დავით ზალკალიანი

ზალკალიანი: პროგრამა სტუდენტებს ევროპის ქვეყნებში განათლების მიღების საშუალებას აძლევს

38
(განახლებულია 16:23 17.02.2021)
დავით ზალკალიანის განცხადებით, საქრთველოს მთავრობა აქტიურად თანამშრომლობს ევროკავშირის ქვეყნების უმაღლეს სასწავლებლებთან, რათა ქართველ სტუდენტებს უცხოეთში განათლების მიღების შესაძლებლობა ჰქონდეთ

 

თბილისი, 17 თებერვალი – Sputnik. საქართველოს ვიცე-პრემიერმა, საგარეო საქმეთა მინისტრმა დავით ზალკალიანმა, ევროპის უნივერსიტეტის მიერ ორგანიზებულ ერაზმუს პლიუსისა და ჟან მონეს ონლაინ ზამთრის სკოლის სასწავლო კურსის გახსნის ცერემონაზე მონაწილეებს სიტყვით მიმართა, ნათქვამია საქართველოს საგარეო საქმეთა სამინისტროს მიერ გავრცელებულ განცხადებაში.

ონლაინ ზამთრის სკოლა „ევროპეიზაცია და დემოკრატიზაცია: საქართველო და ევროკავშირის“ გახსნის ღონისძიება „ევროპის უნივერსიტეტში“ დღეს გაიმართა. 

მინისტრმა ისაუბრა საქართველოში ერაზმუს პლიუსის პროგრამის წარმატებაზე და აღნიშნა, რომ პროგრამაში, რომელიც წარმატებულ სტუდენტებს ევროპის სხვადასხვა ქვეყანაში უმაღლესი განათლების მიღების შესაძლებლობას აძლევს, ბოლო ხუთი წლის განმავლობაში საქართველოდან 6,5 ათასზე მეტმა სტუდენტმა მიიღო მონაწილეობა.

„ვფიქრობ, ამ კურსის ერთ-ერთი შედეგი ისიც იქნება, რომ ახალგაზრდებისთვის უფრო ნათელი გახდება, რა მოუტანა საქართველოს ევროპული ინტეგრაციის გზამ, რომელსაც ქვეყანა დაადგა ჩვენი მოქალაქეების დიდი უმრავლესობის მხარდაჭერით... ჩვენი მიზანია კიდევ უფრო პრაქტიკული და მრავალფეროვანი გავხადოთ ჩვენი სტუდენტებისა და მკვლევარების შესაძლებლობები ევროკავშირის უმაღლეს სასწავლებლებში სწავლის, კვლევის და გამოცდილების შეძენის კუთხით,“ – აღნიშნა ზალკალიანმა.

ზამთრის სკოლა „ევროპის უნივერსიტეტის“ ორგანიზებით იმართება, რომელმაც ერასმუს პლიუსის ჟან მონეს პროგრამის ფინანსური მხარდაჭერა მოიპოვა ევროკავშირის საგრანტო კონკურსის ფარგლებში. აღნიშნული მოდული ასევე ითვალისწინებს აკადემიური გუნდის მიერ კვლევის ჩატარებას და კონფერენციის გამართვას.

ზამთრის სკოლის მონაწილეები „ევროპის უნივერსიტეტის“ პროფესორებისგან ინტერაქციულ რეჟიმში მიიღებენ ინფორმაციას საქართველოს ევროპეიზაციისა და დემოკრატიზაციის, ასოცირების ხელშეკრულებით გათვალისწინებული თემატური საკითხების, საქართველოს ევროპული საგარეო და რეგიონული პოლიტიკის, ევროპეიზაციის თანამედროვე გამოწვევების შესახებ.

ზამთრის სკოლის დისკუსიებში ჩაერთვებიან საკანონმდებლო და აღმასრულებელი ხელისუფლების მაღალი ოფიციალური პირები, სამოქალაქო საზოგადოების გამორჩეული ლიდერები და დარგის სპეციალისტები.

