საპატრიარქო

საპატრიარქო: გარკვეული ძალები ცდილობენ ეკლესიის პოზიციას პოლიტიკური სარჩული დაუდონ

58
(განახლებულია 15:12 08.10.2020)
გუშინ საქართველოს პროკურატურამ საქართველო–აზერბაიჯანის საზღვრის დემარკაციის პროცესში უცხოეთის სახელმწიფოსთვის საქართველოს ტერიტორიის ნაწილის გადაცემის საქმეზე ორი პირი დააკავა.

თბილისი, 8 ოქტომბერი — Sputnik. გარკვეული ძალები ცდილობენ ეკლესიის პოზიციას პოლიტიკური სარჩული დაუდონ, საქართველოსა და აზერბაიჯანს შორის მეგობრულ ურთიერთობას კი ჩრდილი მიაყენონ, ნათქვამია საქართველოს საპატრიარქოს საზოგადოებასთან ურთიერთობის სამსახურის მიერ გავრცელებულ ინფორმაციაში. 

საქართველოს საპატრიარქოში დავით–გარეჯის საკითხთან დაკავშირებით სასულიერო პირების შეხვედრა გაიმართა, რომელსაც დავით–გარეჯის მონასტრის არქიმანდრიტი კირიონი (ონიანი) და სხვა სასულიერო პირები ესწრებოდნენ.

როგორც განცხადებაშია აღნიშნული, საქართველოს ეკლესია მრავალი წელია აქტიურად გამოთქვამს თავის მკვეთრ პოზიციას ამ ტერიტორიაზე საქართველოს საზღვრებისა და ქართული მონასტრების ბედის თაობაზე და მაქსიმალურად იყენებს ყველა ტრიბუნას, რათა მართებული ინფორმაცია მიაწოდოს როგორც ჩვენი ქვეყნის მოქალაქეებს, ისე საერთაშორისო საზოგადოებას.

როგორც საპატრიარო  განმარტავს, ხელშეკრულება, რომელსაც ქართულმა და აზერბაიჯანულმა მხარემ ხელი მოაწერეს, საზღვრის დადგენის საფუძვლად 1938 წლის რუკას გულისხმობს. საზღვრის დადგენაზე მომუშავე ჯგუფმა საერთოდ არ იხელმძღვანელა აღნიშნული რუკით, ხოლო მისი რამდენიმე წლის წინ მოპოვებული ასლები ავთენტურად არ მიიჩნია.

„შედეგად – კომისიამ ხელი მოაწერა სასაზღვრო ზოლის განსაზღვრის ისეთ ოქმს, რომლის საფუძველზეც ამჟამად აზერბაიჯანელი მესაზღვრეები ჩიჩხიტურსა და უდაბნოს მონასტრის ტერიტორიას აკონტროლებენ. დღეს კი დადგა ახალი გარემოებები, მოპოვებულ იქნა ამ რუკების დედნები ყველა აუცილებელი ნიშნით, რაც მის ავთენტურობას უეჭველს ხდის. შესაბამისად, ჩნდება შესაძლებლობა და აუცილებლობა, რომ ამ კარტოგრაფიული დოკუმენტაციის საფუძველზე მოხდეს 2006-2007 წლებში ხელმოწერილი კომისიის ოქმების გადახედვა”, – ნათქვამია გავრცელებულ ინფორმაციაში. 

შეხვედრაზე ასევე იმსჯელეს 2019 წელს დარგის სპეციალისტების, მეცნიერებისა და ექსპერტების 14-კაციანი ჯგუფის მიერ მიღებული დასკვნების თაობაზე.

„აღნიშნულმა ჯგუფმა დავით–გარეჯის პრობლემა შეისწავლა როგორც ისტორიული, ისე იურიდიული და კარტოგრაფიული კუთხით და დაადასტურა, რომ სადავო ტერიტორია და მასზე მდებარე ქართული მონასტრები საქართველოს კუთვნილებაა და სრულად უნდა ექცეოდეს ქვეყნის ლეგიტიმურ, საერთაშორისოდ აღიარებულ საზღვრებში“, – ნათქვამია განცხადებაში.

ეკლესია კიდევ ერთხელ გარკვევით აფიქსირებს თავის პოზიციას, რომ მისთვის მთავარია ობიექტური და სამართლიანი გადაწყვეტილების მიღება მშვიდობიანი და სამართლებრივი გზით, ყოველგვარი პოლიტიზებისა და დაძაბულობის გარეშე, აღნიშნულია განცხადებაში.

