პაატა იმნაძე

იმნაძე: აჭარაში ვითარების დასტაბილურების პირველი ნიშნები გამოიკვეთა

82
(განახლებულია 19:20 30.09.2020)
შემთხვევების ნახტომისებური მატება არ ხდება, რაც პირველი დამაიმედებელი ნიშანია იმისა, რომ მოსახლეობა გაცილებით უკეთ იცავს წესებს, აღნიშნა პაატა იმნაძემ.

თბილისი, 30 სექტემბერი — Sputnik. ეპიდემიოლოგიური მდგომარეობის გამო აჭარას განსაკუთრებული ყურადღება ექცევა და სიტუაციის სტაბილიზაციის პირველი ნიშნები უკვე გამოიკვეთა, განაცხადა დაავადებათა კონტროლის ეროვნული ცენტრის უფროსის მოადგილემ პაატა იმნაძემ, რომელიც ბათუმში იმყოფება.

ბათუმის სათნოების სახლის 25 ბენეფიციარსა და 10 თანამშრომელს კორონავირუსი გამოუვლინდა>>>

მისი თქმით, აჭარა კორონავირუსთან ბრძოლის წინა ხაზზეა.

„მაქსიმალურად ყველაფერს ვაკეთებთ, რათა ვითარება მალე დასტაბილურდეს და პირველი ნიშნები უკვე გამოიკვეთა. თუ უახლოეს დღეებში ასე გაგრძელდება, შესაძლოა, მოვახდინოთ დასტაბილურება. არ ხდება შემთხვევების ნახტომისებური მატება, რაც პირველი დამაიმედებელი ნიშანია იმისა, რომ მოსახლეობა გაცილებით უკეთ იცავს რეკომენდაციებს, ვიდრე ერთი თვის წინ. ასევე უნდა იმოქმედოს დამატებით დაწესებულმა რეგულაციებმაც“, – განაცხადა პაატა იმნაძემ.

ჟურნალისტების კითხვებზე პასუხის გაცემისას იმნაძე ლეტალური შემთხვევების მატების ფაქტს შეეხო.

მისი თქმით, თითოეული ადამიანის გარდაცვალება მისი ოჯახისა და ახლობლებისთვის ტრაგედიაა. ინფიცირებულთა და გარდაცვლილთა რაოდენობის ზრდას ეპიდემიოლოგი რეკომენდაციებისა და წესების დაუცველობით ხსნის, რაც, მაგალითად, აგვისტოში დაფიქსირდა. 

„თუ პირველ 1900 პაციენტზე იყო 19 გარდაცვალება, დღეს 4000-ზე მეტი პაციენტი გვყავს დამატებული და თითქმის ორჯერ გაზრდილი ინფიცირებულთა რაოდენობიდან გვყავს ასევე 19 გარდაცვლილი. სხვა მხრიდან რომ შევხედოთ, რომ არ ვიცოდეთ აგვისტოში რაც ხდებოდა, ეს გასაკვირი იქნებოდა“, – განაცხადა იმნაძემ.

ამასთან, მან წუხილი გამოთქვა იმ ფაქტთან დაკავშირებით, რომ ინფექციამ ბათუმის მოხუცებულთა თავშესაფარში შეაღწია.

„ჩვენ დასავლეთის ქვეყნების ძალიან ტრაგიკული გამოცდილება გვაქვს, სადაც მოხუცთა თავშესაფარში შეღწეულმა ინფექციამ მაღალი ლეტალობა გამოიწვია, იგივე შვედეთში, სადაც ვერ მოხერხდა მოხუცების საავადმყოფოებში გადაყვანა. აქ კი ყველა, ვისაც დახმარება სჭირდება, საავადმყოფოებშია გადაყვანილი და მაღალი ხარისხის მომსახურებას იღებენ“, – განაცხადა პაატა იმნაძემ.

გუშინ ცნობილი გახდა, რომ ბათუმის სათნოების სახლ „სავანეში" კორონავირუსი 25 ხანდაზმულს და 10 თანამშრომელს დაუდასტურდა.

82
თემები:
COVID-19 საქართველოში (2249)
საპარლამენტო არჩევნები 2020

ცესკო: ყველაზე მეტი აქტივობა რაჭა-ლეჩხუმსა და სვანეთში დაფიქსირდა

98
(განახლებულია 23:01 31.10.2020)
ცესკო-ს ინფორმაციით, დღის განმავლობაში საოლქო საარჩევნო კომისიებში შევიდა 289 საჩივარი, რომელთა უმრავლესობა ძირითადად პროცედურულ ხარვეზებს შეეხება

თბილისი, 31 ოქტომბერი - Sputnik. ყველაზე მაღალი აქტივობა დაფიქსირდა ისევ მე-19 მაჟორიტარულ საარჩევნო ოლქში, კერძოდ, რაჭა-ლეჩხუმსა და სვანეთში - 63.8 %, ხოლო ყველაზე დაბალი აქტივობა არის ისევ ქვემო ქართლის რეგიონში - 51 %,  განაცხადა ბრიფინგზე ცენტრალური საარჩევნო კომისიის (ცესკოს) პრეს-სპიკერმა ანა მიქელაძემ.