ზამთრის სკოლის ყველა მონაწილეს სერტიფიკატი გადაეცემა. გარდა ამისა, ახალგაზრდებს ჟან მონეს მოდულის 2021-2023 წლების სხვა ღონისძიებებში ჩართვისა და დისკუსიებში მონაწილეობის შესაძლებლობა ექნებათ.

38
ადამიანები პირბადეებით ქუჩაში

პირველად საქართველოში დასაქმების ონლაინ ფესტივალი  ტარდება

3
(განახლებულია 12:55 26.02.2021)
ფესტივალი განკუთვნილია ახალგაზრდებისთვის და ყველა დაინტერესებული ადამიანისთვის. ღონისძიების მიზანია დასაქმების ხელშეწყობა და სამსახურის მაძიებლების დამსაქმებლებთან დაკავშირება

თბილისი, 26 თებერვალი – Sputnik. პირველად საქართველოში 1-დან 5 მარტის ჩათვლით, დასაქმების ხელშეწყობის სახელმწიფო სააგენტოს ჩართულობითა და HR hub – ისა და World Vision საქართველოს ორგანიზებით, დასაქმების ონლაინ ფესტივალი – „გაესაუბრე საიდანაც გინდა” ჩატარდება, ნათქვამია უწყების მიერ გავრცელებულ ინფორმაციაში.

სააგენტოს ცნობით, ღონისძიების მიზანია დასაქმების ხელშეწყობა და სამსახურის მაძიებლების დამსაქმებლებთან დაკავშირება.

დასაქმების ფესტივალზე წარმოდგენილი იქნება ოცდაათამდე კომპანია და 200-მდე ვაკანსია როგორც თბილისში, ასევე რეგიონებში. ფესტივალი განკუთვნილია ახალგაზრდებისთვის და ყველა დაინტერესებული ადამიანისთვის.

ფესტივალზე HR მენეჯერები, რეკრუტერები წარმოადგენენ კომპანიებსა და მიმდინარე ვაკანსიებს, რომელთა ნახვაც კანდიდატებს შეუძლიათ სპეციალურ ბმულზე: shorturl.at/jkvL6.

დასაქმების მსურველები შეარჩევენ მათთვის სასურველ კომპანიებს, ვაკანსიებს და დარეგისტრირდებიან. ამის შემდეგ კი მათთვის ჩაინიშნება ონლაინ შეხვედრები დამსაქმებლებთან, რომლებიც კანდიდატების დასაქმების გადაწყვეტილებას კონკრეტული ვაკანსიების მოთხოვნების შესაბამისად მიიღებენ.

მოსახლეობის დასაქმების პოლიტიკა საქართველოს მთავრობისთვის პრიორიტეტულია>>

სამუშაოს მაძიებლებთან შეხვედრის დროს კომპანიის წარმომადგენლები ისაუბრებენ, თუ რა ვაკანსიები და შეთავაზებები აქვთ, რა არის მათი კომპანიის, როგორც დამსაქმებლის კონკურენტული უპირატესობა, როგორ სამუშაო გარემოს სთავაზობენ დასაქმების მსურველებს. დასასრულ კი, სამუშაოს მაძიებლებს კითხვების დასმის საშუალება ექნებათ.

შეხვედრები გაიმართება ონლაინ Zoom-ის პლატფორმის გამოყენებით. დასაქმების ფესტივალში და მასტერკლასებზე დასასწრებად დარეგისტრირდით ბმულზე:https://forms.gle/ThsrUGNZLLAA1nXx8.

დარეგისტრირების შემდეგ, კომპანიის ონლაინ სესიის წინ, მონაწილეები მოკლე ტექსტური შეტყობინების სახით მიიღებენ Zoom–ის ლინკს, რომლის მეშვეობითაც პირდაპირ მოხვდებიან მათ მიერ წინასწარ შერჩეული დამსაქმებლების სესიებზე.

