მამაკაცი პირბადით აფთიაქთან

რატომ ძვირდება პანდემიის დროს საქართველოში წამლები და სამედიცინო მომსახურება?

73
(განახლებულია 19:29 20.11.2020)
გაძვირებული წამლები და სამედიცინო მომსახურება – საჭირბოროტო პრობლემა თუ COVID-19-ის პანდემიით გამოწვეული გიგანტური კრიზისის ზღვაში წვეთი? ამ საკითხის გარკვევას „Sputnik-საქართველოს“ კორესპონდენტი შეეცადა.

საქართველოში კვლავ გაძვირდა წამლები და სამედიცინო მომსახურება. სააფთიაქო ქსელებში მთავარ ფაქტორად ლარის კურსს ასახელებენ.

ეროვნული ვალუტა გაუფასურებას განაგრძობს, სწორედ ამიტომ უწევს კერძო სექტორს იმპორტირებულ საქონელზე ფასების გაზრდა.

საქართველოს ეროვნულმა ბანკმა 20 ნოემბერს აშშ დოლარის მიმართ ლარის კურსი დაადგინა ნიშნულზე - 3,2948 GEL/$1.

მაგრამ რამდენად მაღალია დამატებული თანხა და რამდენით განსხვავდება ფასები, მაგალითად, მეზობელი თურქეთის ფასებისგან, სადაც საქართველოს მოქალაქეები საკმაოდ ხშირად ყიდულობენ საჭირო მედიკამენტებს?

„Sputnik-საქართველომ“ სცადა გაერკვია, როგორი მდგომარეობაა საქართველოში წამლებისა და სამედიცინო მომსახურების ფასების კუთხით.

რა და რამდენით გაძვირდა?

საქართველოს სტატისტიკის ეროვნული სამსახურის „საქსტატის“ მონაცემებით, მიმდინარე წლის ოქტომბერში, გასული წლის ანალოგიურ პერიოდთან შედარებით, ფასები ტკივილგამაყუჩებელ პრეპარატებზე 32,15%-ით გაიზარდა. გაძვირდა ასევე გულ-სისხლძარღვთა სამკურნალო პრეპარატები, თერმომეტრები, ტონომეტრები და ა.შ. გაძვირდა ვიტამინებიც, რომლებზეც პანდემიის პერიოდში განსაკუთრებით გაიზარდა მოთხოვნა.

გაძვირებული წამლები:

სისხლის მიმოქცევის მედიკამენტები +12,26%
ტკივილგამაყუჩებლები +32,15%
ანტიბიოტიკები          +6,66%
ვიტამინები     +9,59%
საჭმლის მომნელებელი სისტემის პრეპარატები +10,63%
ანთების საწინააღმდეგო პრეპარატები +9,91%
თერმომეტრები +12,47%
წნევის საზომი აპარატები +13,70%

გაძვირებული სამედიცინო მომსახურება:

კბილის ამოღება  +32,35%
სისხლის ანალიზი +9,54%
თერაპევტის კონსულტაცია +5,48%
სტომატოლოგის მომსახურება (დაბჟენა) +17,24%
ულტრაბგერითი გამოკვლევა +6,43%
სტაციონარული მომსახურება +3,94%
ქირურგიული მომსახურება +0,14%

ერთადერთი სამედიცინო მომსახურება, რომელიც არ გაძვირებულა, პირიქით, გაიაფდა – არის მშობიარობა. ამ მომსახურების ფასი 1,74%-ით შემცირდა.

საქართველოში ფიზიოლოგიური მშობიარობა დაახლოებით 850 ლარი ჯდება. პერსონალური ექიმი-გინეკოლოგის მომსახურებით სარგებლობის შემთხვევაში ამ თანხას ემატება 250-დან 500 ლარამდე. ეპიდურალური ანესთეზია ჯდება 250 ლარი. საკეისრო კვეთა – 1500 ლარი.

