თეა წულუკიანი

წულუკიანი სუროგატულ დედობასთან დაკავშირებით ცვლილებებზე

87
(განახლებულია 20:40 27.08.2020)
მინისტრმა განაცხადა, რომ ცვლილებები არ ეხება ხელოვნური განაყოფიერების პროცესს და აჟიოტაჟი ამ საკითხის ირგვლივ ტყუილად ატყდა.

თბილისი, 27 აგვისტო – Sputnik. ხელოვნური განაყოფიერების პროცესში არანაირი ახალი წესი არ იმოქმედებს, ეს ყალბი ინფორმაციაა, განაცხადა საქართველოს იუსტიციის მინისტრმა თეა წულუკიანმა ქართული მასმედიის ზოგიერთი წარმომადგენლის მიერ გავრცელებული ინფორმაციის საპასუხოდ.

მისი თქმით, შესწორებები სუროგატულ დედობას უკავშირდება და არ ეხება ინ-ვიტრო განაყოფიერებას. უფრო მეტიც, ის ბავშვების დაცვისკენ არის მიმართული.

„ამ ყალბი ინფორმაციის უკან, ჩემი აზრით, დგანან ის კერძო კომპანიები, რომლებიც ძალიან დიდ ფინანსურ სარგებელს იღებენ სუროგაციის გზით უცხოელი წყვილების საქართველოში შემოყვანის ფარგლებში, როდესაც ხდება სუროგაციის გზით ბავშვების გაჩენა საქართველოში და შემდეგ მათი ქვეყნიდან გაყვანა. არავითარ შემთხვევაში იუსტიციის მინისტრს და სამინისტროს არ აქვს უფლებამოსილება ხელოვნური განაყოფიერების საკითხები დაარეგულიროს... ამიტომ არავითარი ახალი წესი ხელოვნური განაყოფიერების პროცესში არ შემოდის. ეს არის ყალბი ინფორმაცია“, – განაცხადა წულუკიანმა.

მინისტრის განცხადებით, ახალი წესი სუროგატულ დედობას ეხება. ამ დროს ვითარება იმგვარია, რომ ქალების 100%, ვინც თავის სხეულში ითავსებს ემბრიონს სხვისი ბიოლოგიური მასალიდან თანხის სანაცვლოდ, საქართველოს მოქალაქეები არიან, ხოლო წყვილების 98% და მეტი, რომლებიც სუროგაციით სარგებლობენ საქართველოში – უცხოელები.

„შემოდის წესი, სადაც წყვილი იქნება კვლავაც გაგებული ისევ როგორც ქალი და მამაკაცი. ასევე ახალი წესი არის ის, რომ ჩვენ უნდა აღვკვეთოთ ჩვილით ვაჭრობის ტრანსნაციონალური დანაშაული და პრევენცია მოვახდინოთ, რომ საქართველოში სუროგაციით დაბადებული ბავშვი არ გახდეს სექსუალური ექსპლუატაციის, წამების, არაადამიანური მოპყრობის საგანი. ამიტომაც მოვითხოვთ 1 სექტემბრიდან, რომ ნოტარიუსთან მისული უცხოელი წყვილი ან შერეული წყვილები ერთი წელი მაინც ფაქტობრივად ცხოვრობდნენ ერთად, ქორწინებით ან ქორწინების გარეშე, რომ ჩვენ სახეზე გვქონდეს წყვილი, რომელსაც მართლა სურს ბავშვის ყოლა და აღზრდა“, – აღნიშნა წულუკიანმა.

თეა წულუკიანის 25 აგვისტოს ბრძანების თანახმად, საქართველოში სუროგატული დედობის მომსახურებით სარგებლობას შეძლებენ მხოლოდ ის წყვილები, რომლებიც არიან დაქორწინებული ან ფაქტობრივად ცხოვრობენ ერთად მინიმუმ ერთი წლის განმავლობაში.

შესწორებებში, რომელიც მინისტრმა შეიტანა 2012 წლის 31 იანვრის ბრძანებაში „სამოქალაქო აქტების რეგისტრაციის წესის დამტკიცების შესახებ“, ნათქვამია, რომ ქალისა და მამაკაცის თანაცხოვრება ნოტარიულად უნდა იყოს დამოწმებული.

ეს ნიშნავს, რომ ქალისა და მამაკაცის ფაქტობრივი თანაცხოვრება ნოტარიულად დამოწმებულია შესაბამისი დოკუმენტებით – საინფორმაციო-სამისამართო ბარათით, რომლითაც დასტურდება ერთ მისამართზე რეგისტრაციის ფაქტი; ამონაწერით საჯარო რეესტრიდან, რომლითაც დასტურდება საერთო სარგებლობისთვის გამიზნულ ქონებაზე თანამესაკუთრეობის ფაქტი; რელიგიური ქორწინების დამადასტურებელი საბუთით ან სხვ.

ბრძანებაში ასევე გაწერილია სუროგატი დედისა და ბავშვის გენეტიკური მშობლების უფლება–მოვალეობები.