ჯამში, საქართველოს მთელ ტერიტორიაზე საპარლამენტო არჩევნებში ამომრჩეველთა აქტივობამ 20:00 საათის მონაცემებით 56,11%-ს (1 970 540 ამომრჩეველი) მიაღწია.
რაც შეეხება სტაციონარულ სამკურნალო დაწესებულებებსა და იზოლაციაში მყოფი ამომრჩევლებისთვის შექმნილ 127 სპეციალურ უბანს, 311-ვე გადასატანი საარჩევნო ყუთი 21:00 საათისთვის დაბრუნდა სპეციალურად შექმნილ საარჩევნო უბნებზე.

მიქელაძის ინფორმაციით, დღეს ცესკოს სატელეფონო-საინფორმაციო ცენტრში 08:00 საათიდან 20:00 საათამდე  3 881 სატელეფონო ზარი და 574 ონლაინ შეტყობინება შევიდა. მათი დიდი ნაწილი ამომრჩევლების მიერ სიაში მონაცემების გადამოწმებას, საარჩევნო უბნის მისამართებისა და საარჩევნო პროცედურების დაზუსტებას შეეხებოდა.

ასევე, დღის განმავლობაში საოლქო საარჩევნო კომისიებში შევიდა 289 საჩივარი. მათი უმრავლესობა ძირითადად პროცედურულ ხარვეზებს შეეხება, როგორიცაა საკონტროლო ფურცლის არასრულყოფილი შევსება, მარკირებასთან დაკავშირებული წესების დარღვევა და ა.შ.

„საარჩევნო ადმინისტრაცია მიმართავს არჩევნებში ჩართულ ყველა მხარეს, განსაკუთრებით მედია წარმომადგენლებს, საკუთარი საქმიანობის განხორციელების პროცესში, ხელი შეუწყონ საარჩევნო ადმინისტრაციას მშვიდ, სამუშაო ვითარებაში წარმართოს საქმიანობა, რათა ზუსტად აისახოს თითოეული ამომრჩევლის ნება და არ შეფერხდეს ხმის დათვლის პროცესი“,- განაცხადა ანა მიქელაძემ.

პრეს-სპიკერის თქმით, კანონით გათვალისწინებული ყველა პროცედურის დასრულების შემდეგ, საუბნო შემაჯამებელი ოქმები მიეწოდება შესაბამის საოლქო საარჩევნო კომისიებს, რომლებიც უმოკლეს ვადებში ატვირთავენ საარჩევნო მართვის სპეციალურ ელექტრონულ პროგრამაში.

ცესკო საუბნო შემაჯამებელ ოქმებს მიღებისთანავე ეტაპობრივად განათავსებს სპეციალურ ვებ-გვერდზე results.cec.gov.ge.

ამასთან, ნებისმიერ მსურველს ექნება შესაძლებლობა დააკვირდეს არჩევნების წინასწარი შედეგების შეჯამების პროცესს ცესკოში ინტერნეტ ტრანსლირების საშუალებით, რომელიც 360 გრადუსიანი ტექნოლოგიის გამოყენებით ცესკოს facebook-გვერდზე, Youtube-სა და ოფიციალურ ვებ-გვერდზე იქნება ხელმისაწვდომი.

2020 წლის საპარლამენტო არჩევნები საქართველოში შერეული სისტემით ჩატარდა. ქვეყნის მოსახლეობამ 150 დეპუტატი უნდა აირჩიოს საკანონმდებლო ორგანოში — 120 პროპორციული და 30 მაჟორიტარული წესით.

მეათე მოწვევის პარლამენტის არჩევნებში 48 პარტია და ორი საარჩევნო ბლოკი იღებდა მონაწილეობას.

98
თემები:
საქართველოს საპარლამენტო არჩევნები 2020

როგორ აღნიშნეს "ქართულმა ოცნებამ" და "ნაციონალურმა მოძრაობამ" არჩევნების დასრულება - ვიდეო

133
საპარლამენტო არჩევნები დასრულდა. ეგზიტპოლების მონაცემებით, ლიდერობს „ქართული ოცნება“. როგორ აღნიშნეს არჩევნების დასრულება მმართველი პარტიისა და ოპოზიციური ნაცმოძრაობის მომხრეებმა, ჩვენს ვიდეოში იხილავთ

ტელეარხებმა შაბათს საღამოს, ხმის მიცემის დასრულების შემდეგ, გამოაქვეყნეს ეგზიტპოლების შედეგების სერია. ყველა მათგანში ლიდერობს მმართველი პარტია „ქართული ოცნება“, მეორე ადგილზეა - „ერთიანი ნაციონალური მოძრაობა“.