„საქსტატის“ მონაცემებით, ოქტომბერში წლიურმა ინფლაციამ 3,8% შეადგინა. 2020 წლის ოქტომბერში, წინა თვეებთან შედარებით, ინფლაციის დონემ საქართველოში 0,8% შეადგინა. 

თურქეთში მედიკამენტები გაცილებით იაფია

საქართველოს მოქალაქეები, რომელთაც მცირედი შესაძლებლობა მაინც აქვთ, რომ წამლები თურქეთში შეიძინონ, ამ შანსს ხელიდან არ უშვებენ, რადგან, როგორც გაირკვა, იქ წამლები გაცილებით იაფია, ვიდრე საქართველოში.

„დედაჩემს ინსულტი ჰქონდა, გადარჩა. ახლა მკურნალობა სჭირდება. წამლები მთელი ცხოვრება უნდა სვას. მას ქრონიკული დაავადება აქვს, – ჰყვება თბილისის მკვიდრი მეგი ჩხეიძე. – მისი წამლები თვეში დაახლოებით 300-500 ლარი მიჯდებოდა, იმისდა მიხედვით, როგორ ცვლიდა ექიმი პრეპარატების დოზებს. ახლა 500-700 ლარი მიჯდება. ეს მეტისმეტად ძვირია.

მიწევს დახმარებისთვის ახლობლებს მივმართო და მოვძებნო ადამიანები, რომლებიც თურქეთიდან ჩამოდიან. მაგალითად, წამალი „ეპიქსი“ აქ 137 ლარი ღირს, თურქეთში კი 50 ლარი ჯდება. ამ თვეში გამიმართლა, იქით კვირაში ორ კოლოფს ჩამომიტანენ. მინდოდა მეტის შეძენა და მომარაგება, მაგრამ არ გამომივიდა. საქართველოში წამლები ძალიან ძვირია“.

იმერეთის რეგიონის მცხოვრები კახა ტალახაძე ჰყვება, რომ რამდენიმე წლის წინ მის მეუღლეს დაუსვეს დიაგნოზი – მკერდის კიბო. დასჭირდა ძვირადღირებული მკურნალობა. მას მოუხდა უძრავი ქონების – მიწების გაყიდვა, საიდანაც შემოსავალს და მოსავალს იღებდა.

„ამ მიწებს არასდროს და არავითარ შემთხვევაში არ გავყიდდი, მაგრამ სხვა გზა არ დამრჩა, – ამბობს კახა. – ბანკმა ასეთი დიდი თანხა არ მომცა, მოცდაც არ შემეძლო, ასე რომ, როგორც კი მყიდველი გამოჩნდა, დაუფიქრებლად გავყიდე.

მეუღლე გაცილებით უკეთაა, მაგრამ ახლა მე გავხდი ავად – გულით. ოპერაცია გამიკეთეს. საბედნიეროდ, ოპერაციის 70% სახელმწიფომ დააფინანსა. ნათესავებმა ფული შემიგროვეს და გამომიგზავნეს. ამ თანხით საჭირო წამლები შევიძინეთ. ძალიან ძვირი ღირს“.

ტალახაძემ ჯერ არ იცის, რით იყიდის წამლებს მომავალ თვეებში. აპირებს დახმარებისთვის რაიონულ ადმინისტრაციას მიმართოს, მაგრამ იქ დახმარება ერთჯერადია.

„თუ ფული არ გაქვს და ავად გახდი, ჩათვალე, რომ შენი საქმე წასულია. სამწუხაროდ, ასეა“, – ამბობს ტალახაძე.

ყველაფერში დამნაშავე ლარის კურსია

კომპანია HB-Georgia-ში, რომელიც ფარმაკოლოგიური და სამედიცინო პროდუქციის დისტრიბუციითაა დაკავებული, აცხადებენ, რომ წამლის ფასები კორონავირუსის პანდემიისა და ლარის არასტაბილური კურსის გამო იზრდება.

