ეპიდემია საქართველოში – დაკეტილი სავაჭრო ცენტრები

ეპიდემიოლოგები შეზღუდვების მინიმალურ შემსუბუქებას ემხრობიან

101
(განახლებულია 17:16 21.12.2020)
საქართველო კორონავირუსის მეორე ტალღას ებრძვის. მას შემდეგ, რაც ინფიცირების დღიურმა მაჩვენებელმა 4 ათასს გადააჭარბა, მთავრობამ ქვეყანაში დამატებითი შეზღუდვების შემოღების გადაწყვეტილება მიიღო.

თბილისი, 21 დეკემბერი – Sputnik. ქართველი ეპიდემიოლოგები ქვეყანაში ეპიდვითარების გაუარესების გამო ნოემბრის ბოლოს დაწესებული შეზღუდვების საახალწლო პერიოდში მინიმალურ შემსუბუქებას უჭერენ მხარს. 

სპეციალისტების განცხადებით, ქვეყანაში ეპიდვითარების სტაბილიზაციის ელემენტები შეინიშნება, მაგრამ სადღესასწაულო პერიოდში კორონავირუსის გავრცელების საკმაოდ დიდი რისკია.

„დაწესებულმა შეზღუდვებმა გარკვეულწილად შეამცირა ინფიცირებულთა რაოდენობა, თუმცა მაჩვენებელი მცირე მაინც არ არის და ქვეყანაში სიტუაცია კვლავ დრამატულია. ვფიქრობ, რომ ყველა შეზღუდვა არ უნდა მოიხსნას, რადგან ეს ინფიცირებულების მატებას აუცილებლად გამოიწვევს", – განაცხადა თბილისის ინფექციური პათოლოგიისა და შიდსის ცენტრის ბოქსირებული განყოფილების უფროსმა მარინა ენდელაძემ.

შეზღუდვების გაუქმების შემთხვევაში ეპიდემიოლოგები მოსახლეობას შობა–ახალი წლის მოკრძალებულად აღნიშვნისა და დაწესებული რეკომენდაციების მაქსიმალური დაცვისკენ მოუწოდებენ.

„24 დეკემბრიდან შეზღუდვების მოხსნასთან დაკავშირებით, ალბათ, უფრო მეტი სიფრთხილეა საჭირო, რადგანაც შექმნილ ეპიდსიტუაციაში შეზღუდვების არსებობა არის ერთადერთი გამოსავალი. (წინააღმდეგ შემთხვევაში) იანვრის თვეში შეიძლება ინფიცირების კატასტროფული მაჩვენებელი გვქონდეს“, – განაცხადა მედიცინის აკადემიურმა დოქტორმა მაკა ბულეიშვილმა. 

არსებული შეზღუდვების მოხსნას არ ემხრობა საქართველოს დაავადებათა კონტროლისა და საზოგადოებრივი ჯანმრთელობის ეროვნული ცენტრი, განაცხადა ცენტრის ხელმძღვანელმა ამირან გამყრელიძემ.

„ჩვენ უფრო რადიკალური პოზიციის მომხრე ვართ. რამე მნიშვნელოვანი შემსუბუქების რეკომენდაციას არ ვიძლევით, რადგან გამოჩნდა ე.წ. სტაბილიზაციის ტენდენცია ქვეყანაში და ყველაფერი წყალში არ უნდა ჩავყაროთ. საქართველოსთვის ყოველდღიურად 2–3 ათასი შემთხვევა ძალიან ბევრია, რაც ჯანდაცვის სექტორზე დიდ ზეწოლას ახდენს“, – განაცხადა გამყრელიძემ.

მისი თქმით, შეზღუდვები და რეკომენდაციების დაცვა კორონავირუსის გავრცელების ყველაზე ეფექტური საშუალებაა.

ქვეყანაში არსებული ეპიდსიტუაციის გათვალისწინებით საქართველოს მთავრობამ დამატებითი წერტილოვანი შეზღუდვების დაწესების გადაწყვეტილება მიიღო. შეზღუდვები 28 ნოემბრიდან ამოქმედდა. ამასთან, ხელისუფლებამ პირობა დადო, რომ 24 დეკემბრიდან 2 იანვრამდე მთელ საქართველოში გაიხსნება სავაჭრო ცენტრები, აღდგება საქალაქთაშორისო ტრანსპორტის მუშაობა და შობა–ახალი წლის დღესასწაულთან დაკავშირებით დროებით გაუქმდება სხვა შეზღუდვებიც. 

