დეზინფექცია სკოლაში

სკოლებში ვირუსის პრევენციისთვის აუცილებელი პირობები დამაკმაყოფილებელი არაა: ომბუდსმენი

61
(განახლებულია 22:21 15.02.2021)
სახალხო დამცველი მოუწოდებს სახელმწიფოს, მაქსიმალურად გამოიყოს როგორც ფინანსური, ასევე ადამიანური რესურსი სკოლებში პრევენციული ღონისძიებების ეფექტურად განხორციელებისთვის.

თბილისი, 15 თებერვალი – Sputnik. სახალხო დამცველი ნინო ლომჯარია სკოლებში სახელმწიფოს მიერ კორონავირუსის პრევენციისთვის გატარებულ ღონისძიებებს არასაკმარისად თანმიმდევრულად მიიჩნევს და აცხადებს, რომ ისინი არ აკმაყოფილებს ვირუსის პრევენციისთვის აუცილებელ პირობებს.

რამდენად უსაფრთხოა პირბადე ბავშვებისთვის: ინფექციონისტის განმარტება>>

დღეიდან საქართველოს მასშტაბით სასწავლო პროცესი საკლასო ოთახებში განახლდა. ამასთან, მშობლებს დისტანციური სწავლების არჩევანის უფლებაც აქვთ. სასწავლო პროცესი საკლასო ოთახებში განახლებული წესების დაცვით აღდგა – აუცილებელია პირბადის ტარება (V-XII კლასების მოსწავლეებისთვის), 1-მეტრიანი დისტანციის დაცვა, თერმოსკრინინგი.

სახალხო დამცველის განცხადებით, განათლების სამინისტროს არ წარმოუდგენია ერთიანი სამოქმედო გეგმა, რაც უზრუნველყოფს სკოლებში საგანმანათლებლო პროცესის ეფექტურ მართვას, გამოვლენილ ხარვეზებზე სწრაფ რეაგირებასა და საჭიროებების შესაბამისი ღონისძიებების დაგეგმვას.

„უწყების მიერ მიღებული ზოგადი რეკომენდაციების თანახმად, სკოლებმა თავად უნდა შეიმუშაონ პანდემიის პირობებში, საგანგებო სიტუაციაში სამოქმედო გეგმა, რაც ერთიანი ხედვის და მიდგომის არსებობისთვის არასაკმარისია“, – აღნიშნულია ომბუდსმენის აპარატის მიერ გავრცელებულ განცხადებაში.

გარდა ამისა, ლომჯარია მიიჩნევს, რომ სრული ინფორმაცია არაა წარმოდგენილი სკოლების სანიტარიულ-ჰიგიენური და ინფრასტრუქტურული პრობლემების თაობაზე. ასევე გამოწვევის წინაშე დგას კერძო დიდკონტინგენტიან სკოლებში დისტანციის დაცვისა და ნაკადების მართვის მონიტორინგის საკითხი.

„შესაძლოა რისკებთან იყოს დაკავშირებული ისიც, რომ მე-5 კლასამდე მოსწავლეებისთვის არ არის სავალდებულო პირბადის ტარება, რაც, თავის მხრივ, ვირუსის გავრცელების ერთ-ერთ ეფექტურ პრევენციულ ღონისძიებას წარმოადგენს“, – აღნიშნულია განცხადებაში.

სახალხო დამცველის შეფასებით, მნიშვნელოვანია, სახელმწიფოს ჰქონდეს პოლიტიკის ერთიანი დოკუმენტი, სამოქმედო გეგმა, სრულყოფილი ინფორმაცია ქვეყანაში მოქმედ თითოეულ ზოგადსაგანმანათლებლო დაწესებულებაში არსებულ საჭიროებებზე და სასწავლო პროცესი აღნიშნულის მიხედვით დაიგეგმოს.

61
აბრა მაღაზიაში კორონავირუსის შესახებ

როდის მოიხსნება დარჩენილი შეზღუდვები: ამირან გამყრელიძის პროგნოზი

30
(განახლებულია 08:45 28.02.2021)
ეპიდემიოლოგის თქმით, ჯერჯერობით ქვეყანაში სტაბილური ეპიდსიტუაციაა და კორონავირუსის მესამე ტალღა მოსალოდნელი არ არის

თბილისი, 28 თებერვალი – Sputnik. შეზღუდვების შემდგომი შემსუბუქება შესაძლებელი იქნება 1-2 კვირაში, თუ ამის საშუალებას ეპიდვითარება მოგვცემს, განუცხადა ჟურნალისტებს დაავადებათა კონტროლის ეროვნული ცენტრის დირექტორმა ამირან გამყრელიძემ.

საქართველოში 1 მარტიდან ბევრი შეზღუდვა მოიხსნება: გაიხსნება მუზეუმები, საბავშვო ბაღები, ფიტნეს-დარბაზები. უქმდება შაბათ-კვირის კარანტინი. ამ კვირაში სრული დატვირთვით ამუშავდა საზოგადოებრივი და საქალაქთაშორისო ტრანსპორტი.

„ამ ეტაპზე საკმაოდ ბევრი შეზღუდვა მოიხსნა, სერიოზული შემსუბუქება გამოცხადდა, ამიტომ 1-2 კვირა უნდა დავაკვირდეთ ეპიდსიტუაციას. ეს შეზღუდვები რა სტიმულს მისცემს ინფექციის გავრცელებას. ამის შემდეგ გადაწყდება შეზღუდვების შემსუბუქება. ხვალ და ზეგ ეს არ იქნება“, - განაცხადა გამყრელიძემ.

რაც შეეხება მესამე ტალღას, მისი პროგნოზებით, თუ მარტი და აპრილი აფეთქებების გარეშე ჩაივლის, ის ნაკლებად სავარაუდოა.

