თბილისი, 29 ივნისი — Sputnik. ქართველი მეზღვაურების პირადობის დამადასტურებელ დოკუმენტებს 150 წლის ისტორიის მქონე ევროპული კომპანია ANY Security Printing Company Plc დაამზადებს, ნათქვამია საქართველოს საზღვაო ტრანსპორტის სააგენტოს განცხადებაში.
საზღვაო ტრანსპორტის კომპანია, მეზღვაურთა შრომის კონვენციის მოთხოვნების შესაბამისად, ახალი ფორმატის ორ მაიდენტიფიცირებელ დოკუმენტს გასცემს – მეზღვაურის საიდენტიფიკაციო ბარათსა და ნაოსნობის წიგნაკს.
ეს დოკუმენტები არსებულ მეზღვაურის წიგნაკს ჩაანაცვლებს.
„მეზღვაურთა პირადობის საერთაშორისო კონვენციაში შესული ცვლილებების თანახმად, მეზღვაურის საიდენტიფიკაციო ბარათი უნდა შეიცავდეს უკონტაქტო მიკროსქემას და ის დროთა განმავლობაში ჩაანაცვლებს მეზღვაურის ვიზას კონვენციის წევრ სახელმწიფოებში, მათ შორის ევროკავშირის ქვეყნებსა და მსხვილ სატრანზიტო ზონებში", – ნათქვამია განცხადებაში.
ნაოსნობის წიგნაკში შესაძლებელი იქნება ნაოსნობის ისტორიის მონაცემების შეტანა და ყოველი დასრულებული ნაოსნობის შემდეგ მეზღვაურს აღარ დასჭირდება ინდივიდუალური ცნობის აღება გემიდან.
უნგრული კომპანია ANY Security Printing Company Plc, რომელმაც საერთაშორისო ტენდერი მოიგო და რომელიც მაღალი რეპუტაციით სარგებლობს, სპეციალიზდება გაყალბებისგან დამცავი ნიშნების შემცველი დოკუმენტების, მათ შორის სავალუტო ერთეულების ბეჭდვაში.
„კომპანია იყენებს ისეთ თანამედროვე ტექნოლოგიებს, როგორიცაა ნანოტექნოლოგიები, გააჩნია საკუთარი ლაბორატორია და ჰყავს მსოფლიო დონის სპეციალისტები", – აღნიშნულია განცხადებაში.
