სასწრაფო დახმარების ბრიგადა

COVID-19 და ლეტალური შემთხვევები: გარდაცვალების ყველაზე მეტი ფაქტი თბილისში დაფიქსირდა

78
(განახლებულია 19:35 27.10.2020)
ახალი კორონავირუსით დაავადებულთა რაოდენობა ბოლო დღე-ღამეში 1824-ით გაიზარდა და საერთო რიცხვმა 32127-ს მიაღწია.

თბილისი, 27 ოქტომბერი – Sputnik. ბოლო 24 საათში საქართველოში კორონავირუსით 23 პაციენტი გარდაიცვალა და მათი საერთო რაოდენობა 238-მდე გაიზარდა. შესაბამისი ინფორმაცია საქართველოს მთავრობის სპეციალურ ვებ-გვერდზე stopcov.ge განახლდა.

გავრცელებული ინფორმაციით, გარდაცვალების ფაქტები დაფიქსირდა თბილისში, აჭარაში, იმერეთში, შიდა ქართლში და მცხეთა-მთიანეთში.

კორონავირუსით გარდაცვლილი 23 პაციენტიდან ცხრა თბილისში, რვა აჭარაში, ორი იმერეთში, ორი შიდა ქართლში, ორი კი მცხეთა-მთიანეთში გადიოდა მკურნალობის კურსს.

თბილისის შემდეგ ბოლო 24 საათში კორონავირუსით გარდაცვალების ყველაზე მაღალი მაჩვენებელი აჭარაში დაფიქსირდა. გარდაიცვალა რვა პაციენტი, მათ შორის ორი ქალია, ექვსი კი – მამაკაცი.

გარდაცვალების სამი შემთხვევა დაფიქსირდა ბათუმის რესპუბლიკურ საავადმყოფოში, ორი ქობულეთის სამედიცინო ცენტრში, თითო–თითო შემთხვევა კი ბათუმის ინფექციურ საავადმყოფოში, საერთაშორისო ჰოსპიტალსა და კლინიკა „მედცენტრში“.

საქართველოში კორონავირუსით 23 პაციენტი გარდაიცვალა>>

გავრცელებული ინფორმაციით, გარდაცვლილებს COVID-19-ის დიაგნოზის პარალელურად მძიმე თანმხლები დაავადებები აღენიშნებოდათ. გარდაცვლილთა ასაკი აჭარაში 65-დან 82 წლამდე მერყეობს.

თერჯოლის საავადმყოფოში გარდაცვლილილი პაციენტები 75 და 83 წლის პირები იყვნენ.

75 წლის ქალი „თერჯოლამედში" წალენჯიხიდან გადაიყვანეს, ის შეყვანიდან ერთ საათში გარდაიცვალა, მას თანმდევი დაავადებები ჰქონდა. რაც შეეხება მეორე პაციენტს, 83 წლის ქალი კლინიკაში ბათუმიდან ორი კვირის წინ გადაიყვანეს, პაციენტს თანმდევი დაავადებები ჰქონდა და მართვით სუნთქვაზე იმყოფებოდა.

შიდა ქართლში, „გორმედის“ კოვიდ-კლინიკებში მოთავსებული ინფიცირებულებიდან ორი პაციენტი გარდაიცვალა, ერთი 66 წლის, მეორე კი - 72 წლის. გარდაცვლილებს თანმდევი დაავადებები აღენიშნებოდათ.

ამ დროისთვის სხვა გარდაცვლილების შესახებ ინფორმაცია არ ვრცელდება.

ახალი კორონავირუსით დაავადებულთა რაოდენობა ბოლო დღე-ღამეში 1824-ით გაიზარდა და საერთო რიცხვმა 32127-ს მიაღწია.

თუ კორონავირუსი დაგიდასტურდათ - ექიმის რჩევები, როგორ იმკურნალოთ სახლში>>

ამ დროისათვის სულ გამოჯანმრთელდა 12632 ადამიანი, გარდაიცვალა – 238, კარანტინის რეჟიმშია 3757, სტაციონარებში ექიმების დაკვირვების ქვეშ 3847 პაციენტია, ხოლო კოვიდ–სასტუმროებში 2238 ადამიანი იმყოფება.

