ირაკლი შოთაძე

დანაშაულთან ბრძოლა და მკაცრი სისხლის სამართლის პოლიტიკა: გენპროკურორის ანგარიში

58
(განახლებულია 19:23 13.01.2021)
ოჯახური ძალადობა, კორუფცია, ნარკოდანაშაული, ფულის გათეთრება – ის დანაშაულებია, რომლებიც საქართველოს გენერალურმა პროკურორმა ირაკლი შოთაძემ თავისი უწყების საქმიანობის პრიორიტეტულ მიმართულებებად დაასახელა.

თბილისი, 13 იანვარი – Sputnik. 2020 წელს სისხლის სამართლებრივი დანაშაულების რაოდენობა 18,3%-ით შემცირდა 2019 წელთან შედარებით და საერთო რაოდენობამ 15,6 ათასი შეადგინა, განაცხადა გენერალურმა პროკურორმა ირაკლი შოთაძემ საპროკურორო საბჭოს სხდომაზე უწყების 2020 წლის საქმიანობის შესახებ ანგარიშის წარდგენისას.

პანდემიის მიუხედავად საქართველოს პროკურატურა დატვირთული იყო საქმეებით, აღნიშნა მან. 2020 წელს სისხლის სამართლებრივი დევნა ყველაზე ხშირად ხორციელდებოდა ისეთი დანაშაულების მიმართ, რომლებსაც ეხება მუხლები „საფრთხე“, „ოჯახური ძალადობა“ და „ქურდობა“.

შარშან ოჯახური ძალადობისთვის სისხლის სამართლის პასუხისგებაში მიეცა 4 633 ადამიანი, რაც თითქმის ორჯერ აღემატება წინა წლების მაჩვენებლებს.

შოთაძის თქმით, ოჯახში ძალადობისა და ქალთა მიმართ ძალადობის წინააღმდეგ ბრძოლა ქვეყნის პროკურატურისთვის პრიორიტეტულია, რაც გამოიხატება სამართალდამცველ ორგანოებში მსხვერპლთა გახშირებული მომართვიანობით და სისხლის სამართლებრივი დევნის მაღალი მაჩვენებლებით.

შოთაძემ აღნიშნა, რომ პროკურატურა მკაცრ სისხლის სამართლის პოლიტიკას ატარებს იმ პირთა მიმართ, რომლებიც ოჯახურ ძალადობაში არიან ბრალდებული და უარს ამბობს დისკრეციული უფლებამოსილების გამოყენებაზე ქალთა მიმართ ძალადობაში დამნაშავე პირთა მიმართ.

შარშან გაიზარდა პროკურორთა მიმართვები სასამართლოში ასეთ დამნაშავეთა მიმართ აღკვეთის ღონისძიების სახით პატიმრობის გამოყენების მოთხოვნით.

უწყებისთვის მნიშვნელოვან მიმართულებად შოთაძემ დაასახელა ასევე მართლმსაჯულება არასრულწლოვნების მიმართ.

მისი თქმით, ბოლო წლებში უწყებამ არაერთი წარმატებული ნაბიჯი გადადგა ეფექტური მართლმსაჯულების სისტემის დასანერგად, რომელიც ორიენტირებული იქნება არასრულწლოვანთა ინტერესებზე და მათ კეთილდღეობაზე.

სასჯელი ნარკოდანაშაულისთვის

2020 წელს საქართველოს პროკურატურამ შსს-სთან ერთად აქტიური ბრძოლა გააჩაღა ნარკოდანაშაულთან.

პროკურატურა მკაცრ სისხლის სამართლებრივ პოლიტიკას ატარებს, პირველ რიგში, ნარკორეალიზატორების წინააღმდეგ.

შოთაძის ინფორმაციით, 2020 წელს 71-დან 70 ნარკორეალიზატორის მიმართ აღკვეთის ღონისძიების სახით მოითხოვეს და გამოიყენეს თავისუფლების აღკვეთა.

