ფულის მოხსნა ბანკომატიდან

რა დოკუმენტები გვჭირდება და როგორ დავრეგისტრირდეთ 300-ლარიანი დახმარების მისაღებად

3217
(განახლებულია 20:27 15.05.2020)
დღეიდან 300-ლარიანი დახმარების მისაღებად კორონავირუსის პანდემიის შედეგად  დაზარალებულ თვითდასაქმებულთა რეგისტრაცია დაიწყო.

თუ თქვენ თვითდასაქმებული ხართ, მაშინ მოგიწევთ დაამტკიცოთ, რომ ნამდვილად მუშაობდით 2020 წლის პირველ კვარტალში და COVID-19-ის პანდემიის გამო შემოსავალი დაკარგეთ.

თუ რა გზები არსებობს ამის დასამტკიცებლად, რა დოკუმენტები დაგჭირდებათ და როგორ უნდა გაიაროთ რეგისტრაცია, ვეცდებით ამ სტატიით ამომწურავი ინფორმაცია მოგაწოდოთ.

საქართველოს მთავრობის ანტიკრიზისული გეგმის შესაბამისად, თვითდასაქმებულები სახელმწიფოსგან 300-ლარიან ერთჯერად დახმარებას კონკრეტული საბუთის წარდგენის შემდეგ მიიღებენ.

300-ლარიანი დახმარების მისაღებად ონლაინ რეგისტრაცია დღეიდან დაიწყო და 6 კვირის განმავლობაში, ანუ 1 ივლისამდე გაგრძელდება. თუ ელექტრონული რეგისტრაციის გავლის შესაძლებლობა არ გაქვთ,  მიმართეთ დასაქმების სააგენტოს ან/და სოციალური მომსახურების სააგენტოს სერვის-ცენტრებს (იხ. მისამართები - ssa.gov.ge) და წარმომადგენლები ადგილზე დაგეხმარებიან რეგისტრაციაში. ან დამატებითი ინფორმაციისთვის დარეკეთ ჯანდაცვის სამინისტროს ცხელ ხაზზე - 1505.

პირველ რიგში განვსაზღვროთ, ვინ არიან თვითდასაქმებულები

თვითდასაქმებულად ითვლება ყველა ის ფიზიკური პირი, რომელიც ეწეოდა რაიმე ტიპის ეკონომიკურ საქმიანობას და იღებდა შემოსავალს, გარდა დაქირავებით დასაქმებულისა.

თვითდასაქმებული პირები ორ კატეგორიად იყოფიან:

· ფიზიკური პირები, რომლებიც რეგისტრირებული არიან შემოსავლების სამსახურში (დაახლოებით 150 ათასი ადამიანი)

 · ფიზიკური პირები, რომლებიც ეწეოდნენ ეკონომიკურ საქმიანობას ან/და ჰქონდათ შემოსავალი, თუმცა არ არიან რეგისტრირებული შემოსავლების სამსახურში (მათი რაოდენობა უცნობია).

1. ყველაფერი, რაც რეგისტრირებულმა თვითდასაქმებულმა უნდა იცოდეს:

თუ პირველი კატეგორიის თვითდასაქმებულთა რიცხვს მიეკუთვნებით (რეგისტრირებული ხართ შემოსავლების სამსახურში და 2020 წლის აპრილიდან დაკარგეთ შემოსავალი), მაშინ ყველაფერი მარტივადაა და არ დაგჭირდებათ დამატებითი დოკუმენტაციის წარდგენა, რადგან თავად შემოსავლების სამსახური მოახდენს თქვენ იდენტიფიცირებას. ამ შემთხვევაში მხოლოდ განაცხადი უნდა შეავსოთ ჯანდაცვის სამინისტროს ვებ-გვერდზე - www.moh.gov.ge .

