სისხლის ცენტრი

საქართველო და აივ-ინფექცია: ბოლო მონაცემები

160
(განახლებულია 15:04 02.09.2020)
ადამიანის იმუნოდეფიციტის ვირუსი (აივ) წარმოადგენს რეტროვირუსს, რომელიც აინფიცირებს იმუნური სისტემის უჯრედებს და ანადგურებს ან ასუსტებს მათ ფუნქციას.

თბილისი, 2 სექტემბერი — Sputnik. საქართველოს ინფექციური პათოლოგიის, შიდსისა და კლინიკური იმუნოლოგიის ცენტრის მონაცემებით, მიმდინარე წლის დასაწყისიდან ქვეყანაში აივ-ინფიცირების 372 ახალი შემთხვევა დაფიქსირდა.

ცენტრის ვებგვერდზე გავრცელებული ინფორმაციით, გასული წლის ანალოგიურ პერიოდში აღნიშნული მაჩვენებელი 449 იყო.

„2020 წლის 2 სექტემბრის მონაცემებით, ინფექციური პათოლოგიისა და შიდსის ცენტრში რეგისტრირებულია 8474 აივ-ინფიცირებული პირი. მათ შორის, 6 326 მამაკაცია და 2 148 ქალი. პაციენტთა უმრავლესობა 29-დან 39 წლამდეა. შიდსი 4 340 პაციენტს განუვითარდა და 1 734 გარდაიცვალა", - აღნიშნულია ცენტრის განცხადებაში.

2 სექტემბრის მონაცემებით, აივ-მკურნალობას 5 220 პაციენტი გადის, მათ შორის, 590 აფხაზეთიდან. რეგისტრირებულ შემთხვევათა განაწილება გადაცემის გზების მიხედვით ასეთია: 49,0 % (4150) - დაინფიცირდა ჰეტეროსექსუალური კონტაქტის შედეგად; 36,6 % (3107) - ნარკოტიკების ინექციური მომხმარებელია; 12 % (1020) - მამაკაცები, რომელთაც სექსი აქვთ მამაკაცთან; 1,3 % (109) - დაინფიცირდა ვერტიკალური გადაცემის გზით (დედიდან შვილზე); 0,5 % (41) - სისხლის რეციპიენტია.

შემთხვევების 0,6 % -ში (47) გადაცემის გზა დაუდგენელია.

„2020 წელს 99 აივ-ინფიცირებული გარდაიცვალა. მათ შორის, 79 მამაკაცი და 20 ქალი. სულ საქართველოში გამოვლენილია 116 აივ-ინფიცირებული ბავშვი. მათგან 70 - ბიჭია, 46 - გოგონა, 27 გარდაიცვალა, სამმა ქვეყანა დატოვა. განაწილება ინფიცირების გზების მიხედვით შემდეგია : ვერტიკალური (დედიდან) - 108 შემთხვევა (მათგან 1 - ძუძუთი კვებით), სისხლის რეციპიენტი - 4, დაუდგენელი - 2", - ნათქვამია განცხადებაში.

ინფექციური პათოლოგიის, შიდსისა და კლინიკური იმუნოლოგიის ცენტრის მონაცემებით, შემთხვევების უმეტესობა რეგისტრირებულია თბილისში - 3148 შემთხვევა, მათგან 87 უცხოეთის მოქალაქეა. სამეგრელოში 1165 შემთხვევა დაფიქსირდა, იმერეთში 1017, აჭარაში 970, აფხაზეთში 528, კახეთში 419, ქვემო ქართლში 485, შიდა ქართლში 314, გურიაში 180 და სამცხე-ჯავახეთში კი ინფიცირების 113 შემთხვევაა გამოვლენილი.

ადამიანის იმუნოდეფიციტის ვირუსი (აივ) წარმოადგენს რეტროვირუსს, რომელიც აინფიცირებს იმუნური სისტემის უჯრედებს და ანადგურებს ან ასუსტებს მათ ფუნქციას. ადრეულ სტადიებზე ინფექცია უსიმპტომოდ მიმდინარეობს. თუმცა მის განვითარებასთან ერთად იმუნური სისტემა სუსტდება და ადამიანი ოპორტუნისტული ინფექციებისადმი უფრო მოწყვლადი ხდება.

შიდსი (შეძენილი იმუნოდეფიციტის სინდრომი) აივ-ინფექციის ბოლო სტადიაა. შეიძლება გავიდეს 10-15 წელი, სანამ აივ-ინფიცირებულ ადამიანს შიდსი განუვითარდება, ამ პროცესის კიდევ უფრო შენელება ანტირეტროვირუსულ პრეპარატებს შეუძლია.