„ძირითადი აქცენტი კეთდებოდა ნარკოტიკული საშუალების გამსაღებელ პირთა გამოვლენაზე. განსაკუთრებით აქტუალური იყო ნარკოტიკებით ვაჭრობის ისეთი ახალი სქემების გამოვლენა, როგორიცაა საკომუნიკაციო საშუალებების გამოყენებით ონლაინ ვაჭრობა. ამ ტიპის დანაშაულთან ბრძოლის ეფექტიანობის გაზრდის მიზნით შსს-ს ცენტრალური კრიმინალური პოლიციის დეპარტამენტში შეიქმნა სპეციალიზებული დანაყოფი, რომლის აქტიური მუშაობის შედეგად 2020 წელს გამოვლინდა 16 ნარკომოვაჭრე და 13 ე.წ. ინტერნეტ მაღაზია“, – აღნიშნა გენერალურმა პროკურორმა.

შოთაძემ უკანონო შემოსავლების შესაძლო ლეგალიზაციის ფაქტებზეც ისაუბრა და აღნიშნა, რომ შარშან ეს სფერო შესწავლის საგანი იყო. 2020 წელს განსაკუთრებით მსხვილი უკანონო შემოსავლების ლეგალიზაციის ფაქტზე 854 848 ლარის ფულადი–უძრავი ქონების კონფისკაცია განხორციელდა.

სპეცოპერაცია ფონიჭალაში - პოლიციამ ცხრა ნარკორეალიზატორი დააკავა>>

ნარკოტრანზიტთან ბრძოლისას გასულ წელს გამოვლინდა ასევე 110 კილოგრამი ჰეროინის საერთაშორისო ტრანზიტის ფაქტი.

ციფრული პროდუქტების დანერგვა

გასული წელი პროკურატურისთვის წარმატებული იყო სხვადასხვა ციფრული პროდუქტისა და ანალიტიკური კვლევის დანერგვის თვალსაზრისითაც. საქართველოს პროკურატურისა და საქართველოს იუსტიციის სამინისტროსთან არსებული სსიპ ელექტრონული მმართველობის სააგენტოს ერთობლივი მრავალწლიანი მუშაობის შედეგად შეიქმნა სისხლის სამართლის საქმისწარმოების ახალი ელექტრონულ სისტემა, რომელიც 2019 წლის ნოემბრიდან ეტაპობრივად ჩაირთო და ამჟამად უკვე მოქმედებს საქართველოს პროკურატურის ყველა სტრუქტურულ ერთეულსა და სხვა სამართალდამცველი ორგანოების საგამოძიებო დანაყოფებში.

ახალი ელექტრონული სისტემის დანერგვას შოთაძემ გამოძიების სრულყოფილად და ეფექტიანად წარმოების მიმართულებით გადადგმული ინოვაციური ნაბიჯი უწოდა.

გენერალურმა პროკურორმა ანალიტიკურ პორტალზეც ისაუბრა და განაცხადა, რომ პორტალზე განთავსებულია ინფორმაცია ანალიზის, სახელმძღვანელოების, რეკომენდაციებისა და კვლევების შესახებ. ანალიტიკური პროგრამული სისტემის ერთ-ერთ მნიშვნელოვან ფუნქციას თანამშრომელთა დატვირთვის მონიტორინგის ავტომატიზაცია წარმოადგენს.

ხელოვნური ინტელექტი გამოძიების პროცესში

ანგარიშის პრეზენტაციისას აღინიშნა საქართველოში აშშ-ის საელჩოს მხარდაჭერით IBM I2 ციფრული ანალიტიკური პროგრამის წარმატებით დანერგვის თაობაზეც. ეს პროგრამა სამართალდამცველ ორგანოებს შესაძლებლობას აძლევს, განახორციელონ საგამოძიებო ანალიზი, ამოიცნონ საჭიროებები, ხელი შეუწყონ უწყებათა თანამშრომლობას.

IBM I2 მომხმარებელს საბანკო, სატელეფონო ამონაწერებისა და სხვა ინფორმაციის სხვადასხვა ფორმატით პროგრამაში ინტეგრირების საშუალებას აძლევს.

