თბილისი, 6 იანვარი — Sputnik. შობის დღესასწაულთან დაკავშირებით დღეს, 21:00 საათიდან 7 იანვრის 05:00 საათამდე გადაადგილებაზე შეზღუდვა არ იმოქმედებს.
გავრცელებული ინფორმაციით, შობის ღამეს გადაადგილების შეზღუდვა მოიხსნება როგორც ქვეითად, ისე ავტომობილით გადაადგილებისას.
ქვეყანაში ეპიდვითარების გაუარესების გამო 28 ნოემბრიდან მკაცრი შეზღუდვები მოქმედებს: სავალდებულოა პირბადის ტარება, 21:00 საათის შემდეგ გარეთ გასვლა იკრძალება, არ მუშაობს საზოგადოებრივი ტრანსპორტი, დაკეტილია სპორტული დარბაზები, სკოლები, საბავშვო ბაღები და ა.შ.
როგორც საკოორდინაციო საბჭოში განმარტავენ, მთელი ქვეყნის მასშტაბით 21:00 საათიდან 05:00 საათამდე გადაადგილების შეზღუდვა კვლავ ძალაში იქნება, გამონაკლისს მხოლოდ ახალი წლისა და შობის ღამეები წარმოადგენს.
ეპიდემიოლოგები მოსახლეობას მოუწოდებენ, საახალწლო დღეებში სიფრთხილე გამოიჩინონ და ხალხმრავალ შეკრებებს თავი აარიდონ.