„წამლების გაძვირების მთავარი და ძირითადი მიზეზი ლარის კურსია. დიახ, მომწოდებლებიც ზრდიან ფასებს, მაგრამ უმნიშვნელოდ. ლარის კურსი, რომელიც მუდმივად თამაშობს, ფასებზე აისახება, იზრდება, რა თქმა უნდა, თვითღირებულებაც. პანდემია ბიზნეს-სტაბილურობას ხელს უშლის. ყველაფერი ურთერთგადაჯაჭვულია“, – აცხადებს კომპანიის წარმომადგენელი ნიკოლოზ ნიკოლაძე.

ამასთან, ნიკოლაძის თქმით, კომპანია ყველაფერს აკეთებს იმისათვის, რომ წამლების ფასები არ შეიცვალოს, მაგრამ ეს მხოლოდ მათზე არ არის დამოკიდებული. „უკვე დღეს საუბარია იმაზე, რომ კვლავ მოგვიწევს მედიკამენტების გაძვირება“, – აღნიშნავს ნიკოლაძე.

არასტაბილური სიტუაცია = წამლების გაძვირება

„რატომ გაძვირდა? იმიტომ რომ ლარი გაუფასურდა. ყველა წამალს უცხოურ ვალუტაზე ვყიდულობთ – დოლარზე, ფუნტ სტერლინგზე, ევროზე, – აცხადებს ჯანდაცვის საკითხთა ექსპერტი ვატო სურგულაძე. – ასე რომ, თუ არ იქნება სტაბილური ვითარება, წამლები კვლავ გაძვირდება“.

პანდემიის პირობებში წამლების ფასები და მოქალაქეთა დახმარება ყველაზე ცოტაა, რაზეც შეიძლება იფიქროს ხელისუფლებამ, მიიჩნევს ექსპერტი.

„ამჟამად მერია აპირებს მილიონის გადახდას ნაძვებში. ამ ფულით შეიძლება ყველა კოვიდ-ინფიცირებულისთვის, რომელიც მკურნალობს როგორც სახლში, ისე კოვიდ-სასტუმროში, შეიძინოს პულსოქსიმეტრები, რომელთა დახმარებითაც შეიძლება სატურაციის გაზომვა. ეს კი ყველაზე კარგი მეთოდია იმისთვის, რომ ადამიანი კრიტიკულ მდგომარეობაში არ აღმოჩნდეს“, – ამბობს სურგულაძე.

ექსპერტი დარწმუნებულია, რომ ხელისუფლებას არ უნდა იმის აღიარება, რომ ქვეყანაში კატასტროფული სიტუაციაა. ამასობაში პრობლემები, სურგულაძის თქმით, არის ყველა საავადმყოფოში, სექტორში, ასევე წამლების შეძენის საკითხებში, ექიმების, მკურნალობის და ბევრი სხვა მიმართულებით.

რაც შეეხება იმას, თუ რატომ ღირს თუნდაც თურქეთში წამლები საგრძნობლად იაფი, ვიდრე საქართველოში, ეს, ვატო სურგულაძის აზრით, უკავშირდება, ერთი მხრივ, იმას, რომ თავად ქვეყანა ბევრ რამეს აწარმოებს, მეორე მხრივ კი იქ სახელმწიფო გაძვირებული მედიკამენტების დიდი ნაწილის სუბსიდირებას ეწევა. როდესაც იქ წამლები ძვირდება, თურქეთის მთავრობა ამ სხვაობას ანაზღაურებს, აღნიშნავს სურგულაძე.

არავინ არ უნდა აღმოჩნდეს მარტოდმარტო COVID-ის პირისპირ

ამგვარად, ექსპერტის სიტყვებით, საქართველოს მრავალი მოქალაქე პანდემიის პირობებში მძიმე მდგომარეობაში აღმოჩნდა. განსაკუთრებით უჭირთ ქრონიკული დაავადებების მქონე ადამიანებს, რომლებსაც ხანგრძლივი და პერმანენტული მედიკამენტოზური მკურნალობა სჭირდებათ.