რაში სჭირდება საქართველოს ხელოვნური ინტელექტი>>

„IBM I2 წარმოადგენს პროგრამულ უზრუნველყოფას, რომელიც გამოიყენება დანაშაულის პრევენციისა და დროულად გამოძიებისთვის. აღნიშნული პროგრამა შექმნილია ნატოს წევრი ქვეყნების ხელშეწყობით და აქტიურად გამოიყენება ამერიკის შეერთებულ შტატებში, კანადასა და ევროკავშირის წევრ ქვეყნებში ფულის გათეთრების, კიბერდანაშაულის, თაღლითობის და სხვა კომპლექსური ხასიათის დანაშაულის გამოძიების პროცესში“, – განაცხადა გენერალური პროკურორის პირველმა მოადგილემ ბაკურ აბულაძემ.

აბულაძემ ხაზი გაუსვა, რომ პროგრამა პროკურორებსა და გამომძიებლებს ეხმარება დროული საგამოძიებო და ოპერატიული გადაწყვეტილებების მიღებასა და მოკლე დროში ეფექტური შედეგების მიღწევაში.

კორუფციასთან ბრძოლა პრიორიტეტებს შორის

კორუფციის აღკვეთა, გამოვლენა და მასთან ბრძოლა – საქართველოს პროკურატურის ერთ-ერთი პრიორიტეტია. უწყებაში შექმნილია სპეციალიზებული საგამოძიებო დანაყოფი – კორუფციულ დანაშაულზე სისხლისსამართლებრივი დევნის სამმართველო.

კორუფციულ დანაშაულებზე გამოძიებას და სისხლისსამართლებრივ დევნას აგრეთვე ახორციელებენ პროკურატურის ცენტრალური და რეგიონული საგამოძიებო დანაყოფები.

ბაკურ აბულაძის განცხადებით, ანტიკორუფციული პოლიტიკის ფარგლებში 2020 წელს საქართველოს პროკურატურაში კორუფციასთან დაკავშირებულ 169 სისხლის სამართლის საქმეზე დაიწყო გამოძიება. ამავე პერიოდში სისხლისსამართლებრივი დევნა დაიწყო 67 პირის მიმართ. 2020 წელს კი სასამართლო განაჩენი დადგა კორუფციულ დანაშაულში მხილებული 58 პირის მიმართ.

აშშ-ის საელჩო სუსის გამომძიებლებისა და პროკურორებისთვის კორუფციაზე სასწავლო კურსს ატარებს>>

აბულაძის თქმით, საქართველოს პროკურატურის სისტემაში მოქმედი ანტიკორუფციული საგამოძიებო დანაყოფები საქმიანობას ერთი სტრუქტურული ქოლგის ქვეშ განახორციელებენ. კორუფციულ დანაშაულზე სისხლისსამართლებრივი დევნის სამმართველოს სპეციალიზებული გამომძიებელი ეყოლება პროკურატურის ყველა საგამოძიებო დანაყოფში და მათი კოორდინირებული მართვა ცენტრალიზებულად განხორციელდება.

აბულაძემ მნიშვნელოვან გამოწვევად დაასახელა ასევე ფულის გათეთრებასთან ბრძოლა და აღნიშნა, რომ უკანონო შემოსავლების ლეგალიზებისას იზრდება დანაშაულებრივ საქმიანობაში იურიდიული პირების გამოყენებისა და ჩათრევის შემთხვევები. 2020 წელს უკანონო შემოსავლების გათეთრებისთვის სისხლის სამართლებრივ პასუხისგებაში მიეცა 21 ფიზიკური და 2 იურიდიული პირი.

58
თემები:
კრიმინალი საქართველოში (1246)
ხანდაზმული ადამიანები პირბადეებით

რა მოხდება მოსახლეობის 60 პროცენტის აცრის შემთხვევაში: ცერცვაძის განმარტება

62
აშშ–ის ეროვნულ–დემოკრატიული ინსტიტუტის (NDI) მიერ საქართველოში  ჩატარებული საზოგადოებრივი აზრის კვლევის ფარგლებში გამოკითხულთა მხოლოდ 41%-მაკორონავირუსის ვაქცინის გაკეთებაზე თანხმობა განაცხადა.

