თბილისი, 17 აგვისტო – Sputnik. საქართველოში ბოლო დღე-ღამეში კორონავირუსის ხუთი ახალი შემთხვევა გამოავლინეს. აქედან ორი პაციენტის ინფიცირების წყარო ჯერჯერობით უცნობია, განუცხადა ჟურნალისტებს თბილისის ინფექციური საავადმყოფოს სამედიცინო დირექტორმა მარინა ეზუგბაიამ.
კორონავირუსი მსოფლიოში – 17 აგვისტოს მონაცემები>>
რაც შეეხება დანარჩენ შემთხვევებს, ორი უკვე დადგენილი შემთხვევის კონტაქტია, ერთი – „შემოტანილი“. ამ დროისთვის COVID–ცენტრებში 232 პაციენტი მკურნალობს.
პაციენტების მდგომარეობასთან დაკავშირებით ეზუგბაიამ განაცხადა, რომ ექვსის მდგომარეობა კრიტიკულია, ხოლო 22-ის – მძიმე.
„ისინი კოვიდ-ცენტრების შესაბამის რეანიმაციულ განყოფილებებში მკურნალობენ. მძიმე პაციენტების რაოდენობა გაგვეზარდა და, დღევანდელი მონაცემებით, 22 მძიმე პაციენტია. გამოჯანმრთელებულთა რაოდენობა 81 პროცენტია, ხოლო ლეტალობის მაჩვენებელი – 1.27%“, – განაცხადა ეზუგბაიამ.
რაც შეეხება პაციენტებს უშუალოდ ინფექციურ საავადმყოფოში, კლინიკამ ორი ახალი პაციენტი მიიღო, ხოლო სამი გამოჯანმრთელებული გაწერა. მძიმე პაციენტი კვლავ ორია.
ცდები ადამიანებზე: რუსეთში კორონავირუსის მეორე ვაქცინას ცდიან>>
ამ დროისათვის საქართველოში კორონავირუსით ინფიცირებულთა რაოდენობამ 1341-ს მიაღწია. ამასთან, კლინიკებიდან ბოლო დღე-ღამეში გაეწერა ოთხი პაციენტი. პანდემიის დაწყებიდან დღემდე სულ გამოჯანმრთელდა 1092, გარდაიცვალა – 17 ადამიანი.
კორონავირუსის პირველი შემთხვევა საქართელოში 26 თებერვალს დაფიქსირდა.
