ვაქცინაციის კაბინეტი

გრიპის რომელი ვაქცინა უკეთესია: ბიძინა კულუმბეგოვის განმარტება

427
სახელმწიფომ წელს 235 ათასი დოზა გრიპის ვაქცინა შეიძინა, აქედან გამოყენებულია მხოლოდ 170 ათასამდე დოზა

თბილისი, 13 დეკემბერი – Sputnik. გრიპის საწინააღმდეგო ოთხკომპონენტიანი ვაქცინა უფრო ძლიერია და იმუნური სისტემის პასუხს თითქმის ერთ კვირაში აყალიბებს, ამის შესახებ ისაუბრა ალერგოლოგ-იმუნოლოგმა, ბიძინა კულუმბეგოვმა.

საქართველოში შემოტანილია ორი ტიპის გრიპის საწინააღმდეგო ვაქცინა: სამკომპონენტიანი და ოთხკომპონენტიანი.

კულუმბეგოვის თქმით, სამ და ოთხკომპონენტიანი ვაქცინები, შინაარსობრივად განსხვავდება. სამკომპონენტიანი ვაქცინა უფრო დახვეწილი და რაფინირებულია. გვერდითი მოვლენები, ტკივილი, ტემპერატურა ნაკლებად ახასიათებს. ამავე დროს, ცოტა გვიან აყალიბებს იმუნურ პასუხს - დაახლოებით ორი კვირა სჭირდება. ამიტომ, აცრისთვის იდეალური პერიოდია ოქტომბერი-ნოემბერი, ვიდრე შტამი გამოჩნდება. ოთხკომპონენტიანი ვაქცინა კი უფრო ძლიერია და იმუნური სისტემის პასუხი თითქმის ერთ კვირაში ყალიბდება, აცხადებს სპეციალისტი.

ბიძინა კულუმბეგოვმა განმარტა, რომელი ვაქცინა უფრო ეფექტურია მაშინ, როცა გრიპის ვირუსი ცირკულაციას იწყებს.

„გრიპის ორი, A და B შტამები, ორი სახეობითაა წარმოდგენილი 4-კომპონენტიან ვაქცინაში. 3-კომპონენტიანში ორივე A შტამია და B-დან მარტო ერთია. გრიპის შტამებს შორის, მთავარი სირთულე ახასიათებს H1N1-ს, ე.წ. „ღორის გრიპს“, რომელიც ორივე ვაქცინაში შედის, რადგან ის ყველაზე აგრესიულია. კიდევ ერთი შტამია H3N2, რომელიც არცთუ ისე მარტივ გრიპს იწვევს. ორივე გრიპის ვაქცინა ამ მოთხოვნებს აკმაყოფილებს, თუმცა ახლა დიდი ხელმისაწვდომობაა ოთხ კომპონენტიანი ვაქცინის, სადაც B ჯგუფის ორივე შტამი იქნება“, - განაცხადა ალერგოლოგ-იმუნოლოგმა ბიძინა კულუმბეგოვმა ტელეკომპანია Imedi-ს ეთერში.

საქართველოში გრიპის ვირუსი, როგორც წესი, ნოემბერში ფიქსირდება და პიკს დეკემბერი–იანვარში აღწევს. საქართველოში ყველაზე ხშირად B ტიპის ვირუსი ფიქსირდება, რომელიც ხასიათდება კლინიკურად შედარებით მსუბუქი და საშუალო სიმძიმის მიმდინარეობით. ასევე ხვდება A ტიპის – H3 და H1 ვირუსები, აგრეთვე რინოვირუსები.

რაც შეეხება პრევენციულ ზომებს, იგი ისეთივეა, როგორც კორონავირუსის შემთხვევაში – ხელების ხშირი დაბანა, სოციალური დისტანციის დაცვა, პირბადის ტარება. განსხვავება იმაში მდგომარეობს, რომ გრიპის საწინააღმდეგო ვაქცინა არსებობს.

საქართველოში გრიპის საწინააღმდეგო ვაქცინის ჩატარება რისკ-ჯგუფში შემავალი პირებისთვის უფასოა. აღნიშნულ კატეგორიაში შედიან ქრონიკული დაავადებების მქონე პირები, აივ-ინფექციით და C ჰეპატიტით დაავადებული პირები, ორსულები, მოხუცებულთა და ბავშვთა სახლების ბენეფიციარები, სკოლების, ბაღების პედაგოგები და მომვლელი პერსონალი, სამხედროები, მაშველები და მედპერსონალი.

ქვეყანაში გრიპის საწინააღმდეგო ვაქცინა კერძო სექტორსაც შემოაქვს, რომლით სარგებლობაც საზოგადოების დიდ ნაწილს შეუძლია – ამ შემთხვევაში ვაქცინაცია ფასიანია.

