დადის ტურებში, კვირაში ორჯერ, ამან უსაფრთხოების ამბავში კიდევ უფრო განმამტკიცა.

3. დეზომეტრები დაგვირიგეს, რომელიც ზომავს რადიაციის დონეს, ანუ თუ ცოტა საექსკურსიო გზიდან გადაუხვევ და "დაუკრეფავში გადახვალ", სადაც რადიაციის დონე მაღალია - ისეთს დაგიწივლებს, ცხოვრება თვალწინ გაგირბენს.

4. საინტერესო ფაქტი ისაა, რომ დგახარ, ისმენ ისტორიებს და თითქმის არაა რადიაცია, 3 მეტრში კი შეიძლება ისეთი იყოს, რომ გულიც გაგისკდეს შიშისგან.

5. თუნდაც შემთხვევით მოხვდე მაღალ რადიაციულ ადგილას, ეს არ ნიშნავს მომენტალურ გაფართხალებას, რადიაციას დრო სჭირდება, რომ დაგიპყროს. ასევე, ტურის მანძილზე სამჯერ ზომავენ შენს მიერ მიღებული რადიაციის დონეს, რომელიც უმეტესად არ აღემატება 1 საათიანი ფრენისას მიღებულ დასხივებას.

6. ტური გრძელდება 6-7 საათი, რამდენიმე გაჩერებით და უსაინტერესოესი ისტორიებით.

7. ღირებულება 1 დღიანი ტურისთვის საკმაოდ დიდი, 120 დოლარამდეა, მაგრამ ღირს, უსაფრთხოება ეკონომიაზე მაღლა დგას.

8. ისტორიებს ისეთებს მოგიყვებიან, გული აგიჩუყდება, სსრკ შეცდომებზე, სიკვდილის ხიდზე, პრიპიატზე, რომელშიც სიცოცხლე გაჩერდა და ა.შ.

9. გარდა ჩერნობილის სულის შემძვრელი ისტორიისა, მეორე უნიკალურობა ისაა, რომ სიცოცხლე 35 წლის წინ გაჩერდა და მას შემდეგ ხელი არავის უხლია, ანუ ფაქტობრივად 1986 წლის სსრკ-ში მოგზაურობ.

10. მეილითაც იჯავშნება ტური, კიევიდანაც და ავტობუსები იქაური „ვაგზლის“ ტერიტორიიდან გადიან.

1986 წლის 26 აპრილს, მოსკოვის დროით 01:43 საათზე ჩერნობილის ატომურ ელექტროსადგურზე, ქალაქ პრიპიატში, უკრაინის სსრ-ში, საბჭოთა კავშირში, აფეთქება მოხდა. ჩერნობილის რეაქტორის აფეთქებით გავრცელებული რადიოაქტიური იზოტოპების ინტენსივობა ატმოსფეროში 400-ჯერ აღემატებოდა ჰიროსიმაზე 1945 წელს ჩამოგდებული ატომური ბომბის რადიოაქტიურ კონცენტრაციას. 2021 წელს ამ მოვლენიდან 35 წელი გავიდა.

კატასტროფის ადამიანური, ტექნიკური თუ ფინანსური ზარალის ზუსტი რაოდენობის დადგენა დღემდე ვერ ხერხდება. ცნობილია, რომ უშუალოდ აფეთქებას 31 ადამიანი ემსხვერპლა, მაგრამ ამ დრომდე გრძელდება იმ დაავადებათა მუტაცია, რომლებიც რადიოაქტიური ნივთიერებების ატმოსფეროში გაბნევას მოჰყვა.

80
თემები:
ქართველი სელებრითები (475)
მომავლის გზა - მამა და შვილი

საქართველოში მამის დღე აღინიშნება

13
(განახლებულია 14:41 19.06.2021)
მამის დღე ახსენებს საზოგადოებას, თუ რამდენად დიდია შვილების აღზრდის პროცესში მამების ჩართულობა და აქტივობა.

