სკოლა

თბილისის ერთ-ერთ სკოლაში პირველკლასელ მოსწავლეს კორონავირუსი დაუდასტურდა

94
(განახლებულია 19:51 06.10.2020)
ამ დროისათვის ეპიდემიოლოგებთან კონსულტაციები მიმდინარეობს და სკოლის შემდგომი ნაბიჯები სპეციალისტების რეკომენდაციებზე იქნება დამოკიდებული.

თბილისი, 6 ოქტომბერი – Sputnik. თბილისის 21-ე საჯარო სკოლაში პირველკლასელ მოსწავლეს COVID-19  დაუდასტურდა, იუწყება საზოგადოებრივი მაუწყებლის „პირველი არხი“.

საქართველოში ბოლო 24 საათში კორონავირუსის 549 ახალი შემთხვევიდან 99 თბილისში დაფიქსირდა.

გავრცელებული ინფორმაციით, მოსწავლე ვირუსით, სავარაუდოდ, გასულ კვირაში ერთ-ერთ წვეულებაზე ყოფნისას დაინფიცირდა. მას ვირუსისთვის დამახასიათებელი სიმპტომები არ აღენიშნება. ბავშვი სკოლაში ბოლოს პარასკევს იყო. სკოლის ადმინისტრაციას ინფორმაცია მოსწავლის მშობელმა გუშინ, საღამოს მიაწოდა. 

21-ე საჯარო სკოლის დირექტორის თამარ ამზაშვილის განცხადებით, ამ დროისათვის სკოლაში სასწავლო პროცესი არ შეწყვეტილა, თვითიზოლაციაში მხოლოდ იმ კლასის მოსწავლეები და პედაგოგი გადავიდნენ, სადაც ვირუსი დაფიქსირდა. 

„მხოლოდ იმ კლასში, სადაც ინფექცია გამოვლინდა, სწავლის პროცესი ონლაინ–რეჟიმში გაგრძელდა. 29-ვე მოსწავლე და კლასის მასწავლებელი თვითიზოლაციაში იმყოფებიან. შენობაში უკვე ჩატარდა სადეზინფექციო სამუშაოები“, – განაცხადა სკოლის დირექტორმა.

ამასთან, თამარ ამზაშვილის განცხადებით, ეპიდემიოლოგებთან კონსულტაციები მიმდინარეობს და თუ როგორ გააგრძელებს სკოლა საქმიანობას, სპეციალისტების რეკომენდაციებზე იქნება დამოკიდებული.

საქართველოში ახალი კორონავირუსით დაავადებულთა რაოდენობა ბოლო დღე-ღამეში 549-ით გაიზარდა და 9245-ს მიაღწია. ამ დროისათვის სულ გამოჯანმრთელდა 4887 ადამიანი, გარდაიცვალა – 58 პაციენტი.

საქართველოში კორონავირუსის პირველი შემთხვევა 26 თებერვალს დაფიქსირდა.

94
თემები:
COVID-19 საქართველოში (2149)

გვარამია ზუგდიდში მძევლების აყვანაზე: ჩვენ ყველაფერი ვიცით და ინფორმაციას გავასაჯაროვებით

24
„მთავარის“ გენდირექტორის თქმით, სამართალდამცავმა ორგანოებმა თავდასხმი შესახებ მათგან გაიგეს და სწორედ შსს–ს თხოვნით ტელეკომპანიის ჟურნაალისტებმა დეტალებზე საჯაროდ არ ისაუბრეს

 

თბილისი, 22 ოქტომბერი – Sputnik. ოპოზიციური ტელეკომპანია „მთავარი არხის“ გენერალური დირექტორი ნიკა გვარამია, რომელსაც გუშინ დაუკავშირდა პირი, რომელმაც მძევლები აიყვანა, ამტკიცებს, რომ ფლობს ინფორმაციას „საქართველოს ბანკის“ ფილიალზე თავდასხმის საქმეზე და დეტალებს მოგვიანებით გამოაქვეყნებს. 

21 ოქტომბერს, შეიარაღებული პირი  „საქართველოს ბანკის“ ერთ–ერთ ფილიალში შეიჭრა და 40–ზე მეტი ადამიანი მძევლაად აიყვანა.  ბოროტმოქმედი  ხელისუფლებისგან ნახევარ მილიონ დოლარს, ვერტმფრენს ან მანქანას, ასევე მისი უსაფრთხოების გარანტიებს ითხოვდა. მოთხოვნების შეუსრულებლობის შემთხვევაში კი დამნაშავე მძევლების დახოცვით იმუქრებოდა.

მძევლები გათავისუფლების სპეცოპერაცია შვიდ საათზე მეტხანს გაგრძელდა, რთული და ხანგრძლივი მოლაპარაკებების შედეგად, მძევლების გათავისუფლება სამეგრელო–ზემო სვანეთის პოლიციის დეპარტამენტის დირექტორის, ავთანდილ გალდავას დამსახურებით მოხდა, რომელიც ბოლო ეტაპზე მძევლებს ჩაენაცვლა. მოგვიანებით, ავთანდილ გალდავამ და სამმა მძევალმა თავდამსხმელთან ერთად დატოვა ბანკის შენობა. ამ დროისთვის ყველა მძევალი გათავისუფლებულია, ბოროტმოქმედზე კი ძებნაა გამოცხადებული.