„მთავარი ამოცანა ხომ არის – ადამიანი არ დარჩეს მარტოდმარტო კოვიდის პირისპირ არც ერთი წუთით. მან უნდა იცოდეს, ვის და როდის მიმართოს. თუ გიცდიათ „112“-ზე ან „1505“-ზე დარეკვა? სასწრაფოში გეუბნებიან, რომ თუ გყავთ ნაცნობები საავადმყოფოში, მაშინ გადაგიყვანენ. ეს სრული კატასტროფაა. ეს მმართველი აპარატის კრახია. სრული კრახი“, – აცხადებს სურგულაძე.

სურგულაძე ერთ-ერთია იმ ექსპერტთაგან, რომელმაც მოამზადა მიმართვა მთავრობისადმი და მოითხოვა უწყებათშორისი საკოორდინაციო საბჭოს გაფართოება. მისი სიტყვებით, მნიშვნელოვანია, რომ მთავრობამ დაიწყოს ექსპერტების რჩევების მოსმენა, „ლოკდაუნი“ კი გამოსავალი არ არის, დარწმუნებულია სურგულაძე.

„ჩინეთში პირველი ინფიცირებული ადამიანის დარეგისტრირების შემდეგ ერთი წელი გავიდა და მსოფლიომ დღემდე არაფერი იცის ამ ვირუსზე. დიახ, ჩვენ მეტი ინფორმაცია გვაქვს, ვიდრე ერთი წლის წინ, მაგრამ როგორ განიცდის ვირუსი მუტაციას, როგორ იმუშავებს ვაქცინა, თუ მას შექმნიან?“ – აღნიშნავს სურგულაძე.

მისი თქმით, ებოლას საწინააღმდეგო ვაქცინას შვიდი წელი ამზადებდნენ, მაგრამ ის დღემდე არ მუშაობს ისე, როგორც საჭიროა. არ არის შექმნილი ვაქცინა კორონავირუსის „ნათესავების“ – 40%-იანი ლეტალობის მქონე SARS-ისა და MERS-ის წინააღმდეგ. ამასთან, სურგულაძე დარწმუნებულია, რომ არავინ იცის, როგორ იმოქმედებს ვაქცინა ნერვულ, შარდსასქესო, რეპროდუქციულ სისტემებზე, როგორი გენეტიკური მუტაცია შეიძლება გამოიწვიოს და ა.შ.

ჯერ კი მსოფლიო ისტერიულად მისდევს კორონავირუსის საწინააღმდეგო ვაქცინას და ახალ პრეპარატებს, პანდემია კი ძალას იკრეფს და სულ უფრო მეტი სიცოცხლე მიაქვს, ანგრევს ეკონომიკას. ამ ყველაფრის ფონზე წამლის ფასები, საუბედუროდ, პირველი რიგის პრობლემა ხდება.

73
თემები:
COVID-19 საქართველოში (2540)
თმის შეჭრა

გამყრელიძე: რატომ არ იკეტება სილამაზის სალონები

188
სილამაზის სალონებსა და ესთეტიკის ცენტრებში ზედმიწევნით ასრულებენ ჯანდაცვის სამინისტროს რეკომენდაციებს, აღნიშნა ეპიდემიოლოგმა

თბილისი, 26 ნოემბერი – Sputnik. დაავადებათა კონტროლის ეროვნული ცენტრის გენერალურმა დირექტორმა, ამირან გამყრელიძემ განმარტა, რატომ მიიღო კორონავირუსთან ბრძოლის საკოორდინაციო საბჭომ გადაწყვეტილება, არ დაკეტოს სილამაზის სალონები.

ახალი შეზღუდვების სრული სია: რისი გაკეთება შეიძლება და რისი – არა >>

გამყრელიძის თქმით, აღმოჩნდა, რომ სილამაზის სალონებში უსაფრთხოების ზომებს კარგად იცავენ.

