პრემიერი გიორგი გახარია

გახარია: დახმარება მივა ყველა იმ ადამიანამდე, ვინც შესაბამის განაცხადს შეავსებს

297
(განახლებულია 16:33 20.08.2020)
სოციალური დახმარება ბავშვის ერთ-ერთი მშობლის ან კანონიერი წარმომადგენლის მიერ განაცხადის შევსების შემდეგ გაიცემა.

თბილისი, 20 აგვისტო – Sputnik. ეს დახმარება მივა ყველა იმ ოჯახამდე, ყველა იმ ადამიანამდე, რომელიც მიიჩნევს, რომ მას ეს დახმარება სჭირდება და შესაბამის განაცხადს გააკეთებს, განაცხადა საქართველოს პრემიერ-მინისტრმა გიორგი გახარიამ მთავრობის დღევანდელ სხდომაზე ბავშვებისთვის განკუთვნილ 200-ლარიან დახმარებაზე საუბრისას.

ბავშვები საქართველოში ერთჯერადად 200-ლარიან დახმარებას მიიღებენ>>

საქართველოს პრემიერ-მინისტრმა გიორგი გახარიამ 6 აგვისტოს მთავრობის სხდომაზე მოსახლეობის დახმარების ახალი ეტაპის დაწყების შესახებ განაცხადა, რომლის ფარგლებშიც 18 წელს ქვემოთ ასაკის ყველა მოზარდი სახელმწიფოსგან 200 ლარის ოდენობის ერთჯერად დახმარებას მიიღებს. გახარიას თქმით, დღეისათვის საქართველოში 18 წლამდე ასაკის დაახლოებით 880 ათასი მოზარდია.

„დღევანდელი მდგომარეობით, უკვე დარეგისტრირებულია 600 868 ბავშვი, რაც წარმოადგენს ქვეყანაში 366 ათას ოჯახს. რა თქმა უნდა, ეს შთამბეჭდავი ციფრებია. ეს არის ერთ-ერთი ყველაზე სწორი სოციალური პროგრამა, რომელიც ჩვენ განვახორციელეთ ბოლო წლების განმავლობაში და რომლის მიზანიც გახლავთ 18 წლამდე ბავშვებისა და მოზარდების მხარდაჭერა, განსაკუთრებით, როდესაც ახალი სასწავლო წელი იწყება“, – განაცხადა პრემიერმა.

როგორც გახარიამ აღნიშნა, ქვეყანაში გამოჩდნენ ადამიანები, რომლებიც ცდილობენ მიიღონ ფინანსური და პოლიტიკური სარგებელი იმით, რომ ბავშვებს და მათ მშობლებს დაეხმარონ იმ დახმარების მიღებაში, რომელიც მათ სახელმწიფოსგან ეკუთვნით.

„დარწმუნებული ვართ, რომ ჩვენს მოქალაქეებთან არანაირი შუამავლები არ გვჭირდება. იმედი მაქვს, აღარ იქნება ისეთი მორალური პრობლემები, როცა ვიღაცები ცდილობენ, ბავშვებისთვის განკუთვნილი სარგებელი პოლიტიკურ დივიდენდებში დააკონვერტირონ“, – განაცხადა მთავრობის მეთაურმა.

მისი თქმით, ყველამ, ვისაც განაცხადის შევსებაში დახმარება სჭირდება, უნდა მიმართოს სოციალური მომსახურების სააგენტოს ნებისმიერ ტერიტორიულ ერთეულს, საქართველოს რეგიონული განვითარებისა და ინფრასტრუქტურის სამინისტროს და ადგილობრივ თვითმმართველობებს, იუსტიციის სახლებსა და საზოგადოებრივ ცენტრებს ან „ლიბერთი ბანკის“ ფილიალებს. აღნიშნული უწყებები მათ ყველანაირი ფინანსური სარგებლის გარეშე მიეხმარებიან.

სპეციალური ელექტრონული პორტალი – daxmareba.moh.gov.ge 15 აგვისტოდან ჩაირთო. სოციალური დახმარება ბავშვის ერთ-ერთი მშობლის ან კანონიერი წარმომადგენლის მიერ განაცხადის შევსების შემდეგ გაიცემა. დახმარების მიღება შესაძლებელი იქნება მიმდინარე წლის სექტემბრიდან.

იმ შემთხვევაში, თუ მშობელი არ დარეგისტრირდება და განაცხადს არ შეიტანს, ეს ნიშნავს, რომ ის კომპენსაციის მიღებაზე უარს ამბობს.

297
თემები:
სოციალური სფერო საქართველოში (217)
ლაბორატორია

ინფიცირებული მოსწავლეები, მასწავლებელი, მერიის თანამშრომლები რა ვითარებაა სამეგრელოში

31
(განახლებულია 13:02 23.09.2020)
საქართველოში ახალი კორონავირუსით დაავადებულთა რაოდენობა გასულ დღე-ღამეში 227-ით გაიზარდა და 4140-ს მიაღწია, გამოჯანმრთელდა 1643 ადამიანი, გარდაიცვალა 25.