ბოლო მონაცემებით, საქართველოში კორონავირუსით ინფიცირებულთა საერთო რაოდენობამ 208.638 შეადგინა. გამოჯანმრთელდა 180.441 ადამიანი, გარდაიცვალა 2.094 პაციენტი.

101
თემები:
COVID-19 საქართველოში (2862)
ნინო ლომჯარია

სახალხო დამცველს ვაქცინაციის ეროვნულ გეგმასთან შენიშვნები არ აქვს

24
(განახლებულია 18:02 19.01.2021)
როგორც ნინო ლომჯარიამ აღნიშნა, ომბუდსმენის აპარატი კორონავირუსის საწინააღმდეგო ვაქცინაციის პროცესს მუდმივ მონიტორინგს გაუწევს

თბილისი, 19 იანვარი – Sputnik. საქართველოს სახალხო დამცველის აპარატს საერთაშორისო და ადამიანის უფლებების დაცვის სტანდარტების თვალსაზრისით ვაქცინაციის გეგმასთან შენიშვნები არ აქვს, იუწყება მთავრობის ადმინისტრაციის პრეს–სამსახური. 

 „ჩვენ შევაფასეთ  ვაქცინაციის ეროვნულ გეგმაში მოცემული პრიორიტეტული მიმართულებები საერთაშორისო სტანდარტებთან და ადამიანის უფლებების დაცვის სტანდარტებთან მიმართებით და ჩვენ  შენიშვნები არ გვაქვს“, – განაცხადა საქართველოს სახალხო დამცველმა ნინო ლომჯარიამ პრემიერ-მინისტრ გიორგი გახარიასთან ვაქცინაციის კომისიის წევრებთან გამართული შეხვედრის შემდეგ.

ლომჯარიას თქმით, სახალხო დამცველის აპარატმა ვაქცინაციის ეროვნული გეგმის შემუშავებაში უშუალო მონაწილეობა მიიღო.

 „ჩვენ ამ ეტაპზე გეგმასთან დაკავშირებით შენიშვნები არ გვაქვს ადამიანის უფლებების დაცვის სტანდარტებთან მიმართებით, თუმცა, დავაკვირდებით უშუალოდ ვაქცინაციის პროცესს,  რამდენად წარიმართება ის გეგმის შესაბამისად და მაქსიმალურად ვეცდებით, საზოგადოებას მივაწოდოთ ობიექტური ინფორმაცია ყველა იმ საკითხზე, რაც ეხება ვაქცინების უსაფრთხოებას და მთელ ამ პროცესს“, – აღნიშნა  ლომჯარიამ. 

საქართველომ ვაქცინაციის ეროვნულ გეგმაზე მუშაობა პრაქტიკულად დაასრულა. საქართველოს პრემიერ–მინისტრმა კოვიდ–ვაქცინაციის ეროვნულ გეგმაზე მომუშავე კომისიის წევრებთან და ექსპერტებთან გეგმის საბოლოო დეტალებთან დაკავშირებით მორიგი შეხვედრა გამართა.

COVAX–პლატფორმამ საქართველოსგან 18 იანვარს დასტური მიიღო იმასთან დაკავშირებით, რომ ქვეყანა მზადაა მიმდინარე წლის პირველ კვარტალში კორონავირუსის საწინააღმდეგო ვაქცინა მიიღოს. ეკონომიკის სრული გახსნისთვის აუცილებელია ზრდასრული მოსახლეობის 60%–ის ვაქცინაცია, რისთვისაც დაახლოებით 164 მლნ ლარი იქნება საჭირო.

ვაქცინაციისთვის უკვე განისაზღვრა პრიორიტეტული ჯგუფები: ჯანდაცვის სექტორი, თავშესაფრებისა და სხვა მსგავსი დაწესებულებების პერსონალი და ბენეფიციარები, 75 წელს ზემოთ ასაკის მოსახლეობა, 65–დან 74 წლამდე მოსახლეობა, ქრონიკული დაავადებების მქონე 18–54 წლის პირები. შემდგომ იგეგმება მოსახლეობის დანარჩენი ნაწილის ვაქცინაცია, მათ შორის, იმ პირების, რომელთაც ვირუსი გადაიტანეს.

