ტესტირება

თამარ გაბუნია: ჯერ ვერ ვიტყვით, რომ პიკი გადავიარეთ

55
(განახლებულია 19:48 29.12.2020)
ჯანდაცვის სამინისტრო თავს იკავებს იმისგან, რომ ქვეყანაში არსებულ ეპიდვითარებას „სტაბილური“ უწოდოს, თუმცა „სტაბილურობის ნიშნები გამოიკვეთა“.

თბილისი, 29 დეკემბერი – Sputnik. ჯერ ნაადრევია იმაზე საუბარი, რომ საქართველომ კორონავირუსის პანდემიის პიკი გაიარა, განაცხადა ბრიფინგზე ქვეყნის ჯანდაცვის მინისტრის მოადგილემ თამარ გაბუნიამ.

გახარია: მოვუწოდებ მოქალაქეებს, მარტივი სიმპტომების შემთხვევაშიც გაიკეთონ ტესტი>>

მისი თქმით, მდგომარეობის გაუმჯობესებაზე საუბარი ჯერ ადრეა, მაგრამ შეიძლება იმის თქმა, რომ სტაბილიზაციის ნიშნები იკვეთება.

„თუმცა, იმისი დაბეჯითებით თქმა, რომ პიკი გადავიარეთ და უკვე დაღმავალი ტენდენცია გვაქვს ეპიდემიის მიმდინარეობაში, ცოტა რთულია და ამაზე საუბარი ნაადრევია. თითოეული შემსუბუქება და შეზღუდვა საჭიროებს ორკვირიან ინტერვალს იმისთვის, რომ შედეგები მეტად თვალსაჩინო იყოს. ჩვენი პოზიციაა, რომ ამ შემთხვევაში არ უნდა ვიჩქაროთ“, – განაცხადა გაბუნიამ.

სტაბილიზაციის ნიშნები ჰოსპიტალურ სექტორშიც შეინიშნება. ეს განსაკუთრებით იგრძნობა აჭარაში, სადაც ეს სექტორი ამჟამად ნახევრად არის დატვირთული.

ამ დროისათვის ქვეყნის სტაციონარებში 5 ათასზე მეტი ინფიცირებული მკურნალობს. თავისუფალია 2 ათასამდე ადგილი.

გაბუნიას თქმით, შეუძლებელია კორონავირუსის ქცევისა და მიმდინარეობის პროგნოზირება. უფრო მეტიც, საქართველო უნდა ელოდოს ახალ შტამებსა და ტალღისებურ დინებებს მანამ, სანამ მოსახლეობა არ აიცრება.

გაბუნიამ აღნიშნა, რომ დამატებითი საწოლების მობილიზება თბილისის რესპუბლიკურ საავადმყოფოში 2021 წელსაც გაგრძელდება. მან ასევე დასძინა, რომ უწყების პრიორიტეტი იქნება პირველადი ჯანდაცვის, ასევე რიგი არანაკლებ მნიშვნელოვანი მიმართულებების გაძლიერება.

55
მდინარე რიონი

ნამახვან ჰესის კასკადის მშენებლობა: რიონის ხეობაში ორი პარალელური აქცია გაიმართა

19
(განახლებულია 17:22 16.01.2021)
რიონზე „ნამახვანის ჰესების კასკადის“ მშენებლობას მოსახლეობა უკვე რამდენიმე თვეა აპროტესტებს. მათი თქმით, გიგანტური ჰესის მშენებლობა ტერიტორიის დატბორვას გამოიწვევს, შედეგად კი მოსალოდნელია ეკოლოგიური კატასტროფა და მოსახლეობის დიდი ნაწილი უსახლკაროდ დარჩება

თბილისი, 16 იანვარი - Sputnik. მდინარე რიონის ხეობის სოფლებში ნამახვან ჰესის კასკადის მშენებლობის მომხრეთა და მოწინააღმდეგეთა აქციები გაიმართა, იუწყება პირველი არხი.

სოფელ ოფურჩხეთში მოსახლეობის ნაწილმა აქცია  სახელწოდებით „არ გააჩერო ნამახვანჰესი“ გამართა. აქციის მონაწილეების განცხადებით,  ნამახვანჰესის მშენებლობა უნდა გაგრძელდეს. მათი თქმით, ჰესის მშენებლობის შემთხვევაში განვითარდება ინფრასტრუქტურა, ტურიზმი, შეიქმნება სამუშაო ადგილები და ემიგრანტები სამშობლოში დაბრუნდებიან.

ასევე, სოფელ ჟონეთში პარალელური აქცია გამართეს ჰესის მშენებლობის მოწინააღმდეგეებმაც. მათი განცხადებით, უკვე 83-ე დღეა, ჰესის მშენებლობას აპროტესტებენ. აქციის მონაწილეების მტკიცებით,  ვერც ხელისუფლებისგან და ვერც ჰესის მშენებელი კომპანიისგან ამ დრომდე ვერ მიიღეს უსაფრთხოების გარანტიები. ისინი პროტესტის შეწყვეტას არ აპირებენ და ამტკიცებენ, რომ ჰესის მშენებლობა 500 ჰექტარი მიწის დატბორვას გამოიწვევს, მათ შორის ტყეების, სავარგულების, რამდენიმე სოფლის, რის გამოც ათეულობით ოჯახი უსახლკაროდ დარჩება. ისინი აცხადებენ, რომ ეს ტერიტორია მეწყერსაშიშია და ჰესის მშენებლობით გამოწვეული საფრთხეები მთელს დასავლეთ საქართველოს ემუქრება.