„დასაშვებია, რომ ჩვენთანაც „ბრიტანული შტამის“ მეტი გავრცელება იყოს, მას გავრცელების მეტი სისწრაფე ახასიათებს, უფრო ახალგაზრდა ადამიანებს აზიანებს, თუმცა სიმძიმით არ გამოირჩევა. მაგრამ ჩვენ ახლა დაღმავალ ტალღაზე ვართ, ანუ ეპიდსიტუაცია ქვეყანაში სტაბილიზირდება. ასე გაგრძელდება, თუ ჩვენ რამე დიდი შეცდომა არ დავუშვით, არ მოვეშვით, პირბადე არ გადავაგდეთ“, - განაცხადა გამყრელიძემ.

საქართველოში კორონავირუსის პირველი შემთხვევა 2020 წლის 26 თებერვალს დაფიქსირდა, დღემდე ქვეყანაში 270.510 შემთხვევაა გამოვლენილი.

30
თენგიზ ცერცვაძე

საქართველოში კოვიდგადატანილი ადამიანების კვლევა მომდევნო კვირაში დაიწყება: მიზნები

254
ინფექციონისტის განცხადებით, კვლევა მხოლოდ თბილისში ჩატარდება და შემთხვევითი შერჩევის პრინციპით 500 მონაწილე შეირჩევა

თბილისი, 27 თებერვალი – Sputnik. საქართველოში კოვიდგადატანილი ადამიანების კვლევა მომდევნო კვირაში დაიწყება, განაცხადა თბილისის ინფექციური საავადმყოფოს დირექტორმა, თენგიზ ცერცვაძემ.

ცერცვაძის განცხადებით, ჯანდაცვის სპეციალისტებს კვლევის შემდეგ ზუსტად ეცოდინებათ, კოვიდგადატანილი პაციენტების რა ნაწილს უვითარდება პოსტკოვიდური სინდრომი.

„გვეცოდინება სად უფრო ხშირია: კაცებში თუ ქალებში, ახალგაზრდებში თუ ასაკოვნებში, ვინც მძიმედ გადაიტანა დაავადება თუ ვინც მსუბუქად. რაც მთავარია, გვეცოდინება რომელი გამოვლინება სჭარბობს პოსტკოვიდურ სინდრომში: სასუნთქი სისტემის, ზოგადი სიმპტომები - დაღლილობა, სისუსტე, კუნთების ტკივილი, ნევროლოგიური სიმპტომები და სხვა“, - განაცხადა ცერცვაძემ.

ცერცვაძის ინფორმაციით, კვლევის შემდეგ, ჯანდაცვის სამინისტროში შეიქმნება პროგრამა, რომელიც უფასოდ მოემსახურება პოსტკოვიდური სინდრომის მქონე პაციენტებს.

„საუბარია იმაზე, რომ ეს პაციენტები მივლენ ზოგადი პროფილის კლინიკებში, ინფექციურ კლინიკებში და შეიძლება ოჯახის ექიმთანაც. სპეციალური კვლევის ალგორითმით და კითხვარით დადგინდება, აქვს თუ არა მას პოსტკოვიდური სინდრომი და თუ აქვს, რომელი გამოვლინება აქვს და შემდეგ უკვე ამ კონკრეტული გამოვლინების მიხედვით, ისინი დაკვალიანდებიან და გადამისამართდებიან სპეციალისტებთან“, – განაცხადა ცერცვაძემ.

კვლევისთვის შერჩეულ ადამიანებს მედიკოსები ტელეფონით დაუკავშირდებიან და მოიწვევენ კლინიკებში.

პოსტკოვიდური სინდრომი მსოფლიო მედიკოსთა ახალი გამოწვევაა. როგორც სპეციალისტები აცხადებენ, დაკვირვების შედეგად დადგინდა, რომ პოსტკოვიდური სინდრომი უმეტესად იმ პაციენტებს ემართებათ, ვინც ვირუსი მძიმე ფორმებში გადაიტანა. ხშირად მათი ხელახალი ჰოსპიტალიზაცია ხდება საჭირო.

254
ექიმი ევგენი კომაროვსკი

რა მეთოდებით არ ღირს იმუნიტეტის გაძლიერება - ექიმ კომაროვსკის რჩევები

0
(განახლებულია 09:22 28.02.2021)
ადამიანის ორგანიზმის იმუნიტეტის ამაღლების ერთ-ერთი ყველაზე ეფექტური ხერხია ჯანსაღი ძილი და დადებითი ემოციები

თბილისი, 28 თებერვალი – Sputnik. იმუნიტეტის ამაღლების ყველაზე არაეფექტური და ეფექტური მეთოდები - ამის შესახებ ექიმმა ევგენი კომაროვსკიმ თავის Instagram-ზე ისაუბრა.

მედიკოსის თქმით, ჯანმრთელობის გაუმჯობესების ყველაზე არაეფექტური მეთოდებია ბიოაქტიური საკვები დანამატების, ასევე ელეუთეროკოკის და ექინაცეის მიღება, ხახვის და ნივრის მირთმევა, ვირუსის საწინააღმდეგო ამულეტები, იმუნომოდულატორები და ჰომეოპათია.

კომაროვსკი განმარტავს, რომ იმუნიტეტის ამაღლების ყველაზე ეფექტური მეთოდებია - სრულფასოვანი ძილი, ზომიერი ფიზიკური დატვირთვები, უარი მავნე ჩვევებზე (თამბაქოს და ალკოჰოლის მოხმარება), ვაქცინაცია, სრულფასოვანი კვება და დადებითი ემოციები.

0