თბილისი, 19 ივნისი — Sputnik. საქართველოში 20 ივნისს მამის საერთაშორისო დღეს აღნიშნავენ.

მამის დღე საქართველოში, გაეროს მოსახლეობის ფონდის (UNFPA) საქართველოს ოფისისა და არასამთავრობო ორგანიზაცია Care Together-ის ინიციატივით, კამპანიის „კაცები ზრუნავენ“ ფარგლებში წელს მეექვსედ აღინიშნება.

ამ დღის აღსანიშნავად ზუგდიდსა და ოზურგეთში რამდენიმე ღონისძიება იგეგმება.

კერძოდ, 19 ივნისს, 12:00 საათიდან 17:00 საათამდე, ზუგდიდის სპორტულ დარბაზში მამებისა და შვილებისთვის გაიმართება ტექნოლოგიური ვორქშოპი.

ვორქშოპის მიმდინარეობისას მამები და შვილები ერთად იმუშავებენ ტექნოლოგიურ პროექტებზე, რაც, ერთი მხრივ, დააახლოებს მათ და, მეორე მხრივ, ბავშვების ტექნოლოგიებით დაინტერესებას შეუწყობს ხელს.

შეხვედრა ილიას სახელმწიფო უნივერსიტეტთან და საქართველოს ინოვაციებისა და ტექნოლოგიების სააგენტოსთან თანამშრომლობით გაიმართება.

ასევე, 19 ივნისს, 18:00 საათზე, ზუგდიდის ბოტანიკურ ბაღში გაიმართება წიგნის „მამები და შვილები“ პრეზენტაცია, რომელიც 2020 წელს გამომცემლობა „არტანუჯის“ მიერ გამოიცა.

წიგნში თავმოყრილია 13 წლის მუხრან მაჭავარიანის წერილი მამისადმი, ოთარ და თაკო ჭილაძეები, გელა ჩარკვიანი და მისი შვილები – ირაკლი და თეონა, ფრიდონ და ზაზა ხალვაშები, ვახტანგ და ირინა ჯავახაძეები, ბაჩანა ბრეგვაძე და მისი ქალიშვილები ქეთევანი და ანა. ასევე ამ წიგნში შეგხვდებათ, თუ რას წერდნენ ერთმანეთს და ერთმანეთის შესახებ მიხეილ და ქეთევან ჯავახიშვილები, პაოლო და მედეა იაშვილები, კონსტანტინე და ზვიად გამსახურდიები.

ღონისძიებას ზვიად კვარაცხელია და დავით გორგილაძე გაუძღვებიან.

ხვალ, 20 ივნისს, ოზურგეთში, კაფეში „8+1“, საბავშვო წიგნის „ლუნა და ციცინათელების პლანეტა“ პრეზენტაცია გაიმართება.

წიგნის ავტორი დავით გორგილაძეა. წიგნი ერთი ჩვეულებრივი ოჯახის თავგადასავლებზე მოგვითხრობს, რომლის გარშემოც ჯადოსნური ამბები ხდება, დედა და მამა თანაბრად ინაწილებენ შვილების აღზრდის პასუხისმგებლობასა და საოჯახო საქმეებს. უახლოეს ადამიანებზე ყოველდღიური ზრუნვა და საერთო გამოწვევების გააზრება ამ ოჯახის ბედნიერებისა და ჰარმონიის საფუძველია.

ღონისძიებას წიგნის ავტორები, მწერალი დათო გორგილაძე და ილუსტრატორი თათია ნადარეიშვილი გაუძღვებიან.

მამის დღე არის დღესასწაული, რომელიც ბევრ ქვეყანაში მამობის აღსანიშნავად და მამების პატივსაცემად ყოველწლიურად აღინიშნება. ის, როგორც წესი, ივნისის მესამე კვირა დღეს იმართება. დღესასწაული პირველად აშშ-ში 1910 წლის 19 ივნისს აღინიშნა.

