ხანძარი ბაზრობაზე

შეუძლიათ ივაჭრონ: ვინ და რაზე დაითანხმა დამწვარი ბაზრობის დაზარალებული მოვაჭრეები

61
(განახლებულია 19:07 17.06.2020)
ხანძრისგან დაზარალებული მოვაჭრეების ზარალს პირველ რიგში სადაზღვევო კომპანია აანაზღაურებს, თუმცა საკუთარი შესაძლებლობების ფარგლებში დაზარალებულთა დახმარებას გეგმავს თბილისის მერიაც.

თბილისი, 17 ივნისი – Sputnik. ვარკეთილში დამწვარი შერეული ბაზრობის აღდგენამდე მოვაჭრეებს მუშაობისთვის უსაფრთხო ადგილს გამოუყოფენ და რამდენიმე თვით გადასახადებისგან გაათავისუფლებენ, განაცხადა სამგორის რაიონის გამგებელმა კახა სამხარაძემ.

სამხარაძემ ხანძრის შედეგად დაზარალებულ მოვაჭრეებთან შეხვედრა ოთხშაბათს გამართა და მათ 10-კაციანი საინიციატივო ჯგუფის შექმნა და დღის განმავლობაში მერიაში შეხვედრის გამართვა შესთავაზა. ამ შეხვედრაში მონაწილეობას მიიღებს სადაზღვევო კომპანიის წარმომადგენელიც. 

„ადმინისტრაცია მზად არის გადარჩენილ ტერიტორიაზე მოაწყოს დახლები და დაზარალებულებს ვაჭრობის საშუალება მისცეს, ამასთან ჩვენ შევთანხმდით, რომ მოვაჭრეები სამი–ხუთი თვის გადასახადებისგან გათავისუფლდებიან. სადაზღვევო კომპანია ასევე მზად არის ამ ადამიანებს გარკვეული კომპენსაცია გადაუხადოს“, – განაცხადა რაიონის გამგებელმა.

სამხარაძის თქმით, შესაძლოა, ყველა მოვაჭრე კომპენსაციით კმაყოფილი არ დარჩეს, მაგრამ მათ უნდა დაამტკიცონ, რომ გარკვეული თანხის საქონელი ჰქონდათ.

„სადაზღვევო კომპანიამ ამ ადამიანებს შესთავაზა იმდენი, რისი შეთავაზებაც საკუთარი შესაძლებლობების ფარგლებში შეეძლო. სადაზღვევო კომპანია ზარალს აუნაზღაურებს არა მარტო მათ, ვისაც აქვს დეკლარირებული ქონება, არამედ მათაც, ვისაც არ აქვს. მაგრამ იგი შედარებით დაბალი ტარიფი იქნება. აქედან გამომდინარე, შესაძლოა ყველა კმაყოფილი ვერ დარჩეს. ამიტომაც ადამიანებმა უნდა დაამტკიცონ, რომ ისინი გარკვეულ ქონებას ფლობდნენ“, – განაცხადა გამგებელმა.

ხანძრისგან დაზარალებული მოვაჭრეების ზარალს პირველ რიგში სადაზღვევო კომპანია აანაზღაურებს, თუმცა საკუთარი შესაძლებლობების ფარგლებში დაზარალებულთა დახმარებას გეგმავს თბილისის მერიაც.

იმის შესახებ, რომ თბილისის მერია ხანძრის შედეგად დაზარალებულ მოვაჭრეებთან კონსულტაციების გამართვასა და საკუთარი კომპეტენციის ფარგლებში დახმარებას აპირებს, განაცხადა დედაქალაქის მერმა კახა კალაძემ.

ვარკეთილში, შუამთის ქუჩაზე მდებარე ე.წ. თათრების ბაზრობაზე ხანძარი 15 ივნისს, ღამით გაჩნდა. ცეცხლი 4 ათას კვადრატულ მეტრ ფართობზე გავრცელდა. ხანძარს რამდენიმე საათის განმავლობაში 130 მეხანძრე–მაშველი აქრობდა, მობილიზებული იყო 25 სახანძრო მანქანა. ვითარებას ის ართულებდა, რომ ბაზრობის მიმდებარე ტერიტორიაზე ბენზინგასამართი სადგური მდებარეობს. ხანძრის შედეგად შერეული ბაზრობის გარკვეული ტერიტორია დაიწვა. დილისთვის ხანძარი სრულად ლიკვიდირებული იყო.

61
თემები:
თბილისი დღეს (1665)
თბილისი

კუნძული მსოფლიოს Covid-რუკაზე: ავსტრიული გამოცემა საქართველოს ბრძოლაზე წერს

11
საქართველომ დაამტკიცა, რომ სწრაფი რეაგირება, დისციპლინა და მკაცრი ქმედებები ვირუსის წინააღმდეგ ბრძოლაში წარმატების საწინდარია, წერს გამოცემა

თბილისი, 12 ივლისი – Sputnik. ავსტრიული საზოგადოებრივი მაუწყებლის ბეჭდური გამოცემა – ORF Nachrichten სტატიას აქვეყნებს საქართველოს, როგორც კორონავირუსის წინააღმდეგ ბრძოლაში განსაკუთრებულად წარმატებული ქვეყნის შესახებ.

სტატიაში ნათქვამია, რომ საქართველო სამხრეთ კავკასიის პატარა ქვეყანაა, რომელიც „მაღალი ინფიცირების მქონე ქვეყნებით გარშემორტყმული ერთგვარი კუნძულია, რომელმაც ვირუსის წინააღმდეგ შემუშავებული ბრძოლის სტრატეგიით სახელი გაითქვა“.