„არის მეორე რისკი, რომ დაკეტო სილამაზის სალონი და შეზღუდო, ეს ბიზნესი ინაცვლებს ჩრდილში, ადამიანები სახლებში დადიან და შესაძლებელია უფრო მეტი იყო გავრცელების რისკი“, - განაცხადა გამყრელიძემ.

ხუთშაბათს საქართველოს მთავრობამ დაამტკიცა კორონავირუსთან ბრძოლის ორთვიანი გეგმა, რომლის თანახმად ამ პერიოდში ქვეყანაში რიგი შეზღუდვები იმოქმედებს.

28 ნოემბრიდან საქართველოს რვა დიდ ქალაქში მუშაობას აჩერებს საზოგადოებრივი ტრანსპორტი. მთელი ქვეყნის მასშტაბით იხურება სპორტკლუბები და აუზები, რესტორნები მხოლოდ გარეთ გატანის მომსახურებაზე გადავლენ, დაიკეტება ღია და დახურული ტიპის ყველა სავაჭრო წერტილები, გარდა პირველადი საჭიროების საქონლის სარეალიზაციო წერტილების.

აიკრძალება გადაადგილება 21:00 საათიდან 05:00 საათამდე. ჩერდება საქალაქთაშორისო ტრანსპორტი, თუმცა კერძო ავტომობილით გადაადგილება დაშვებულია.

 

 

188
თემები:
COVID-19 საქართველოში (2540)
ქუთაისი. სასტუმრო „არგო“, რომელიც კოვიდ-კლინიკად აქციეს

კოვიდ-სასტუმროებს ჟანგბადის კონცენტრატორები გადაეცათ

62
პაციენტების კვალიფიციური მომსახურებისთვის კოვიდ-სასტუმროები თანდათანობით საჭირო აღჭურვილობას იღებენ.

თბილისი, 26 ნოემბერი – Sputnik. საქართველოს კოვიდ-სასტუმროებს პაციენტების უკეთესი მომსახურებისთვის 100 ჟანგბადის კონცენტრატორი დაურიგდა, განაცხადა ბრიფინგზე ჯანდაცვის მინისტრმა ეკატერინე ტიკარაძემ.

როდის მიიღებს საქართველო COVID-19-ის საწინააღმდეგო ვაქცინას: ოპტიმისტური პროგნოზი >>

პირველ დეკემბერს საქართველო დამატებით 900 ჟანგბადის კონცენტრატორს მიიღებს.

„ეს ასევე გვაძლევს იმის საშუალებას, რომ სასტუმროების ბაზაზე პაციენტების მეტად უკეთესი მართვა შევძლოთ“, - განაცხადა ტიკარაძემ.

ტიკარაძემ აღნიშნა, რომ კლინიკებმა უნდა მიიღონ მხოლოდ ის პაციენტები, რომლებიც ნამდვილად საჭიროებენ ჰოსპიტალიზაციას, და არა ისეთები, რომლებსაც „კოვიდ-სასტუმროდან ხედი არ მოსწონთ“.

„გარწმუნებთ, კოვიდ-სასტუმროში მყოფი ყველა პაციენტი იღებს საჭირო დახმარებას და ექიმების მეთვალყურეობის ქვეშ იმყოფება“, - აღნიშნა ტიკარაძემ.

მისი თქმით, ყველა კოვიდ-სასტუმრო არის მიმაგრებული თავის კლინიკაზე და 18:00 საათის შემდეგ იქ ხდება პაციენტების კვლევებზე გადაყვანა. იმ შემთხვევაში თუ პაციენტს ესაჭიროება კლინიკაში დარჩენა, პასუხისმგებელი კლინიკა მას იტოვებს.

„თუ ეს საჭიროება არ დგას, ის დაბრუნდება სასტუმროში და გააგრძელებს იქ ადგილზე მყოფი ექიმის მეთვალყურეობის ქვეშ მკურნალობას“, - აღნიშნა ტიკარაძემ.

