საკლასო ოთახი

გაბუნია: 1 ოქტომბრიდან სწავლის სკოლებში გაგრძელების საკითხი ერთ კვირაში გაირკვევა

158
(განახლებულია 14:19 15.09.2020)
ხელისუფლებამ ქვეყნის ტერიტორიაზე არსებული სკოლები სრულად უზრუნველყო პირბადეებით, დეზობარიერებით, სადეზინფექციო ხსნარებითა და თერმოსკრინინგის აპარატებით.

თბილისი, 15 სექტემბერი — Sputnik. სასწავლო პროცესის 1 ოქტომბრიდან საკლასო ოთახებსა და აუდიტორიებში განახლების თაობაზე პასუხი, სავარაუდოდ, ერთ კვირაში გვექნება, განაცხადა ჯანდაცვის მინისტრის მოადგილემ თამარ გაბუნიამ ტელეკომპანია „პალიტრანიუსის“ ეთერში. 

საქართველოს სკოლებსა და უმაღლეს სასწავლებლებში სასწავლო წელი 15 სექტემბერს დაიწყო. მაგრამ დიდ ქალაქებში – თბილისში, ქუთაისში, რუსთავში, გორში, ზუგდიდსა და ფოთში სწავლა 1 ოქტომბრამდე დისტანციურად წარიმართება. იგივე შეზღუდვები დაწესდა მაღალმთიან აჭარაში, ასევე ბათუმში, ხელვაჩაურსა და ქობულეთში, სადაც ინფიცირების ბევრი შემთხვევა გამოვლინდა. სავარაუდოდ, 1 ოქტომბრის შემდეგ სასწავლო პროცესი საკლასო ოთახებსა და აუდიტორიებში გაგრძელდება.

თამარ გაბუნიას განცხადებით, ქვეყანაში დღეს არსებული ეპიდემიოლოგიური ვითარების ფონზე სკოლებში ინფექციის გავრცელება სერიოზულ დამაზიანებელ შედეგს გამოიწვევს, ამიტომაც რიგ ქალაქებში სასწავლო პროცესის დისტანციურად განახლების აუცილებლობა დადგა.

„ეპიდემია დინამიური პროცესია. ჩვენ იმედი გვქონდა, რომ 15 სექტემბერს დავიწყებდით სწავლას საკლასო ოთახებში. თუმცა, შექმნილი ეპიდვითარებიდან გამომდინარე, ასე არ მოხდა. უნდა დავიცადოთ და დაველოდოთ მოვლენების განვითარებას. ახლა ინფექციის კონტროლის ძალიან აქტიურ ფაზაში ვართ… თუ რა მოხდება 1 ოქტომბერს, ამასთან დაკავშირებით პასუხი შეიძლება ერთ კვირაში გვქონდეს“, – განაცხადა თამარ გაბუნიამ.

მისი თქმით, ამ ეტაპზე აქტიურად მიმდინარეობს ბათუმში მოგზაურობის ისტორიის მქონე მასწავლებლების ტესტირება, რადგან ისინი რისკ-ჯგუფს წარმოადგენენ. 

„ზოგადად სკოლების გახსნა არა მარტო ჩვენთვის, არამედ ბევრი ქვეყნისთვის არის გამოწვევა. ამ ეტაპზე ჩვენ გვაქვს კრიტიკული მომდევნო ორი კვირა. აქტიურად მიმდინარეობს იმ პედაგოგების ტესტირება, რომლებიც ზაფხულის სეზონზე აჭარაში იმყოფებოდნენ, ისინი ერთ-ერთ რისკ-ჯგუფს წარმოადგენენ. დამეთანხმებით, რომ სკოლაში ინფექციის გავრცელება სერიოზულ დამაზიანებელ შედეგებს მოიტანს“, – განაცხადა გაბუნიამ.

განათლების სამინისტრომ დაავადებათა კონტროლისა და საზოგადოებრივი ჯანმრთელობის ეროვნულ ცენტრს უკვე მიაწოდა იმ პედაგოგების სია, რომლებიც აჭარაში იმყოფებოდნენ. მათი რაოდენობა დაახლოებით 2,1 ათასია.

გარდა ამისა, ხელისუფლებამ ქვეყნის ტერიტორიაზე არსებული სკოლები სრულად უზრუნველყო პირბადეებით, დეზობარიერებით, სადეზინფექციო ხსნარებითა და თერმოსკრინინგის აპარატებით.

ამ დროისათვის ქვეყანაში კორონავირუსის 2562 დადასტურებული შემთხვევა დაფიქსირდა. სულ გამოჯანმრთელდა 1369 ადამიანი. გარდაცვლილია – 19, კარანტინის რეჟიმში იმყოფება 6633, ხოლო სტაციონარებში ექიმების დაკვირვების ქვეშ 836 პაციენტია.