საიდან დაიწყო ყველაფერი?

საქართველოს პროკურატურამ უცხო ქვეყნისთვის საქართველოს ტერიტორიის ნაწილის გადაცემისკენ მიმართული მოქმედების ფაქტზე გამოძიების დაწყების შესახებ განცხადება 29 სექტემბერს გამოაქვეყნა. უწყების ცნობით, კომისიის მიერ საქართველო–აზერბაიჯანის სახელმწიფო საზღვრის გარკვეული მონაკვეთები არამართლზომიერად, ჩვენი ქვეყნის ტერიტორიული ინტერესების საზიანოდ შეთანხმდა. 

გუშინ საქართველოს პროკურატურამ საქართველო–აზერბაიჯანის საზღვრის დემარკაციის პროცესში უცხოეთის სახელმწიფოსთვის საქართველოს ტერიტორიის ნაწილის გადაცემის საქმეზე ორი ადამიანი დააკავა.

დაკავებული არიან საქართველოს საგარეო საქმეთა სამინისტროს მეზობელი ქვეყნების დეპარტამენტის სასაზღვრო ურთიერთობათა სამსახურის უფროსი ივერი მელაშვილი და საქართველოს შინაგან საქმეთა სამინისტროს სასაზღვრო პოლიციის სახმელეთო საზღვრის დაცვის დეპარტამენტის მთავარი ინსპექტორი ნატალია ილიჩოვა. ორივე მათგანი, როგორც ექსპერტები, 2007 წლამდე იყვნენ დელიმიტაცია–დემარკაციის კომისიის წევრები და რუკების ალბომებს ადგენდნენ.

დაკავებულებს სსკ-ის 308-ე მუხლის პირველი ნაწილის („საქართველოს საწინააღმდეგო მოქმედება, მიმართული უცხო ქვეყნისათვის საქართველოს მთელი ტერიტორიის ან მისი ნაწილის გადაცემისაკენ ანდა საქართველოს ტერიტორიიდან მისი ნაწილის გამოყოფისაკენ“) შესაბამისად, 10-დან 15 წლამდე ვადით თავისუფლების აღკვეთა ემუქრებათ.

აზერბაიჯანულ მხარეს კომენტარი ამ დრომდე არ გაუკეთებია.

საზღვრის დემარკაცია

საქართველო–აზერბაიჯანის საზღვრის დემარკაცია საკმაოდ მტკივნეული საკითხია საქართველოსა და აზერბაიჯანის ურთიერთობებში, ამასთან, მხარეები მწვავე განცხადებებს ერიდებიან.

საქართველო–აზერბაიჯანის საზღვარი 440 კილომეტრია, მისი მესამედი ჯერ არ არის დელიმიტირებული.

სახელმწიფო საზღვრის დელიმიტაციისა და დემარკაციის ქართულ-აზერბაიჯანული მთავრობათშორისი კომისია 1996 წელს შეიქმნა. პირველი 15 წლის განმავლობაში მან საზღვრის თითქმის 70 პროცენტი შეათანხმა, მაგრამ 2007 წლიდან დელიმიტაციის პროცესში დაბრკოლებები წარმოიშვა. სადავოდ რჩება დავით-გარეჯისა და სოფელ ერისიმედის ტერიტორიები.

„აჟიოტაჟი პროცესს ვნებს": მელაშვილი საქართველო–აზერბაიჯანს შორის სადავო ტერიტორიაზე>>>

სექტემბრის ბოლოს თბილისში აზერბაიჯანის საგარეო საქმეთა მინისტრის ვიზიტის დროს საქართველოს საგარეო საქმეთა მინისტრმა დავით ზალკანიანმა განაცხადა, რომ მოპოვებულია ახალი კარტოგრაფიული მასალა დავით-გარეჯის კომპლექსთან დაკავშირებით, ამიტომ 2006-2007 წლების ქართულ-აზერბაიჯანული შეთანხმება შეიძლება გადაიხედოს.

ამასთან, ქართველ დიპლომატს არ დაუკონკრეტებია, რომელი კარტოგრაფიული მასალები იქნა აღმოჩენილი. ჯეიჰუნ ბაირამოვმა საპასუხოდ განაცხადა, რომ საკითხი სპეციალისტებმა უნდა შეისწავლონ და იმედი გამოთქვა, რომ „საქართველოსა და აზერბაიჯანს შორის არ არსებობს ისეთი საკითხები, რომელთა განხილვა და მოგვარება არ შეიძლება". 