ჯანდაცვის მინისტრი ასევე შეეხო მედპერსონალის ინფიცირების თემას. მან აღნიშნა, რომ ბევრ კლინიკებში აიკრძალა ერთობლივი სადილობა, რადგან სწორედ ერთობლივად საკვების მირთმევა ხშირად გამხდარა ინფიცირების მიზეზი. ასევე, მედპერსონალი ინფიცირდება როგორც პაციენტებისგან, ასევე სამუშაოს გარეთ.

საქართველოში კორონავირუსის მეორე ტალღა მძვინვარებს. ყოველდღიურად სამი ათასზე მეტი ახალი შემთხვევა ფიქსირდება. 26 ნოემბრის მონაცემებით, საქართველოში დადასტურებული შემთხვევების რაოდენობა უკვე 118 ათასს აღემატება.

ეპიდვითარების გაუარესების გამო საკოორდინაციო საბჭომ 28 ნოემბრიდან 1 თებერვლამდე დამატებითი შეზღუდვების დაწესების გადაწყვეტილება მიიღო.

ქვეყანაში რიგი შეზღუდვები მოქმედებს, როგორიცაა, მაგალითად, პირბადის ტარების აუცილებლობა როგორც დახურულ, ისე ღია სივრცეში, დიდ ქალაქებში სწავლა დისტანციურად მიმდინარეობს, ღამით აკრძალულია გადაადგილება და ა.შ.

62
თემები:
COVID-19 საქართველოში (2540)
დოლისყანის ტაძარი

საეკლესიო კალენდარი: 27 ნოემბერი

0
(განახლებულია 08:59 27.11.2020)
მართლმადიდებლური ეკლესია 27 ნოემბერს აღნიშავს ხსენებას წმიდისა მოციქულისა ფილიპესი (I); კეთილმორწმუნისა მეფისა იუსტინიანესი (565) და დედოფლისა თეოდორასი (548); წმ. გრიგოლ პალამასი, თესალონიკელი მთავარეპისკოპოსისა (დაახლ. 1360).

წმიდა მოციქული ფილიპე

გალილეის ქალაქ ბეთსაიდის მკვიდრი, წმიდა წერილში ღრმად იყო განსწავლული.მას სწორად ესმოდა ძველი აღთქმის წინასწარმეტყველებათა არსი და მესიის მოლოდინით ცხოვრობდა. ფილიპე პირველი მოწოდებისთანავე თან გაჰყვა მაცხოვარს 

ქრისტეს ამაღლების შემდეგ ფილიპე მოციქული გალილეაში ქადაგებდა ღვთის სიტყვას. ნეტარის სწავლებას საკვირველი სასწაულები ახლდა თან. 

მოციქული ფრიგიაში, ქალაქ იერაპოლში ჯვარზე აღესრულა.

წმიდა გრიგოლ პალამა, თესალონიკელი მთავარეპისკოპოსი

1296-97 წლებში დაიბადა წარჩინებული, მდიდარი და კეთილმსახური ქრისტიანების ოჯახში.

ოცი წლის ასაკში გრიგოლმა 1316, სხვა ცნობით, 1318 წელს ორ უმცროს ძმასთან ერთად ათონის მთას მიაშურა და ვათოპედის მონასტერში მორჩილად შედგა. აქ ნეტარი მამა ღირსი ნიკოდიმოს ვათოპედელის (ხს. 11 ივლისს) ხელმძღვანელობით მოღვაწეობდა და მის მიერვე აღიკვეცა ბერად.  

