ხობის კოლხეთის 15 ფეხბურთელს კორონავირუსი დაუდასტურდა

კორონავირუსი ხობის „კოლხეთის” 15 ფეხბურთელს დაუდასტურდა

30
(განახლებულია 15:45 18.11.2020)
საფეხბურთო გუნდის ინფიცირებულ წევრებს კორონავირუსისთვის დამახასიათებელი სიმპტომები მსუბუქ ფორმაში აქვთ გამოხატული, ამ დროისათვის უცნობია მათი ინფიცირების წყარო.

თბილისი, 18 ნოემბერი – Sputnik. საფეხბურთო კლუბ ხობის „კოლხეთის" ერთბაშად 15 ფეხბურთელს დაუდასტურდა კორონავირუსი, იუწყება „Sputnik–საქართველოს“ კორესპონდენტი. 

კლუბის ხელმძღვანელობის განცხადებით, ამ დროისათვის ინფიცირებული ფეხბურთელები ანაკლიაში არსებულ საკარანტინო სივრცეში არიან გადაყვანილი. მათი ჯანმრთელობის მდგომარეობა დამაკმაყოფილებელია.

რაც შეეხება ფოთის მუნიციპალიტეტს, ბოლო 24 საათში კორონავირუსის 32 ახალი შემთხვევა დაფიქსირდა. 

საზოგადოებრივი ჯანმრთელობის ადგილობრივი ცენტრის ინფორმაციით, ინფიცირებულთაგან ორი კოვიდ–კლინიკაშია მოთავსებული, დანარჩენები კი მკურნალობას სახლში, ოჯახის ექიმის მეთვალყურეობის ქვეშ გადიან.

„შესაძლოა კორონავირუსის შემთხვევათა რაოდენობა კიდევ გაიზარდოს, რადგან საბოლოო კვლევა დასრულებული არ არის. ფოთში კორონავირუსის პირველი შემთხვევიდან დღემდე მთლიანობაში 791 შემთხვევაა დაფიქსირებული. გარდაიცვალა 5 ადამიანი. გამოჯანმრთელდა 432 პირი. ინფიცირების აქტიური შემთხევის რაოდენობა 333-ია. სტაციონარში მკურნალობს 17 პაციენტი, საკარანტინო სივრცეში იმყოფება 11, სახლის პირობებში კი 327 ინფიცირებულია. ამ დროისათვის მდგომარეობა არის სტაბილური და მართვადი“, – განაცხადეს საზოგადოებრივი ჯანდაცვის ცენტრში.

საქართველოში ახალი კორონავირუსით დაავადებულთა რაოდენობა ბოლო დღე-ღამეში 3.443-ით გაიზარდა და ინფიცირებულთა საერთო რიცხვმა 89.395-ს მიაღწია. ამ დროისათვის სულ გამოჯანმრთელდა 71.468 ადამიანი, გარდაიცვალა – 815, კარანტინის რეჟიმშია 2.370, სტაციონარებში ექიმების დაკვირვების ქვეშ 5.763 პაციენტია, ხოლო კოვიდ–სასტუმროებში 3.435 ადამიანი იმყოფება.

საქართველოში კორონავირუსის პირველი შემთხვევა 26 თებერვალს დაფიქსირდა.

ნიკა ლატარია

30
თემები:
COVID-19 საქართველოში (2561)
ჯანდაცვის სამინისტრო

საგანგებო სიტუაციების კოორდინაციისა და გადაუდებელი ცენტრის ხელმძღვანელი გადადგა

16
(განახლებულია 14:04 28.11.2020)
ავთანდილ თალაკვაძის თანამდებობის დატოვების გადაწყვეტილებასთან დაკავშირებით სავარაუდო მიზეზი სახელდება.

თბილისი, 28 ნოემბერი - Sputnik. ჯანდაცვის სამინისტროს საგანგებო სიტუაციების კოორდინაციისა და გადაუდებელი ცენტრის ხელმძღვანელი, ავთანდილ თალაკვაძე თანამდებობიდან გადადგა. იუწყება ტელეკომპანია „რუსთავი 2“.

