პოლიცია

დმანისში ვითარებას შსს აკონტროლებს

66
(განახლებულია 20:42 17.05.2021)
ამ დროისათვის აქციის მონაწილეები პოლიციის შენობასთან არიან შეკრებილი და არეულობის დროს დაკავებულთა გათავისუფლებას მოითხოვენ.

თბილისი, 17 მაისი — Sputnik. სიტუაცია დმანისში, სადაც ადგილობრივ მოსახლეობას შორის მასობრივი ჩხუბი მოხდა, შედარებით დამშვიდდა.

დმანისის მცხოვრებლებმა ცხრა აპრილის ქუჩიდან პოლიციის შენობისკენ გადაინაცვლეს, სადაც, მათი განცხადებით, არეულობის დროს დაკავებულები იმყოფებიან. 

დმანისში ადგილობრივი ახალგაზრდების ორ ჯგუფს შორის კონფლიქტი გუშინ დაიწყო. არსებული ინფორმაციით, სასურსათო მაღაზიის გამყიდველმა რამდენიმე ახალგაზრდას ლუდის ნისიად მიცემაზე უარი უთხრა. ქალის თქმით, ახალგაზრდებმა მას შეურაცხყოფა მიაყენეს, მამამისი კი სცემეს.

საინფორმაციო საშუალებების ცნობით, კონფლიქტი ეთნიკურ აზერბაიჯანელებსა და სვანეთიდან ეკომიგრანტებს შორის კვირას მოხდა, ხოლო ამ დილით ახალი ძალით განახლდა.

შსს დმანისში შეკრებილ მოქალაქეებს მოუწოდებს, შეწყვიტონ დაპირისპირება და დაემორჩილონ სამართალდამცველი ორგანოების მოთხოვნებს.

დმანისში შექმნილ სიტუაციასთან დაკავშირებით კომენტარი პოლიტიკოსებმაც გააკეთეს.

ოპოზიციური პარტია „სტრატეგია აღმაშენებლის“ ლიდერი გიორგი ვაშაძე პოლიციას მოუწოდებს, ვითარების განსამუხტად დროულად მიიღოს შესაბამისი ზომები.

„შესაბამისმა უწყებამ დროულად უნდა მიიღოს ზომები კონფლიქტის მშვიდობიანი გზით მოგვარებისთვის. საკუთარი მოსახლეობისადმი ასეთი გულგრილი დამოკიდებულება დაუშვებელია. მე ასევე მოვუწოდებ დაპირისპირებულ მხარეებს, შეინარჩუნონ სიმშვიდე, რათა ხელი არ შეუწყონ კონფლიქტის ეთნიკურ დაპირისპირებაში გადაზრდას“, – განაცხადა ვაშაძემ. 

პარლამენტის საპროცედურო საკითხთა კომიტეტის თავმჯდომარის ირაკლი ქადაგიშვილის თქმით, კანონი კონფლიქტის ყველა მონაწილის მიმართ მკაცრად უნდა მოქმედებდეს განურჩევლად ეთნიკური ნიშნისა, რადგან ყველა მათგანი საქართველოს მოქალაქეა.

„მთავრობა დაინტერესებულია ამ კონფლიქტის აღმოფხვრით. ყოფითი კონფლიქტი გუშინ ბანალური მიზეზის გამო დაიწყო და მისი ეროვნული და ეთნიკური ნიშნით შემოსვა მიუღებელია ჩვენი ქვეყნის შიდა პოლიტიკური ვითარების გათვალისწინებით, ასევე რეგიონში არსებული მდგომარეობიდან გამომდინარე. თუ ვინმე დაინტერესებულია კონფლიქტის გაღვივებით, ეს არის ცალსახა მტრობა ქვეყნის მიმართ. წინასწარ ვერ ვიტყვი, კონფლიქტი პროვოცირებული იყო თუ სპონტანური“, – განაცხადა ქადაგიშვილმა.

ქვემო ქართლის რეგიონის პოლიციის უფროსის ლაშა გოგნიაშვილის განმარტებით, ყველაფერი გაკეთდა იმისთვის, რომ ახალ დაპირისპირებებს ადგილი არ ჰქონოდა.

„შინაგან საქმეთა სამინისტროს თითოეული დანაყოფის თანამშრომელი ყველანაირად შეეცადა, რომ შეხლა-შემოხლა არ მომხდარიყო. მაქსიმალურად განვაიარაღეთ ყველა“, – განაცხადა გოგნიაშვილმა.