კერძოდ, შემოსავლების სამსახური იდენტიფიცირებას გაუკეთებს:

-მცირე ბიზნესის სტატუსის მქონე მეწარმე ფიზიკურ პირებს (თუ 2020 წლის პირველ კვარტალში წარმოდგენილი გაქვთ საშემოსავლო გადასახადის ყოველთვიური დეკლარაცია, ან გიფიქსირდებათ ბრუნვა საკონტროლო სალარო აპარატით)

-მეწარმე ფიზიკურ პირებს (მაგალითად, დასაქმებული ხართ ბაზრობებზე და წარმოდგენილი გაქვთ 2020 წლის პირველ კვარტალში საშემოსავლო გადასახადის ყოველთვიური დეკლარაცია, ან გიფიქსირდებათ ბრუნვა საკონტროლო სალარო აპარატით, ან ეკონომიკური საქმიანობის განხორციელების ფაქტი დადასტურებული იქნება ბაზრობის ორგანიზატორის მიერ შემოსავლების სამსახურში წარდგენილი ინფორმაციით)

-პირებს, რომლებიც ახორციელებენ ფიქსირებული გადასახადით დასაბეგრ საქმიანობას (მაგალითად, დასაქმებული ხართ თონეში, სილამაზის სალონში, ავტოტექმომსახურების ობიექტში და ა.შ. და 2020 წლის პირველ კვარტალში განხორციელებული საქმიანობა დაგიდასტურდებათ შემოსავლების სამსახურში დარიცხული და გადახდილი ფიქსირებული გადასახადით)

-მიკრობიზნესის სტატუსის მქონე მეწარმეებს (ამ კატეგორიაში განიხილებიან ის ფიზიკური პირები, რომლებიც დაფინანსებას არ იღებენ ბიუჯეტიდან)

-ინდივიდუალურ მეწარმეებს (თუ 2020 წლის 1 აპრილამდე წარმოდგენილი გაქვთ 2019 წლის საშემოსავლო გადასახადის წლიური დეკლარაცია, ან 2020 წლის პირველ კვარტალში გიფიქსირდებათ ბრუნვა საკონტროლო სალარო აპარატით)

გაითვალისწინეთ, თუ ამ კატეგორიის თვითდასაქმებულების რიცხვში შედიხართ, თქვენ იდენტიფიცირებას შემოსავლების სამსახური უზრუნველყოფს 2020 წლის 20 მაისამდე და აკეთებს საკომპენსაციო პირების სიას. ამ სიაში ვერ მოხვდებით, თუ თქვენზე 2020 წლის განმავლობაში ფიქსირდება ხელფასის გაცემა, ან ასევე ფიქსირდებით დაქირავებით დასაქმებულთა კომპენსაციის სიებშიც (ვინც დაკარგა ხელფასი).

როგორც ზემოთ აღვნიშნეთ, კომპენსაციის მისაღებად უნდა შეავსოთ ელექტრონული განაცხადი ჯანდაცვის სამინისტროს ვებ-გვერდზე - www.moh.gov.ge: 1. სახელი, გვარი და პირადი ნომერი; 2. საკონტაქტო მონაცემები (ფაქტობრივი საცხოვრებელი მისამართი და საკონტაქტო ტელეფონი); 3. საბანკო რეკვიზიტები (ანგარიშის ნომერი). 

ბანკის ანგარიშის ველის შევსების შემდეგ გამოდის ერთ-ერთი შეტყობინება:

· თქვენ ხართ დასაქმებული და ვერ მოხვდით კომპენსაციის მიმღებ პირთა სიაში.

· თქვენ მიიღებთ უმუშევრობის კომპენსაციას რეგისტრაციის გარეშე

თუ თქვენ ირიცხებით ერთჯერადი კომპენსაციის მიმღებ პირთა სიაში, ავტომატურად შეივსება ველი: „ფიზიკური პირები, რომლებიც რეგისტრირებულები არიან შემოსავლების სამსახურში“

და გამოვა შეტყობინება: „წარმატებით მოხდა თქვენი მონაცემების გადამოწმება“. ამის შემდეგ უნდა შეავსოთ შემდეგი ველები: 1. ფაქტობრივი მუნიციპალიტეტი (ჩამოიშლება მუნიციპალიტეტის დასახელებები და აირჩიეთ ის მუნიციპალიტეტი, სადაც ცხოვრობთ) 2. ფაქტობრივი მისამართი.

