თბილისი, 25 ივნისი — Sputnik. მსახიობ ზურაბ ანთელავას პოპულარობა არ აკლდა, თუმცა საზოგადოების განსაკუთრებული სიყვარული „ჩემი ცოლის დაქალებში“ კვაზი მანტკავას როლმა მოუტანა.
ისევე, როგორც ბევრ სხვა ხელოვანს, კორონავირუსის პანდემიამ ფინანსური პრობლემები მასაც შეუქმნა. ჟურნალ „სარკესთან“ საუბრისას მსახიობი ამბობს, რომ შემოდგომა-ზამთარი აშინებს, ვინაიდან შესაძლოა ელემენტარული პურის ყიდვაც კი პრობლემა გახდეს.
„ახლა ზაფხულია და ცოტა იოლია თავის გატანა. იცით, როგორ მეშინია შემოდგომა-ზამთრის პერიოდის?! შეიძლება პურიც ვეღარ ვიყიდოთ“, – ამბობს მსახიობი.
ზურაბ ანთელავას უფროსი თაობის მაყურებელი თელავის თეატრის წარმოდგენებით იცნობს, მათ შორის, სპექტაკლებიდან „ალალე“, „ჩემი წყალ-ჭალის ხმები“ და სხვ. ამჟამად თბილისის რამდენიმე თეატრის სპექტაკლებში მონაწილეობს.
