წვეთოვანი

საქართველოში კორონავირუსის მართვაში, შესაძლოა, პენსიონერი ექიმები და სტომატოლოგები ჩაერთონ

41
(განახლებულია 20:22 06.11.2020)
კორონავირუსით ინფიცირებულთა მართვაში უკვე ჩართული არიან სამედიცინო სასწავლებლების სტუდენტები. ისინი გადანაწილებული არიან როგორც კლინიკურ სექტორში, ასევე აქტიურად არიან ჩართული ონლაინ-კლინიკების მუშაობაში.

თბილისი, 6 ნოემბერი – Sputnik. საქართველოს ჯანდაცვის სამინისტრო კორონავირუსით დაავადებული პაციენტების მართვის პროცესში პენსიონერი ექიმების ჩართვას გეგმავს, განაცხადა ჯანდაცვის მინისტრმა ეკატერინე ტიკარაძემ მთავრობის ადმინისტრაციაში გამართულ ბრიფინგზე. 

სექტემბრის დასაწყისიდან საქართველოში მკვეთრად იმატა კორონავირუსით ინფიცირებულთა რაოდენობამ. დღეს ქვეყანაში ინფიცირების რეკორდული მაჩვენებელი – 2 775 შემთხვევა დაფიქსირდა.

ტიკარაძის განმარტებით, კორონავირუსის შემთხვევების მატებასთან ერთად ყველაზე საყურადღებო სამედიცინო პერსონალის რესურსი გახდა. ამიტომ ამ ეტაპზე ყველა პროფილის ექიმის მაქსიმალური მობილიზება ხდება.

„პენსიონერი ექიმების მხრიდანაც გვაქვს გამოხმაურება და არის მზადყოფნა. შესაბამისად, მათი რესურსი აქტიურად არის გამოყენებული სახელმწიფოს მხრიდან, თუმცა ამ ეტაპისთვის მიმდინარეობს კიდევ დამატებითი მობილიზება ყველა იმ სხვა პროფილის ექიმებისა, რომლებიც ფლობენ შესაბამის უნარ-ჩვევებს და შეუძლიათ პაციენტების მართვა“, – განაცხადა ტიკარაძემ. 

დღეს დაავადებათა კონტროლის ეროვნული ცენტრის ხელმძღვანელმა ამირან გამყრელიძემაც განაცხადა, რომ, მართალია, პენსიონერი ექიმები ვერ იმუშავენ რეანიმაციულ განყოფილებებსა და ჰოსპიტლებში, მაგრამ მათი დახმარება სასარგებლო იქნება კოვიდ–ცენტრებში, კოვიდ–სასტუმროებსა და პირველადი ჯანდაცვის დაწესებულებებში.

გამყრელიძის განაცხადებით, კორონავირუსის მართვაში, შესაძლოა, სტომატოლოგებმაც მიიღონ მონაწილეობა, რადგან მათ შესაბამისი სამედიცინო განათლება აქვთ.

კორონავირუსით ინფიცირებული პაციენტების მართვაში უკვე ჩართული არიან მედიცინის საგანმანათლებლო პროგრამების სტუდენტებიც (1844 მაღალკურსელი). ჯანდაცვის მინისტრის ინფორმაციით, ისინი გადანაწილებული არიან როგორც კლინიკურ სექტორში, ასევე აქტიურად არიან ჩართული ონლაინ-კლინიკების მუშაობაშიც.

საქართველოში ახალი კორონავირუსით დაავადებულთა რაოდენობა ბოლო დღე-ღამეში 2775-ით გაიზარდა და ინფიცირებულთა საერთო რიცხვმა 51993-ს მიაღწია. ამ დროისათვის სულ გამოჯანმრთელდა 37019 ადამიანი, გარდაიცვალა 423 პაციენტი.

საქართველოში კორონავირუსის პირველი შემთხვევა 26 თებერვალს დაფიქსირდა.

41
თემები:
COVID-19 საქართველოში (2505)
პაატა იმნაძე

იმნაძე: რეალურად COVID-19–ის 10 ათასამდე შემთხვევა გვაქვს ყოველდღიურად

12
(განახლებულია 11:56 25.11.2020)
კორონავირუსით ინფიცირების ოფიციალური სტატისტიკა ქვეყანაში არსებულ რეალურ სურათს არ ასახავს, მიიჩნევს ეპიდემიოლოგი

თბილისი, 25 ნოემბერი - Sputnik. სინამდვილეში, საქართველოში ერთ დღეში კორონავირუსით ათი ათასამდე მოქალაქე ინფიცირდება და არა სამი–ოთხი ათასი, როგორც ეს სტატისტიკურ მონაცემებშია ასახული, განაცხადა ტელეკომპანია „რუსთავი2"–ის ეთერში დაავადებათა კონტროლისა და საზოგადოებრივი ჯანმრთელობის ეროვნული ცენტრის ხელმძღვანელის მოადგილე პაატა იმნაძემ.

COVID-19 საქართველოში: რამდენი შემთხვევა გამოვლინდა ბოლო დღე-ღამეში>>

„ჩვენი გათვლებით, ახლა 10 ათასამდე მაინც არის დღეში ახალი ავადმყოფი საქართველოს მასშტაბით. ეს არის ის, რაც რეალურად ხდება ახლა, უბრალოდ, ეს ადამიანები არიან ის უსიმპტომოები, ძალიან მსუბუქები, რომლებიც არ მიდიან, რომ გაიტესტონ, ან სისტემაში მოხვდნენ", – განაცხადა იმნაძემ.