ამის შემდეგ უნდა დააჭიროთ ღილაკს „დასრულება“.

ელექტრონული განაცხადის წარდგენიდან არაუგვიანეს 10 სამუშაო დღის ვადაში სააგენტო განაცხადში არსებულ თქვენს პირად ნომერს ადარებს შემოსავლების სამსახურიდან მიღებულ ინფორმაციას და საკომპენსაციო თანხას ჩაგირიცხავთ თქვენ მიერ მითითებულ საბანკო ანგარიშზე. იმ შემთხვევაში, თუ თქვენი პირადი ნომერი არ არის საკომპენსაციო პირთა სიაში, სააგენტო გაცნობებთ ამის შესახებ.  

2. ყველაფერი, რაც არარეგისტრირებულმა თვითდასაქმებულმა უნდა იცოდეს

შედარებით რთულადაა საქმე, თუ მეორე კატეგორიის თვითდასაქმებულს მიეკუთვნებით, ანუ რეგისტრირებული არ ხართ შემოსავლების სამსახურში. ამ შემთხვევაში კომპენსაციის მისაღებად აუცილებელად უნდა დაადასტუროთ, რომ 2020 წლის პირველ კვარტალში ეწეოდით რაიმე სახის ეკონომიკურ საქმიანობას, ან გქონდათ შემოსავალი.

თქვენ დღეიდან 6 კვირის განმავლობაში, ანუ 1 ივლისამდე უნდა შეავსოთ განაცხადი ჯანდაცვის სამინისტროს ვებ-გვერდზე - www.moh.gov.ge და წარადგინოთ 2020 წლის პირველ კვარტალში შემოსავლის წყაროს დამადასტურებელი რაიმე დოკუმენტი.

ამ შემთხვევაში თქვენ შემდეგი სახის ინფორმაცია უნდა შეავსოთ:

· სახელი, გვარი და პირადი ნომერი;

· საკონტაქტო მონაცემები (ფაქტობრივი საცხოვრებელი მისამართი და საკონტაქტო ტელეფონი);

 · საბანკო ანგარიშის რეკვიზიტები;

· ინფორმაცია 2020 წლის პირველ კვარტალში შემოსავლის წყაროს შესახებ;

· 2020 წლის პირველ კვარტალში შემოსავლის წყაროს დამადასტურებელი დოკუმენტი

რა შეიძლება იყოს შემოსავლის წყაროს დამადასტურებელი დოკუმენტი

-გადასახადის გადამხდელად რეგისტრირებული პირის (გარდა არამეწარმე ფიზიკური პირისა) მიერ გაცემული პირველადი საგადასახადო დოკუმენტი, რომლითაც დასტურდება შემოსავლის მიღების ფაქტი (წერილობითი დოკუმენტი, რომლითაც შესაძლებელია საქონლის მიწოდების/მომსახურების გაწევის მონაწილე მხარეთა იდენტიფიცირება, აქვს თარიღი და მოიცავს მიწოდებული საქონლის/გაწეული მომსახურების ჩამონათვალსა და ღირებულებას. მაგალითად, შესყიდვის აქტი, მიღება-ჩაბარების აქტი);

-2020 წლის პირველი სამი თვის საბანკო ამონაწერი, რომლითაც დასტურდება ეკონომიკური საქმიანობიდან მიღებული შემოსავალი;

-მუნიციპალიტეტის ან სხვა ადმინისტრაციული ორგანოს მიერ პირზე გაცემული რაიმე საქმიანობის დამადასტურებელი ცნობა ნებართვა/ლიცენზია;

-საქართველოში რეგისტრირებული იურიდიული პირის მიერ გაცემული დოკუმენტი, რომლითაც დასტურდება პირის ეკონომიკური აქტივობა ან/და შემოსავალი;

-სხვა

ამ შემთხვევაში სააგენტო იხილავს წარმოდგენილ ელექტრონულ განაცხადებს და არაუგვიანეს ორი კვირის ვადაში გადაწყვეტილების მისაღებად სიას წარუდგენს უწყებათშორის კომისიას. აღნიშნულ სიაში ვერ მოხვდებიან ის პირები, რომლებიც არიან შემოსავლების სამსახურიდან სააგენტოსთვის მიწოდებულ სხვა საკომპენსაციო სიებში.