საქართველოში კორონავირუსის პირველი შემთხვევა 26 თებერვალს დაფიქსირდა.

158
თემები:
COVID-19 საქართველოში (2862)
საკლასო ოთახი

ვითარება ქობულეთში: ზედა სამების სკოლაში ექვს პედაგოგს კორონავირუსი დაუდასტურდა

19
(განახლებულია 13:14 25.02.2021)
გუშინ, სწავლების დისტანცირ რეჟიმზე გადავიდა ქობულეთის №3 საჯარო სკოლა, სადაც კორონავირუსი 9 პედაგოგს და 5 მოსწავლეს დაუდასტურდა.

 

თბილისი, 24 თებერვალი – Sputnik. ქობულეთის მუნიციპალიტეტის სოფელ ზედა სამების საჯარო სკოლის ექვს პედაგოგს COVID-19​ დაუდასტურდა, იუწყება „აჭარის ტელევიზია".

ამ დროისთვის სასწავლო დაწესებულება დროებით დაიხურა და ორი კვირის განმავლობაში ფუნქციონირებას დისტანციურ რეჟიმში გააგრძელებს. 

 

„გუშინ ზედა სამების საჯარო სკოლაში მასწავლებლების გეგმური ტესტირებისას სწრაფი ტესტით ინფიცირების ერთი შემთხვევა დადასტურდა, ეპიდემიოლოგებმა პედკოლექტივში აღნიშნული პირების ახლო კონტაქტში მყოფი მასწავლებლების გამოკვლევა დაიწყეს. PCR-ტესტმა ხუთი პედაგოგის შემთხვევაში დადებითი პასუხი დააფიქსირა. ინფიცირების ახალი შემთხვევების გამოვლენის მიზნით კვლევები ამ დრომდე გრძელდება", – განაცხადეს აჭარის საზოგადოებრივი ჯანდაცვის ცენტრში.

გუშინ კორონავირუსის 14 შემთხვევა დაფიქსირდა  ქობულეთის №3 საჯარო სკოლაშიც – ინფიცირებულთა შორის ცხრა პედაგოგი და 5 მოსწავლეა. ქობულეთის რესურს–ცენტრის გადაწყვეტილებით, აღნიშნული სკოლა სწავლების დისტანციურ–რეჟიმზე გადავიდა.

საქართველოს მასშტაბით საკლასო ოთახებში სასწავლო პროცესი 15 თებერვლიდან განახლდა. ბათუმში, ფოთში, ზუგდიდში, გორსა და თელავში კი 1 თებერვლიდან აღდგა.

ბოლო მონაცემებით, გასულ დღე–ღამეში ქვეყნის მასშტაბით გამოვლენილი კორონავირუსის 362 ახალი შემთხვევიდან 25 შემთხვევა აჭარაში დაფიქსირდა.

 

 

19
თემები:
კორონავირუსი საქართველოში: ბოლო ცნობები
მატილდა გვარლიანი

„ჩემი საოცრება...“ - მატილდა გვარლიანის ცეცხლოვანი ფოტოსესია გულგრილს არავის ტოვებს

74
(განახლებულია 12:02 25.02.2021)
ახალბედა მოდელის სურათები დიდი პოპულარობით სარგებლობს. Instagram-ზე ატვირთულ უახლეს ფოტოს 11 ათასზე მეტი მოწონება აქვს. მატილდას ხელშეუხებელი სილამაზე აღფრთოვანებას იწვევს

ქართველი მოდელი მატილდა გვარლიანი ცეცხლოვანი ფოტოსესიის ვიდეოს აქვეყნებს. ბოლო ფოტოსესიაზე მატილდას თეთრი საცურაო კოსტიუმი აცვია. გოგონა საოცარ ფორმაშია და მოკლედ შეჭრილი თმა ძალიან უხდება.

თანატოლ მოდელებს შორის მატილდა ერთ-ერთი ყველაზე ცნობილია. გოგონა 17 წლის არის და უკვე ხუთ სამოდელო სახლთან თანამშრომლობს. მათ შორის არის რამდენიმე ქართული და რამდენიმე უცხოური წამყვანი მოდის სახლი. თანამედროვე ქართული მოდის ახალი სახე გამორჩეულია სილამაზით, შარმითა და მომხიბლავი ღიმილით.