ადგილზე იმყოფება ქვემო ქართლის გუბერნატორი შოთა რეხვიაშვილიც, რომელიც დაძაბული ვითარების განმუხტვას და ხალხის დამშვიდებას ცდილობს.

66
ნინოწმინდის პანსიონი

დაიხურება თუ არა ნინოწმინდის პანსიონი - რა გადაწყდა საპატრიარქოში გამართულ შეხვედრაზე

40
(განახლებულია 20:13 13.06.2021)
ნინოწმინდის პანსიონში ამ ეტაპზე 23 ბავშვი რჩება, მათთან სოციალური მუშაკები მუშაობენ, პარალელურად მიმდინარეობს ამ ბავშვებისთვის ოჯახების მოძიებაც.

თბილისი, 13 ივნისი — Sputnik. ნინოწმინდის პანსიონში არსებულ ვითარებაზე დღეს საქართველოს საპატრიარქოში იმსჯელეს, განაცხადა საქართველოს საპატრიარქოს საზოგადოებასთან ურთიერთობის სამსახურის ხელმძღვანელმა, ანდრია ჯაღმაიძემ შეხვედრის დასრულების შემდეგ.

 

წმინდა ნინოს სახელობის ობოლ, უპატრონო და მზრუნველობამოკლებულ ბავშვთა პანსიონი, რომელიც საპატრიარქოს პატრონაჟის ქვეშაა, ფართო საზოგადოებისა და სახელმწიფო სტრუქტურების ყურადღების ცენტრში სახალხო დამცველის განცხადების შემდეგ მოექცა. როგორც გასულ კვირაში ნინო ლომჯარიამ სპეციალურ ბრიფინგზე აღნიშნა, პანსიონში ბავშვებზე ფსიქოლოგიური და ფიზიკური ზეწოლა ხორციელდება, ხოლო დაწესებულების ტერიტორიაზე მის წარმომადგენლებს შესვლის უფლებას არ აძლევენ. აღნიშნული განცხადების საფუძველზე საქართველოს შსს-მ გამოძიება დაიწყო.

საპატრიარქოს მიერ ინიცირებულ შეხვედრას სენაკისა და ჩხოროწყუს მიტროპოლიტი შიო (მუჯირი), ბოდბელი მთავარეპისკოპოსი იაკობი (იაკობიშვილი) სასულიერო პირებთან და საპატრიარქოს შესაბამის თანამშრომლებთან  ერთად ესწრებოდნენ საქართველოში ევროკავშირის ელჩი, საქართველოს ჯანდაცვის მინისტრის მოადგილე, ასევე საქართველოში გაეროს ბავშთა ფონდისა (UNICEF) და არასამთავრობო ორგანიზაცია World Vision-ის წარმომადგენლები.

შეხვედრაზე ითქვა, რომ ნინოწმინდის ბავშვთა პანსიონი დროთა განმავლობაში გადავა და მოერგება მსოფლიოშო არსებულ საერთაშორისო სტანდარტებს.

„ვისაუბრეთ ბოლო დროს შექმნილ სირთულეებზე, რაც ნინოწმინდის მზრუნველობამოკლებულ ბავშვთა სახლთან იყო დაკავშირებული და არამხოლოდ ამ ბავშვთა სახლთან დაკავშირებით, არამედ ზოგადად პრინციპზე, რომელიც გულისხმობს, რომ თანამედროვე სტანდარტები უნდა იქნას გათვალისწინებული. მივაღწიეთ ერთსულოვნებას იმასთან დაკავშირებით, რომ ბავშვთა საუკეთესო ინტერესებიდან გამომდინარე უნდა იქნას ყველა საკითხი გადაწყვეტილი“, - განაცხადა ანდრია ჯაღმაიძემ.

კითხვაზე, დაიხურება თუ არა ნინოწმინდის ბავშვთა პანსიონი, ანდრია ჯაღმაიძემ აღნიშნა, რომ პანსიონის დახურვაზე კი არ არის საუბარი, არამედ დაწესებულების თანამედროვე სტანდარტებთან შესაბამისობაში მოყვანაზე.