კომისიის გადაწყვეტილებიდან 10 სამუშაო დღის ვადაში სააგენტო უზრუნველყოფს კომპენსაციის თანხის ჩარიცხვას განცხადებაში მითითებულ საბანკო ანგარიშზე. თუ თქვენი განცხადება არ დაკმაყოფილდა, სააგენტო გადაწყვეტილების მიღებიდან 15 სამუშაო დღის ვადაში მოკლე ტექსტური შეტყობინების სახით მოგაწვდით ინფორმაციას კომპენსაციის გაცემაზე უარის შესახებ.

ვინ შეიძლება მოხვდეს არარეგისტრირებული თვითდასაქმებულების კატეგორიაში და რა დამადასტურებელი დოკუმენტი უნდა წარადგინოს?

განვიხილოთ რამდენიმე შესაძლო ვარიანტი:

· თუ ხართ ბაზრობის დახლზე მოვაჭრე პირი, მაგრამ არ ხართ რეგისტრირებული მეწარმედ და თქვენ შესახებ ბაზრობის ორგანიზატორსაც არ აქვს ინფორმაცია წარდგენილი შემოსავლების სამსახურში, ამ შემთხვევაში ეკონომიკური აქტივობის/შემოსავლის წყაროს დასადასტურებლად უნდა წარადგინოთ ბაზრობის ორგანიზატორის მიერ გაცემული ცნობა იმის შესახებ, რომ 2020 წლის პირველ კვარტალში ვაჭრობდით მისი ბაზრობის ტერიტორიაზე და იხდიდით შესაბამის ქირას/იჯარას

 · თუ დასახლებული პუნქტიდან მუნიციპალიტეტის ცენტრში ან დასახლებულ პუნქტებს შორის გადაგყავდათ მგზავრები და არ წარმოადგენთ კომპანიის თანამშრომელს, უნდა წარადგინოთ დამადასტურებელი დოკუმენტი შესაბამისი მუნიციპალიტეტიდან

· თუ დასახლებული პუნქტებიდან ბავშვები დაგყავდათ საჯარო სკოლაში და არ ხართ კომპანიის თანამშრომელი, უნდა წარადგინოთ დამადასტურებელი დოკუმენტი შესაბამისი მუნიციპალიტეტიდან

· თუ ახორციელებდით მგზავრთა საქალაქთაშორისო გადაყვანას და არ წარმოადგენთ კომპანიის თანამშრომელს, უნდა წარადგინოთ ავტოსადგურის ორგანიზატორისგან შესაბამისი ცნობა და მომსახურების გაწევის ანაზღაურების დამადასტურებელი დოკუმეტი (საბანკო ტრანზაქცია ან სალარო აპარატის ჩეკი)

 · თუ დღიურად აქირავებდით კუთვნილ საცხოვრებელ ფართებს ბინების გაქირავების ელექტრონული პორტალების მეშვეობით (Airbnb.com, booking.com და სხვ.), უნდა წარადგინოთ საბანკო ამონაწერი, სადაც გამოჩნდება შესაბამისი კომპანიიდან მიღებული შემოსავალი

· თუ ამზადებდით, მაგალითად, სუვენირებს და აბარებდით სუვენირების მაღაზიას, ან რაიმე სოფლის მეურნეობის პროდუქტს აბარებდით საცხობს/რესტორანს, უნდა წარადგინოთ შესაბამისი პირველადი საგადასახადო დოკუმენტი (შესყიდვის აქტი, მიღება-ჩაბარების აქტი)

 · თუ მუშაობთ ძიძად, ხელოსნად, დამლაგებლად ან სხვა მსგავსი ტიპის სამუშაოზე, კომპენსაციას მიიღებთ იმ შემთხვევაში, თუ წარადგენთ გადასახადის გადამხდელად რეგისტირირებული სერვისის მიმწოდებელი/საშუამავლო კომპანიიდან ცნობას, ვისი მეშვეობითაც 2020 წლის 1 აპრილამდე მოხდა მისი დამსაქმებელთან დაკავშირება. ამ შემთხვევაში ვერაფრით დაგეხმარებიან კერძო პირები და ოჯახები.