როგორც ადრე ეკონომიკის მინისტრმა ნათია თურნავამ განაცხადა, „ნამახვანიჰესი“ ძალიან მნიშვნელოვანი პროექტია ენერგეტიკული უსაფრთხოების განმტკიცების კუთხით, თურქული კომპანია „ენკა" (ENKA) ძალიან აქტიურად მუშაობს მოსახლეობასთან, მათ შორის სოციალური პროექტების განხორციელების მიმართულებით. მისი თქმით, პროექტის ფარგლებში საერთო ჯამში 2000 საქართველოს მოქალაქე დასაქმდება.

თავის მხრივ, კომპანია Enka Riniubels, რომელიც ნამახვან ჰესის კასკადის პროექტს ახორციელებს, ამტკიცებს, რომ კასკადის საპროექტო სამუშაოებიჯერ კიდევ 1930-იან წლებში დაიწყო, ხოლო პირველი ტექნიკურ-ეკონომიკური დასაბუთება 1972 წელს გაკეთდა. 2006 წელს დეტალური კვლევები ჩაატარა USAID-ის საერთაშორისო განვითარების სააგენტომ, ხოლო 2007 წელს - კომპანია Hydroproject International-მა. პროექტის განხორციელებადობის საბოლოო კვლევა ეკუთვნის იტალიურ კომპანია Studio Pietrangel-ს, რომელმაც ის 2015 წელს შეასრულა.

კომპანიაში იუწყებიან, რომ ტენდერის მოგების შემდეგ Enka Riniubels-მა განმეორებითი კვლევა ჩაატარა თითქმის ყველა ასპექტზე, რომელიც ადრე არის შესწავლილი.

განსაკუთრებული ყურადღება კომპანიამ დაუთმო ისეთ საკითხებს, როგორებიცაა ჰიდროგეოლოგია, მეწყრული საფრთხის ზონის სეისმურობა, ჰიდროლოგია და კაშხლის უსაფრთხოება.

მდინარე რიონზე „ნამახვანის ჰესების კასკადის“ პროექტი გააერთიანებს ორ ჰესს - „ნამახვანს“ და „ტვიშს“, 433 მეგავატის საერთო დადგმული სიმძლავრით. პროექტის სავარაუდო ღირებულება 730 მილიონ დოლარს შეადგენს.

პროექტს განახორციელებს Clean Energy Georgia Group, რომელმაც შესაბამის ტენდერში გაიმარჯვა. ჰესის ასაშენებლად Clean Energy Georgia Group, რომელიც ნორვეგიული ჯგუფ Clean Energy-ს შვილობილი კომპანიაა, თურქულ სამშენებლო ჰოლდინგ ENKA Insaat ve Sanayi A.S-ს მოიზიდავს.

19

თბილისში ხმაურიანი აქცია გაიმართა „ქართული ოცნების“ ყრილობის წინააღმდეგ - ვიდეო

61
არასამთავრობო და სამოქალაქო ორგანიზაციების წარმომადგენლებმა მმართველი პარტია „ქართული ოცნების“ ყრილობის წინ ხმაურიანი აქცია გამართა თბილისში. დაწვრილებით - იხილეთ ვიდეოში

საპროტესტო აქცია საგამოფენო ცენტრი ExpoGeorgia-ს ტერიტორიაზე გაიმართა, სადაც „ქართული ოცნების“ ყრილობა ტარდებოდა. პოლიციამ რამდენიმე ადამიანი დააკავა.

სიტუაცია მას შემდეგ დაიძაბა, რაც მონაწილეებმა საგამოფენო ცენტრთან ანტისამთავრობო ლოზუნგების შემცველი დიდი პლაკატის დაყენება დააპირეს. როგორც კი მათ გზის გადაკეტვა სცადეს, მათსა და პოლიციას შორის დაპირისპირება მოხდა.

მმართველი პარტიის ყრილობის მთავარი მიზანი პარტიის ახალი ხელმძღვანელისა და პოლიტსაბჭოს წევრების არჩევნებია. პარტიაში ცვლილებები მას შემდეგ გახდა საჭირო, რაც ბიძინა ივანიშვილმა პოლიტიკიდან წასვლის შესახებ განაცხადა.

61
ზორან მარუშიჩი

თბილისის „დინამომ“ სერბ თავდამსხმელთან კონტრაქტი გააფორმა

0
(განახლებულია 17:41 16.01.2021)
კარიერის უმეტესი ნაწილი მარუშიჩმა სერბეთისა და ბოსნიის და ჰერცეგოვინას კლუბებში გაატარა, „დინამოში“ კი ბელარუსის ჩემპიონატიდან გადავიდა

თბილისი, 16 იანვარი — Sputnik. საქართველოს მოქმედმა ჩემპიონმა ფეხბურთში - თბილისის „დინამომ“ სერბ თავდამსხმელთან, ზორან მარუშიჩთან კონტრაქტი გააფორმა, ნათქვამია კლუბის Facebook-გვერდზე გავრცელებულ განცხადებაში.

შეთანხმება „დინამოსა“ და 27 წლის ფორვარდს შორის, რომელიც თავისუფალი აგენტის სტატუსით სარგებლობს, 1+1 სისტემით არის შედგენილი. გარიგების ფინანსური მხარე არ საჯაროვდება.

მარუშიჩი „დინამოში“ გადავიდა ბელარუსის ჩემპიონატიდან, სადაც გროდნოს „ნემანის“ სახელით ასპარეზობდა. კლუბის შემადგენლობაში სერბმა თავდამსხმელმა 28 მატჩი ჩაატარა, 11 გოლი გაიტანა და ოთხი შედეგიანი გადაცემა გააკეთა.

კარიერის უმეტესი ნაწილი მარუშიჩმა სერბეთისა და ბოსნიის და ჰერცეგოვინას კლუბებში გაატარა. გამოცემა transfermarkt.com-ის შეფასებით, თავდამსხმელის შეფასება 500 ათას ევროს შეადგენს.

0