ჩინური ვაქცინა Sinopharm

Sinopharm-ით 18 წელს ზემოთ მოქალაქეები აიცრებიან

50
(განახლებულია 16:23 27.04.2021)
სხვადასხვა მნიშვნელოვანი კვლევების საფუძველზე დადასტურებულია, რომ 18-დან 60 წლამდე მოქალაქეებისთვის ჩინური პრეპარატით ვაქცინაცია უსაფრთხოა, აღნიშნა ჯანდაცვის მინისტრმა.

თბილისი, 27 აპრილი - Sputnik. Sinopharm-ის პრეპარატით ვაქცინაცია 18 წელს ზემოთ მოქალაქეებს ჩაუტარდებათ, განაცხადა ჯანდაცვის მინისტრმა ეკატერინე ტიკარაძემ იმუნიზაციის ექსპერტთა საბჭოს დასრულების შემდეგ გამართულ ბრიფინგზე.

ვის აცრიან ჩინური ვაქცინით – გამყრელიძემ ჯგუფები დაასახელა>>

საქართველომ უკვე მიიღო ჩინური ვაქცინის ასი ათასი დოზა, რომელზეც რეგისტრაცია დღეიდან იწყება. Sinopharm–ის პრეპარატით აცრა უკვე 4 მაისიდან იქნება შესაძლებელი. ამ ვაქცინით მსოფლიოში 150 მლნ ადამიანია აცრილი. უახლოეს პერიოდში ქვეყანა მიიღებს მეორე ჩინურ ვაქცინას Sinovac (100 ათასი დოზა) და ივნის–ივლისში – Sinopharm–ის დამატებით დოზას (ნახევარი მლნ დოზა).

მინისტრის განმარტებით, 18-დან 60 წლამდე მოქალაქეებისთვის ჩინური ვაქცინით აცრა უსაფრთხოა და ამას არაერთი მნიშვნელოვანი კვლევა ადასტურებს. მისივე ინფორმაციით, უკვე გადამზადებულია 100-ზე მეტი ჯგუფი, რომელიც საქართველოში მოქალაქეთა უსაფრთხო ვაქცინაციას უზრუნველყოფს.

„მნიშვნელოვნად შემდეგი კვირიდან გაფართოვდება ქსელი, სადაც მოხდება ჩვენი მოქალაქეების ვაქცინაცია, კერძოდ, 78 ცენტრი დაემატება. საერთო ჯამში, საქართველოში ამ ეტაპისთვის გაშლილი იქნება 138 ცენტრი, სადაც ვაქცინაციის პროცესი გაიმართება”, - აღნიშნა ტიკარაძემ.

მინისტრმა ასევე ისაუბრა მასობრივ ვაქცინაციაზეც და აღნიშნა, რომ ამ პროცესზე მსჯელობა უკვე მიმდინარეობს და გადაწყვეტილებას უახლოეს მომავალში მიიღებენ. ამასთან, კლინიკურ ჯგუფთან ერთად სხდომა გაიმართება, სადაც გაირკვევა, დაიწევს თუ არა ასაკობრივი ზღვარი AstraZeneca-ს ვაქცინასთან დაკავშირებით, რომლის გამოყენებაც საქართველოში მხოლოდ 55 წელს ზემოთ პირებისთვის არის ნებადართული.

საქართველოში მოსახლეობის ვაქცინაცია 15 მარტს მედპერსონალით დაიწყო. დაბალი მიმართვიანობის გამო კორონავირუსის საწინააღმდეგო ვაქცინაციის პროცესში შემდეგ სხვა ასაკობრივი ჯგუფებიც დაემატნენ, მათ შორის 55 წელს ზემოთ მოქალაქეები, პოლიციელები, სამხედრო მოსამსახურეები, ასევე დიალიზზე მყოფი და ორგანოგადანერგილი პაციენტები.

საქართველოს ჯანდაცვის სამინისტრომ ვაქცინაციაზე წინასწარი რეგისტრაციის პორტალი https://www.moh.gov.ge/covid-chart/register/welcome
აამუშავა. აქ შესაძლებელია რეგისტრაციის გავლა და სასურველი ვაქცინის არჩევა.

27 აპრილის მონაცემებით, ქვეყანაში ჯამში აცრილია 40.095 ადამიანი.