გაეროს მოსახლეობის ფონდის (UNFPA) საქართველოს ოფისისა და არასამთავრობო ორგანიზაცია We Care-ის ინიციატივით საქართველოში 2016 წელს დაიწყო კამპანია „კაცები ზრუნავენ“ გაეროს ერთობლივი პროგრამის „გენდერული თანასწორობისთვის" ფარგლებში და შვედეთის მთავრობის ფინანსური მხარდაჭერით.

13
„რიონის ხეობის მცველების“ საპროტესტო აქცია

ეკონომიკის სამინისტრო: სოფელ ნამოხვანში პროტესტი ვერ გაგრძელდება

23
(განახლებულია 13:10 19.06.2021)
ონლაინ-შეხვედრაზე განიხილებოდა სამი ძირითადი საკითხი - შემდგომი დეესკალაცია, ტექნიკური და სამშენებლო ზედამხედველობის სააგენტოს მიერ „ნამახვანჰესის“ პროექტის ინსპექტირების შესახებ ინფორმაციის მიწოდება და დაკავებულების საკითხი

თბილისი, 19 ივნისი — Sputnik. რიონის ხეობაში „ნამახვანჰესის" მშენებლობის პროექტთან დაკავშირებით მედიაციის მეორე შეხვედრა იყო ძალიან პოზიტიური, რიონის ხეობაში დეესკალაციის პროცესი გრძელდება, განაცხადა ეკონომიკისა და მდგრადი განვითარების მინისტრის მოადგილემ, დავით თვალაბეიშვილმა.

გასულ შაბათ-კვირას მოძრაობა „რიონის ხეობის მცველების" ლიდერებმა საქართველოს სოფლის მეურნეობისა და ეკონომიკის მინისტრების მოადგილეებთან მოლაპარაკებები გამართეს ევროპელი მედიატორის – ევროკავშირის სამდივნოს ენერგეტიკული გაერთიანების დირექტორის მოადგილის და მოლაპარაკებებისა და დავების მოგვარების ცენტრის თავმჯდომარის დირკ ბუშლეს მონაწილეობით. ცხრასაათიანი შეხვედრის შედეგად მხარეებმა შეძლეს გარკვეული შეთანხმების მიღწევა.

17 ივნისს შინაგან საქმეთა სამინისტრომ სოფელ გუმათთან უსაფრთხოების მიზნით მოწყობილი რკინის ჯებირების დემონტაჟი დაიწყო, მაგრამ ადგილზე პოლიციის ძალები კვლავ რჩებიან და აქციის მონაწილეებს ხეობაში შესვლის შესაძლებლობა კვლავ არ ეძლევათ. 

ეკონომიკის სამინისტროს ინფორმაციით, შეხვედრა, რომელიც ონლაინფორმატში 18 ივნისს გაიმართა, რამდენიმე საათს გაგრძელდა. მისი მსვლელობისას ის საკითხები განიხილეს, რომელთა მოგვარებაზეც მხარეები ევროკავშირის ენერგეტიკული გაერთიანების მონაწილეობით ერთი კვირის წინ, მედიაციის პირველ შეკრებაზე შეთანხმდნენ.

დავით თვალაბეიშვილმა დაასახელა სამი ძირითადი მიმართულება, რომლის შესახებ შეხვედრაზე გამახვილდა ყურადღება.

„პირველი იყო დეესკალაციის თემა, რომელიც ყველაზე მწვავეა. როგორც მოგეხსენებათ, მთავრობამ მიიღო გადაწყვეტილება და რკინის კედელი იქნა გუმათიდან დემონტირებული. გაიხსნა გზა, თუმცა იმისთვის, რომ პროტესტის მონაწილეებმა შეძლონ ხეობაში შესვლა, გვჭირდება კიდევ დამატებითი სამუშაოები. ის ადგილი, სადაც ისინი ადრე იყვნენ დაბანაკებული, კერძო ტერიტორიაა და პროტესტი იქ ვერ გაგრძელდება“, – განაცხადა მინისტრის მოადგილემ.