აივ-ინფექცია გადაეცემა დაუცველი სქესობრივი აქტის დროს (ანალური ან ვაგინალური), დაინფიცირებული სისხლის გადასხმისას, დაინფიცირებული ნემსების გამოყენების დროს, ასევე დედიდან შვილზე ორსულობის, მშობიარობის ან ლაქტაციის დროს.

160
თემები:
ჯანდაცვა საქართველოში (244)
სვანეთი ზამთარში

ქვემო სვანეთის გზებზე უამინდობის გამო შეზღუდვები ამოქმედდა

49
რთული მეტეოროლოგიური პირობების გამო შეზღუდვები დაწესდა გზის ლენტეხი-მელეს და მელე-ლასდილის მონაკვეთებზე

თბილისი, 17 იანვარი – Sputnik. რთული მეტეოროლოგიური პირობების გამო, შიდასახელმწიფოებრივი მნიშვნელობის ქუთაისი (წყალტუბოს გადასახვევი)-წყალტუბო-ცაგერი-ლენტეხი-ლასდილის საავტომობილო გზის მელე-ლასდილის მონაკვეთზე, ყველა სახის ავტოტრანსპორტის მოძრაობა აკრძალულია, იუწყება საავტომობილო გზების დეპარტამენტი.

უწყების ცნობით, ამავე გზის ლენტეხი-მელეს მონაკვეთზე, აკრძალულია მისაბმელიანი, ნახევრადმისაბმელიანი ავტოტრანსპორტის და 30 ადგილზე მეტი ტევადობის ავტობუსების მოძრაობა.

ხოლო დანარჩენი სახის ავტოტრანსპორტის მოძრაობა დასაშვებია მოცურების საწინააღმდეგო ჯაჭვების გამოყენებით.

რაც შეეხება ორი და მეტი წამყვანი ხიდის მქონე ავტოტრანსპორტს, მათი მოძრაობა თავისუფალია.

49
საბაგირო გუდაურში

გუდაური-კობის დამაკავშირებელი საბაგიროები ჩაირთო

154
(განახლებულია 15:34 17.01.2021)
ძლიერმა თოვლმა და ქარმა პრობლემები ყაზბეგის მუნიციპალიტეტშიც შექმნა. სტეფანწმინდაში ათობით მანქანაა გაჩერებული.

თბილისი, 17 იანვარი – Sputnik. გუდაური-კობის დამაკავშირებელი საბაგიროები მხოლოდ მგზავრთა ტრანსპორტირების მიზნით ჩაირთო. ამის შესახებ Gudauri.ski-ს სათხილამურო კურორტის Facebook-გვერდზეა ნათქვამი.

მგზავრებს, რომლებიც უამინდობის გამო კობში არიან ჩარჩენილი, გუდაურში საბაგიროთი გადაიყვანენ.

„მხოლოდ მგზავრთა ტრანსპორტირების მიზნით, გუდაური-კობის დამაკავშირებელი საბაგიროები: გუდაურა, ფირნი, კობი და თრუსო, ჩაირთო და იმუშავებს 17:00 საათამდე“, - ნათქვამია განცხადებაში.

მგზავრობა უფასოა. მგზავრობის საშუალო ხანგრძლივობა - 40 წუთია, აღნიშნულია განცხადებაში.

რთული მეტეოროლოგიური პირობების გამო, კობი-გუდაურის მონაკვეთზე გზის გაწმენდითი სამუშაოების დაწყება ვერ ხერხდება. 

აღნიშნულ მონაკვეთზე ზვავსაშიშროების გამო მოძრაობა 11 იანვრიდან აკრძალულია. გზაზე ტრაილერების 10 კილომეტრიანი რიგი დადგა.

ყაზბეგის მერი: უამინდობის გამო ყაზბეგში ჩარჩენილ ასამდე ადამიანს დახმარება გაეწია >>

 

 

154

უინტერესო, მაგრამ პოპულარული: ყველაზე პირველი ვიდეო YouTube-ზე

0
(განახლებულია 17:43 17.01.2021)
გაინტერესებთ, როგორ და რით დაიწყო "იუთუბის" არსებობის ისტორია? მაშინ ეს ვიდეო უნდა ნახოთ, იმიტომ რომ ის პირველია, რომელიც ვიდეოჰოსტინგზე აიტვირთა

დღეს ძალიან, ძალიან პოპულარული ვიდეოჰოსტინგი 2005 წლის თებერვალში შექმნა PayPal-ის სამმა ყოფილმა თანამშრომელმა. იმავე წლის 23 აპრილს კი მასზე აიტვირთა ვიდეო, რომელიც ზოოპარკში, სპილოს ვოლიერის წინაა გადაღებული.

დღევანდელილ გადასახედიდან, ეს კადრები ფრიად უცნაურად (რომ არ ვთქვათ, უინტერესოდ) გამოიყურება. მაგრამ 142 085 121 ნახვა აქვს, იმიტომ რომ ისტორიულია!

0