თბილისი, 25 იანვარი - Sputnik. ყველა პოლიტიკური ორიენტაციის თუ განსხვავებული შეხედულების ექსპერტი უნდა დადგეს ერთად და დავარწმუნოთ მოსახლეობის რაც შეიძლება დიდი მასა, რომ კორონავირუსის საწინააღმდეგო ვაქცინა გაიკეთონ, განუცხადა პირველ არხს ინფექციური საავადმყოფოს დირექტორმა თენგიზ ცერცვაძემ.

საქართველოს მოსახლეობის დიდ ნაწილს კორონავირუსის საწინააღმდეგო ვაქცინის ჩატარება სურს >>

აშშ–ის ეროვნულ–დემოკრატიული ინსტიტუტის (NDI) მიერ ჩატარებული საზოგადოებრივი აზრის კვლევის თანახმად, საქართველოს მოსახლეობის 41% თანახმაა, აიცრას კორონავირუსზე, წინააღმდეგია ასევე 41%.

ცერცვაძის თვალსაზრისით, ის, რომ ვაქცინაციას გამოკითხულთა  მხოლოდ 41% ემხრობა, ძალიან მცირე რიცხვია. რადგან ქვეყანაში სამიზნედ ითვლება მოსახლეობის 60-65%.

„თუ ჩვენ მივაღწიეთ იმას, რომ ქვეყანაში 60-65% აიცრა, ეს იმას ნიშნავს, რომ ქვეყანაში გვეყოლება იმუნური ფენა, ამას დაემატება ის პაციენტები, ვინც კოვიდი გადაიტანა და ბუნებრივი იმუნიტეტი აქვს. ეს იქნება პრაქტიკულად 100%-იანი გარანტია, რომ ქვეყანაში პანდემიის და ეპიდემიის შემდეგი ტალღები არ იქნება“, - განაცხადა ცერცვაძემ.

ინფექციური საავადმყოფოს დირექტორის თქმით, ის 20 პროცენტი, ვინც დარჩება აუცრელი ან იმუნიტეტის გარეშე, მათთან იქნება ცალკეული შეხვედრები, მაგრამ ეს ვერ მოახდენს გავლენას ვერც ქვეყნის ეკონომიკაზე, ვერც საქმიანი წრეების აქტივობაზე, რადგან მათ კლინიკური სექტორი იოლად გაუმკლავდება.

ვაქცინაციის ეროვნული გეგმის მიხედვით, მოსახლეობის იმუნიზაცია მხოლოდ ჯანდაცვის მსოფლიო ორგანიზაციის (ჯანმო) მიერ დამტკიცებული ვაქცინებით მოხდება,

საქართველო COVAX–პლატფორმის მეშვეობით Pfizer-ისა AstraZeneca-ს ვაქცინის შესყიდვასთან დაკავშირებით აქტიურ მოლაპარაკებებს აწარმოებს. COVAX–პლატფორმით საქართველომ ვაქცინა მოსახლეობის 20%-სთვის – 700 ათასი ადამიანისთვის შეუკვეთა. ქვეყანამ უკვე გადაიხადა 4 მლნ დოლარი.

რა იცავს მათ, ვინც კონტაქტის მიუხედავად COVID-19-ით არ ინფიცირდებიან: ცერცვაძის განმარტება >>

COVAX–პლატფორმამ საქართველოსგან 18 იანვარს დასტური მიიღო იმასთან დაკავშირებით, რომ ქვეყანა მზადაა მიმდინარე წლის პირველ კვარტალში კორონავირუსის საწინააღმდეგო ვაქცინა მიიღოს. ვაქცინის პირველი პარტია – დაახლოებით 20 ათასი დოზა საქართველოში დაახლოებით ერთ თვეში, თებერვლის ბოლოს გამოჩნდება. ქვეყანაში შემოიტანენ ამერიკული კომპანია Pfizer-ისა და მისი გერმანული პარტნიორი BioNTech-ის პრეპარატს BNT162b2.