საქართველოს ჯანდაცვის მინისტრის მოადგილის თამარ ბარკალაიას განცხადებით, ამ ეტაპზე ნინოწმინდის პანსიონში მცხოვრებ ბავშვებთან სოციალური მუშაკები მუშაობენ. პარალელურად მიმდინარეობს მუშაობა მათთვის ოჯახების მოსაძიებლად.

„ამ ეტაპზე 23 ბავშვია ნინოწმინდაში, დიდი უმრავლესობა გაყვანილია ოჯახებში, მაგრამ ასევე არიან ალტერნატიული ზრუნვის სერვისებშიც. ეს არ უნდა გაგრძელდეს ხანგრძლივად, კანონმდებლობით 2022 წლის პირველი აპრილიდან ძალაში შედის ლიცენზირების შესახებ კანონის ის პუნქტები, რომელიც დიდი ზომის ინსტიტუციების დახურვას მოიაზრებს და ალტერნატიული ზრუნვის სერვისების მიწოდებას გულისხმობს. გამოდის, რომ პანსიონის საჭიროება აღარ იქნება“, - განაცხადა ჯანდაცვის მინისტრის მოადგილემ.

მისი თქმით, შემდგომი მუშაობა იქნება მიმართული ბავშვების ოჯახში დაბრუნების და ინტეგრაციის წახალისებაზე.

„შევთანხმდით, რომ დიდი ინსტიტუცია აღარ არის ქვეყნისთვის პრიორიტეტი და არ შეიძლება დიდი ინსტიტუცია იყოს წახალისებული. შესაბამისად, ჩვენ ერთად ასეთივე ფორმატით გავაგრძელებთ თანამშრომლობას, როგორც ნინოწმინდაში, ასევე სხვაგან, რომ დიდი ზომის ინსტიტუციებში ბავშვების შეფასება, მათი საუკეთესო ინტერესის გამოვლენა, მათი ოჯახში დაბრუნება და ინტეგრაცია იყოს წახალისებული, მათ შორის ნინოწმინდაშიც“, - განაცხადა ბარკალაიამ.

გუშინ კი პროკურატურამ ბრალი წაუდგინა მამაკაცს, რომელიც თავის დისშვილს, ნინოწმინდის პანსიონის აღსაზრდელს, შსს-ში არაადამიანური მოპყრობის საქმის ფარგლებში გამოკითხვის შემდეგ მოკვლით ემუქრებოდა.

თბილისის საქალაქო სასამართლომ 5 ივნისს ნაწილობრივ დააკმაყოფილა არასამთავრობო ორგანიზაციის „პარტნიორობა ადამიანის უფლებებისთვის“ (PHR) შუამდგომლობა და შესაბამის სახელმწიფო უწყებებს დაავალა შშმ სტატუსის მქონე ბავშვების პანსიონიდან დაუყოვნებლივ გაყვანის პროცესის დაწყება.

ბოლო მონაცემებით, სახელმწიფო ზრუნვისა და ტრეფიკინგის მსხვერპლთა, დაზარალებულთა დახმარების სააგენტომ პანსიონიდან 25 არასრულწლოვანი, მათ შორის შშმ პირები გაიყვანა.

40
პოლიცია იცავს ჰესის სამშენებლო მოედანს

პროტესტი ნამახვანჰესის მშენებლობის წინააღმდეგ: მედიატორმა შემაჯამებელი დოკუმენტი შეადგინა

27
(განახლებულია 21:49 13.06.2021)
ერთ-ერთ პირობაში მკაფიოდ არის ნათქვამი, რომ „რიონის ხეობის მცველებმა“ შემდგომი პროტესტი სამშენებლო მოედანზე შესასვლელის დაბლოკვის გარეშე უნდა გააგრძელონ, ხოლო პოლიციის ძალები რიონის ხეობას დატოვებენ.

თბილისი, 13 ივნისი – Sputnik. „ნამახვანჰესის“ მშენებლობის მოწინააღმდეგეებთან გამართული შეხვედრის შემდეგ ევროკავშირის ენერგეტიკული გაერთიანების დავების გადაწყვეტის ცენტრის ხელმძღვანელმა დირკ ბუშლემ, რომელიც შეხვედრის მედიატორი იყო, მოლაპარაკების მხარეებს შემაჯამებელი დოკუმენტი გაუგზავნა.

დოკუმენტის ნათარგმნი ვერსია ქართულ მედიასაშუალებებში გავრცელდა.

