პარიზი

საფრანგეთმა ქვეყანაში საქართველოს მოქალაქეების შესვლა შეზღუდა

162
(განახლებულია 20:22 10.11.2020)
საფრანგეთში შესვლა შეუძლიათ მხოლოდ ამ ქვეყნის მოქალაქეებს და ასევე იმ უცხოელებს, რომლებიც დიპლომატიურ წარმომადგენლობებსა და საერთაშორისო ორგანიზაციებში მუშაობენ.

თბილისი, 10 ნოემბერი – Sputnik. საფრანგეთის ხელისუფლებამ ცვლილებები შეიტანა ქვეყანაში შესვლის წესებში, რაც, მათ შორის, საქართველოს მოქალაქეებსაც ეხება.

შეზღუდვები დაწესდა საქართველოდან და ევროკავშირის შენგენის ზონის სხვა არაწევრი ქვეყნებიდან საფრანგეთის მეტროპოლიაში შესვლაზე.

საფრანგეთში 11 ნოემბრიდან შესვლას შეძლებენ მხოლოდ ამ ქვეყნის მოქალაქეები, მათი მეუღლეები და შვილები, ევროკავშირის წევრი სახელმწიფოების მოქალაქეები, რომლებსაც აქვთ მოქმედი პასპორტი და საფრანგეთში მუდმივი საცხოვრებელი ადგილი. ასევე ოფიციალური პასპორტის მფლობელები – უცხოეთის მოქალაქეები, რომლებიც დიპლომატიურ ან საკონსულო წარმომადგენლობაში მუშაობენ, ან საერთაშორისო ორგანიზაციაში, რომლის შტაბ-ბინაც საფრანგეთშია, ასევე მათი მეუღლეები, შვილები და ა.შ.

ამას გარდა, ქვეყანაში შემსვლელს უნდა ჰქონდეს განცხადება კორონავირუსის სიმპტომების არარსებობის შესახებ. აღნიშნული ცნობის ამობეჭდილი ან ციფრული ვერსია პირმა უნდა წარუდგინოს სატრანსპორტო კომპანიებს გასამგზავრებელი ბილეთის გამოყენებამდე. გარდა ჩვეულებრივი დოკუმენტებისა, ცნობა ასევე უნდა წარადგინოს საფრანგეთის შიდა საზღვრებზე განხორციელებული კონტროლისას.

თუ საფრანგეთში შესვლის სურვილის მქონე პირს ეს ცნობა არ ექნება, ავიაკომპანიამ მას შეიძლება ბორტზე ასვლაზე უარი უთხრას, უკიდურეს შემთხვევაში კი სასაზღვრო კონტროლისას საფრანგეთის ტერიტორიაზე არ დაუშვას.

საგარეო საქმეთა სამინისტროს ინფორმაციით, საფრანგეთში შესვლის ყველა მსურველს 11 ნოემბრიდან თან უნდა ჰქონდეს ბოლო 72 საათში ჩატარებული PCR–ტესტი. ეს ტესტი თვითმფრინავში ჩაჯდომის დროსაც შეიძლება მოითხოვონ.

საქართველომ ავირეისები პარიზის მიმართულებით მიმდინარე წლის ივლისში აღადგინა. ევროპის 13 ქალაქის გარდა ავიამიმოსვლა სხვა მიმართულებებით ძირითადად შეჩერებულია. გამონაკლისს წარმოადგენს ჩარტერული რეისები.

162
თემები:
COVID-19-ის პანდემია მსოფლიოში (1339)
სოფიკო შევარდნაძე

„სამი თვეა ამ სასწაულთან ერთად ვცხოვრობ“ - სოფო შევარდნაძე პირად ცხოვრებაზე დუმილს არღვევს

56
(განახლებულია 15:22 24.06.2021)
ცნობილმა ჟურნალისტმა პაუზის შემდეგ ვაჟთან ერთად უახლესი ფოტო გამოაქვეყნა და ცხოვრებისეულ პირად დეტალებზე ისაუბრა. რატომ არის 42 წლის ტელესახის ცხოვრებაში უკანასკნელი სამი თვე სასწაული?

საქართველოს ყოფილი პრეზიდენტის შვილიშვილი, ცნობილი ჟურნალისტი სოფო შევარდნაძე „ინსტაგრამის“ საკუთარ გვერდზე პირად ცხოვრებაზე საუბრობს, რადგან ბოლო პერიოდში, მას მერე, რაც ის დედა გახდა, არ წყდება კითხვები, თუ რატომ არ ჩანს მისი მეორე ნახევარი, ან რატომ არ ასაჯაროებს პატარა ანდრიას ფოტოს. მან გადაწყვიტა, დუმილი კიდევ ერთხელ დაარღვიოს.