62
საერთო რეჟიმის კოლონია

ქართული ციხეებიდან ამნისტიის საფუძველზე უკვე 90 პატიმარი გათავისუფლდა

37
ამნისტიის კანონის თანახმად, თითოეული გათავისუფლებული საპატიმროს სასამართლოს გადაწყვეტილების საფუძველზე ტოვებს

თბილისი, 25 იანვარი - Sputnik. „ამნისტიის შესახებ“ კანონის ძალაში შესვლის მომენტიდან საქართველოს პენიტენციური დაწესებულებებიდან 90 პატიმარი გათავისუფლდა, იუწყება სპეციალური პენიტენციური სამსახური.

კანონი „ამნისტიის შესახებ“ პარლამენტმა 2021 წლის 11 იანვარს მიიღო და ის 1,5 ათასი პატიმრის გათავისუფლებას ითვალისწინებს. თუმცა მის აღსრულებას ერთი თვე დასჭირდება. ამ დროის განმავლობაში სასამართლო თითოეული ამნისტირებულის საქმეს განიხილავს.

სამსახურის ინფორმაციით, გათავისუფლებულთა შორის ექვსი ქალია.

დღეს ამნისტიის შესახებ კანონის საფუძველზე ქსნის №15 კოლონიიდან 11 პატიმარი გათავისუფლდა.

ვის შეეხება ამნისტია, შეგიძლიათ იხილოთ ბმულზე.

37
საქართველოს ზამთრის პეიზაჟები

დღის ასტროპროგნოზი ზოდიაქოს ნიშნებისთვის: 26 იანვარი

0
(განახლებულია 11:58 25.01.2021)
გთავაზობთ ყოველდღიურ ასტროლოგიურ პროგნოზს ზოდიაქოს თითოეული ნიშნისთვის. გაიგეთ ჩვენი ჰოროსკოპიდან, რას გიმზადებენ ვარსკვლავები და რას გირჩევენ ასტროლოგები

დღეს 2021 წლის 26 იანვარია, სამშაბათი. მზარდი მთვარე კირჩხიბის ნიშანშია. ამ დღეს პლანეტა მარსი მფარველობს.

დღევანდელი დღე ადამიანებისგან მეტ კონკრეტულობას მოითხოვს. ნებისმიერი გაურკვევლობა გაღიზიანებას გამოიწვევს. გამძაფრდება რეაქციები მიმდინარე მოვლენებზე, რაც, შესაძლოა, კონფლიქტების საფუძველი გახდეს. ამავე დროს დღეს ძალიან იოლი იქნება ღრმად მიმალულ გრძნობებზე საუბარი, ადამიანისთვის პირდაპირ თქმა, თუ რას ფიქრობთ მასზე. თუმცა, ამ შემთხვევაში სჯობს, ფარგლებს არ გასცდეთ და უკმეხად არაფერი წამოგცდეთ – ამას ურთიერთობებში ბზარის შეტანა შეუძლია.

2021 წლის ჰოროსკოპი ზოდიაქოს ნიშნებისთვის>>

ვერძი: დღეს თქვენთვის საქმეების მოწესრიგების დღეა. თუნდაც ეს გაწერილი არ გქონდეთ, დიდი ალბათობით, ამის აუცილებლობას შექმნილი ვითარება მოითხოვს. მოწესრიგება შეიძლება დასჭირდეს თქვენს სამუშაო ადგილს, ან საქმეებსა და გეგმებს. არ არის გამორიცხული, რომ მოწესრიგების პროცესში დავიწყებული რამ აღმოაჩინოთ, რომელიც დღემდე აქტუალური და თან – საკმაოდ ფასეული.

