თბილისი, 21 იანვარი - Sputnik. საქართველოს მთავრობის ადმინისტრაციის შენობის წინ ქვეყანაში მოქმედი კოვიდ–შეზღუდვების საწინააღმდეგო აქცია გაიმართა, იუწყება Sputnik–საქართველოს კორესპონდენტი.
აქციის ორგანიზატორია არასამთავრობო ორგანიზაცია „ერთიანი ახალგაზრდობა საქართველოსთვის“. ორგანიზაციის წარმომადგენლებმა პერმანენტული საპროტესტო აქციები დააანონსეს, თუ საზოგადოებრივი ტრანსპორტის მუშაობა არ აღდგება. აქციის მონაწილეების განცხადებით, სამუშაოზე ბევრი ვერ დადის და ამის გამო სრულიად უსახსროდ არის დარჩენილი.
„მთავრობისგან ამ შეზღუდვების მოხსნას მოვითხოვთ, რადგან ქვეყნის მოსახლეობა შიმშილით სიკვდილის ზღვარზეა“, – განუცხადა ჟურნალისტებს არასამთავრობო ორგანიზაციის წარმომადგენელმა თეონა ნაბახტეველმა.
აქციის მონაწილეებს ეცვათ ჰუდები წარწერით „ხალხს შია“ და ეკავათ პლაკატები წარწერით „იძებნება ლარი“.
არსებული ეპიდემიოლოგიური ვითარების გამო საქართველოში 28 ნოემბრიდან ახალი შეზღუდვები მოქმედებს, რომლებიც 2021 წლის 31 იანვრის ჩათვლით იქნება ძალაში. კერძოდ, სავალდებულოა პირბადის ტარება, ასევე იკრძალება ქუჩაში გასვლა 21:00 საათის შემდეგ დილის 5 საათამდე, არ მუშაობს საზოგადოებრივი ტრანსპორტი, დაკეტილია სავაჭრო ცენტრები, სპორტდარბაზები, რესტორნები, კაფე–ბარები და ა.შ.
საქართველოში შეზღუდვების ეტაპობრივი მოხსნა 1 თებერვლიდან დაიწყება.