24
თემები:
კორონავირუსი საქართველოში: ბოლო ცნობები
სპეცტექნიკა გზებზე

გუდაური-კობის გზის ნაწილზე ზვავსაშიშროება მოიხსნა

28
(განახლებულია 17:37 19.01.2021)
გუდაური-კობის მონაკვეთზე ზვავსაშიშროების გამო ტრანსპორტის მოძრაობა 11 იანვრიდან აიკრძალა – გზაზე სატვირთო ავტომობილების საცობია

თბილისი, 19 იანვარი - Sputnik. საერთაშორისო მნიშვნელობის მცხეთა–სტეფანწმინდა–ლარსის საავტომობილო გზის გუდაური–კობის მონაკვეთზე გაწმენდითი სამუშაოები დაიწყო, ნათქვამია საავტომობილო გზების დეპარტამენტის მიერ გავრცელებულ განცხადებაში. 

გზის აღნიშნულ მონაკვეთზე კვირაზე მეტია რთული მეტეოროლოგიური პირობების გამო ყველა სახის ტრანსპორტის გადაადგილება აკრძალულია. ინტენსიური თოვისა და დაბალი ტემპერატურის გამო გზის აღნიშნულ მონაკვეთზე ზვავსაშიშროების საფრთხის მაღალი დონეა.

უწყების ცნობით, გზის გაწმენდითი სამუშაოები როგოც გუდაურის, ისე კობის მხრიდან ინტენსიურ რეჟიმში მიმდინარეობს. კერძოდ,  საავტომობილი გზის 93-99-ე და 105-107-ე კმ მონაკვეთებზე, სადაც ზვავსაშიშროება უკვე მოიხსნა. რაც შეეხება გზის 100-104-ე კმ. მონაკვეთს, აქ ზვავსაშიშროების რეჟიმი  კვლავ ნარჩუნდება.

„აღნიშნულ მონაკვეთზე გაწმენდითი სამუშაოები ზვავსაშიშროების რეჟიმის მოხსნისთანავე დაიწყება, რათა უმოკლეს ვადებში აღდგეს ავტოტრანსპორტის მოძრაობა“, – ნათქვამია განცხადებაში.

მცხეთა–სტეფანწმინდა–ლარსის ტრასა დღეისათვის ერთადერთი სახმელეთო გზაა, რომელიც საქართველოსა და სომხეთს რუსეთთან აკავშირებს.


28
თემები:
უამინდობა საქართველოში
კორონავირუსის საწინააღმდეგო რუსული ვაქცინა „ეპივაკკორონა“

„ეპივაკკორონა“ 100%-ით ეფექტურია: „როსპოტრებნადზორმა“ დეტალები გაასაჯაროვა

0
კორონავირუსის საწინააღმდეგო რუსულმა ვაქცინამ „ეპივაკკორონა“ კლინიკური ცდების დროს უმაღლესი დონის ეფექტურობა აჩვენა

თბილისი, 19 იანვარი – Sputnik. „როსპოტრებნადზორის“ პრესსამსახურმა განაცხადა, რომ COVID-19-ის საწინააღმდეგო პრეპარატ „ეპივაკკორონას“ იმუნოლოგიურმა ეფექტურობამ კლინიკური ცდების პირველი და მეორე ფაზების შედეგების მიხედვით 100% შეადგინა.

ვაქცინა კუნთებში ორჯერ გაკეთდება 14–21 დღიანი ინტერვალით და თითოეული ინექციის რაოდენობა 0,5 მილილიტრი იქნება.

ასევე დასაშვებია ვაქცინის ერთი კომპონენტით აცრა იმ შემთხვევაში, თუ ადამიანმა COVID-19 ადრე გადაიტანა.

„მაგრამ „ეპივაკკორონას“ ერთი დოზის ინიექცია არ გამოიწვევს სიძლიერითა და ხანგრძლივობით ოპტიმალურ იმუნურ პასუხს“, - დააზუსტეს „როსპოტრებნადზორში“ და აღნიშნეს, რომ ეს საკითხი დამატებით კვლევას მოითხოვს.

„ეპივაკკორონა“, რომელიც ნოვოსიბირსკის სამეცნიერო ცენტრ „ვექტორში“ პეპტიდური ანტიგენების საფუძველზე შექმნეს, ოქტომბერში დაარეგისტრირეს. ცდების მესამე ეტაპი გრძელდება: მათში მონაწილეობას 40 ათასი მოხალისე იღებს, მათ შორის 60 წელს ზემოდ ასაკის და ქრონიკული დაავადებების მქონე ადამიანები. სამოქალაქო ბრუნვაში უკვე გამოშვებულია 45 ათასი დოზა, მასშტაბური წარმოება თებერვალში დაიწყება.

0