კურო: დღეს გარშემომყოფებთან და მათ შორის, ახლობელ ადამიანებთან დისონანსში იქნებით. შესაძლოა, მოგეჩვენოთ, რომ თქვენ ირგვლივ ადამიანები ძალიან სერიოზული განწყობით დაიარებიან, ისინი კი, თავის მხრივ, უკმაყოფილო იქნებიან თქვენი უზრუნველობით. სერიოზულ კამათს ეს, დიდი ალბათობით, არ გამოიწვევს, თუმცა იმისთვის, რომ ირგვლივ მყოფებთან ურთიერთობებში ბზარი არ გაჩნდეს, ხშირად მოირგეთ „სერიოზული და ჭკვიანი“ ადამიანის სახე, თუნდაც ეს ძალზე სასაცილოდ გეჩვენებოდეთ.

ტყუპი: დღეს მზად ხართ, რომ მტკიცე და შეიძლება რადიკალური ზომებიც გადადგათ და ეს განსაკუთრებით ფინანსების სფეროს ეხება. იმის ნაცვლად, რომ ასჯერ გაზომოთ და ერთხელ გაჭრათ, ასჯერ გაჭრის განწყობაზე იქნებით. ერთი მხრივ, არის საფრთხე, რომ ფული ქარს გაატანოთ; მეორე მხრივ კი ეს საბრძოლო განწყობა ბიძგს მოგცემთ, გადადგათ ის ფინანსური ნაბიჯები, რომლებიც უკვე მომწიფებულია და დიდი ხანია, გადაწყვეტას მოითხოვს.

კირჩხიბი: დღეს კირჩხიბები კრიტიკოსების სახით მოგვევლინებით. ამასთან, თქვენი კრიტიკა ყველა ნაკლებად იქნება მიმართული საკუთარი თავისადმი, კრიტიკის ობიექტები დიდწილად გარშემომყოფები იქნებიან. თქვენი შენიშვნები ადამიანებს შეცდომების გამსოწორებას აიძულებს, თუმცა ყველაფერი მარტივადაც არ იქნება. თქვენი ბრძნული რჩევები, შესაძლოა, ყურს მიღმა გატარდეს, ხოლო კრიტიკა კი წყენის წყარო გახდეს. თქვენი გადასაწყვეტია – ღირს თუ არა კრიტიკაზე დროისა და ძალების  დახარჯვა, თან, როდესაც შედეგის იმედი ნაკლებადაა.

ლომი: დღეს დიდი ალბათობაა, რომ ირგვლივ მყოფი ადამიანები შეეცადონ, თავიანთი წილი პასუხისმგებლობა თქვენ მხრებზე გადმოიტანონ. ისინი იგრძნობენ, რომ დამყოლ ხასიათზე ხართ და ამის გამოყენებას ურცხვად შეეცდებიან. ამის გამოსწორება შეგიძლიათ, თუ მკაცრად დაიცავთ თქვენს პოზიციებს და აღკვეთ ამგვარ მცდელობებს. სხვაგვარად მოგიწევთ სხვისი საქმეების გაკეთება და საკუთარის გადადება.

ქალწული: მთელი დღე გარედან აკვიატებული ზეწოლა შეიძლება იგრძნოთ. შესაძლოა, ეს დროის დეფიციტი იყოს, ან ვითარება მოითხოვდეს თქვენგან სწრაფ მოქმედებებს, ასევე გარშემომყოფები გამუდმებით მოგმართავდნენ თხოვნით. ნებისმიერ შემთხვევაში, ამ ზეწოლისგან გათავისუფლება გაგიჭირდებათ, ამიტომ, სჯობს, შეეგუოთ ასეთ მდგომარეობას. ყველაფერს აჯობებს, განმარტოვდეთ, თუ ამის შესაძლებლობა გაქვთ და სიმშვიდეში მიხედოთ თქვენს საქმეებს.

სასწორი: დღეს იშვიათი შანსი გაქვთ, რომ რომელიმე საქმეში დიდი ნაბიჯი გადადგათ წინ. მთავარია, საჭირო მომენტი დროულად დაინახოთ, ხელიდან არ გაუშვათ და მტკიცედ, მკაფიოდ იმოქმედოთ. აქტიური და შეუპოვარი მოქმედებების წყალობით გამარჯვების დიდი შესაძლებლობა გაქვთ. გამოიყენეთ ეს დღე ახალი სიმაღლეების დასაპყრობად და კონკურენტების უკან ჩამოსატოვებლად.