შეხვედრა, რომელსაც მედიატორების გარდა, „ნამახვანჰესის“ მშენებლობის მოწინააღმდეგე აქტივისტები და გარემოს დაცვის და ეკონომიკის სამინისტროს წარმომადგენლები ესწრებოდნენ, ნატახტარში გუშინ ცხრა საათს გაგრძელდა.

პროექტთან დაკავშირებით:

–  ეკონომიკისა და მდგრადი განვითარების სამინისტრო გაასაჯაროებს ინსპექტირების ანგარიშს მშენებლობის ნებართვის შესაბამისობასთან დაკავშირებით (2 კვირა);

–  გარემოს დაცვისა და სოფლის მეურნეობის სამინისტრო ჩაატარებს მოკვლევას გარემოსდაცვით ნებართვის შესაბამისობასთან დაკავშირებით და გაასაჯაროებს (ორი კვირა );

–  ენერგეტიკული გაერთიანების სამდივნო მოამზადებს და დაუგზავნის ყველას ტექნიკურ პირობებს გარემოზე ზემოქმედების შეფასების დამოუკიდებელი განხილვისთვის (პარასკევი);

– მწვანე ალტერნატივა მოამზადებს და დაუგზავნის ყველას ტექნიკურ პირობებს კონტრაქტის კომერციული პირობების დამოუკიდებელი განხილვისთვის (პარასკევი);

სიტუაცია რიონის ხეობაში:

– რიონის მცველები გააგრძელებენ მშვიდობიან პროტესტს სამშენებლო მოედანზე შესასვლელის დაბლოკვის გარეშე;

– პროკურორი განიხილავს და გამოაქვეყნებს დასკვნას დაკავების შემთხვევებზე;

–  პოლიცია აიღებს არსებულ ბარიერს და უზრუნველყოფს მთავარ გზაზე დაშვებას (პარასკევს);

–  პოლიცია ორგანიზებას გაუწევს და თან გაჰყვება რიონის ხეობის მცველებს სამშენებლო მოედანის მონახულებისას და დაუშვებს დოკუმენტაციას (პარასკევს);

ეროვნული ენერგეტიკული პოლიტიკა:

– ეკონომიკისა და მდგრადი განვითარების სამინისტრო შეიმუშავებს და დაუგზავნის ყველას საქართველოს ეროვნული ენერგეტიკისა და კლიმატის გეგმის თავს ენერგეტიკულ უსაფრთხოებაზე, (ივლისი).

„ნამახვანჰესის“ მშენებლობის წინააღმდეგ პროტესტი შვიდ თვეზე მეტია გრძელდება. მიუხედავად იმისა, რომ პროექტი ქვეყნის ენერგოდამოუკიდებლობისთვის მნიშვნელოვანია, მის წინააღმდეგ პროტესტი სულ უფრო მძაფრდება. პროტესტს ორი მიზეზი აქვს: ერთი - ესაა საფრთხე, რომელიც მომავალი კაშხლის შესაძლო გარღვევამ შეიძლება შეუქმნას მთელ იმერეთის რეგიონს, მეორე - საქართველოში თურქული კომპანია Enka-სთვის დიდი რაოდენობით მიწების 99 წლის ვადით გადაცემაა.

 

27

საშინელი ავარია თბილისში: სატვირთო მსუბუქ ავტომობილებს შეეჯახა - ვიდეო

0
თბილისში კლინიკა „ნიუ ჰოსპიტალსთან“ სატვირთო ავტომობილი რამდენიმე მსუბუქ ავტომობილს დაეჯახა და კლინიკის ეზოში გადავარდა. იხილეთ ვიდეოკადრები ტრაგედიის ადგილიდან

გავრცელებული ინფორმაციით, მძღოლმა საჭე ვერ დაიმორჩილა და გზის საპირისპირო მხარეს გადავიდა, რა დროსაც შეეჯახა კიდეც სხვა მსუბუქ ავტომობილებს.

შემთხვევის შედეგად ერთი ადამიანი ადგილზევე დაიღუპა, ხოლო რვა დაშავდა. მოგვიანებით კიდევ ერთი ადამიანი კლინიკაში გარდაიცვალა.

მომხდარზე გამოძიება სსკ-ის 276-ე მუხლით მიმდინარეობს, რაც ტრანსპორტის მოძრაობის უსაფრთხოების ან ექსპლუატაციის წესის დარღვევას გულისხმობს სასიკვდილო შედეგით.

0