სულ საქართველოს მეათე მოწვევის პარლამენტში შვიდიდან ათ პარტიამდე შევა. გამსვლელი ბარიერი ამ არჩევნებზე 1%-ს შეადგენდა, ბლოკებისათვის კი - მასში შემავალი პარტიების რაოდენობას უდრიდა. მანამდე ექსპერტები ვარაუდობდნენ, რომ ახალი პარლამენტი მრავალპარტიული იქნებოდა.

133
ზაალ უდუმაშვილი

„ნაციონალური მოძრაობა“ იწყებს აქტიურ კონსულტაციებს მთავრობის ფორმირებაზე

0
ოთხივე ეგზიტპოლის შედეგების მიხედვით, 2020 წლის საპარლამენტო არჩევნებზე „ქართულმა ოცნება-დემოკრატიულმა საქართველომ“ მოქალაქეების ყველაზე დიდი მხარდაჭერა მიიღო.

თბილისი, 1 ნოემბერი - Sputnik. ოპოზიციური ბლოკი „ნაციონალური მოძრაობა – ძალა ერთობაშია“ მთავრობის ფორმირებისთვის ოპოზიციურ პარტიებთან კონსულტაციებს იწყებს, განაცხადა პარტია „ერთიანი ნაციონალური მოძრაობის“ ერთ-ერთმა ლიდერმა ზაალ უდუმაშვილმა დღეს გამართულ ბრიფინგზე.

ყველა ეგზიტპოლის შემაჯამებელი მონაცემები ცნობილია >>

ხმის მიცემის პროცედურის დასრულებისა და საარჩევნო უბნების დახურვის შემდეგ, ოთხმა ტელეკომპანიამ ეგზიტპოლების შედეგები გამოაქვეყნა. ეგზიტპოლების მონაცემებით, ბლოკმა „ძალა ერთობაშია“, რომლის ლიდერია ყოფილი მმართველი პარტია „ერთიანი ნაციონალური მოძრაობა“, ამომრჩეველთა ხმების 24%-დან 33%-მდე მოიპოვა. ხოლო მისმა მთავარმა კონკურენტმა, მმართველმა პარტიამ „ქართულმა ოცნებამ“ – 40%-დან 54%-მდე.

უდუმაშვილის თქმით, წინასწარი დათვლის შედეგებით, საპარლამენტო არჩევნებში ოპოზიცია იმარჯვებს.

„არა მხოლოდ სანდო ეგზიტპოლებით, არამედ წინასწარი დათვლის შედეგებითაც უკვე ცნობილია, რომ „ქართული ოცნება“ არის უმცირესობაში და ოპოზიცია იმარჯვებს საპარლამენტო არჩევნებში. ახლა მიმდინარეობს ბიულეტენების დათვლის პროცესი საარჩევნო უბნებზე და „ქართულმა ოცნებამ“ დაიწყო გაყალბების მცდელობის მეორე ტალღა“, - განაცხადა უდუმაშვილმა.

მისი განცხადებით, ოპოზიცია იწყებს აქტიურ კონსულტაციებს მთელ ოპოზიციურ სპექტრთან, მათ შორის მთავრობის ფორმირებაზე.

ოთხივე ეგზიტპოლის შედეგების მიხედვით, 2020 წლის საპარლამენტო არჩევნებზე „ქართულმა ოცნება-დემოკრატიულმა საქართველომ“ მოქალაქეების ყველაზე დიდი მხარდაჭერა მიიღო. თუმცა,  ოპოზიციური ტელეკომპანიების დაკვეთით ჩატარებული გამოკითხვების მონაცემებით, „ქართულ ოცნებას“ არ ჰყოფნის ხმები მთავრობის ფორმირებისა და დამტკიცებისთვის.

მთავრობის ფორმირებისა და დამტკიცებისთვის „ქართულ ოცნებას“ ხმების არანაკლებ 50% სჭირდება,  წინააღმდეგ შემთხვევაში ოპოზიციას თეორიულად შეუძლია შექმნას კოალიცია და მთავრობის ფორმირების უფლება მიიღოს, „ქართული ოცნება“ კი უმცირესობაში აღმოჩნდება.

არჩევნებში 55 პარტია მონაწილეობდა, მათგან შვიდი ორ ბლოკში – „ძალა ერთობაშია“ და „სტრატეგია აღმაშენებელი“. პირველ ბლოკში გაერთიანებული იყო ხუთი პარტია, მეორეში ორი.

პარტიებისთვის გამსვლელი ბარიერი 1%–ს შეადგენდა, ბლოკებისთვის იმდენი პროცენტი, რამდენი პარტიაც შედის ბლოკში. ექსპერტები თავიდანვე ვარაუდობდნენ, რომ ახალი პარლამენტი მრავალპარტიული იქნება.

პარლამენტში 120 ადგილისთვის პროპორციული სისტემით პარტიებიდან და ბლოკებიდან 6 880 კანდიდატი იბრძვის – 1 ადგილზე 57 ადამიანია პრეტენდენტი.

2016 წლის საპარლამენტო არჩევნების შედეგებით საკანონმდებლო ორგანოში სამი პარტია შევიდა.

0
თემები:
საქართველოს საპარლამენტო არჩევნები 2020