მორიელი: დღეს სამართლიანობის გრძნობა გამძაფრდება თქვენში. მზად ხართ, ვინმე ან რამე საკუთარი მკერდით დაიცვათ, თუ ჩათვლით, რომ მას ჩაგრავენ და ავიწროებენ. რას იზამთ, ხანდახან ცუდი არაა სამართლიანობისთვის ბრძოლა და მოძალადისთვის ადგილის მიჩენა. თუმცა დღეს უსამართლობა შეიძლება იქაც „დაინახოთ“, სადაც ამის ნატამალიც კი არაა. ასე რომ, მეტი დაკვირვება გმართებთ, რომ განგაშის ზარი ტყუილუბრალოდ არ შემოჰკრათ.

მშვილდოსანი: დღეს, შესაძლოა, მთელი დღე ჭეშმარიტების ფუჭ ძებნაში დაკარგოთ, თან დარწმუნებული იყოთ, რომ ის „სადღაც აქვეა“. ეს ძებნა ნებისმიერ საკითხს შეიძლება უკავშირდებოდეს – ურთიერთობებს, მუშაობას, პირად ცხოვრებას. თუმცა, რაც არ უნდა მოგეჩვენოთ, რომ სამართლიანობა „ჰა და ჰა, გაიმარჯვებს“, იცოდეთ, რომ ეს მხოლოდ მოჩვენებაა. შეიძლება გაკვირვებულმა აღმოაჩინოთ, რომ „სუფთა სახის“ ჭეშმარიტება თითქმის უსარგებლო რამაა და თქვენ გარდა ის არავის სჭირდება.

თხის რქა: ასტროლოგები დღეს მხოლოდ პირდაპირი გზებით სიარულს გირჩევენ. საკუთარ თამაშის წამოწყების მცდელობას, ან, უფრო უარესი – რამის დამალვას ან დამახინჯებას, სავალალო შედეგები შეიძლება მოჰყვეს. თუ საჭირო შედეგის მიღება გსურთ, ღიად, პირდაპირ და პატიოსნად უნდა იმოქმედოთ. გარშემომყოფებიც სწორედ ამ თვისებებს დააფასებენ თქვენში. მაგრამ ერთიცაა – გულწრფელობასაც თავის საზღვრები აქვს და დაიცავის ეს ფარგლები.

მერწყული: დღეს საჭირო შედეგების მისაღწევად იმის ლაპარაკი მოგიწევთ, რასაც თქვენგან ელოდებიან და არა იმის, რასაც სინამდვილეში ფიქრობთ. ხანდახან შეიძლება გაჩუმებაც უპრიანი იყოს. რას იზამთ, გულწრფელობა ზოგჯერ უადგილოა ხოლმე და მით უმეტეს – მნიშვნელოვან საუბრებში, მოლაპარაკებებში. დღეს თუ სათქმელს პირდაპირ იტყვით, შეიძლება ავნოთ საქმესაც და საკუთარ თავსაც. თუ გაჩუმდებით, მომგებიან პოზიციაში აღმოჩნდებით.

თევზები: დღეს საქმიანობაში მტკიცედ და საბრძოლოდ ხართ განწყობილი. რატომ უნდა იწვალოთ კვანძის გახსნაზე, როცა მისი ნაჯახით გადაჭრა შეიძლება? ყველაზე საინტერესო ისაა, რომ ზოგიერთ საკითხში რადიკალური ზომები სწორედაც რომ ყველაზე მომგებიანი შეიძლება აღმოჩნდეს. მაგრამ ისეთ საქმეებს, რომლებიც დროსა და დელიკატურ დამოკიდებულებას საჭიროებს, სჯობს, სათოფეზეც არ გაეკაროთ. ან წინასწარ შეეგუოთ, რომ ისინი, ასეთ შემთხვევაში, სრული კრახისთვისაა განწირული.

0