50
თემები:
კორონავირუსი საქართველოში: ბოლო ცნობები (630)
საპატრულო პოლიცია ავტობანზე

უკვე მეხუთე დღე: ავტობანის მშენებლობაზე დასაქმებულების გაფიცვა გრძელდება

15
(განახლებულია 18:54 08.05.2021)
როგორც აქციის მონაწილეები აცხადებენ, ეკონომიკური კრიზისის, ლარის გაუფასურებისა და პროდუქტების გაძვირების პირობებში ოჯახების ელემენტარული რჩენისთვის ხელფასები არ ჰყოფნით

თბილისი, 8 მაისი – Sputnik. აღმოსავლეთი–დასავლეთის ავტომაგისტრალის ხევი–უბისას მონაკვეთზე დასაქმებული მუშები უკვე მეხუთე დღეა, არ მუშაობენ. ისინი ხელფასების მომატებას ითხოვენ, იუწყება პირველი არხი.

400–მდე მუშის გაფიცვა ხარაგაულის რაიონის სოფელ ბორითთან მიმდინარეობს, სადაც გზის მონაკვეთის მესამე სატრანსპორტო კვანძია.

„კომუნიკაციაც არა გვაქვს, ვერ გვაგებინებენ, ვერ ვაგებინებთ, თარჯიმანი არის, მაგრამ ოფისშია, ობიექტებზე არ არის. რამე რომ დაგავალოს უფროსმა, ვერ გაიგებ. ძალიან გვიჭირს ასე. დაბალი ხელფასები გვაქვს და გაზრდას მოვითხოვთ“, – განაცხადა აქციის ერთ–ერთმა მონაწილე ბექა ციკორიშვილმა.

აქციის მეორე მონაწილე სერგო გელაშვილმა კი განაცხადა, რომ მათი მთავარი მოთხოვნა არის უცვლელი – დღიური ხელფასის 30%–ით გაზრდა და შრომითი უსაფრთხოების დაცვა, რაც გამოიხატება იმაში, რომ არც გვირაბებში, არც ხიდებზე არანაირი უსაფრთხოების წესები დაცული არ არის.

რიკოთის საუღელტეხილო გზის ხევი–უბისას მონაკვეთის მშენებლობას ჩინური კომპანია Hunan Road and Bridge Construction Group ახორციელებს. 

რიკოთის უღელტეხილზე გზის მშენებლობა გრძელდება>>

რიკოთის საუღელტეხილო გზაზე, რომელიც აღმოსავლეთი–დასავლეთის ჩქაროსნული ავტომაგისტრალის ნაწილს წარმოადგენს, ხიდებისა და გვირაბების მშენებლობა ინტენსიურად მიმდინარეობს. პროექტი ხევი–უბისას 12,2 კმ-იან მონაკვეთზე ოთხზოლიანი გზის მშენებლობას ითვალისწინებს. აღნიშნულ მონაკვეთზე 35 ახალი ხიდისა (18 ხიდი თბილისი–არგვეთას მიმართულებით, ხოლო, 17 – არგვეთა–თბილისის მიმართულებით) და 18 გვირაბის მშენებლობა იგეგმება.

15
ყურანი

მუსლიმ სამხედროებს მინიატურული წმინდა წიგნი გადაეცათ

17
(განახლებულია 17:29 08.05.2021)
ყურანი საქართველოს თავდაცვის სამინისტროს ინიციატივით დაიბეჭდა და თავდაცვის ძალების ყველა სამხედრო ქვედანაყოფში გადანაწილდა.

თბილისი, 8 მაისი — Sputnik. თავდაცვის ძალების მუსლიმ სამხედრო მოსამსახურეებს ყურანის მინიატურული წიგნები დაურიგდათ. იუწყება თავდაცვის სამინისტრო.

ყურანი საქართველოს თავდაცვის სამინისტროს ინიციატივით დაიბეჭდა და თავდაცვის ძალების ყველა სამხედრო ქვედანაყოფში გადანაწილდა.

სენაკში, დასავლეთ სარდლობის მეორე ქვეითი ბრიგადის სამხედრო ბაზაზე ჯარისკაცებისთვის ყურანის გადაცემის ღონისძიებას თავდაცვის ძალების დასავლეთის სარდალი ბრიგადის გენერალი კობა გრიგოლია და საქართველოს მუფთი ადამ შანთაძე დაესწრნენ.