რაც შეეხება ნიკა გვარამიას, სწორედ მას დაუკავშირდა ბოროტმოქმედი  ერთ–ერთი მძევლის, ირაკლი კვარაცხელიას მეშვეობით ჯერ სოციალურ ქსელში, შემდეგ კი პირდაპირ ეთერში და საკუთარი მოთხოვნები წამოაყენა.

 „ყველაფერი ვიცით: ვინ, სად, რა და როდის. დღეს მთელი დღეა ვთანამშრომლობთ პოლიციასთან, ჩვენგან გაიგეს ყველაფერი, ისინი საერთოდ არაფრის აზრზე არ იყვნენ. ვიცით როგორ მიმდინარეობს ეს ყველაფერი ამ მომენტი. დღეს, პოლიციის თხოვნითამ ყველაფერზე საჯაროდ არ ვისაუბრეთ. ანგარიში გავუწიეთ საჯარო ინტერესს. ხვალ აუცილებლად ყველაფერს გავასაჯაროებთ და იმედია, მადლობას თუ არ გადაგვიხდის, ბოდიშს მაინც მოგვიხდის საქართველოს ხელისუფლება“, – დაწერა გვარამია საკუთარ Facebook–გვერდზე. 

მომხდარი ფაქტის შესახებ ინფორმაციის გავრცელების შემდეგ, რომელიც საპარლამენტო არჩევნებამდე 10 დღით ადრე მოხდა, ქვეყანაში დანაშაულის პოლიტიკურ ქვეტექსტზე დაიწყო საუბარი. მაგალითად, ზუგდიდში, შემთხვევის ადგილზე  „ევროპული საქართველოს“ ლიდერი გიგი უგულავა გამოჩნდა და მზადყოფნა გამოთქვა, რომ მძევლებს ჩაანაცვლებდა. გარდა ამისა, რიგმა ოპოზიციურმა პარტიებმა ხელისუფლება ქვეყანაში კრიმინოგენული ვითარების გაუარესებაში დაადანაშაულეს.

მმართველ პარტია „ქართული ოცნება – დემოკრატიული საქართველოში“ ოპოზიციის განცხადებებს პოლიტიკური მოროდიორობა უწოდეს. „ქართული ოცნების“ აღმასრულებელი მდივნისა და საარჩევნო შტაბის ხელმძღვანელის ირაკლი კობახიძის თქმით, გარკვეული ოპოზიციური ძალები  ზუგდიდში განვითარებული მოვლენებით პოლიტიკური ქულების ჩაწერას შეეცადნენ. მან ასევე შემაშფოთებელი და დანაშაულებრივი უწოდა მედიის ქმედებას, რომელმაც ბოროტმოქმედს საკუთარი მოთხოვნების გასაჟღერებლად პირდაპირი ეთერი დაუთმეს.

ამასთან, სოციალურ ქსელში გაჩნდა  ზემოთდასახელებული მძევლის, ირაკლი კვარაცხელიას საქართველოს მესამე პრეზიდენტ მიხეილ სააკაშვილთან გადაღებული ფოტოები, რაც საზოგადოებაში მითქმა–მოთქმის საგანი გახდა.

24
თემები:
ზუგდიდში შეიარაღებულმა პირმა მძევლები აიყვანა
სპეცოპერაცია ზუგდიდში

რა ხდება ზუგდიდში „საქართველოს ბანკთან“, სადაც მძევლები აიყვანეს

41
(განახლებულია 11:57 22.10.2020)
მედიაში გავრცელებული ინფორმაციით, თავდამსხმელმა სამი მძევალი ჩხოროწყუს მუნიციპალიტეტის სოფელ კირცხის ტყეში გაათავისუფლა, თავად კი მიიმალა

თბილისი, 22 ოქტომბერი – Sputnik. ზუგდიდში „საქართველოს ბანკის“ ერთ–ერთი ფილიალის შენობაში, სადაც გუშინ შეიარაღებულმა პირმა მძევლები აიყვანა, საგამოძიებო ღონისძიებები დასრულდა, იუწყება ტელეკომპანია „რუსთავი 2“. 

მედიის წარმომადგენლებსა და გადამღებ ჯგუფებს ბანკის შენობასთან მისვლის საშუალება მხოლოდ დღეს დილით მიეცათ. გუშინ ტერიტორია სპეციალური ლენტით იყო შემოსაზღვრული. გაძლიერებულია უსაფრთხოების ზომები.

ამ დროისთვის ბანკის ფილიალი კლიენტებისთვის დაკეტილია. მათ მხოლოდ  შენობის შესასვლევთან განთავსებული ბანკომატითა და სწრაფი გადახდის აპარატებით  სარგებლობის შესაძლებლობა აქვთ.  ცენტრალური კარი დალუქულია.