· ხართ ნებისმიერი სხვა პირი და 2020 წლის პირველ კვარტალში გიფიქსირდებათ ეკონომიკური აქტივობა ან/და გქონდათ შემოსავალი და შეძლებთ ამ შემოსავლის დამადასტურებელი დოკუმენტის წარმოდგენას (მათ შორის საბანკო ამონაწერის მეშვეობით).

ნებისმიერ ჩვენგანს შეიძლება გაუჩნდეს ლეგიტიმური აზრი, რომ, სახელმწიფოს მიმართ პასუხისმგებლობის გათვალისწინებით, იურიდიული პირები მოერიდებიან არარეგისტრირებული დასაქმებულებისთვის ცნობების გაცემას. თუმცა, როგორც ჯანდაცვის მინისტრის მოადგილემ თამარ ბარკალაიამ განმარტა, თვითდასაქმებულების სოციალური დახმარება არავის დასასჯელად არ იქნება გამოყენებული.

„ეს პროცესი არ არის ორიენტირებული იმ დამსაქმებლის დასჯაზე და იდენტიფიცირებაზე, რომლებიც ამ ცნობებს გასცემენ. ეს პროცესი ორიენტირებულია იმ დასაქმებულების იდენტიფიცირებაზე, რომლებიც ხელფასს იღებდნენ. დამსაქმებელმა უნდა აიღოს სოციალური პასუხისმგებლობა. მთავრობის მხრიდან იქნება მაქსიმალურად ლოიალური დამოკიდებულება დამსაქმებლის მიმართ“, - განმარტა ჯანდაცვის მინიტრის მოადგილემ.

ანტიკრიზისული გეგმის ფარგლებში თვითდასაქმებულების დასახმარებლად ბიუჯეტიდან 75 მილიონი ლარია გამოყოფილი.

3217
სტუდენტები ლექციაზე

იმ მოქალაქეთა საყურადღებოდ, რომლებიც პანდემიის გამო რუსეთში სასწავლებლად ვერ მიდიან

162
(განახლებულია 20:59 25.09.2020)
წელს ქართველი ახალგაზრდობისთვის დაახლოებით 120 ადგილი გამოიყო რუსეთში უფასო განათლების მისაღებად, მაგრამ სტუდენტები პანდემიის გამო გამგზავრებას ვერ ახერხებენ

თბილისი, 25 სექტემბერი - Sputnik. სტუდენტები, რომლებმაც წელს რუსეთის უმაღლეს სასწავლებლებში თანამემამულეთა პროგრამის ფარგლებში ჩააბარეს, მაგრამ პანდემიის გამო სასწავლებლად გამგზავრებას ვერ ახერხებენ, თავიანთ უნივერსიტეტებს უნდა დაუკავშირდნენ. ამის შესახებ Sputnik-საქართველოს საქართველოს რუს თანამემამულეთა ორგანიზაციის საკოორდინაციო საბჭოს თავმჯდომარე ნიკოლაი სვენტიცკიმ განუცხადა.

მარტის შუა რიცხვებიდან საქართველოს საზღვრები პანდემიის გამო ჩაიკეტა. შედეგად საქართველოს მოქალაქეები, რომლებმაც წელს რუსეთის უმაღლეს სასწავლებლებში ჩააბარეს ან არდადეგებზე სახლში იმყოფებოდნენ, ვერ ახერხებენ სასწავლებლად რუსეთში გამგზავრებას.

„პირველი და უმთავრესია, არავინ ინერვიულოს, ყველაფერი ძალაში რჩება, ისინი ისწავლიან. ყველა სტუდენტს, ასპირანტს ვურჩევდი, რაც შეიძლება სწრაფად დაუკავშირდეს ტელეფონით ან ინტერნეტით უმაღლესი სასწავლებლების დეკანატებს, რომლებიც უცხოელ მოქალაქეებთან მუშაობაზე არიან პასუხისმგებელი, და სთხოვონ სიტუაციის დეტალურად განმარტება“, - განაცხადა სვეტნიცკიმ. 

