საბავშვო ბაღი

კერძო საგანმანათლებლო სექტორის ბიზნესი საფრთხეშია სად ეძებენ მაშველ რგოლს მფლობელები

42
(განახლებულია 22:05 08.10.2020)
რთული იქნება საქმიანობის გაგრძელება, ამბობენ კერძო ბაღების მფლობელები და სახელმწიფოსგან დახმარებას ითხოვენ.

თბილისი, 8 ოქტომბერი – Sputnik. კერძო ბაღების დირექტორები სახელმწიფოს მხრიდან თანადგომას, მხარდაჭერას და სუბსიდირებას ითხოვენ, რადგან, მათი განცხადებით, პანდემიის შედეგად ყველაზე მეტად კერძო ბაღები დაზარალდნენ. ამის შესახებ დღეს გამართულ პრესკონფერენციაზე ჟურნალისტებს კერძო სააღმზრდელო-საგანმანათლებლო დაწესებულებების ასოციაცია „მნათის“ ხელმძღვანელი გიგი სისვაძე და კერძო ბაღების დირექტორები ესაუბრნენ. 

სისვაძის განცხადებით, პანდემიის შედეგად ყველაზე მეტად დაზარალდა კერძო საგანმანათლებლო სექტორი, ვინაიდან სასწავლო პროცესი მთლიანად გაჩერდა.

„განსაკუთრებით დაზარალდნენ ბაღები, რადგან ბაღები ვერ სთავაზობენ თავიანთ ბენეფიციარებს თუნდაც დისტანციურ სწავლებას. დაახლოებით რვა თვეა, რაც ეს სექტორი მთლიანად გაჩერებულია. არანაირი შემოსავალი მათ არ გააჩნიათ. ამის უკან დგას ოჯახები, დასაქმებული ადამიანები, ის მოიჯარეები, რომლებისგანაც ჩვენ ფართები გვაქვს აღებული“, – განაცხადა სისვაძემ.

მისი თქმით, იყო მოლოდინი, რომ სწავლა სექტემბერში განახლდებოდა. სააღმზრდელო პროცესის მოსამზადებლად დამატებით თანხები დაიხარჯა, მაგრამ სასწავლო პროცესი არ განახლდა. ეს კი ამ სეგმენტზე ცუდად აისახა. ამასთან, კერძო ბაღებმა დაკარგეს ბენეფიციარები. მშობლებმა შვილები კერძო ბაღებიდან საჯარო ბაღებში გადაიყვანეს.

კერძო ბაღების დირექტორები ითხოვენ, სახელმწიფომ მიიღოს შესაბამისი ზომები და აღმოუჩინოს მათ მხარდაჭერა, ვინაიდან ისინი წლების განმავლობაში ბიუჯეტში იხდიდნენ გადასახადს, ახლა კი მათ სჭირდებათ სახელმწიფოს მხრიდან დახმარება და სუბსიდირება.

„ძალიან მნიშვნელოვანია, რომ ჩვენ გვიწევს ბიუჯეტის გადასახადები. სახელმწიფო არც ამ ნაწილში იღებს ხმას და დუმს. გვაქვს საშემოსავლო გადასახადები, ქონების გადასახადი, რომელიც არ არის პატარა თანხა. ფაქტიურად მთლიანი წელი ჩვენ არ გვიმუშავია და საგადასახადო გვთხოვს ამ გადასახადს“, – განაცხადა სისვაძემ.

საბავშვო ბაღ „იავნანას“ ხელმძღვანელის სალომე ჭანტურიშვილის თქმით, მნიშვნელოვანი იქნება, თუ საშემოსავლო გადასახადს თუნდაც ერთი წლით გადაავადებენ.

„ჩვენ სტანდარტებს, რეგულაციებს ვაკმაყოფილებთ. გავიარეთ შემოწმება, უკვე დადებითი პასუხიც მივიღეთ. როგორც ჩვენთვის ცნობილი გახდა, 12 რიცხვში აპირებენ ჩვენ გახსნას. მოხარულები ვართ, მაგრამ არის რიგი პრობლემები, რაც მოუგვარებელი რჩება. ბავშვების ნაკადი, ფაქტობრივად, გაგვინახევრდა. ძალიან გაგვიჭირდება იჯარის გადახდა, პერსონალის ხელფასების გადახდა და ა.შ. აქედან გამომდინარე, დიდი იმედი გვაქვს, რომ სახელმწიფოს მხრიდან იქნება მხარდაჭერა. თუნდაც ერთი წლით რომ გადაგვიწიონ საშემოსავლო გადასახადი, ეს ჩვენთვის ძალიან მნიშვნელოვანი იქნება“, – განაცხადა ჭანტურიშვილმა.

როგორც ბაღის დირექტორები აღნიშნავენ, ეს სექტორი ეკონომიკური კრიზისის წინაშე დგას.

 

42
არჩევნები

31 ოქტომბრის არჩევნებისთვის ბიულეტენების ბეჭდვა დღეს დასრულდება

14
(განახლებულია 11:37 26.10.2020)
ბიულეტენების ბეჭდვა უსაფრთხოების ნორმების ყველა წესის დაცვით მიმდინარეობს. პროცესს ადგილობრივი ორგანიზაციების 16 დამკვირვებელი აკვირდება.

