თბილისი, 2 ივლისი — Sputnik. საქართველოში ბოლო დღე-ღამეში კორონავირუსის რვა ახალი შემთხვევა გამოვლინდა, აქედან ერთია ინფიცირებულის კონტაქტი, ხოლო დანარჩენი შემოტანილი შემთხვევებია, განაცხადა ჟურნალისტებთან საუბრისას თბილისის ინფექციური საავადმყოფოს სამედიცინო დირექტორმა მარინა ეზუგბაიამ.
კერძოდ, ახალი ინფიცირებულებიდან ექვსი ტრაილერის მძღოლია, კიდევ ერთი – ჩვეულებრივი მოქალაქე, რომელიც სხვა ქვეყნიდან ჩამოვიდა.
ამჟამად საქართველოს COVID-ცენტრებში 107 პაციენტი მკურნალობს. გამოჯანმრთელებულთა რაოდენობამ 87%-ს მიაღწია.
ამ დროისათვის ინფიცირებულების საერთო რაოდენობამ 939 ადამიანი შეადგინა. პანდემიის დაწყებიდან დღემდე გამოჯანმრთელდა 817, გარდაიცვალა 15 ადამიანი.
კარანტინში იმყოფება 3080 ადამიანი, ხოლო სტაციონარებში ექიმების მეთვალყურეობის ქვეშ 242 პაციენტია.