Посмотреть эту публикацию в Instagram

Публикация от Sophie Shevardnadze (@sofikoshevardnadze)

სოფიკოს მიერ ვაჟთან ერთად გამოქვეყნებულ ფოტოებს, „ფოლოვერები“ სულმოუთქმენლად ელიან, თუმცა სოფო პირადი სივრცის პრინციპებს არ არღვევს. ახალშობილ ვაჟთან ერთად პოზირებს, ერთობლივ კადრებს სოციალურ ქსელში განათავსებს, თუმცა სახეს ამ დრომდე უმალავს. „სამი თვეა ამ სასწაულთან ერთად ვცხოვრობ“,- აღნიშნავს სოფო მიკრობლოგის ახალ პოსტზე. „ამიერიდან ყველაფერი სხვანაირად იქნება, აღმოჩნდა, რომ ადამიანური რესურსები ამოუწურავია. როცა მესმის შეკითხვები დედობისა და სამსახურის შეთავსებაზე, წამიერად ვპასუხობ, რომ ყველაფერი შესაძლებელია, თუ გაქვს სურვილი და არ გაქვს კომპლექსები, რომლებსაც უსაფუძვლო დანაშაულის განცდა სდევს ხოლმე თან“,- უყვება ფანებს ჟურნალისტი.

Посмотреть эту публикацию в Instagram

Публикация от Sophie Shevardnadze (@sofikoshevardnadze)

„ახლა ჩემი ოჯახი მაქვს. მე უკვე არა მხოლოდ ქალიშვილი, ან შვილიშვილი ვარ. ახლა დედა ვარ. და რაც არ უნდა უნდოდეს ბევრს, გაიგოს მეტი და უფრო ახლოს, მე უბრალოდ ვიცი, რომ ამიერიდან ჩემი შვილისთვის საზღვრების აგება ჩემი პასუხისმგებლობაა. ყოველთვის მიმაჩნდა, რომ ოჯახის წევრებს აქვთ უფლება, თავად გადაწყვიტონ, სურთ მათ საჯაროობა თუ არა. ჩვენი საქმე კი ის არის, მათ მივცეთ ეს არჩევანი და დავიცვათ არასაჭირო ყურადღებისგან. თუ ადამიანს, რომელიც ჩემ გვერდით არის, შეუძლია საკუთარი თავის დაცვა ამ უფლებით, ჩემი შვილისთვის მე ვარ ასეთი დამცველი. და მხოლოდ როდესაც ანდრია გაიზრდება და თავად შეძლებს გადაწყვიტოს, რის მიწოდება შეუძლია სამყაროსთვის, მე ვიქნები მხოლოდ და მხოლოდ დამკვირვებელი. მანამდე კი ასეა“, – წერდა სოფო.

Посмотреть эту публикацию в Instagram

Публикация от Sophie Shevardnadze (@sofikoshevardnadze)

საქართველოს მეორე პრეზიდენტის ედუარდ შევარდნაძის შვილიშვილი დედა 42 წლის ასაკში გახდა. ტელეწამყვანმა 21 თებერვალს ინფორმაცია ორსულობის შესახებ Clubhouse-ის მოდურ დანართთან საუბრისას გაამხილა, სადაც სტუმრები ბავშვთა აღზრდის თემაზე სასაუბროდ შეიკრიბნენ.

56
თემები:
ქართველი სელებრითები
ვაქცინები

„დეფიციტი აღარ იქნება“ მთავარი ეპიდემიოლოგი ვაქცინების შესახებ

29
(განახლებულია 18:05 24.06.2021)
ჯანდაცვის სამინისტროს ინფორმაციით, საქართველოში უახლოეს პერიოდში ექვსი კომპანიის ვაქცინა შემოვა.

თბილისი, 24 ივნისი – Sputnik. ივლისში ქვეყანა ვაქცინების საკმაოდ დიდ რაოდენობას მიიღებს და დეფიციტი აღარ იქნება, განაცხადა დაავადებათა კონტროლის ეროვნული ცენტრის ხელმძღვანელმა ამირან გამყრელიძემ.

როგორც მან ხუთშაბათს გამართულ ბრიფინგზე განაცხადა, ივლისის დასაწყისიდან  საქართველო ეტაპობრივად დაიწყებს სხვადასხვა დასახელების ვაქცინების, მათ შორის  43 ათასი დოზა AstraZenecа–ს მიღებას.