58
თემები:
საქართველო–აზერბაიჯანის საზღვრის დემარკაციის საქმე (24)
კორონავირუსის ეპიდემია. ხალხი ქუჩაში

„დაბურული მინის“ ნიშანი : რა ცვლილებები აღმოაჩნდათ უსიმპტომო პაციენტებს

26
(განახლებულია 13:27 25.10.2020)
უსიმპტომო ინდფიცირებული ვერ გრძნობს ტემპერატურას და გამოხატულ სუბიექტურ სიმპტომებს. ამიტომაცაა ეს საყურადღებო, აცხადებს ცნობილი ექიმი

თბილისი, 24 ოქტომბერი — Sputnik. უსიმპტომო პაციენტების, რომლებიც კორონავირუსით არიან ინფიცირებულები, ფილტვებში გარკვეული ცვლილებები აღენიშნებათ, განაცხადა იმუნოლოგ-ალერგოლოგმა ბიძინა კულუმბეგოვმა.

მისი თქმით, აშშ-ის დაავადებათა კონტროლის ცენტრის მონაცემებით, ვირუსის მატარებელი ადამიანებიდან დაახლოებით 40% უსიმპტომოა, რაც თავის თავად საკმაოდ ბევრია, თუმცა მათაც გარკვეული ცვლილებები აღმოაჩნდათ.

„როდესაც ე.წ. „უსიმპტომო“ პაციენტები გამოიკვლიეს, აღმოჩნდა, რომ, კომპიუტერული ტომოგრაფიის გადაღების შემდეგ, ამ პაციენტების 50%-ს ფილტვში მაინც ჰქონდა ე.წ. „დაბურული მინის“ ნიშანი ანუ ანთებისთვის დამახასიათებელი ცვლილებები. ინფიცირებული უსიმპტომოა, ვერ გრძნობს ტემპერატურას და გამოხატულ სუბიექტურ სიმპტომებს. ამიტომაცაა ეს საყურადღებო“, - განაცხადა ბიძინა კულუმბეგოვმა.

მისი თქმით, ასეთი ადამიანები ამ დროს ავრცელებენ ინფექციას და სწორედ მათზე მოდის ინფექციის ელვისებური თუ ცეცხლისებური გავრცელების უზარმაზარი პროცენტი.

ამ დროისათვის მსოფლიოში კორონავირუსით ინფიცირების 42 641 728 შემთხვევაა გამოვლენილი, გარდაიცვალა 1 150 157. ამ მონაცემებს ჯონს ჰოპკინსის უნივერსიტეტი ავრცელებს.

რაც შეეხება საქართველოს, ახალი კორონავირუსით დაავადებულთა რაოდენობა ბოლო დღე-ღამეში 1928-ით გაიზარდა და საერთო რიცხვმა 28431-ს მიაღწია, გამოჯანმრთელებულთა რიცხვს 604 ადამიანი შეემატა, გარდაიცვალა 8 ადამიანი.

ამ დროისათვის სულ გამოჯანმრთელდა 10767 ადამიანი, გარდაიცვალა – 201, კარანტინის რეჟიმში იმყოფება 4112, სტაციონარებში ექიმების დაკვირვების ქვეშ 3766 პაციენტია, ხოლო კოვიდ–სასტუმროებში 2268 ადამიანი იმყოფება.

COVID-19-ის გეოგრაფია საქართველოში: თბილისში შემთხვევების რიცხვმა იკლო >>

ასევე კორონავირუსის დიაგნოზით უცხოეთიდან სამშობლოში გადმოყვანილია საქართველოს 41 მოქალაქე, მათ შორის 38 – სამხედრო მოსამსახურე.

საქართველოში კორონავირუსის პირველი შემთხვევა 26 თებერვალს დაფიქსირდა. ჯანმომ კორონავირუსის აფეთქება პანდემიად 11 მარტს გამოაცხადა.

26
თემები:
COVID-19-ის პანდემია მსოფლიოში
წინასაარჩევნო სიმბოლიკა

საქართველოს წამყვანმა პარტიებმა არჩევნებზე 21,6 მილიონი „გამოიმუშავეს“

52
(განახლებულია 10:55 25.10.2020)
არჩევნებში მონაწილე ცხრა წამყვანი პარტიის შემოსავლები და შემოწირულობები თითქმის ათჯერ აღემატება დანარჩენი 41 პარტიის შემოსავლებსა და შემოწირულობებს

თბილისი, 25 ოქტომბერი — Sputnik. ცხრა ყველაზე რეიტინგულმა პარტიამ 1 სექტემბრიდან 12 ოქტომბრამდე წინასაარჩევნო კამპანიის პერიოდში 21,6 მილიონი ლარის შემოსავალი მიიღეს, ნათქვამია სახელმწიფო აუდიტის ვებგვერდზე გამოქვეყნებულ მასალებში.

