ალექსანდრე კვიტაშვილის მეუღლის სიცოცხლე კენჭის ოპერაციას შეეწირა. ამასთან დაკავშირებით ჯანდაცვის ყოფილმა მინისტრმა „ნანუკა ჟორჟოლიანის შოუში“ ისაუბრა.
როგორც კვიტაშვილმა განაცხადა, მისმა მეუღლემ გეგმიური ლაპარასკოპიული ოპერაცია გაიკეთა.
კერძოდ, ანასტასია ოსტროვსკას ნაღვლის ბუშტში ჰქონდა კენჭი და ის უნდა ამოეღოთ, თუმცა 40-წუთიანი ოპერაციის მიმდინარეობისას მისი მდგომარეობა დამძიმდა. ამის შემდეგ კვიტაშვილის მეუღლეს კიდევ სამი ოპერაცია დასჭირდა, თუმცა საბოლოოდ ვერ გადაარჩინეს.
„35 წლის ასაკში, აბსოლუტურად ჯანმრთელი ადამიანი, რომელიც მთელი ცხოვრება სპორტით იყო დაკავებული და ვარჯიშობდა, მძიმე ოპერაციის შემდეგ ერთი თვის განმავლობაში მაქსიმალურად ცდილობდა, რომ გამოსულიყო მდგომარეობიდან, ძალას იკრებდა და მილიონ გეგმას ალაგებდა“, – ჰყვება ყოფილი მინისტრი.
წყვილმა ერთმანეთი უკრაინაში გაიცნო, როდესაც სანდრო კვიტაშვილი უკრაინის ჯანდაცვის მინისტრად მუშაობდა (2014-2015). უკრაინის ჯანდაცვის სამინისტროში მუშაობდა ასევე ანასტასია ოსტროვსკაც. ის ორგანიზაცია CMI-ს თანამშრომელი იყო, რომელიც კონფლიქტების დარეგულირების საკითხებზე მუშაობს.
სანდრო კვიტაშვილმა და ანასტასია ოსტროვსკამ ორი წლის წინ იქორწინეს. ისინი ამერიკაში, ნიუ-იორკში ცხოვრობდნენ. ჯანდაცვის ყოფილი მინისტრის პირველი ცოლი ნიკოლ ჟორდანია იყო – ნოე ჟორდანიას შვილიშვილი და რეჯებ ჟორდანიას შვილი. მათ საერთო შვილი - ნიკოლოზი ჰყავთ.
სანდრო კვიტაშვილი 2010-2013 წლებში თსუ-ის რექტორიც იყო.