2020 წლის 1 იანვრიდან საქართველოში ქვეყანაში უმუშევრობის შესამცირებლად ცალკე უწყება ამოქმედდა - დასაქმების ხელშეწყობის სახელმწიფო სააგენტო. ის ასრულებს შუამავლის როლს სამსახურის მაძიებლებსა და ბიზნესს შორის. ის აღრიცხავს სამსახურის მაძიებლებს, სწავლობს შრომის ბაზარს და ქვეყანაში შრომის ბაზრის საკითხებზე რეკომენდაციებს იძლევა.

საქართველოს მთავრობამ დასაქმების ხელშეწყობის 2021 წლის პროგრამა დაამტკიცა>>

„საქსტატის“ ცნობით, ქვეყნის ყოველი მეხუთე შრომისუნარიანი მოქალაქე უმუშევარია. უმუშევრობის დონე 2020 წლის IV კვარტალში 3,8 პროცენტული პუნქტით გაიზარდა 2019 წლის იმავე პერიოდთან შედარებით და 20,4% შეადგინა.

3
საპატრულო პოლიცია

თბილისში მიმდინარე აქციის გამო გარკვეულ ქუჩებზე გადაადგილება შეზღუდულია

11
(განახლებულია 13:42 26.02.2021)
თბილისში აქციის მიმდინარეობისას დედაქალაქის მოსახლეობა გადაადგილებას ალტერნატიული გზებით შეძლებს. უწყებაში განმარტავენ, რომ გადაკეტილი გზები აქციის დასრულებისთანავე გაიხსნება

თბილისი, 26 თებერვალი - Sputnik. თბილისში მიმდინარე აქცია მსვლელობის გამო დედაქალაქის ცალკეულ უბნებში ავტროტრანსპორტის მოძრაობა დროებით შეზღუდულია, იუწყება შინაგან საქმეთა სამინისტრო.

ოპოზიციური პარტიების წარმომადგენლებმა დაიწყეს მზადება მასშტაბური საპროტესტო აქციისთვის ლოზუნგით „თავისუფლებისთვის“ – დაიძრნენ კოლონები რეგიონებიდან, პარლამენტის შენობასთან კი სცენა მონტაჟდება. აქციის მონაწილეები ფილარმონიიდან პარლამენტის შენობისკენ მსვლელობით უკვე გაემართნენ. შემდეგ პარლამენტთან ძირითადი მიტინგი გაიმართება, ხოლო ბოლოს აქციის მონაწილეები სახელმწიფო კანცელარიასთან გადაინაცვლებენ და პროტესტს იქ დაასრულებენ.

უწყებაში განმარტავენ, რომ საზოგადოებრივი წესრიგისა და უსაფრთხოების დაცვის მიზნით, დღეს 13:00 საათიდან დროებით შეიზღუდა გადაადგილება პეტრე მელიქიშვილის ქუჩასა და მერაბ კოსტავას გამზირზე.

  • აქციისა და მსვლელობის მიმდინარეობისას ასევე დროებით შეიზღუდება გადაადგილება შემდეგ ქუჩებზე: ალექსანდრე ჭავჭავაძის, მიტროფანე ლაღიძის, ბესიკის, ლესია უკრაინკას, ზაქარია ჭიჭინაძის ქუჩა, 9 აპრილის, ანტონ ფურცელაძის, არჩილ ჯორჯაძის, გია ჭანტურიას, რეზო ლაღიძის, ვასო აბაშიძის, მესხიას ქუჩა.

უწყებაში განმარტავენ, რომ ამ დროის განმავლობაში მოსახლეობა გადაადგილებას ალტერნატიული გზების მეშვეობით შეძლებს, კერძოდ მარჯვენა სანაპიროსა და რეზო თაბუკაშვილის ქუჩის გავლით. ასევე მოძრაობა თავისუფალი იქნება ჭონქაძის ქუჩასა და ზემო ვერის მიმართულებით გზებზე.

ტრანსპორტის ნაკადის უსაფრთხო გადაადგილებას საპატრულო პოლიციის ეკიპაჟები არეგულირებენ. აქცია-მსვლელობის დამთავრებისთანავე მოძრაობა ჩვეულ რეჟიმში აღდგება.

11