საქართველოში კორონავირუსის პირველი შემთხვევა 26 თებერვალს დაფიქსირდა.

78
თემები:
COVID-19 საქართველოში (2862)
სასწრაფო დახმარება

COVID-19 საქართველოში 13 ივნისის მონაცემები

10
ამ დროისათვის სულ გამოჯანმრთელდა 339.392  ადამიანი (ბოლო 24 საათში – 1074), გარდაიცვალა – 5.048  (ბოლო 24 საათში – 14), კარანტინის რეჟიმშია 41, სტაციონარებში ექიმების დაკვირვების ქვეშ 3.155 პაციენტი, ხოლო კოვიდ–სასტუმროებში 610 ადამიანი იმყოფება.

თბილისი, 13 ივნისი – Sputnik. საქართველოში ახალი კორონავირუსით დაავადებულთა რაოდენობა ბოლო დღე-ღამეში 522-ით გაიზარდა და ინფიცირებულთა საერთო რიცხვმა 353.965-ს მიაღწია. ინფორმაცია საქართველოს მთავრობის სპეციალურ ვებ-გვერდზე stopcov.ge განახლდა.

ამ დროისათვის სულ გამოჯანმრთელდა 339.392  ადამიანი (ბოლო 24 საათში – 1074), გარდაიცვალა – 5.048  (ბოლო 24 საათში – 14), კარანტინის რეჟიმშია 41, სტაციონარებში ექიმების დაკვირვების ქვეშ 3.155 პაციენტი, ხოლო კოვიდ–სასტუმროებში 610 ადამიანი იმყოფება.

ბოლო 24 საათში ჩატარებულია 21.922 კვლევა ტესტით, მათ შორის ანტიგენის სწრაფი ტესტით - 11.016, PCR ტესტით - 10.906.

დადებითობის მაჩვენებელი: დღიური – 2,38%, ბოლო 14 დღის - 2,61%, ბოლო 7 დღის - 2,29%.

სულ აცრილია 206.742 პირი, ერთ დღეში აცრილია 4.425 ადამიანი.

საქართველოში კორონავირუსის პირველი შემთხვევა 2020 წლის 26 თებერვალს დაფიქსირდა.

10
ნამახვანჰესის მოწინააღმდეგეთა აქცია თბილისში

ნამახვანჰესის საკითხზე ევროკავშირის მედიაციით შეხვედრა დასრულდა: რა გადაწყდა

129
(განახლებულია 22:50 12.06.2021)
რამდენიმესაათიან შეხვედრაზე გადაწყდა, რომ რიონის ხეობაში დეესკალაცია მოხდება, მთავრობა ენერგოუსაფრთხოების 10-წლიან დოკუმენტს შეიმუშავებს, ევროკავშირის წარმომადგენლები კი „ნამახვანჰესის“ მშენებლობის რისკებს შეაფასებენ.

თბილისი, 12 ივნისი – Sputnik. „ნამახვანჰესის“ მშენებლობის მოწინააღმდეგეთა და მთავრობის წარმომადგენლებს შორის შეხვედრა, რომელიც ევროკავშირის ენერგეტიკული გაერთიანების დავების გადაწყვეტისა და მოლაპარაკების ცენტრის წარმომადგენლების შუამავლობით გაიმართა, სამ ძირითად საკითხზე შეთანხმებით დასრულდა.

შეხვედრა, რომელსაც მედიატორების გარდა, „ნამახვანჰესის“ მშენებლობის მოწინააღმდეგე აქტივისტები და გარემოს დაცვის და ეკონომიკის სამინისტროს წარმომადგენლები ესწრებოდნენ, ნატახტარში დღეს დილით ადრე დაიწყო და საღამოს დასრულდა.

