შშმ პირი ეტლით

შშმ პირთა ახალი უფლებები ძალაშია: კანონი სრულად ამოქმედდა

392
(განახლებულია 17:10 06.01.2021)
ამიერიდან შეზღუდული შესაძლებლობების მქონე პირები სრულად ისარგებლებენ ახალი უფლებებით, რომლებიც სახელმწიფომ მათთვის კანონში გაწერა.

თბილისი, 6 იანვარი — Sputnik. საქართველოში სრულად ამოქმედდა კანონი „შეზღუდული შესაძლებლობების მქონე პირთა უფლებების შესახებ“, რომელშიც მკაფიოდაა გაწერილი მათი დამოუკიდებელი ცხოვრებისთვის საჭირო ყველა შესაძლებლობა.

კანონის რამდენიმე თავი, რომელსაც პრეზიდენტმა სალომე ზურაბიშვილმა ხელი 2020 წლის 14 ივლისს მოაწერა, გამოქვეყნებისთანავე ამოქმედდა, ხოლო ორი თავი 2021 წლის 1 იანვრიდან შევიდა ძალაში.

როგორც კანონის ზოგად დებულებებშია ნათქვამი, კანონი განსაზღვრავს შეზღუდული შესაძლებლობის მქონე პირთათვის დისკრიმინაციის გარეშე და სხვებთან თანაბარ პირობებში დამოუკიდებელი ცხოვრების ძირითად პრინციპებსა და მექანიზმებს, რათა მიღწეულ იქნეს:

  • ინდივიდუალური ავტონომიისა და დამოუკიდებლობის, მათ შორის, თავისუფალი არჩევანის გაკეთების, თავისუფალი გადაადგილების, პირადი და ოჯახური ცხოვრების ხელშეუხებლობის, მათ შორის, საცხოვრებელი ადგილის თავისუფლად არჩევის უფლების რეალიზება;
  • დამოუკიდებელი ცხოვრებისთვის შესაძლებლობების განვითარება და საზოგადოებრივ ცხოვრებაში სრულყოფილი მონაწილეობა;
  • საზოგადოებაში შეზღუდული შესაძლებლობის მქონე პირთა სტიგმატიზაციის პრევენცია და აღმოფხვრა;
  • შეზღუდული შესაძლებლობის მქონე პირთა ექსპლუატაციისგან, ძალადობისგან, არასათანადო მოპყრობისა და დისკრიმინაციისგან დაცვა;
  • ნებისმიერ სფეროში მომსახურების ხელმისაწვდომობა.

კანონის ნორმების თანახმად, სახელმწიფო ხელს უწყობს შეზღუდული შესაძლებლობის მქონე პირთა უფლებებისა და ძირითადი თავისუფლებების რეალიზებას და უზრუნველყოფს მათი პიროვნული ღირსების დაცვას.

ასეთ გარანტიათა შორისაა განათლების უფლების სრული რეალიზება, მათ შორის, განათლების ინკლუზიურ სისტემაზე წვდომის უზრუნველყოფა, რომელიც შშმ პირს საშუალებას აძლევს მიიღოს არა მარტო საშუალო, არამედ უმაღლესი განათლებაც.

გარდა ამისა, შშმ პირებისთვის ამოქმედდება პროფესიული ორიენტაციის პროგრამები.

ამიერიდან ხელისუფლება ასევე იზრუნებს შშმ პირებისთვის სამკურნალო დაწესებულებების მომსახურებაზე წვდომის გაუმჯობესებასა და რეაბილიტაციის ახალი სახელმწიფო პროგრამების შექმნაზე.

სახელმწიფო ასევე იღებს ვალდებულებას, იზრუნოს შშმ პირების დასაქმებაზე სპეციალური პროგრამებისა და სპეციალური მექანიზმების შექმნის გზით დამსაქმებელთან ურთიერთობის დასარეგულირებლად.

გარდა ამისა, სახელმწიფო შესაძლებლობას მისცემს შეზღუდული შესაძლებლობების მქონე პირებს, დაქორწინდნენ მეურვის თანხმობის გარეშე და ასევე თავად გადაწყვიტონ, რამდენი შვილის ყოლა სურთ და რა ინტერვალით.

შშმ პირებს მიენიჭათ უფლება, თავად წარმოადგინონ საკუთარი უფლებები პოლიციაში, ნოტარიუსსა და სასამართლოში.

კანონის თანახმად, შშმ პირი, ადგილობრივი ხელისუფლების ორგანოებში მიმართვისას, შეძლებს მიიღოს პერსონალური ასისტენტის მომსახურება, რომელიც დაეხმარება მას ყოველდღიურ ცხოვრებაში თუ სახელმწიფო სერვისებით სარგებლობაში.

ბოლო, 2017 წლის მონაცემებით, საქართველოში 124,5 ათასი შშმ პირი ცხოვრობდა. ამ მომენტისთვის უცნობია, რამდენი შეზღუდული შესაძლებლობების მქონე პირი ცხოვრობს საქართველოში, ვინაიდან კონფიდენციალური მონაცემების გავრცელება აკრძალულია.

392
ლაბორატორია

COVID-19 საქართველოში 16 აპრილის მონაცემები

27
(განახლებულია 10:53 16.04.2021)
ამ დროისათვის სულ გამოჯანმრთელდა 279.831 ადამიანი (ბოლო 24 საათში – 442), გარდაიცვალა – 3.916 (ბოლო 24 საათში – 9), კარანტინის რეჟიმშია 331, სტაციონარებში ექიმების დაკვირვების ქვეშ 2.720 პაციენტი, ხოლო კოვიდ–სასტუმროებში 400 ადამიანი იმყოფება.