წინასაარჩევნო კამპანია საქართველოში 1 სექტემბერს დაიწყო. არჩევნებში სულ 48 პარტია და ორი ბლოკი იღებს მონაწილეობას.

პარტიის შემოსავალი მოიცავს მიზნობრივ დაფინანსებას, საბიუჯეტო დაფინანსებას და შემოწირულობებს. რეიტინგში წარმოდგენილი ცხრა პარტიიდან სახელმწიფო დაფინანსებას სულ ოთხი პოლიტიკური ძალა იღებს:  „ქართული ოცნება - დემოკრატიული საქართველო", „ერთიანი ეროვნული მოძრაობა“ (ბლოკი „ძალა ერთობაშია"), „ევროპული საქართველო - თავისუფლების მოძრაობა" და „საქართველოს პატრიოტთა ალიანსი". დანარჩენი პარტიები ჯერდებიან მიზნობრივ დაფინანსებას და შემოწირულობებს.

შემოსავლების მიხედვით ლიდერია „ქართული ოცნება“, რომელმაც წინასაარჩევნო კამპანიის დაწყებიდან 10,4 მილიონი ლარის შემოსავალი მიიღო, მეორე ადგილზეა „ლელო საქართველოსთვის“ 2,6 მილიონი ლარით. მესამე ადგილი დაიკავა „ძალა ერთობაშიამ“ 2,4 მილიონი ლარის შემოსავლით.

რაც შეეხება შემოწირულობებს, რეიტინგულმა პარტიებმა წინასაარჩევნო კამპანიის დაწყებიდან სულ 20,8 მილიონი ლარი მიიღეს. პირველ ადგილზეა კვლავ „ქართული ოცნება“, რომელსაც 10,1 მილიონზე მეტი ჩაურიცხეს, მეორე ადგილზეა „ლელო“ 2,58 მილიონი ლარის შემოწირულობებით, მესამე ადგილს იკავებს „ძალა ერთობაშია“ – 2,57 მილიონი ლარი.

შედარებისათვის, არჩევნებში მონაწილე ცხრა წამყვანი პარტიის შემოსავლები და შემოწირულობები თითქმის ათჯერ აღემატება დანარჩენი 41 პარტიის შემოსავლებსა და შემოწირულობებს.

პარტია    

ჯამური შემოსავალი

შემოწირულობები

 „ქართული ოცნება - დემოკრატიული საქართველო" 10 355 211 ლარი 2 257 655 ლარი
„ერთიანი ეროვნული მოძრაობა“ (ბლოკი „ძალა ერთობაშია") 2 432 830 ლარი 2 257 655 ლარი
„ევროპული საქართველო - თავისუფლების მოძრაობა" 1 758 842 ლარი 1 620 743 ლარი
„საქართველოს პატრიოტთა ალიანსი" 2 034 846 ლარი 1 886 805 ლარი
„ლელო საქართველოსთვის" 2 599 290 ლარი 2 586 590 ლარი
„სტრატეგია აღმაშენებელი" 2 042 317 ლარი  2 015 504 ლარი
„ერთიანი საქართველო - დემოკრატიული მოძრაობა" 175 956 ლარი 145 300 ლარი
„საქართველოს ლეიბორისტული პარტია" 224 041 ლარი 123 986 ლარი
„გირჩი" 0 ლარი 0 ლარი

   

საქართველოს ეროვნულმა ბანკმა 24 ოქტომბერს ლარის კურსი აშშ დოლარის მიმართ 3,2202 GEL/$1 ნიშნულზე დაადგინა.

საქართველოში 31 ოქტომბერს არჩევნები გაიმართება. ამ დღეს საქართველოს მოსახლეობა აირჩევს პარლამენტის დეპუტატებს, აჭარის უმაღლესი საბჭოს წევრებს, ასევე რამდენიმე მუნიციპალიტეტის ადგილობრივი ხელისუფლების წარმომადგენლებს. საბოლოო მონაცემებით, ამომრჩეველთა ერთიან სიაში 3 526 032 ადამიანია.

52
თემები:
საქართველოს საპარლამენტო არჩევნები 2020