ყურანის გადაცემის შემდეგ მუფთმა სამხედრო მოსამსახურეები დალოცა, მოახლოებული რამადან ბაირამი მიულოცა და წარმატებები უსურვა.

მინიატურული ყურანი საველე პირობებზეა მორგებული, კომპაქტური და დრეკადია. მისი ყდა კომუფლირებულია.

სამინისტროს ინიციატივით, თავდაცვის ძალების მართლმადიდებელ ქრისტიან სამხედრო მოსამსახურეებს გიორგობის დღესასწაულზე უკვე გადაეცათ მინიატურული წმინდა წიგნები „ახალი აღთქმა“. 603-გვერდიან წმინდა წიგნს ქართული ჯარის შესახებ საქართველოს პატრიარქის სიტყვა უძღვის.

ახალი აღთქმის, 4 სახარების, ეპისტოლეებისა და ფსალმუნების გარდა, წმინდა წიგნი მოიცავს სამხედრო ფიცს, საქართველოს სახელმწიფო ჰიმნს, საუფლო ლოცვას - 10 მცნება, მრწამსს, 9 ნეტარებას, ასევე ქართველი მეფეების - ვახტანგ გორგასლისა და დავით აღმაშენებლის მიმართვებს ქართული ლაშქარისადმი.

17
თემები:
საქართველოს თავდაცვა
ნიკა მელია

როდის შეძლებს ნიკა მელია ციხის დატოვებას

0
(განახლებულია 19:26 08.05.2021)
„ერთიანი ნაციონალური მოძრაობის“ ლიდერის წინასწარი პატიმრობიდან გასათავისუფლებლად ევროკავშირის მიერ გადაცემული გირაოს თანხა ახალგაზრდა იურისტთა ასოციაციამ  თბილისის საააღსრულებლო ბიუროს ანგარიშზე უკვე ჩარიცხა.

თბილისი, 8 მაისი — Sputnik. პროკურატურის მიერ სასამართლოსთვის მიმართვის შემთხვევაში  ოპოზიციური პარტია „ერთიანი ნაციონალური მოძრაობის“ ლიდერს ნიკა მელიას სასჯელაღსრულების დაწესებულების დატოვება დღესვე შეუძლია, განაცხადა საქართველოს ახალგაზრდა იურისტთა ასოციაციის ხელმძღვანელმა ნიკა სიმონიშვილმა.

ოპოზიცირი პარტიის ლიდერი ნიკა მელია 2021 წლის 23 თებერვალს დააკავეს. 17 თებერვალს თბილისის საქალაქო სასამართლომ მას 2019 წლის 20–21 ივნისის საქმესთან დაკავშირებით დაუსწრებლად შეუფარდა პატიმრობა. ეს მას შემდეგ მოხდა, რაც მელიამ უარი განაცხადა გირაოს გადახდაზე, რომელიც მას აღკვეთის ალტერნატიულ ღონისძიებად შეეფარდა. მანამდე, პროკურატურის მოთხოვნით, პარლამენტმა მელიას სადეპუტატო იმუნიტეტი მოუხსნა, თუმცა ის კვლავ არის პარლამენტის წევრი.

ნიკა მელიას წინასწარი პატიმრობიდან გასათავისუფლებლად საჭირო გირაოს თანხა 40 000 ლარის ოდენობით  ევროკავშირმა გადაიხადა.

ევროპულმა ფონდმა  დემოკრატიისთვის (European Endowment for Democracy) გირაოს თანხა გამოყო, ხოლო  საქართველოს ახალგაზრდა იურისტთა ასოციაციამ (საია) კი აღნიშნული თანხა ხელისუფლებას გადასცა.

საიამ თბილისის საააღსრულებლო ბიუროს ანგარიშზე თანხა დაახლოებით 15:00 საათზე ჩარიცხა.

ორგანიზაციის ხელმძღვანელის განცხადებით, შესაძლოა, ეს თანხა ჯერ არ იყოს ანგარიშზე ასახული, მაგრამ არცაა აუცილებელი ანგარიშზე თანხის ასახვა.