21 ოქტომბერს, ზუგდიდში „საქართველოს ბანკის“ ერთ–ერთ ფილიალზე თავდასხმა მოხდა. შეიარაღებულმა პირმა ბანკში მძევლები აიყვანა. იგი ხელისუფლებისგან ნახევარ მილიონ დოლარს, ვერტმფრენს ან მძევლებთან ერთად მანქანით გასვლას ითხოვდა. მოთხოვნების შეუსრულებლობის შემთხვევაში კი დამნაშავე მძევლების დახოცვით იმუქრებოდა.

შსს: ყველა მძევალი გათავისუფლებულია>>>

შსს–ს ცნობით, შეიარაღებულ პირს მძევლად 43 ადამიანი ჰყავდა აყვანილი. უწყების ინფორმაციით, რთული და ხანგრძლივი მოლაპარაკებების შედეგად, მძევლების გათავისუფლება სამეგრელო–ზემო სვანეთის პოლიციის დეპარტამენტის დირექტორის, ავთანდილ გალდავას დამსახურებით მოხდა, რომელიც ბოლო ეტაპზე მძევლებს ჩაენაცვლა. მოგვიანებით, ავთანდილ გალდავამ და სამმა მძევალმა თავდამსხმელთან ერთად დატოვა ბანკის შენობა. საბოლოოდ ყველა მძევლის გათავისუფლება დილისთვის გახდა შესაძლებელი.

გავრცელებული ინფორმაციით, თავდამსხმელმა მძევლები ჩხოროწყუს მუნიციპალიტეტის  სოფელ კირცხის ტყეში გაათავისუფლა, თავად კი მიიმალა. მასზე ძებნაა გამოცხადებული.

41
თემები:
ზუგდიდში შეიარაღებულმა პირმა მძევლები აიყვანა
რაგბი. საქართველო–შოტლანდიის დაპირისპირება

საქართველოს ნაკრების შემადგენლობა ცნობილია - ბორჯღალოსნები შოტლანდიას დანაკლისით ხვდებიან

0
გუნდის თავკაცის, ლევან მაისაშვილის თქმით, თუ უთამაშებლობამ თავი არ იჩინა, კარგი და საინტერესო თამაში გამოგვივა

თბილისი, 22 ოქტომბერი Sputnik. საქართველოს რაგბის ნაკრების შემადგენლობა 23 ოქტომბერს „მარიფილდზე“ შოტლანდიის ნაკრებთან გასამართი ტესტ-მატჩისთვის ცნობილია. ინფორმაციას საქართველოს რაგბის კავშირი ავრცელებს.

23–კაციან განაცხადში მოხვდა დებიუტანტი ლექსო ყაულაშვილი. ასევე დაბრუნდა ჯაბა ბრეგვაძე, რომელსაც 2019 წლის მსოფლიო თასის შემდეგ ეროვნული ნაკრების მაისურით არ უთამაშია.

ბორჯღალოსნებს ტრავმების გამო რამდენიმე მორაგბე დააკლდებათ - ბექა გიგაშვილი, ლევან ჩილაჩავა, კოტე მიქაუტაძე, გიორგი ცუცქირიძე, ვანო კარგაძე და ლაშა ხმალაძე.

დანაკლისსა და შემადგენლობაზე ბორჯღალოსანთა თავკაცმა, ლევან მაისაშვილმა ისაუბრა.

„თუ არ ჩავთვლით ტრავმირებულ მოთამაშეებს, ოპტიმალური შემადგენლობა შევარჩიეთ. არ ვაპირებ ჩემი მორაგბეების რისკის ქვეშ დაყენებას“, - განაცხადა ლევან მაისაშვილმა.

მაისაშვილმა ნაკრების დებიუტანტ ლექსო ყაულაშვილზეც ისაუბრა. მისი თქმით, ლექსო კარგ ფორმაშია და გუნდის მზადების პროცესშიც კარგად ჩაერთო.

„გვყავს მობილური და სწრაფი მესამე ხაზი, თუ უთამაშებლობამ თავი არ იჩინა, კარგი და საინტერესო თამაში გამოგვივა“, - აღნიშნა მაისაშვილმა.

ჩვენი ნაკრების მწვრთნელმა კომენტარი რუსეთთან გადადებულ შეხვედრაზეც გააკეთა. მისი თქმით, ნაკრები მხოლოდ შოტლანდიასთან მატჩზეა კონცენტრირებული და რუსეთთან შეხვედრის გადადებას შემადგენლობის შერჩევაზე გავლენა არ ჰქონია.

შეგახსენებთ, 23 ოქტომბერს თბილისის დროით 22:30 საათზე ბორჯღალოსნები შოტლანდიის ნაკრებს ამხანაგურ შეხვედრაში დაუპირისპირდებიან.

ქართველ მორაგბეებს კორონავირუსი დაუდასტურდათ>>

კორონავირუსის პანდემიით გამოწვეული მიზეზების გამო 2020 წელს დაგეგმილი რაგბის სანაკრებო მატჩები, მათ შორის საქართველო-რუსეთის შეხვედრა გაურკვეველი ვადით გადაიდო.

0
თემები:
სპორტის ამბები