შეუძლებელია მატილდა გვარლიანის მშვენება ადამიანს ყურადღების მიღმა დარჩეს. ამიტომ მის თითოეულ ახალ პოსტს თუ მორიგ სატელევიზიო ინტერვიუს უამრავი გამოხმაურება მოჰყვება ხოლმე. ბოლო პერიოდში მატილდა მეტად პოპულარული გახდა სოციალურ ქსელში. „ინსტაგრამის“ ოფიციალურ გვერდზე მისი „ფოლოვერების“ რაოდენობა 98 ათასს აჭარბებს.

თბილისის, ბაქოს, პარიზის, მილანის, მიუნხენის წამყვანი სამოდელო სახლები და ქართველი თინეიჯერი გოგონა, რომელსაც დიდ მომავალს მოდის დიდი კრიტიკოსები უწინასწარმეტყველებენ. მისი და მისი ძმის დავით გვარლიანის საუცხოო გარეგნობა სოციალურ ქსელს იპყრობს. ქართული მოდის ახალი სახე Victoria's Secret-ის შოუში მონაწილეობაზე ოცნებობს. კრიტიკოსების აზრით, მატილდას ყველა შანსი აქვს.

პოდიუმის ახალბედა წარმომადგენელმა პირველად თაკო ნაცვლიშვილის დედის სამოდელო სააგენტო Look Model Management-ს მიაკითხა. 12 წლის იყო და პოდიუმზე გამოსვლისგან მაშინ თავი შეიკავა. მოგვიანებით კი 14 წლის მატილდა დიდი წარმატებით დაბრუნდა. უახლესმა ვიდეომ სოციალურ ქსელში ვნებათაღელვა გამოიწვია. „საოცრად ლამაზი ხარ“, „ძალიან შემაყვარა ამ გოგომ თავი“, „ჩემი საოცრება“, - უწერენ კომენტარებში მოდელს.

74
თემები:
სელებრითების ცხოვრება
საწარმო

საქართველოში სახელმწიფო საწარმოთა რეფორმის საბჭო შეიქმნება

0
(განახლებულია 13:41 25.02.2021)
აღსანიშნავია, რომ სახელმწიფო საწარმოების რეფორმაზე ფინანსთა სამინისტრომ მუშაობა 2020 წლის მეორე კვარტალიდან დაიწყო.

თბილისი, 25 თებერვალი - Sputnik. საქართველოში სახელმწიფო საწარმოთა რეფორმის საბჭო შეიქმნება, განაცხადა საქართველოს პრემიერ-მინისტრმა ირაკლი ღარიბაშვილმა ხუთშაბათს გამართულ მთავრობის  სხდომაზე.

მისი თქმით, ასეთი აუცილებლობა კორონავირუსით გამოწვეული ეკონომიკური კრიზისის გამო წარმოიშვა. პრემიერი იმედს გამოთქვამს, რომ ახალი საბჭო ხელს შეუწყობს ეკონომიკის განვითარებას. 

როგორც ღარიბაშვილმა აღნიშნა, საბჭო სახელმწიფო საწარმოთა რეფორმის სტრატეგიასა და კონკრეტულ სამოქმედო გეგმას შეიმუშავებს და ასევე  უზრუნველყოფს და მეთვალყურეობას გაუწევს რეფორმების დანერგვას ყველა ეტაპზე.

„ჩვენი მთავრობა აქტიურად მუშაობს სახელმწიფო საწარმოების კოპლექსურ რეფორმაზე, რომლის მიზანია, კორპორაციული მართვის უმაღლეს სტანდარტებთან დაახლოება. ეს არის ევროპული ტიპის რეფორმა, რომელიც ეფუძნება საუკეთესო ევროპულ სტანდარტებს და გამოცდილებას. ინიციატივას აქტიურად უჭერს მხარს საერთაშორისო სავალუტო ფონდი, მსოფლიო ბანკი და „აზიის განვითარების ბანკი“, – განაცხადა ღარიბაშვილმა.

„რეფორმა მოგვცემს საშუალებას, მივაღწიოთ სახელმწიფო საწარმოთა სექტორში ეფექტიანობის ზრდას, რამაც ხელი უნდა შეუწყოს მათი წვლილის გაზრდას ეკონომიკურ საქმიანობაში“, - განაცხადა ღარიბაშვილმა.

კორონავირუსის პანდემიამ ქვეყნის ეკონომიკას დიდი ზიანი მიაყენა. მოსახლეობის გარკვეული ნაწილი შემოსავლის გარეშე დარჩა, ბიზნესი სტაგნაციას განიცდის, ვითარებას მოქმედი შეზღუდვებიც ართულებს. პანდემიის შედეგების შესარბილებლად მთავრობამ 2020 წლის აპრილში დაამტკიცა ანტიკრიზისული გეგმა მოსახლეობისა და ბიზნესის დასახმარებლად, რომელიც ამ დღემდე რამდენიმე ეტაპად ხორციელდება.

0