თბილისი, 16 თებერვალი – Sputnik. ახალი კორონავირუსისგან გამოჯანმრთელების შემდეგ ადამიანებს მთელი რიგი სიმპტომები აღენიშნებათ, განაცხადა თბილისის ინფექციური საავადმყოფოს დირექტორმა თენგიზ ცერცვაძემ პირველი არხის ეთერში.
„ყველაზე ხშირი პოსტკოვიდური სინდრომი არის საერთო სისუსტე, დაღლილობა. სიმპტომების მეორე ჯგუფია სუნთქვის გაძნელება, გახშირება, მოკლედ – სუნთქვასთან დაკავშირებული პრობლემები. მესამე – ნევროლოგიური პრობლემები, როგორიც არის მეხსიერების დაქვეითება, დეპრესია, შფოთი, უძილობა, თავის ტკივილი და ა.შ. მეოთხე არის გულსისხლძარღვთა სისტემის მხრიდან ჩივილები. მაგალითად, უსიამოვნო შეგრძნება გულ-მკერდის არეში, რიტმის დარღვევა, ექსტრასისტოლები და ასე შემდეგ“, – განაცხადა თენგიზ ცერცვაძემ.
ცერცვაძის თქმით, ინფექციურ საავადმყოფოში პოსტკოვიდური სიმპტომების მქონე პაციენტების მიმართვიანობა მაღალია.
„ვემზადებით ძალიან სერიოზული კვლევის ჩასატარებლად, რომელიც დაიწყება დაახლოებით მარტიდან. მეორე – ვემზადებით უკვე ამ პაციენტების სისტემური მომსახურებისთვის, რამეთუ კვლევაში მოხვდება სულ დაახლოებით 400 ადამიანი. კვლევის მიზანია, შევისწავლოთ და დავდოთ პოსტკოვიდური სინდრომის თავისებურებანი, რათა შემდეგ ეს ქვეყნის ჯანდაცვამ პრაქტიკაში გამოიყენოს“, - აღნიშნა ცერცვაძემ.
მისივე თქმით, მეორე მიმართულება არის ასეთი პაციენტების მომსახურების სერვისების მიწოდების სისტემის შექმნა. კერძოდ, პროგრამა პოსტკოვიდური ავადმყოფებისათვის, რომლითაც ყველა პაციენტი ისარგებლებს.
„თუ კვლევაში ჩართული იქნება 400 პაციენტი, პოსტკოვიდური სინდრომის პროგრამით სარგებლობა შეეძლება ყველა პაციენტს, ესეც დაახლოებით მარტში ამოქმედდება“, – აღნიშნა თენგიზ ცერცვაძემ.
პოსტკოვიდური სინდრომი მსოფლიო მედიკოსთა ახალი გამოწვევაა. როგორც სპეციალისტები აცხადებენ, დაკვირვების შედეგად დადგინდა, რომ პოსტკოვიდური სინდრომი უმეტესად იმ პაციენტებს ემართებათ, ვინც ვირუსი მძიმე ფორმებში გადაიტანა. ხშირად მათი ხელახალი ჰოსპიტალიზაცია ხდება საჭირო.
საქართველოში ახალი კორონავირუსით დაავადებულთა საერთო რიცხვმა 266.462-ს მიაღწია, რომელთაგანაც გამოჯანმრთელდა 259.228 ადამიანი.