თბილისი, 16 აპრილი – Sputnik. საქართველოში ახალი კორონავირუსით დაავადებულთა რაოდენობა ბოლო დღე-ღამეში 1.077-ით გაიზარდა და ინფიცირებულთა საერთო რიცხვმა 293.321-ს მიაღწია. ინფორმაცია საქართველოს მთავრობის სპეციალურ ვებ-გვერდზე stopcov.ge განახლდა.

ამ დროისათვის სულ გამოჯანმრთელდა 279.831 ადამიანი (ბოლო 24 საათში – 442), გარდაიცვალა – 3.916 (ბოლო 24 საათში – 9), კარანტინის რეჟიმშია 331, სტაციონარებში ექიმების დაკვირვების ქვეშ 2.720 პაციენტი, ხოლო კოვიდ–სასტუმროებში 400 ადამიანი იმყოფება.

ბოლო 24 საათში ჩატარებულია 31.645 ტესტი, მათ შორის ანტიგენის სწრაფი ტესტით – 20.727, PCR–ტესტით – 10.918.

დადებითობის მაჩვენებელი: დღიური - 3,4%, ბოლო 14 დღის - 2,77%, ბოლო 7 დღის - 2,04%.

საქართველოში კორონავირუსის პირველი შემთხვევა 2020 წლის 26 თებერვალს დაფიქსირდა.

27
თემები:
კორონავირუსი საქართველოში: ბოლო ცნობები
მოწევა აკრძალულია!

ტაქსიში და საკუთარ ავტომობილში თამბაქოს მოხმარება შეიძლება აიკრძალოს

20
(განახლებულია 10:41 16.04.2021)
გამოიკვეთა მონიტორინგის გააქტიურების აუცილებლობა საჯარო და სამედიცინო დაწესებულებებში, სადაც თამბაქოს მოხმარების წესების დარღვევის ხშირი ფაქტები ფიქსირდება

თბილისი, 16 აპრილი – Sputnik.  თამბაქოს მოხმარება ტაქსიში ან საკუთარ ავტომობილში, სადაც ბავშვები იმყოფებიან, შეიძლება აიკრძალოს, შესაბამისი რეკომენდაცია პარლამენტმა უკვე მიიღო.

 „თამბაქოს კონტროლის შესახებ“ საქართველოს კანონის აღსრულების მდგომარეობის თაობაზე პარლამენტის დადგენილების თანახმად, მონიტორინგის საფუძველზე ტაქსისა და ავტომობილებში თამბაქოს მოხმარების აკრძალვის შემოღების აუცილებლობა გამოვლინდა, რადგანაც ხშირი შემთხვევებია, როდესაც თამბაქოს მოხმარება არასრულწლოვნების თანდასწრებით ხდება.

გარდა ამისა, გამოვლინდა აუცილებლობა საჯარო და სამედიცინო დაწესებულებებში  თამბაქოს მოხმარების წესების აღსრულების კონტროლისა,  სადაც კანონის ხშირი დარღვევა ფიქსირდება. 

გარდა ამისა, კვლევის შედეგებმა გამოავლინა  ინტერნეტ–სივრცეში თამბაქოსა და თამბაქოს ნაწარმის რეკლამის შემთხვევები და ქვეყანაში სიგარეტის საცალო გაყიდვის პრაქტიკა.

მთლიანობაში საქართველოში თამბაქოს საწინააღმდეგო კანონმდებლობა  დადებითად ფასდება. პარლამენტის მონაცემებით, კანონი იშვიათად ირღვევა, თამბაქოს მოხმარებასთან დაკავშირებული დაავადებები კი მცირდება.

საქართველოს პარლამენტმა „თამბაქოს კონტროლის შესახებ" კანონი 2017 წლის მაისში დაამტკიცა. 2018 წლის 1 მაისიდან საქართველოში თამბაქოს მოხმარება აკრძალულია საზოგადოებრივ ადგილებში – ბარებში, რესტორნებში, სასტუმროებში, კაფეებსა და ნებისმიერ სხვა შენობაში. გამონაკლისს კაზინო, ბარებისა და რესტორნების ღია ვერანდები და ტერასები, სათამაშო აპარატების სალონები, ასევე უმაღლესი სასწავლებლებისა და სამედიცინო დაწესებულებების ტერიტორიებზე გამოყოფილი სპეციალური ადგილები წარმოადგენს. თამბაქოს მოხმარება შეუძლიათ მსახიობებსაც სპექტაკლის დროს – რეჟისორის შემოქმედებითი ჩანაფიქრის განხორციელების მიზნით, მსახიობის მიერ როლის შესრულებისას.

ერთ კოლოფ უფილტრო ან ფილტრიან სიგარეტზე აქციზის ფასი 1,7 ლარია. ამასთან, ფილტრიან სიგარეტზე ადვალური გადასახადი გაიზარდა: 10-დან 30%-მდე კოლოფის ღირებულებიდან გამომდინარე. დღეისთვის საქართველოში ერთი კოლოფი თამბაქოს ფასი 5,5 ლარიდან იწყება. შედარებისთვის 2017 წელს ერთი კოლოფი სიგარეტი დაახლოებით 1,5 ლარი იყო.

20