თბილისი, 26 ოქტომბერი — Sputnik. 31 ოქტომბრის საპარლამენტო არჩევნებისთვის თბილისის შვიდ სტამბაში საარჩევნო ბიულეტენების ბეჭდვა ორშაბათს დასრულდება. 

ბიულეტენების ბეჭდვის პროცესს, რომელიც სამი დღეა გრძელდება, ცენტრალური საარჩევნო კომისიის წევრებთან ერთად სადამკვირვებლო ორგანიზაციების წარმომადგენლები აკვირდებიან. არჩევნებისთვის სულ 7 102 600 ბიულეტენი დაიბეჭდება.

საქართველოში 31 ოქტომბრის საპარლამენტო, საკრებულოების შუალედური, მერების რიგგარეშე და აჭარის უმაღლესი საბჭოს არჩევნები იმართება. ბოლო მონაცემებით, ამომრჩეველთა ერთიან სიაში 3 526 032 ადამიანია რეგისტრირებული.

3 160,9 ათასი ბიულეტენი განკუთვნილია პროპორციული საარჩევნო სისტემისთვის (პარტიული სიები და ბლოკები), 3 097,8 ათასი კი მაჟორიტარულისთვის, 584 ათასი აჭარის უმაღლესი საბჭოს, 40,1 ათასი საკრებულოს შუალედური, 219,8 ათასი კი მერების არჩევნებისთვის.

საარჩევნო ბიულეტენები თანმიმდევრობით დაინომრება და 50-50 ცალად აიკინძება ბლოკნოტების სახით.

ბიულეტენები 3 725 საარჩევნო უბანზე განაწილდება. აღსანიშნავია, რომ ბიულეტენები ასევე იბეჭდება ეთნიკური უმცირესობების ენებზე: აქედან ქართულ-აზერბაიჯანული ბიულეტენები მიეწოდება 213 საარჩევნო უბანს, ხოლო ქართულ-სომხური - 135 საარჩევნო უბანს. საოლქო საარჩევნო კომისიები კენჭისყრის დაწყებამდე არაუგვიანეს 12 საათისა უზრუნველყოფენ ბიულეტენების მიწოდებას საუბნო საარჩევნო კომისიებისათვის. 

ამასთან, თბილისის, თელავის, თეთრიწყაროსა და ონის მუნიციპალიტეტების 39 საარჩევნო უბანზე, მოქალაქეები მიიღებენ 3 ბიულეტენს: პროპორციული, მაჟორიტარული არჩევნებისა და ადგილობრივი თვითმმართველობის ორგანოების (საკრებულო) არჩევნებისთვის.
კასპის, ონის, ხარაგაულის, თერჯოლისა და ქუთაისის მუნიციპალიტეტებში, ჯამში 255 საარჩევნო უბანზე, სადაც მერების არჩევნები იმართება, ამომრჩეველი სამი სახის ბიულეტენს მიიღებს.

რაც შეეხება აჭარას, სადაც საპარლამენტო არჩევნების პარალელურად აჭარის უმაღლესი საბჭოს არჩევნები ტარდება, ამომრჩეველი ოთხი სახის ბიულეტენს მიიღებს.

ბიულეტენების ბეჭდვა უსაფრთხოების ნორმების ყველა წესის დაცვით მიმდინარეობს. პროცესს ადგილობრივი ორგანიზაციების 16 დამკვირვებელი აკვირდება.

14
თემები:
საქართველოს საპარლამენტო არჩევნები 2020
საავადმყოფო

საქართველოში კორონავირუსით კიდევ 14 პაციენტი გარდაიცვალა

22
საქართველოში ახალი კორონავირუსით დაავადებულთა რაოდენობა ბოლო დღე-ღამეში 1872-ით გაიზარდა და საერთო რიცხვმა 30303-ს მიაღწია

თბილისი, 26 ოქტომბერი – Sputnik. ბოლო 24 საათში საქართველოში კორონავირუსით 14 პაციენტი გარდაიცვალა და მათი საერთო რაოდენობა 215-მდე გაიზარდა. შესაბამისი ინფორმაცია საქართველოს მთავრობის სპეციალურ ვებ-გვერდზე stopcov.ge განახლდა.

ახალი კორონავირუსით დაავადებულთა რაოდენობა ბოლო დღე-ღამეში 1872-ით გაიზარდა და საერთო რიცხვმა 30303-ს მიაღწია.

ამ დროისათვის სულ გამოჯანმრთელდა 11370 ადამიანი, გარდაიცვალა – 215, კარანტინის რეჟიმში იმყოფება 3769, სტაციონარებში ექიმების დაკვირვების ქვეშ 3832 პაციენტია, ხოლო კოვიდ–სასტუმროებში  2249 ადამიანი იმყოფება.

საქართველოში კორონავირუსის პირველი შემთხვევა 26 თებერვალს დაფიქსირდა.

22
თემები:
COVID-19 საქართველოში