საქართველოს მოსახლეობაში გრიპის საწინააღმდეგო ვაქცინის პოპულარიზაცია 2014-2015 წლებში დაიწყო. 2018 წელს ქვეყანამ შეიძინა 40 ათასი დოზა, მაგრამ პრეპარატის დიდი ნაწილი აუთვისებელი დარჩა. გასულ წელს ქვეყანამ უკვე 100 ათასი დოზა შეიძინა, საიდანაც გამოუყენებელი ძალიან მცირე ნაწილი დარჩა.

სპეციალისტების აზრით, გრიპის საწინააღმდეგო ვაქცინაცია არის გრიპის პრევენციის და მისგან გამოწვეული მძიმე შედეგების ყველაზე ეფექტური სპეციფიკური საშუალება. სამეცნიერო კვლევებით დადგენილია, რომ ვაქცინაციას შეუძლია გრიპით დაავადების რისკი შეამციროს 60%-ით მთელ მოსახლეობაში გრიპის სეზონის განმავლობაში.

427
თემები:
ჯანდაცვა საქართველოში (244)
მდინარე რიონი

ნამახვან ჰესის კასკადის მშენებლობა: რიონის ხეობაში ორი პარალელური აქცია გაიმართა

18
(განახლებულია 17:22 16.01.2021)
რიონზე „ნამახვანის ჰესების კასკადის“ მშენებლობას მოსახლეობა უკვე რამდენიმე თვეა აპროტესტებს. მათი თქმით, გიგანტური ჰესის მშენებლობა ტერიტორიის დატბორვას გამოიწვევს, შედეგად კი მოსალოდნელია ეკოლოგიური კატასტროფა და მოსახლეობის დიდი ნაწილი უსახლკაროდ დარჩება

თბილისი, 16 იანვარი - Sputnik. მდინარე რიონის ხეობის სოფლებში ნამახვან ჰესის კასკადის მშენებლობის მომხრეთა და მოწინააღმდეგეთა აქციები გაიმართა, იუწყება პირველი არხი.

სოფელ ოფურჩხეთში მოსახლეობის ნაწილმა აქცია  სახელწოდებით „არ გააჩერო ნამახვანჰესი“ გამართა. აქციის მონაწილეების განცხადებით,  ნამახვანჰესის მშენებლობა უნდა გაგრძელდეს. მათი თქმით, ჰესის მშენებლობის შემთხვევაში განვითარდება ინფრასტრუქტურა, ტურიზმი, შეიქმნება სამუშაო ადგილები და ემიგრანტები სამშობლოში დაბრუნდებიან.

ასევე, სოფელ ჟონეთში პარალელური აქცია გამართეს ჰესის მშენებლობის მოწინააღმდეგეებმაც. მათი განცხადებით, უკვე 83-ე დღეა, ჰესის მშენებლობას აპროტესტებენ. აქციის მონაწილეების მტკიცებით,  ვერც ხელისუფლებისგან და ვერც ჰესის მშენებელი კომპანიისგან ამ დრომდე ვერ მიიღეს უსაფრთხოების გარანტიები. ისინი პროტესტის შეწყვეტას არ აპირებენ და ამტკიცებენ, რომ ჰესის მშენებლობა 500 ჰექტარი მიწის დატბორვას გამოიწვევს, მათ შორის ტყეების, სავარგულების, რამდენიმე სოფლის, რის გამოც ათეულობით ოჯახი უსახლკაროდ დარჩება. ისინი აცხადებენ, რომ ეს ტერიტორია მეწყერსაშიშია და ჰესის მშენებლობით გამოწვეული საფრთხეები მთელს დასავლეთ საქართველოს ემუქრება.

როგორც ადრე ეკონომიკის მინისტრმა ნათია თურნავამ განაცხადა, „ნამახვანიჰესი“ ძალიან მნიშვნელოვანი პროექტია ენერგეტიკული უსაფრთხოების განმტკიცების კუთხით, თურქული კომპანია „ენკა" (ENKA) ძალიან აქტიურად მუშაობს მოსახლეობასთან, მათ შორის სოციალური პროექტების განხორციელების მიმართულებით. მისი თქმით, პროექტის ფარგლებში საერთო ჯამში 2000 საქართველოს მოქალაქე დასაქმდება.

თავის მხრივ, კომპანია Enka Riniubels, რომელიც ნამახვან ჰესის კასკადის პროექტს ახორციელებს, ამტკიცებს, რომ კასკადის საპროექტო სამუშაოებიჯერ კიდევ 1930-იან წლებში დაიწყო, ხოლო პირველი ტექნიკურ-ეკონომიკური დასაბუთება 1972 წელს გაკეთდა. 2006 წელს დეტალური კვლევები ჩაატარა USAID-ის საერთაშორისო განვითარების სააგენტომ, ხოლო 2007 წელს - კომპანია Hydroproject International-მა. პროექტის განხორციელებადობის საბოლოო კვლევა ეკუთვნის იტალიურ კომპანია Studio Pietrangel-ს, რომელმაც ის 2015 წელს შეასრულა.