ეპიდემიოლოგმა აღნიშნა, რომ მთავრობის დამოკიდებულება არ უნდა იყოს ასეთი ლიბერალური, შეზღუდვები უფრო მკაცრი უნდა იყოს.

„ამას ყველაფერს მე ზაფხულშიც ვამბობდი,რომ ეს მოხდებოდა. შეახსენეთ მოსახლეობას, რომ მე ჩემს სიტყვებზე პასუხისმგებელი ვიყავი გაზაფხულზეც, ზაფხულშიც და ახლაც. ალბათ საჭირო იყო მეტი შეზღუდვები", – განაცხადა იმნაძემ.

სპეციალისტები ფიქრობდნენ, რომ მოსახლეობა გაგებით შეხვდებოდა ამ პრობლემას და გაითავისებდა, დაუჯერებდა სპეციალისტებს, მაგრამ ეს ასე არ მოხდა, აღნიშნა მან.

„დიახ, მეტი სიმკაცრე უნდა ყოფილიყო, გეთანხმებით", – განაცხადა იმნაძემ.

მან აღნიშნა, რომ ყველა დიდი შეკრება, იქნება ეს ეკლესიაში, აქციაზე, რესტორანში ან სადმე სხვაგან, შეიძლება ინფექციის მასშტაბური გავრცელების წყარო გახდეს.

დღეის მონაცემებით, საქართველოში კორონავირუსით ინფიცირებულია 114 889 ადამიანი, გარდაიცვალა 1 085.

„ეს იყო შეცდომა" – ჯანდაცვის მინისტრი მთავრობის ლიბერალურ პოლიტიკაზე>>

სექტემბრის დასაწყისიდან, როდესაც ქვეყანაში საკურორტო სეზონი დამთავრდა, ქვეყანაში ინფიცირების ბუმი მოხდა – ახალი შემთხვევების დღიური ზრდა ბოლო დროს უკვე 3–4 ათასია.

12
თემები:
COVID-19 საქართველოში (2505)
კორონავირუსი საქართველოში

კოვიდ-სტატისტიკა საქართველოში: თბილისში ყველაზე მეტი შემთხვევაა

6
(განახლებულია 11:41 25.11.2020)
საქართველოში პანდემიის გავრცელებიდან დღემდე გამოვლენილი დადასტურებული შემთხვევების საერთო რაოდენობამ 115 ათასს მიაღწია.

თბილისი, 25 ნოემბერი – Sputnik. საქართველოში ბოლო 24 საათში კორონავირუსის დადასტურებული 3.071 შემთხვევიდან ყველაზე მეტი – 1.314 შემთხვევა კვლავ თბილისში გამოვლინდა, განაცხადა უწყებათშორის საკოორდინაციო საბჭოსთან არსებული საოპერაციო შტაბის უფროსის მოადგილემ ბერდია სიჭინავამ მთავრობის ადმინისტრაციაში გამართულ ბრიფინგზე.

ინფიცირების ახალი შემთხვევების რაოდენობით მეორე ადგილზე აჭარა, მესამეზე კი იმერეთია.

დღეს გამოვლენილი შემთხვევების სტატისტიკა რეგიონების მიხედვით ასეთია: აჭარა – 523, იმერეთი – 264, სამეგრელო–ზემო სვანეთი – 232, კახეთი – 214, მცხეთა-მთიანეთი –165, გურია – 106, ქვემო ქართლი – 104, სამცხე-ჯავახეთი – 84, შიდა ქართლი – 44, რაჭა-ლეჩხუმი და ქვემო სვანეთი – 21. 

დღევანდელი მონაცემებით, გამოჯანმრთელებულ ადამიანთა რაოდენობა ინფიცირებულები პირების რიცხვს აჭარბებს. ბოლო 24 საათში გამოჯანმრთელდა 3 366 პირი, ხოლო ჯამში გამოჯანმრთელებულთა რაოდენობა 95 581-მდე გაიზარდა.

ბოლო 24 საათში გარდაიცვალა 34 პაციენტი. ქვეყანაში კორონავირუსის დიაგნოზით ჯამში 1.085 ადამიანი გარდაიცვალა.

ამ დროისათვის საქართველოში 18.197 აქტიური შემთხვევაა.  კოვიდ–კლინიკებში მოთავსებულია 6.145 ადამიანი, მათ შორის,  თბილისში - 2.712, აჭარაში - 1.010, იმერეთში - 1.241.

886 პაციენტის მდგომარეობა მძიმეა. ხელოვნური სუნთქვის აპარატზე შეერთებულია 324 პირი, მათ შორის, თბილისში – 165, აჭარაში – 49, იმერეთში – 42. ბინაზე 8.329 პირი მკურნალობს.

დღევანდელი მდგომარეობით, საკარანტინო სივრცეში იმყოფება 2.071 ადამიანი, მათ შორის, თბილისში – 434, აჭარაში – 1.021, ხოლო იმერეთში – 33.

თვითიზოლაციაში იმყოფება 51.936 პირი, აქედან თბილისში 17.231 ადამიანი, აჭარაში – 13.768, იმერეთში – 4.951.

საქართველოში პანდემიის გავრცელებიდან დღემდე გამოვლენილი დადასტურებული შემთხვევების საერთო რაოდენობა 114.889-ს შეადგენს.

საქართველოში კორონავირუსის პირველი შემთხვევა 26 თებერვალს დაფიქსირდა.

6
თემები:
COVID-19 საქართველოში (2505)