წმიდა გრიგოლი ერთმანეთს უთავსებდა ხუცესის მოვალეობის შესრულებას და განდეგილურ ღვაწლს: კვირაში ხუთ დღეს იგი მდუმარებასა და ლოცვაში ატარებდა, შაბათ-კვირას კი ხალხთან გამოდიოდა, ღვთისმსახურებას აღასრულებდა და მრევლს მოძღვრავდა. ნეტარი მამის ქადაგებები ღრმა ზეგავლენას ახდენდა ტაძარში მყოფ მორწმუნეებზე. წმიდა გრიგოლისთვის ცხოვრების წესის მიუხედავად უცხო იყო სრული განდგომა საზოგადოებრივი ცხოვრებისაგან. ზოგჯერ იგი ქალაქის განათლებული ახალგაზრდობის საღვთისმეტყველო დისპუტებს ესწრებოდა, რომელთაც მომავალი პატრიარქი ისიდორე უძღვებოდა. ერთხელ კონსტანტინოპოლიდან დაბრუნებულმა წმიდანმა თესალონიკის მახლობლად აღმოაჩინა ბერიად წოდებული ადგილი, რომელიც მეტად მოხერხებული იყო ბერმონაზვნური მოღვაწეობისათვის. მალე მან აქ შემოიკრიბა მცირე საძმო, რომელსაც ხუთი წელი წინამძღვრობდა. 1331 წელს გრიგოლმა ათონს მიაშურა და ათანასეს ლავრის მახლობლად მდებარე წმიდა საბას სკიტში განმარტოვდა. 1333 წელს იგი ესთიგმენის მონასტრის იღუმენად დაადგინეს, 1336 წელს კი კვლავ წმიდა საბას სკიტს დაუბრუნდა და დაიწყო საღვთისმეტყველო მოღვაწეობა, რომელიც სიკვდილის დღემდე არ შეუწყვეტია.

მართლმორწმუნე მეფე იუსტინიანე I და დედოფალი თეოდორა 

ბიზანტიის წმიდა იმპერატორი იუსტინიანე წარმოშობით ბულგარეთიდან, სრედეცის (დღევანდელი სოფია) მახლობლად მდებარე სოფელ ბერდიანიდან იყო. კეთილმსახური ხელისუფალი გულმოდგინედ იღვწოდა ქვეყანაში მართლმადიდებლური სარწმუნოების განსამტკიცებლად, მისი მეფობის დროს (527-565) ბიზანტიამ ბრწყინვალე სამხედრო გამარჯვებები მოიპოვა სპარსეთში, აფრიკასა და იტალიაში, რაც დიდად უწყობდა ხელს წარმართული სარწმუნოების აღმოფხვრას ვანდალებსა და ვესტ-გუთებს შორის. მეფე იუსტინიანეს ბრძანებით ათენში წარმართული სკოლები დახურეს. მან მცირე აზიაში ქრისტიანობის განსამტკიცებლად გაგზავნა ეფესელი ეპისკოპოსი იოანე, რომელმაც სამოცდაათ ათასზე მეტი კაცი მონათლა. მეფემ ბრძანა, ახალმოქცეულთათვის ოთხმოცდაათი ტაძარი აეგოთ და უხვად შეეწეოდა საეკლესიო მშენებლობას იმპერიაში. მისი დროის ხუროთმოძღვრების საუკეთესო ნიმუშებად ითვლება მონასტერი სინას მთაზე და წმიდა სოფიას ტაძარი კონსტანტინოპოლში. მრავალმხრივ განათლებული იმპერატორი გულმოდგინედ იღვწოდა ღვთისმსახურთა და ბერმონაზონთა განათლებაზე - ბრძანა, მათთვის ესწავლებინათ რიტორიკა, ფილოსოფია და ღვთისმეტყველება.

პირად ცხოვრებაში იუსტინიანე მკაცრი ქრისტიანული კეთილმსახურებით გამოირჩეოდა. მან 505 წელს შეჰვედრა სული უფალს.
წმიდა ეკლესიამ იმპერატორთან ერთად წმიდანად შერაცხა მისი მეუღლე და თანამოაზრე თეოდორაც. ნეტარი თეოდორა მიიცვალა 548 წელს.

0
თემები:
საეკლესიო კალენდარი