„დადასტურებულია ევროკავშირის მხრიდანაც და ჩვენ მიერაც, რომ თანხა უკვე გაგზავნილია და გადარიცხულია. ამ პირობებში არსებობს იმის შესაძლებლობა, რომ პროკურატურა შუამდგომლობით წავიდეს სასამართლოში და სასამართლომ მიიღოს გადაწყვეტილება აღკვეთის ღონისძიების შეცვლასთან დაკავშირებით. შემდეგ, რა თქმა უნდა, ანგარიშზე თანხაც აისახება“, - განაცხადა ნიკა სიმონიშვილმა.

მისივე განცხადებით, საია საქართველოში ევროკავშირის წარმომადგენლობის მითითების მიხედვით მოქმედებდა. თავად ნიკა მელიასთან ორგანიზაციის წარმომადგენლებს ამ საკითზე კომუნიკაცია არ ჰქონიათ.

პროკურატურაში აცხადებენ, რომ როგორც კი თანხის გადარიცხვის ოფიციალური დოკუმენტი ან თანხა აისახება ანგარიშზე, პროკურატურის წინადადება ნიკა მელიასთვის აღკვეთის ღონისძიების შეცვლის თაობაზე ძალაშია.

ევროკავშირის მიერ გირაოს გადახდის საკითხი დღის წესრიგში მას შემდეგ დადგა, რაც საქართველოს მთავრობამ და რამდენიმე ოპოზიციურმა ლიდერმა 19 აპრილს ხელი მოაწერეს დოკუმენტს, რომელიც ევროპული საბჭოს პრეზიდენტ შარლ მიშელმა შესთავაზა.

დოკუმენტის თანახმად, მელიამ ციხე ამნისტიის კანონის საფუძველზე უნდა დატოვოს, ასევე განიხილება მისი გათავისუფლება გირაოს საფუძველზე.

მიუხედავად გათავისუფლებაზე გარანტიისა, „ნაცმოძრაობა“ შეთანხმებაზე ხელმოწერასა და პარლამენტში შესვლაზე უარს აცხადებს იმ დრომდე, ვიდრე მელია არ დატოვებს საპატიმროს.

2019 წლის 20-21 ივნისის „გავრილოვის ღამედ“ წოდებული პროტესტის შემდეგ აღძრული საქმეების ფიგურანტების ამნისტია ევროკავშირის შუამავლობით მხარეების მიერ ხელმოწერილი შეთანხმების ერთ-ერთი პუნქტია.

საქართველოს პარლამენტში „მაისის არდადეგების“ შემდეგ ამნისტიის შესახებ კანონპროექტის ორი ვარიანტი დარეგისტრირდება – ერთი უმრავლესობის, მეორე ოპოზიციის მიერ მომზადებული.

მმართველი პარტიისა და ოპოზიციის მიერ მომზადებული დოკუმენტების ვერსიები განსხვავდება ერთმანეთისგან – მხარეებს თავად ამნისტიის პროცესთან დაკავშირებით განსხვავებული ხედვა აქვთ. ხელისუფლების სურვილია, რომ ამნისტია საქმის ყველა ფიგურანტს შეეხოს, მათ შორის პოლიციელებსაც და იმ შესაძლო პირებსაც, რომლებიც შეიძლება გამოძიებამ მოგვიანებით გამოავლინოს.

ოპოზიცია, პირველ რიგში, ჯგუფური ძალადობის ორგანიზებასა და მასში მონაწილეობისთვის ბრალდებულთა და გასამართლებულთა ამნისტიისა და მათთვის ნასამართლობის მოხსნის წინადადებით გამოდის. ასეთ ბრალდებულთა შორის, რიგითი აქტივისტების გარდა, არის „ერთიანი ნაციონალური მოძრაობის“ თავმჯდომარე ნიკა მელია, რომელიც ამჟამად პატიმრობაშია.

გარდა ამისა, ოპოზიცია 20–21 ივნისის ღამეს სამსახურებრივი უფლებამოსილების გადამეტებაში ამჟამად ბრალდებული პოლიციელების ამნისტიაზეც თანახმაა, მაგრამ ამავდროულად იმ პირთა პასუხისმგებლობისგან გათავისუფლების წინააღმდეგია, რომლებსაც პოლიტიკური თანამდებობები ეკავათ და მონაწილეობდნენ ბრძანებების გაცემაში.

0