თბილისი, 12 ივნისი — Sputnik. სატელევიზიო საგანმანათლებლო პროექტი „ტელესკოლა", რომელიც კორონავირუსის პანდემიის პერიოდში განათლების სამინისტრომ დისტანციურ სწავლებასთან დაკავშირებით აამოქმედა, 13 ივნისიდან გაკვეთილების ტრანსლაციას ინგლისურ ენაზე დაიწყებს.
პროექტი საქართველოს განათლების, მეცნიერების, კულტურისა და სპორტის სამინისტროსა და ბრიტანეთის საბჭოს მხარდაჭერით ზაფხულის არდადეგების განმავლობაში განხორციელდება.
პროგრამის სახელწოდებაა Word on the Street, ის წარმატებით ხორციელდებოდა ჩინეთში, მონტენეგროში, სერბეთში, თურქეთსა და სხვა ქვეყნებში. პროექტის მიზანი ზაფხულის არდადეგების ეფექტურად გამოყენება და ინგლისური ენის ცოდნის გაუმჯობესებაა.
სხვადასხვა სახალისო და სასარგებლო თემებზე გაკვეთილების დროს მოსწავლეებს ლექსიკის გამდიდრებისა და გრამატიკის უკეთ ათვისების შესაძლებლობა ექნებათ. თითოეულ გაკვეთილს ახლავს დამატებითი ონლაინ-სავარჯიშოები, პასუხებითა და ინტერაქტიული ვიდეორგოლებით.
საქართველო ერთ-ერთი პირველი იყო იმ ქვეყნებს შორის, რომლებმაც პედაგოგებსა და მოსწავლეებს დისტანციური სწავლებისთვის ბევრი საინტერესო რესურსი მიაწოდეს. მათ შორის, ქვეყანაში გადაიცემოდა ყოველკვირეული ვებინარები, უფასო პუბლიკაციები და ონლაინ-ტრენინგების ფართო არჩევანი, რომელიც ხელმისაწვდომი იყო ყველა მასწავლებლისთვის და მათთვის, ვისთვისაც პროფესიული განვითარება მნიშვნელოვანია.