„ნამახვანჰესის“ მოწინააღმდეგების თქმით, სანამ ხეობაში გადაადგილებას და პროტესტის ძველ ლოკაციას - სოფელ ნამოხვანში დაბრუნებას ვერ შეძლებენ, მედიაციის პროცესზე ვერ გადავლენ.

რაც შეეხება მეორე საკითხს, დავით თვალაბეიშვილის განცხადებით, საუბარია ტექნიკური და სამშენებლო ზედამხედველობის სააგენტოს მიერ „ნამახვანჰესის“ პროექტის ინსპექტირების შესახებ ინფორმაციის მიწოდებაზე როგორც ევროკავშირისთვის, ასევე მეორე მხარისთვის.

„სამშენებლო ზედამხედველობის სააგენტომ მოგვაწოდა ამომწურავი ინფორმაცია ამ საკითხზე. თუ არსებობს რამე კითხვები, შევთანხმდით, რომ ამ კითხვებს მივიღებთ წერილობითი ფორმით და შემდეგ გაეცემა პასუხები“, – განაცხადა თვალაბეიშვილმა.

მინისტრის მოადგილის ინფორმაციით, მესამე საკითხი დაკავებულ აქტივისტებს შეეხებოდა.

„აღნიშნულ საკითხზე პროკურატურამ განცხადება უკვე გააკეთა. მედიაციის შეხვედრისას დამატებითი ინფორმაციის წარმოდგენის საკითხი დაისვა. ჩვენ შევისწავლით, რა სახის დამატებითი ინფორმაციაა საჭირო და ამასაც მომავალ კვირაში მივაწვდით მეორე მხარეს“,  – განაცხადა თვალაბეიშვილმა.

იმერეთის რეგიონში „ნამახვანჰესის" კასკადის მშენებლობის მოწინააღმდეგეთა პროტესტი უკვე შვიდ თვეზე მეტია გრძელდება. მთავრობა იძულებული გახდა დათმობებზე წასულიყო და რიონზე ჰიდროელექტროსადგურის კაშხლის მშენებლობაზე 9-დან 12 თვემდე ვადით მორატორიუმი გამოაცხადა.

საქართველოს მთავრობამ „ნამახვანჰესის" პროექტის შემუშავების, მშენებლობის, მფლობელობისა და მისი კასკადის ექსპლუატაციის უფლება 2019 წელს ნორვეგიულ კომპანია Clean Energy Group-ს გადასცა, რომელმაც, თავის მხრივ, მშენებარე კომპანიად თურქული Enka მოიწვია. საინჟინრო ნაგებობა ერთბაშად ორი მუნიციპალიტეტის – ცაგერისა და წყალტუბოს ტერიტორიებს დაიკავებს.

„ნამახვანჰესი" კასკადი ორი ჰესისგან შედგება: ერთი კაშხლის ფართობია 1 კვადრატული კილომეტრი, მეორე კაშხლის ფართობი - 5,1 კვადრატული კილომეტრი. „ნამახვანჰესის" კასკადმა მდინარე რიონზე უნდა დააკავშიროს ორი ჰიდროელექტროსადგური – 333 მგვტ სიმძლავრის „ქვემო ნამახვანი" და 100 მგვტ სიმძლავრის „ზემო ნამახვანი". ამავე დროს, კაშხლისა და რაბის დახმარებით მოხდება წყლის დონის რეგულირება, რათა ხეობა არ დაიტბოროს.

პროექტის განხორციელებამ საქართველოს ყოველწლიურად მოხმარებული ელექტროენერგიის 15% უნდა მოუტანოს. კასკადის მშენებლობაში 830 მლნ დოლარის ინვესტიცია განხორციელდება.

 

23