საგანგებო სიტუაციების კოორდინაციისა და გადაუდებელი ცენტრი ჯანდაცვის სამინისტროს საჯარო სამართლის იურიდიული პირია.  

არსებული ინფორმაციით, თალაკვაძემ პოსტი პირადი განცხადების საფუძველზე დატოვა. მისი გადაწყვეტილების მიზეზად ჯანდაცვის მინისტრ ეკატერინე ტიკარაძესთან  COVID-19-ის მართვის საკითხზე აზრთა სხვადასხვაობა სახელდება.

ამ დროისთვის ავთანდილ თალაკვაძეს კონკრეტულ საკითხზე კომენტარი არ გაუკეთებია. თალაკვაძე ჯანდაცვის სამინისტროში აღნიშნულ თანამდებობას 2015 წლიდან იკავებდა.

მიმდინარე წლის 1 იანვრიდან საგანგებო სიტუაციების კოორდინაციისა და გადაუდებელი დახმარების ცენტრი ქალაქ თბილისის მუნიციპალიტეტის საჯარო სამართლის იურიდიული პირის – სასწრაფო სამედიცინო დახმარების ცენტრის უფლებამონაცვლეს წარმოადგენს.

16
ციხეში

პენიტენციურ დაწესებულებებში ხანმოკლე პაემნები დროებით გაუქმდა

16
(განახლებულია 13:40 28.11.2020)
ქვეყანაში არსებული ეპოდემიოლოგიური სიტუაციიდან გამომდინარე და უწყებათაშორისი საკოორდინაციო საბჭოს გადაწყვეტილების შესაბამისად, დღეიდან პენიტენციურ სისტემაში შეზღუდვები ამოქმედდა.

თბილისი, 28 ნოემბერი - Sputnik. პენიტენციურ დაწესებულებაში განსაკუთრებული პირობების მოქმედების პერიოდში ბრალდებულებსა და მსჯავრდებულებს 2021 წლის პირველ იანვრამდე ხანმოკლე პაემნით სარგებლობა შეუჩერდათ. ინფორმაციას სპეციალური პენიტენციური სამსახური ავრცელებს.

პაემნის შეზღუდვასთან ერთად 28 დეკემბრამდე შეიზღუდება ამანათების მიწოდებაც.

გადაწყვეტილება უწყებაში ქვეყანაში არსებული ეპიდემიოლოგიური სიტუაციიდან გამომდინარე მიიღეს.

გავრცელებულ ინფორმაციაში ნათქვამია, რომ სპეციალური პენიტენციური სამსახურის გენერალური დირექტორის 2020 წლის 5 მარტის N4109 ბრძანებაში „პენიტენციურ დაწესებულებებში განსაკუთრებული პირობების შემოღების შესახებ“ ცვლილებები შევიდა.

„შეზღუდვების მოქმედების ვადის შემდგომ გაგრძელებასთან ან მოხსნასთან დაკავშირებით სპეციალური პენიტენციური სამსახური გადაწყვეტილებებს ეპიდსიტუაციიდან გამომდინარე, უწყებათაშორისი საკოორდინაციო საბჭოს რეკომენდაციების შესაბამისად მიიღებს“, - აღნიშნულია გავრცელებულ ინფორმაციაში.

საქართველოში 28 ნოემბრიდან რთული ეპიდვითარების გამო ხელისუფლებამ ახალი შეზღუდვები აამოქმედა, რომლებიც 2021 წლის 31 იანვრამდე იქნება ძალაში.

საქართველოში კორონავირუსის მეორე ტალღა მძვინვარებს. ყოველდღიურად ინფიცირების რამდენიმე ათასი ახალი შემთხვევა ფიქსირდება.

16
თემები:
COVID-19 საქართველოში (2561)