კომპანიაში იუწყებიან, რომ ტენდერის მოგების შემდეგ Enka Riniubels-მა განმეორებითი კვლევა ჩაატარა თითქმის ყველა ასპექტზე, რომელიც ადრე არის შესწავლილი.

განსაკუთრებული ყურადღება კომპანიამ დაუთმო ისეთ საკითხებს, როგორებიცაა ჰიდროგეოლოგია, მეწყრული საფრთხის ზონის სეისმურობა, ჰიდროლოგია და კაშხლის უსაფრთხოება.

მდინარე რიონზე „ნამახვანის ჰესების კასკადის“ პროექტი გააერთიანებს ორ ჰესს - „ნამახვანს“ და „ტვიშს“, 433 მეგავატის საერთო დადგმული სიმძლავრით. პროექტის სავარაუდო ღირებულება 730 მილიონ დოლარს შეადგენს.

პროექტს განახორციელებს Clean Energy Georgia Group, რომელმაც შესაბამის ტენდერში გაიმარჯვა. ჰესის ასაშენებლად Clean Energy Georgia Group, რომელიც ნორვეგიული ჯგუფ Clean Energy-ს შვილობილი კომპანიაა, თურქულ სამშენებლო ჰოლდინგ ENKA Insaat ve Sanayi A.S-ს მოიზიდავს.

18

თბილისში ხმაურიანი აქცია გაიმართა „ქართული ოცნების“ ყრილობის წინააღმდეგ - ვიდეო

60
არასამთავრობო და სამოქალაქო ორგანიზაციების წარმომადგენლებმა მმართველი პარტია „ქართული ოცნების“ ყრილობის წინ ხმაურიანი აქცია გამართა თბილისში. დაწვრილებით - იხილეთ ვიდეოში

საპროტესტო აქცია საგამოფენო ცენტრი ExpoGeorgia-ს ტერიტორიაზე გაიმართა, სადაც „ქართული ოცნების“ ყრილობა ტარდებოდა. პოლიციამ რამდენიმე ადამიანი დააკავა.

სიტუაცია მას შემდეგ დაიძაბა, რაც მონაწილეებმა საგამოფენო ცენტრთან ანტისამთავრობო ლოზუნგების შემცველი დიდი პლაკატის დაყენება დააპირეს. როგორც კი მათ გზის გადაკეტვა სცადეს, მათსა და პოლიციას შორის დაპირისპირება მოხდა.

მმართველი პარტიის ყრილობის მთავარი მიზანი პარტიის ახალი ხელმძღვანელისა და პოლიტსაბჭოს წევრების არჩევნებია. პარტიაში ცვლილებები მას შემდეგ გახდა საჭირო, რაც ბიძინა ივანიშვილმა პოლიტიკიდან წასვლის შესახებ განაცხადა.

60
სოციალური ქსელები

Facebook-მა სიტყვა გატეხა: ტრამპის გვერდები განბლოკილია

0
(განახლებულია 18:05 16.01.2021)
მანამდე გავრცელდა განცხადება, რომ მოქმედ პრეზიდენტს თავის სოციალურ ქსელებთან წვდომა სახელმწიფოს მეთაურის პოსტზე უფლებამოსილების ამოწურვამდე არ ექნება

თბილისი, 16 იანვარი — Sputnik. აშშ-ის პრეზიდენტ დონალდ ტრამპის აქაუნტები სოციალურ ქსელ Facebook-სა და Instagram-ზე აღდგენილია.

Facebook-ის აკაუნტიდან წაშლილია ყველა ბოლო პოსტი, რადგან ისინი, სოციალური ქსელის ადმინისტრაციის თვალსაზრისით, საპროტესტო აქციების წამომწყებებისადმი ტრამპის სიმპათიებს გამოხატავენ.

მანამდე გავრცელდა განცხადება, რომ ტრამპს თავის სოციალურ ქსელებთან წვდომა პრეზიდენტის პოსტზე უფლებამოსილების ამოწურვამდე არ ექნება. მარკ ცუკერბერგის თქმით, არსებობს დიდი რისკები იმისა, რომ ტრამპი თავის პროფილებს სოციალურ ქსელებში მხარდამჭერებისადმი მიმართვისთვის გამოიყენებს.

6 იანვარს აშშ-ის პრეზიდენტ დონალდ ტრამპის მიტინგის შემდეგ კენჭისყრის შედეგებით უკმაყოფილო ამერიკელები კაპიტოლიუმზე შტურმი მიიტანეს. პროტესტების დროს ორი ადამიანი დაიღუპა, მათ შორის ერთ-ერთი პოლიციელია. ამ მოვლენების დროს კიდევ სამი პირი დაიღუპა, თუმცა ეს არეულობებს არ უკავშირდება.  ამის შემდეგ ტრამპი სოციალურ ქსელებში დაბლოკეს. მისი გვერდი Twitter-ში კვლავ დაბლოკილია.

0