დიზაინერმა ანუკი არეშიძემ „ინსტაგრამის“ მომხმარებლებს წლების წინ საკუთარი ქორწილის მოკრძალებული ფოტო გაუზიარა. ხელის მოწერის ცერემონია 2008 წლის 2 დეკემბრითაა დათარიღებული და მასზე ცნობილი წყვილი საკმაოდ მოკრძალებულად გამოიყურებიან.
წლების შემდეგ, თბილისის მერმა და მისმა მეუღლემ 13-წლიანი თანაცხოვრების შემდეგ ჯვარი გასული წლის ზაფხუში დაიწერეს. წყვილმა 15 ივნისს კახეთში, გრემის მონასტერში შვილებიც მონათლა. კალაძის და არეშიძის უმცროსი შვილების ნათლია სხვებთან ერთად საქართველოს კათოლიკოს-პარტიარქი იყო. წყვილს რამდენიმე მეჯვარე ჰყავს, მათ შორის ცნობილი ფეხბურთელი ალექსანდრე იაშვილი და დიზაინერი მაკა კვიციანი.
განსხვავებით ხელისმოწერის ცერემონიიდან, ანუკი არეშიძეს ჯვრისწერაზე საკუთარი დიზაინით შექმნილი, თეთრი ფერის, მხრებმოშიშვლებული, მიდი-კაბა ეცვა, თავზე კი გრძელი შლეიფი ეკეთა. ქალაქის მერი კი ნაცრისფერსა და შავ ფერში იყო გამოწყობილი. ჯვრისწერის შემდეგ წყვილმა სტუმრებს წინანდალში, სასტუმრო „რედისონში“ უმასპინძლა.
გამოცემა Tatler-თან მიცემულ ინტერვიუში ანუკი არეშიძე დანანებით ამბობდა, რომ მას და კახის ჯვარი ამ დრომდე არ ჰქონდათ დაწერილი, თუმცა კაბა ჯვრისწერის ცერემონიისთვის საპატიო ადგილს იკავებდა დიზაინერის გარდერობში. როგორც იქნა, მშვენიერი კაბის მორგების დღეც დადგა.
კახისა და ანუკის სიყვარულის ამბავი იტალიაში 2008 წლის 12 იანვარს დაიწყო, როდესაც „მილანის” ფეხბურთელი ერთ-ერთ სასურველ სასიძოდ ითვლებოდა, არეშიძე კი უკვე წარმატებული მოდელი გახლდათ.
შეხვედრისთანავე სიყვარული ორივე მათგანს ეწვია და მიუხედავად იმისა, რომ მთელი საქართველო მათი ქორწილის კადრებს მოუთმენლად ელოდა, წყვილმა 2008 წლის ომის შემდგომი პერიოდის გათვალისწინებით საზეიმო ცერემონიისგან თავი შეიკავა და ხელი საიდუმლოდ მოაწერა.
კახისა და ანუკის ერთმანეთისგან რადიკალურად განსხვავებული ცხოვრების სტილი და ტემპი აქვთ, ყოფილი ფეხბურთელი ამჯამად თბილისის მერის პოზიციას იკავებს, ანუკიმ კი სამოდელო კარიერაზე საკუთარი ნებით უარის თქმის შემდეგ დიზაინერობას მიჰყო ხელი და რამდენიმე წლის წინ შექმნა ქართული ბრენდი ANOUKI, რომელმაც ყველაზე პრეტენზიული შემფასებლების კომპლიმენტებიც კი დაიმსახურა.
როგორი დატვირთული სამუშაო განრიგიც არ უნდა ჰქონდეს წყვილს, მათი მთავარი საზრუნავი და საფიქრალი შვილები არიან. ანუკი და კახი 4 ვაჟის მშობლები არიან: ლევანის, კახაბერისა და ვაჩეს შემდეგ, სულ ორი წლის წინ, პარიზის სამშობიაროში, ნაბოლარა ბიჭი ნიკოლასიც გაჩნდა.