თბილისი, 5 მარტი – Sputnik. თურქმენეთის, უზბეკეთის, ტაჯიკეთისა და ყირგიზეთის მოქალაქეები საჰაერო გზით საქართველოში შემოსვლას PCR-ტესტის უარყოფითი პასუხის შემთხვევაში შეძლებენ, იუწყება მთავრობის პრეს-სამსახური.
უწყებათაშორისი საკოორდინაციო საბჭოს გადაწყვეტილებით, ზემოთ აღნიშნული ქვეყნების მოქალაქეებმა საზღვრის კვეთისას ბოლო 72 საათში ჩატარებული PCR-ტესტის უარყოფითი პასუხი უნდა წარმოადგინონ, ჩამოსვლიდან მესამე დღეს კი საკუთარი ხარჯებით განმეორებითი ტესტი ჩაიტარონ.
იმ ქვეყნების ჩამონათვალში, რომელთა მოქალაქეებსაც PCR-ტესტის საფუძველზე საქართველოში შემოსვლის უფლება აქვთ, ასევე შედიან რუსეთი, სომხეთი, აზერბაიჯანი, უკრაინა, ყაზახეთი და ბელარუსი. მანამდე ასეთი უფლება მოიპოვეს ევროკავშირის წევრი ქვეყნების, ასევე შვეიცარის, ნორვეგიის, ისრაელის, აშშ-ის, დიდი ბრიტანეთის, არაბთა გაერთიანებული საამიროების, კატარისა და თურქეთის მოქალაქეებმა და რეზიდენტებმა.