„ქვეყანა 3,7 მილიონი მოსახლეობით მდებარეობს თურქეთსა და რუსეთის ფედერაციას შორის, ასევე ესაზღვრება სომხეთსა და აზერბაიჯანს. ყოფილ საბჭოთა რესპუბლიკებში, ასევე თურქეთში ინფიცირების შემთხვევების რაოდენობა მოსახლეობაში ზოგჯერ ათჯერ მაღალია“, - აღნიშნულია სტატიაში.

ავტორი აღნიშნავს, რომ ვირუსთან ბრძოლაში წარმატებული მოქმედებების შედეგად საქართველომ ყურადღება მიიპყრო რამდენიმე გავლენიანი საერთაშორისო გამოცემის და ანალიტიკური ცენტრის (BBC, ამერიკული და ბრიტანული ანალიტიკური ცენტრების), რომლებიც ზედმიწევნით სწავლობდნენ საქართველოს მაგალითს.

„საქართველომ ყველას დაუმტკიცა, რომ სწრაფი რეაგირება, დისციპლინა და მკაცრი ქმედებები (ზოგჯერ არცთუ ისე პოპულარული) Covid-ვირუსის წინააღმდეგ ბრძოლაში წარმატების საწინდარია“, – ნათქვამია სტატიაში.

მასალაში აღნიშნულია, რომ საქართველოს მთავრობის მიერ გადადგმული ეფექტური ნაბიჯების გარდა, ე.წ. სამმა მუშკეტერმა – დაავადებათა კონტროლის ცენტრის დირექტორმა ამირან გამყრელიძემ, მისმა მოადგილემ პაატა იმნაძემ და ვირუსოლოგმა, თბილისის ინფექციური საავადმყოფოს დირექტორმა თენგიზ ცერცვაძემ ერთობლივი სტრატეგია შეიმუშავეს.

რაც შეეხება საქართველოს მთავრობის მიერ გადადგმულ კონკრეტულ ნაბიჯებს, სტატიაში ნათქვამია, რომ მკაცრად კონტროლდებოდა შეზღუდვების დაცვა, საჭიროების შემთხვევაში კი ცალკეულ პირებს, ასევე კომპანიებს დიდი ოდენობის ჯარიმები დაეკისრა.

ამავე კონტექსტში აღნიშნულია, რომ მთავრობის მიერ მიღებული გადაწყვეტილებები ყოველთვის მოსაწონი არ იყო მოსახლეობისთვის, თუმცა მისი დიდი ნაწილი მთავრობის მოწოდებას დაემორჩილა და სახლში დარჩა. სტატიაში აგრეთვე ნახსენებია „ქართული მართლმადიდებლური ეკლესია”, რომელიც აგრძელებდა ღვთისმსახურებას.

საქართველო სომხეთს კორონავირუსთან ბრძოლაში დახმარებას კიდევ ერთხელ სთავაზობს >>

სტატიის დასასრულს ავტორი უამბობს მკითხველს, რომ საქართველო 1 ივლისიდან საერთაშორისო ტურისტებისთვის საჰაერო საზღვრების გახსნას აპირებდა, თუმცა ქვეყანაში ეპიდსიტუაციის სტაბილურობის შესანარჩუნებლად ამ თარიღმა ივლისის ბოლოსთვის გადაიწია.

11
თემები:
COVID-19-ის პანდემია მსოფლიოში
ამირან გამყრელიძე

COVID-19 საქართველოში: ყველა ახალი შემთხვევა შემოტანილია

202
(განახლებულია 15:22 12.07.2020)
ბოლო ერთი თვის განმავლობაში ინფიცირებულ პირებს შორის ხშირად არიან ტრაილერების მძღოლები, რომლებიც საერთაშორისო გადაზიდვებს ახორციელებენ

თბილისი, 12 ივლისი — Sputnik. საქართველოში კორონავირუსის ხუთივე ახალი შემთხვევა შემოტანილია, განაცხადა დაავადებათა კონტროლის ეროვნული ცენტრის ხელმძღვანელმა, ამირან გამყრელიძემ.

მისი თქმით, ხუთივე პაციენტი კარანტინში იმყოფებოდა. ზოგიერთი მათგანი საქართველოს მოქალაქეა, რამდენიმეს კი ორმაგი მოქალაქეობა აქვს.

„ამჯერად ახალ შემთხვევებს შორის არც ერთი არ არის სატვირთო ავტომობილის მძღოლი. პაციენტების ჯანმრთელობის მდგომარეობა დამაკმაყოფილებელია“, – განმარტა გამყრელიძემ პირველი არხის ეთერში.

რაც შეეხება ზოგად სიტუაციას, მისი თქმით, განგაშისა და პანიკის საფუძველი არ არსებობს.

„გვაქვს ყოველდღიურად ერთეული შემთხვევები. უმრავლესობა არის იმპორტირებული. ბოლო ერთი თვის განმავლობაში ხშირად ინფიცირებულები არიან სატვირთო ავტომობილის მძღოლები, რომლებიც გადაზიდვებს ახორციელებენ “ , – აღნიშნა გამყრელიძემ.

ბრძოლა კორონავირუსთან: საქართველოს მოქალაქეები მთავრობის მუშაობით კმაყოფილები არიან >>

12 ივლისის მონაცემებით, საქართველოში ბოლო 24 საათში COVID-19-ით ინფიცირების ხუთი ახალი შემთხვევა გამოვლინდა. ამგვარად, დადასტურებულ შემთხვევათა რაოდენობა 986-მდე გაიზარდა.

 

202
თემები:
COVID-19 საქართველოში