თბილისი, 11 სექტემბერი – Sputnik. ქუთაისის ლაბორატორიაში გამოკვლეული ათასამდე ნიმუშიდან 28 შემთხვევაში პასუხი კორონავირუსზე დადებითია, იუწყება „პირველი არხი“ დაავადებათა კონტროლის იმერეთის სამმართველოს უფროსის გოჩა გიორგიძის ინფორმაციაზე დაყრდნობით.
ქუთაისის ერთ-ერთი საჯარო სკოლის 21 პედაგოგს კორონავირუსი დაუდასტურდა>>
ახალი შემთხვევები ძირითადად უკვე დადასტურებული პაციენტების კონტაქტებია, აღნიშნა გიორგიძემ.
„ეპიდემიოლოგები კვლავ მუშაობენ და მიმდინარეობს კონტაქტების დადგენა. რაც შეეხება წყაროს, შეგვიძლია ვთქვათ, რომ ქუთაისში ახალი კორონავირუსის მასშტაბის გაზრდა ცაგერის კლასტერს უკავშირდება“, – აღნიშნა გოჩა გიორგიძემ.
გუშინ კორონავირუსი ქუთაისის 32-ე სკოლის ერთბაშად 21 პედაგოგს დაუდასტურდა. სკოლაში ვირუსი მას შემდეგ გავრცელდა, რაც ერთ-ერთი პედაგოგი თბილისში გამართულ ქორწილში იმყოფებოდა და დადასტურებულ შემთხვევასთან კონტაქტი ჰქონდა.
საქართველოში გუშინ კორონავირუსით ინფიცირების დღე-ღამური რეკორდული მაჩვენებელი – 57 შემთხვევა გამოვლინდა. ეს ქვეყანაში ვირუსის დაფიქსირების დღიდან ყველაზე დიდი მაჩვენებელია.
ბოლო მონაცემებით, საქართველოში კორონავირუსით ინფიცირებულთა რაოდენობამ 1830-ს მიაღწია. გამოჯანმრთელდა 1334 ადამიანი. გარდაცვლილია – 19, კარანტინის რეჟიმში იმყოფება 5882, ხოლო სტაციონარებში ექიმების დაკვირვების ქვეშ 390 პაციენტია.
ახალი, დღევანდელი მონაცემები მალე გახდება ცნობილი.
