თბილისი, 1 თებერვალი – Sputnik. ისრაელში საქართველოს საელჩო ქვეყანაში მცხოვრები თანამემამულეებისთვის ინფორმაციას ავრცელებს.
უწყების ცნობით, ისრაელის ტერიტორიაზე შესასვლელად აუცილებელია სამთავრობო კომისიის მიერ გაცემული სპეციალური ნებართვა ფრენის შესახებ.
ისრაელის მთავრობის გადაწყვეტილებით, 5 თებერვლის 07:00 საათამდე ქვეყნის საზღვრები სრულად ჩაკეტილი იქნება. ამასთან, შეზღუდვები რეგულარულ ფრენებსა და სახმელეთო საზღვრის კვეთაზე იმოქმედებს 7 თებერვლის შუაღამემდე.
საელჩოს ინფორმაციით, ყველა მგზავრი ვალდებულია კოვიდ–სასტუმროში 12-დღიანი კარანტინი გაიაროს. გარდა ამისა, ძალაში რჩება ადრე დამტკიცებული ყველა შეზღუდვა.
ისრაელში რიგით მესამე საყოველთაო კარანტინი 8 იანვარს დაიწყო. დაკეტილია ყველა სავაჭრო ცენტრი, მუშაობს მხოლოდ სასურსათო მაღაზიები და აფთიაქები. აკრძალულია სტუმრად მისვლა. არ მუშაობს სპორტული დარბაზები, მუზეუმები, ბაზრობები, სილამაზის სალონები და ა.შ.