შეთანხმება შემდეგ სამ საკითხზე მოხდა:

  1. ევროკავშირის წარმომადგენლები სამოქალაქო საზოგადოებასა და მთავრობასთან ერთად „ნამახვანჰესის“ პროექტის რისკებს შეაფასებენ. რისკების აღმოჩენის შემთხვევაში მათი აღმოფხვრის მიზნით მედიატორები დიალოგს უზრუნველყოფენ.
  2. რიონის ხეობაში უნდა მოხდეს დეესკალაცია, რკინის ბარიერების მოხსნა, საპოლიციო ძალების გაყვანა და იქ მყოფი ადამიანებისთვის კონსტიტუციით გათვალისწინებული უფლების უზრუნველყოფა გადაადგილების თავისუფლებასთან დაკავშირებით.
  3. მთავრობამ უნდა შეადგინოს დოკუმენტი, რომელიც განსაზღვრავს მომავალი 10 წლის განმავლობაში ენერგოუსაფრთხოების პოლიტიკას, მათ შორის განხილული იქნება ჰიდროელექტროსადგურების წილი და როლი მთლიან ენერგოუსაფრთხოებაში. შემდეგ მოხდება ამ დოკუმენტის განხილვა, სხვა ალტერნატიულ საშუალებებთან ერთად.
„სამოქალაქო საზოგადოებაც აქტიურად იქნება ჩართული ამ განხილვებში და რა თქმა უნდა, არ იქნება ეს დოკუმენტი დოკუმენტისთვის, არამედ აუცილებლად უნდა იყოს აღსრულებადი“, - განაცხადა ევროკავშირის ენერგეტიკული გაერთიანების დავების გადაწყვეტის ცენტრის ხელმძღვანელმა, დირკ ბუშლემ.

მისი თქმით, მომავალში ევროკავშირის მხრიდან მედიაციის გაგრძელების საკითხი მხარეების მიერ აღნიშნული პირობების შესრულებაზეა დამოკიდებული.

„ეს პირობები ვადებში ეფექტურად თუ აღსრულდება, რა თქმა უნდა მედიაცია აუცილებლად გაგრძელდება“, – განაცხადა დირკ ბუშლემ.

პროტესტების ორგანიზატორის, ვარლამ გოლეთიანის განცხადებით, შეხვედრაზე საპროტესტო აქციებზე დაკავებული აქტივისტების საკითხიც განიხილებოდა.

„მკაფიოდ დადგა დაკავებული ბიჭების საკითხი. მოწოდება გაკეთდება პროკურატურის მისამართით, რომ უნდა გათავისუფლდნენ ჩვენი თანამებრძოლები, მათ შორის სამინისტრომაც ჩაინიშნა ეს მიმართვა პროკურატურის მისამართით. ასევე, ჩვენთვის მნიშვნელოვანია ჩვენი თანამებრძოლების პოტენციური დაკავებები, რაც შეიძლება მოხდეს იმიტომ, რომ ჩვენ გვაქვს ამაზე ინფორმაცია“, - განაცხადა გოლეთიანმა.

მან აღნიშნა, რომ შეთანხმების თანახმად, საპოლიციო ძალები უნდა გაიყვანონ რიონის ხეობიდან, ხოლო დემონსტრანტები სოფელ ნამოხვანში დაბრუნებას შეძლებენ.

„შევთანხმდით, რომ თუკი ეს პირობები შესრულდება შემდეგ პარასკევამდე, ისევ შევიკრიბებით და დადგება შემდგომი პირობის განხილვის საკითხი, რაც გულისხმობს სამუშაო პროცესის შეჩერებას უშუალოდ ხეობაში“, – განაცხადა გოლეთიანმა.

„ნამახვანჰესის“ მშენებლობის წინააღმდეგ პროტესტი შვიდ თვეზე მეტია გრძელდება. მიუხედავად იმისა, რომ პროექტი ქვეყნის ენერგოდამოუკიდებლობისთვის მნიშვნელოვანია, მის წინააღმდეგ პროტესტი სულ უფრო მძაფრდება. პროტესტს ორი მიზეზი აქვს: ერთი - ესაა საფრთხე, რომელიც მომავალი კაშხლის შესაძლო გარღვევამ შეიძლება შეუქმნას მთელ იმერეთის რეგიონს, მეორე - საქართველოში თურქული კომპანია Enka-სთვის დიდი რაოდენობით მიწების 99 წლის ვადით გადაცემაა.

 

129