სვენტიცკის თქმით, ეს პრობლემა შეეხო არა მხოლოდ საქართველოს მოქალაქეებს, არამედ სხვა ქვეყნების მოქალაქეებსაც, რომლებმაც წელს პროგრამით რუსეთის უმაღლეს სასწავლებლებში ჩააბარეს. როგორც მან აღნიშნა, ბევრი ასეთი მოქალაქეა, რომელთა ქვეყანაში შეშვება და საერთო საცხოვრებლებში განთავსებაა საჭირო.

„ამ მიმართულებით მუშაობა მიმდინარეობს, ეს ზუსტად ვიცი. მთავარია, ხელი არ ჩაიქნიონ, რადგან ეს ბავშვები უკვე ჩარიცხული არიან უმაღლესებში“, - აღნიშნა სვენტიცკიმ.

ამასთან, ზოგიერთი სტუდენტი საქართველოდან უკვე შეუდგა დისტანციურ სწავლას რუსეთის უმაღლესებში.

„მე ბაუმანის სახელობის უნივერსიტეტში ჩავაბარე, ამჟამად დისტანციურად ვსწავლობ. უმაღლესთან კონტაქტს ვინარჩუნებ, დაუსწრებლად საერთო საცხოვრებელში ადგილიც კი გამომიყვეს. მაგრამ რუსეთში მოხვედრას ვერ ვახერხებ - საჭიროა სპეციალური მოსაწვევი, რომლის მიღებასაც მხოლოდ მაშინ შევძლებ, როდესაც საზღვრები გაიხსნება და ეპიდემიოლოგიური ვითარება მოგვარდება“, - განუცხადა Sputnik-საქართველოს ერნესტ შადინოვმა, რომელმაც უმაღლესში წელს პროგრამის ფარგლებში ჩააბარა.

საქართველოში შვეიცარიის საელჩოსთან მოქმედი რუსეთის ინტერესების სექცია ყოველწლიურად კონკურსის წესით არჩევს საქართველოს მოქალაქეთა შორის რუსეთის უმაღლესებში ჩაბარების მსურველებს. რუსეთში სხვადასხვა ქვეყნიდან სტუდენტების სწავლების პროგრამა უკვე 15 წელია მოქმედებს. მთელი ამ წლების განმავლობაში მხოლოდ საქართველოდან რუსეთში განათლების მისაღებად ყოველწლიურად დაახლოებით 120 სტუდენტი მიემგზავრება.

162
სტუდენტების პროტესტი

„სწავლა მინდა!“ ქართველმა სტუდენტებმა განათლების სამინისტროსთან აქცია გამართეს

90
(განახლებულია 20:13 25.09.2020)
დისტანციური სწავლების ხარისხს როგორც მოსწავლეები, ისე მათი მშობლები ჯერ კიდევ გაზაფხულზე უჩიოდნენ. ახალი სასწავლოს წლის დაწყებასთან ერთად საკითხი განსაკუთრებით გამწვავდა

თბილისი, 25 სექტემბერი – Sputnik. განათლების სამიბნისტროს შენობის წინ სტუდენტებმა საპროტესტო აქცია „სწავლა მინდა!“ გამართეს, იუწყება Sputnik–საქართველოს კორესპონდენტი მოვლენების ადგილიდან.

ქვეყანაში სასწავლო წელი 15 სექტემბერს განახლდა, მაგრამ ეპიდვითარების გაუარესების გამო რვა ქალაქის – თბილისი, ბათუმი, ქობულეთი, ქუთაისი, ფოთი, რუსთავი, ზუგდიდი, გორი, ასევე კახეთის, გურიისა და შიდა ქართლის ზოგიერთი სოფლის სკოლების მოსწავლეები და სტუდენტები იძულებული არიან, ორი კვირის განმავლობაში, 1 ოქტომბრამდე დისტანციურად ისწავლონ. სხვა ქალაქებსა და სოფლებში სასწავლო დაწესებულებები გაიხსნა.