87
ილია მეორე

საქართველოს პარტიარქი უკრაინაში მომხდარ ტრაგედიასთან დაკავშირებით მწუხარებას გამოთქვამს

13
(განახლებულია 11:38 28.09.2020)
„ვილოცებთ მათი უკვდავი სულებისთვის“ – წერს პატრიარქი უკრაინის პრეზიდენტისა და კიევის მეტროპოლიტისადმი გაგზავნილ სამძიმრის წერილებში

თბილისი, 28 სექტემბერი  — Sputnik.  საქართველოს კათოლიკოს–პატრიარქმა ილია მეორემ  ხარკოვის ოლქში მომხდარ ავიაკატასტროფასთან დაკავშირებით უკრაინის პრეზიდენტ ვლადიმირ ზელენსკის სამძიმრის წერილი გაუგზავნა

26 სექტემბრის საღამოს სამხედრო-სატრანსპორტო თვითმფრინავი Ан-26 ხარკოვის ოლქში ქალაქ ჩუგუევთან ახლოს იმ დროს ჩამოვარდა, როდესაც სასწავლო ფრენას ახორციელებდა. ბორტზე იმყოფებოდა 27 ადამიანი - ეკიპაჟის 7 წევრი და 20 კურსანტი. 25 ადამიანი ადგილზე დაიღუპა, ორმა კურსანტმა თვითმფრინავიდან გადმოსვლა მოახერხა, თუმცა, ერთ-ერთი მათგანი საავადმყოფოში გარდაიცვალა.

„ჩვენ ვლოცულობთ მათი უკვდავი სულებისათვის, რათა უფალმან სავანესა მართალთასა დააწესოს ისინი. გთხოვთ, ჩვენი სამძიმარი და თანადგომა გადასცეთ გარდაცვლილთა ოჯახის წევრებსა და ახლობლებს, მთელ უკრაინელ ხალხს. დაშავებულთ კი ვუსურვებთ, ღვთის წყალობით, მალე გამოჯანმრთელებას", - ნათქვამია ილია მეორის წერილში, რომელსაც საქართველოს საპატრიარქო ავრცელებს.

საპატრიარქოს განცხადებით, მსგავსი წერილი გაეგზავნა კიევისა და სრულიად უკრაინის მიტროპოლიტს, მის უნეტარესობა ონოფრეს.

13
თემები:
საქართველოს საპატრიარქო
ტესტირება კორონავირუსზე

უსიმპტომო პაციენტები 12 დღის შემდეგ ტესტის გარეშე გამოჯანმრთელებულად ჩაითვლებიან

25
გაბუნიას თქმით, ჯანმომ განაცხადა, რომ სიმპტომების გამოვლენიდან რვა დღეში ადამიანი გადამდები აღარ არის. მიუხედავად ტესტის პასუხისა, სხვა ადამიანის დაინფიცირების შანსი, პრაქტიკულად, არ არსებობს ან ძალზე მინიმალურია.

თბილისი, 28 სექტემბერი – Sputnik. პირი, რომელსაც დაუდასტურდა კორონავირუსი და ტესტირებიდან 12 დღის შემდეგ სიმპტომები არ აღენიშნება, გამეორებითი ტესტის გარეშე ჩაითვლება გამოჯანმრთელებულად და მას შეუძლია დაუბრუნდეს სოციალურ აქტივობას, განაცხადა ჯანდაცვის მინისტრის მოადგილე თამარ გაბუნიამ საკოორდინაციო საბჭოს სხდომის დასრულების შემდეგ.

გაბუნიას თქმით, ჯანდაცვის მსოფლიო ორგანიზაციამ (ჯანმო) განაცხადა, რომ სიმპტომების გამოვლენიდან რვა დღეში ადამიანი გადამდები აღარ არის. ტესტის პასუხი შეიძლება დადებითი იყოს, მაგრამ სხვა ადამიანის დაინფიცირების შანსი, პრაქტიკულად, არ არსებობს ან ძალზე მინიმალურია.

„მეთორმეტე დღეს პირი, რომელსაც ტესტირების დღიდან გაუვიდა მეთორმეტე დღე და სიმპტომები არ აღენიშნება, ჩაითვლება, როგორც გამოჯანმრთელებული და მას შეუძლია დაუბრუნდეს სოციალურ აქტივობას, ტესტირების, პოლიმელაზურ-ჯაჭვური ტესტის განმეორებით ჩატარების გარეშე“, – აღნიშნა გაბუნიამ.

რაც შეეხება იმ ადამიანებს, რომლებსაც სიმპტომები აღენიშნებათ და მოთავსებული არიან საავადმყოფოებში, გამოჯანმრთელებამდე მინიმალური ხანგრძლივობა არის 13 დღე. როგორც გაბუნიამ აღნიშნა, აქედან 10 დღე სიმპტომების პერიოდი და სამი დღე – უსიმპტომო.

„ეპიდემიური რისკების თვალსაზრისით, ასეთი პაციენტებიც მეთოთხმეტე, მეთხუთმეტე დღიდან, თუ სამი დღე არის სიმპტომებისგან თავისუფალი, ითვლება, რომ აღარ წარმოადგენენ რისკს“, – განაცხადა გაბუნიამ.

საქართველოში კორონავირუსით გარდაცვლილთა საერთო რაოდენობა 31–მდე გაიზარდა>>

საქართველოში ბოლო პერიოდში მკვეთრად იმატა კორონავირუსით ინფიცირებულთა რაოდენობამ. ბოლო დღე-ღამეში მათი რაოდენობა 298-ით გაიზარდა და 5552-ს მიაღწია, სულ გამოჯანმრთელდა  2054  ადამიანი, გარდაიცვალა 31 პაციენტი.

25
თემები:
COVID-19 საქართველოში