თბილისი, 23 სექტემბერი  — Sputnik. ზუგდიდში კორონავირუსი მერიის სამ თანამშრომელს დაუდასტურდა, სამივე მათგანი უკვე დადასტურებული შემთხვევების კლასტერს უკავშირდება, განაცხადა სამეგრელო-ზემო სვანეთის სახელმწიფო რწმუნებულის მოვალეობის  შემსრულებელმა მალხაზ თორიამ  „Sputnik-საქართველოსთან“

ამ დროისთვის ზუგდიდის მერიაში სადეზინფექციო სამუშაოები ტარდება, თანამშრომელთა ნაწილი მუშაობის დისტანციურ რეჟიმზეა გადასული. ინფიცირებულ პირებთან უშუალო კონტაქტში მყოფი პირები კი თვითიზოლაციაში არიან გადაყვანილი – ტესტის პასუხები დღის მეორე ნახევარში იქნება ცნობილი.  

თორიას განცხადებით, რეგიონში გუშინ  კორონავირუსზე PCR-ტესტი 728 მოქალაქეს ჩაუტარდა და უარყოფითი პასუხი 17 შემთხვევაში დაფიქსირდა. ინფიცირებულთა შორის არასრულწლოვნებიც არიან.

კორონავირუსის  შემთხვევებიდან  14  გუშინ დადასტურებული ორი მოქალაქის კონტაქტებია. სამი მესტიის მუნიციპალიტეტის ხაიშის სკოლის მოსწავლეა.  მათი ინფიცირების წყარო ქობულეთიდან მოწვეული  მასწავლებელია, რომელსაც ინფექცია აღმოაჩნდა.  რაც შეეხება სკოლას, დაწესებულება ფუნქციონირებას დისტანციური რეჟიმში  აგრძელებს. ინფიცირებულთა შორისაა აფხაზეთიდან გადმოყვანილი ერთი პირიც. 

„ამ ეტაპზე მოსახლეობის მასობრივი ტესტირება მიმდინარეობს. ეპიდემიოლოგები ინფიცირებულთა კონტაქტების მოძიებას ახორციელებენ.  რეგიონში გამკაცრდება  მოქალაქეების მხრიდან ჯანდაცვის სამინისტროს მიერ დადგენილი რეგულაციების დაცვაზე კონტროლი“, - განაცხადა  მალხაზ თორიამ.

საქართველოში ახალი კორონავირუსით დაავადებულთა რაოდენობა გასულ დღე-ღამეში 227-ით გაიზარდა და 4140-ს მიაღწია, გამოჯანმრთელდა 1643 ადამიანი, გარდაიცვალა 25.

ქვეყანაში ბოლო 24- საათში პაციენტის გარდაცვალების ორი შემთხვევა დაფიქსირდა – ბოლო ორ დღეში  СOVID-19-ს  ხუთი პაციენტი ემსხვერპლა.

საქართველოში კორონავირუსის პირველი შემთხვევა 26 თებერვალს დაფიქსირდა.

ნიკა ლატარია

31
თემები:
COVID-19 საქართველოში
PCR–ტესტირება ბათუმში

რთული, მაგრამ კონტროლს ექვემდებარება აჭარის მეთაურმა რეგიონში არსებული ვითარება შეაფასა

16
(განახლებულია 13:07 23.09.2020)
რეგიონი სრულ მზადყოფნაშია, რომ საშიშ ვირუსს შეებრძოლოს, სისტემა გამართულად მუშაობს ყველა დონეზე – მობილიზებულია აჭარის ლოგისტიკური, ლაბორატორიული და ეპიდემიური სიმძლავრეები

თბილისი, 23 სექტემბერი – Sputnik. აჭარაში ინფიცირებულთა რაოდენობის ზრდის მიუხედავად, რეგიონში ყველა უწყება გამართულად მუშაობს, ამიტომ შეზღუდვების გამკაცრების აუცილებლობა არ არის, განაცხადა აჭარის მთავრობის მეთაურმა თორნიკე რიჟვაძემ რეგიონის ოპერატიული შტაბის სხდომაზე.

ბოლო 24 საათში დარეგისტრირებული კორონავირუსის 227 ახალი შემთხვევიდან 165 აჭარაში გამოვლინდა. რეგიონში სულ ინფიცირების ათასზე მეტი აქტიური შემთხვევაა.

„დაინფიცირებული პაციენტების მართვის ნაწილში პრიორიტეტს წარმოადგენს კლინიკური მიმართულების კიდევ უფრო გაძლიერება. დღეს აჭარაში ჩამობრძანდა მარინა ეზუგბაია. მის კოლეგებთან ერთად ჩვენ უკვე გავაგრძელებთ ყველა კოვიდ-მართვის კლინიკასთან აქტიურ კომუნიკაციას“, – განაცხადა რიჟვაძემ.