„სავაჭრო ცენტრ Hualing–ში უკვე გაიხსნა პირველი დიდი ამცრელი სივრცე. ასეთივე დიდი სივრცეები გაიხსნება ყველა დიდ ქალაქში, რათა ივლისში, აგვისტოსა და სექტემბრში რაც შეიძლება მეტი ადამიანის ვაქცინაცია მოხდეს. ვადასტურებ, ძალზე მყარ ინფორმაციაზე დაყრდნობით, რომ  ვაქცინების საკმაო მარაგი შეიქმნება“, – განაცხადა გამყრელიძემ. 

მისი განმარტებით,  რამდენიმე კვირის შემდეგ საქართველო დონაციის სახით აშშ–დან ვაქცინების მნიშვნელოვან რაოდენობას მიიღებს.

„ჩვენ ვფიქრობთ და დარწმუნებული ვართ, რომ ვაქცინების დეფიციტი, ის მწარე გამოცდილება, რომელიც ქვეყანაში ბოლო 4–5 დღის განმავლობაში შეიქმნა, აღარ განმეორდება“, – განაცხადა გამყრელიძემ.

რაც შეეხება მოქალაქეებს, რომლებიც  AstraZeneca–ს მეორე დოზით ვაქცინაციაზე იყვნენ დარეგისტრირებული და  პირველი დოზის მიღებიდან 10–12 კვირა გაუვიდათ, გამყრელიძის თქმით, მათ უკვე შეუძლიათ სპეციალურ პორტალზე რეგისტრაციის გავლა. უახლოესი ორი კვირის განმავლობაში დაახლოებით 1,8 ათასი მოქალაქე შეძლებს AstraZeneca–ს მეორე დოზით აცრას.

გამყრელიძის განცხადებით, ამ ეტაპზე საქართველოს არ აქვს აღნიშნული პრეპარატით მოქალაქეების პირველი დოზით ვაქცინაციის შესაძლებლობა და მათ ამის შესახებ სმს–შეტყობინებები დაეგზავნათ.

რამდენიმე დღის წინ დაავადებათა კონტროლის ეროვნულმა ცენტრმა მოქალაქეებს ვაქცინების დეფიციტთან დაკავშირებით ბოდიში მოუხადა.

ბოლო მონაცემებით, საქართველოში კორონავირუსის საწინააღმდეგო ვაქცინა 245.380–მა ადამიანმა გაიკეთა, მათგან სრული დოზით აცრილია 88.754 პირი.

29
თემები:
კორონავირუსი საქართველოში: ბოლო ცნობები
ღვინო

ლონდონში ქართულმა ღვინომ ბრიტანელი ექსპერტების საუკეთესო შეფასება მიიღო

0
დეგუსტაციაზე წარმოდგენილი იყო 50-ზე მეტი ქართული ღვინის მწარმოებელი კომპანიის 100-მდე დასახელების ღვინო, რომელიც დიდი ბრიტანეთის ბაზარზე უკვე ხელმისაწვდომია.

თბილისი, 24 ივნისი – Sputnik. ლონდონში ქართული ღვინის დეგუსტაცია გაიმართა, ნათქვამია ღვინის ეროვნული სააგენტოს მიერ გავრცელებულ განცხადებაში.

ღონისძიება ღვინის ეროვნული სააგენტოს კონტრაქტორი ბრიტანული კომპანიის Swirl Wine Group ორგანიზებით გაიმართა, რომელსაც საქართველოს საგანგებო და სრულუფლებიანი ელჩი გაერთიანებულ სამეფოში სოფიო ქაცარავა დაესწრო.

სააგენტოს ინფორმაციით, ქართული ღვინის ადგილობრივმა იმპორტიორებმა დეგუსტაციაზე 50-ზე მეტი ქართული ღვინის სხვადასხვა ბრენდი წარმოადგინეს, რომლებიც უკვე ხელმისაწვდომია დიდი ბრიტანეთის ბაზარზე.

„წარმოდგენილი იყო 50-ზე მეტი ქართული ღვინის მწარმოებელი კომპანიის 100-მდე დასახელების ღვინოები, რომლებიც ამ ეტაპზე, ღვინის ეროვნული სააგენტოს მხარდაჭერით, ცდილობენ ქართული ღვინის სტრატეგიულ, დიდი ბრიტანეთის ბაზარზე დამკვიდრებას“, - ნათქვამია განცხადებაში.

ქართული ღვინის დეგუსტაცია  ლონდონის პრესტიჟულ რესტორან Trivet-ში ჩატარდა, რომლის ღვინის მენიუც შედგენილია ღვინის განსაკუთრებულ ისტორიაზე დაფუძნებით. ამ აღიარებულ რესტორანში საქართველოს, როგორც ღვინის სამშობლოს, შესაბამისი ადგილი უკავია მსოფლიოს სხვა საუკეთესო ღვინოებს შორის.

0