მან ასევე აღნიშნა, რომ რეგიონში სრულად არის მობილიზებული ლოგისტიკური, ლაბორატორიული და ეპიდემიური სიმძლავრეები, ადამიანური და ტექნიკური რესურსები.

„არ იგეგმება რამე სახის მძიმე შეზღუდვების დაწესება... ახლა მოვიდა დრო, როცა უნდა მოვახდინოთ ვირუსის მართვა და ადაპტაცია... ეპიდვითარების ლოკალიზება შესაძლებელი იქნება მხოლოდ ერთიანობით, სოლიდარობით და მოქალაქეების მაქსიმალური პასუხისმგებლობით. ამას ემატება ჯანდაცვის სექტორიც, რომელიც გააკეთებს მაქსიმუმს, რომ ეფექტურად მართოს ეს პროცესები. კიდევ ერთხელ გარწმუნებთ, რომ სისტემა გამართულად მუშაობს, კიდევ უფრო მზარდი დინამიკის შემთხვევაში ჩვენ მზად ვართ, რომ არც ერთი ადამიანი არ დარჩეს უპატრონოდ“, – განაცხადა რიჟვაძემ.

გაქვთ თუ არა კორონავირუსი: მსურველებს თბილისში COVID–19–ზე ტესტის ჩატარება შეუძლიათ>>

აჭარის ჯანდაცვის მინისტრის ნინო ნიჟარაძის განცხადებით, იმის იმედი, რომ ახალი შემთხვევების რაოდენობა მკვეთრად შემცირდება, არ უნდა გვქონდეს.

როგორც მან აღნიშნა, შემდგომი დინამიკა მთლიანად მოსახლეობაზეა დამოკიდებული. თუ ადამიანები არ დაიცავენ დადგენილ წესებს, შემთხვევების რაოდენობა არ შემცირდება.

16
თემები:
COVID-19 საქართველოში
კახა კალაძე

თბილისში „ფორდის“ მარკის 300 მიკროავტობუსს შემოიყვანენ

0
(განახლებულია 13:29 23.09.2020)
კახა კალაძის განცხადებით, 300 მიკროავტობუსი საკმარისი არ არის, ამიტომ საჭირო გახდება დამატებითი შესყიდვები.

თბილისი, 23 სექტემბერი - Sputnik. ოქტომბერში დედაქალაქში „ფორდის“ მარკის 300 ახალი სამარშრუტო ტაქსი შემოვა, განაცხადა თბილისის მერმა კახა კალაძემ დედაქალაქის მთავრობის დღევანდელ სხდომაზე.

ახალ მიკროავტობუსებს თბილისის მერია შეიძენს>>

კალაძის განცხადებით, ძველი მიკროავტობუსების ჩასანაცვლებლად და 300 ახალი მიკროავტობუსის შესყიდვასთან დაკავშირებით ტენდერი 15 ივლისს გამოცხადდა, ტენდერის დასრულების შემდეგ კი, 18 სექტემბერს  გამარჯვებულ კომპანიასთან ხელშეკრულება გაფორმდა.

„გვყავს გამარჯვებული კომპანია, „ფორდის“ მარკის 300 ერთეული მიკროავტობუსი ეტაპობრივად შემოვა დედაქალაქში. ოქტომბერში გარკვეული ნაწილი უკვე ადგილზე იქნება და დანარჩენიც 180 კალენდარული დღის განმავლობაში შემოვა, რათა მთლიანად ჩავანაცვლოთ მიკროავტობუსები“, – განაცხადა კალაძემ.

დედაქალაქის მერმა აღნიშნა, 300 მიკროავტობუსი საკმარისი არ იქნება და საჭირო გახდება დამატებითი შესყიდვების განხორციელება.

„პირველი წლების განმავლობაში თბილისში დაახლოებით 3 ათასამდე მიკროავტობუსი გადაადგილდებოდა, თუმცა რეფორმით, რომელიც წამოვიწყეთ, ავტობუსების, მიკროავტობუსების რაოდენობა დაახლოებით 1200-მდე შემცირდება, მთლიან მოდერნიზებას ვაკეთებთ ქსელის, ძირითად რაიონებში ივლის 12-მეტრიანი, 10-მეტრიანი, 8-მეტრიანი ავტობუსები, ხოლო თბილისის რელიეფიდან გამომდინარე, არსებული ქუჩების სივიწროვიდან გამომდინარე, საჭიროა მიკროავტობუსები“, – განაცხადა კალაძემ.

„ჩემი გეგმა მაქვს“: როგორ აპირებს თბილისის ვიცე-მერი სამარშრუტო ტაქსების პარკის განახლებას>>

თბილისს ამჟამად დაახლოებით 1,8 ათასი „მარშრუტკა" ემსახურება. დღის განმავლობაში მიკროავტობუსებით 600 ათასზე მეტი ადამიანი სარგებლობს.

0
თემები:
თბილისი დღეს