Студенческий омбудсмен провел митинг перед Министерством образования под названием Мы хотим учиться
© Sputnik / Alex Shlamov
სტუდენტების აქცია განათლების სამინისტროსთან

საპროტესტო აქციაში რამდენიმე ათეული სტუდენტი მონაწილეობდა. ახალგაზრდებმა ქვეყნის უმაღლეს სასწავლებლებში დისტანციური სწავლება გააპროტესტეს. მათ ხელში ეკავათ პლაკატები წარწერებით „მოგვეცით სწავლის უფლება", „ჩვენ გვინდა ხარისხიანი განათლება", „სწავლა ჩვენი უფლებაა" და სხვ.

Студенческий омбудсмен провел митинг перед Министерством образования под названием Мы хотим учиться
© Sputnik / Alex Shlamov
სტუდენტების აქცია განათლების სამინისტროსთან

გასულ დღე–ღამეში საქართველოში კორონავირუსის 265 ახალი შემთხვევა გამოვლინდა.. ეს პანდემიის დაწყებიდან ყველაზე მაღალი მაჩვენებელია.

ოფიციალურ ვებ–გვერდზე განთავსებული მონაცემებით, ქვეყანაში სულ გამოვლენილია კორონავირუსის 4 664 შემთხვევა, აქედან ამჟამად აქტიურია 2 903.

ამასთან, ბოლო 24 საათში კლინიკები დატოვა 54–მა ადამიანმა, სულ გამოჯანმრთელდა 1 759 პაციენტი, გარდაცვლილთა რიცხვს დაემატა კიდევ ერთი და გახდა 27.

90
თემები:
განათლება საქართველოში
კორონავირუსის ეპიდემია. ჟურნალისტები პირბადეებით

ვინ და როგორ აშუქებს არჩევნებს? სპეციალისტებმა ქართული მასმედია გააანალიზეს

0
ყველაზე კრიტიკული ტონი მთავრობის მიმართ ჰქონდა :მთავარ არხს“ – 72%, ხოლო ყველაზე დადებითი Postv–ს – 33%

თბილისი, 26 სექტემბერი - Sputnik. ქართული მასმედია ყველაზე მეტ ყურადღებას უთმობს მმართველი პარტია „ქართული ოცნება – დემოკრატიული საქართველოს“ საქმიანობის გაშუქებას. შემდეგ მოდიან ოპოზიციური პარტიები „ერთიანი ნაციონალური მოძრაობა“ და „ევროპული საქართველო“.

ამაზე მეტყველებს საპარლამენტო არჩევნების შუალედური მედიამონიტორინგის შედეგები. მედიამონიტორინგმა მასობრივი ინფორმაციის 43 საშუალება მოიცვა: 12 ტელეარხი, 10 რადიო, რვა გაზეთი და 13 ონლაინ–გამოცემა. კვლევა 15 ივნისიდან 31 აგვისტოს ჩათვლით პერიოდში ჩატარდა.

არჩევნები 2020: „ოდირმა“ საქართველოში სადამკვირვებლო მისია გახსნა>>

მედიამონიტორინგი ხორციელდება ევროკავშირისა და გაეროს განვითარების პროგრამის (UNDP) მხარდაჭერით და სამ არასამთავრობო ორგანიზაციასთან – საქართველოს ჟურნალისტური ეთიკის ქარტია, Internews Georgia და CRRC–საქართველო – თანამშრომლობით. მონიტორინგი2020 წლის დეკემბერში დასრულდება.

მონიტორინგის პირველი შედეგები

„ქართული ოცნება უფრო დადებით კონტექსტში გააშუქა ტელეარხმა „იმედი“ (29%), ხოლო ნეგატიურად – ოპოზიციურმა ტელეარხმა „მთავარი არხი“ (72%).

 „ერთიანი ნაციონალური მოძრაობა“ ყველაზე დადებითად გააშუქა „მთავარმა არხმა“ (6%), ხოლო ნეგატიურად – ტელეარხმა „ობიექტივმა (79%).

ოპოზიციურ საპარლამენტო პარტია „ევროპულ საქართველოს“ ყველაზე მეტი დრო დაუთმა ტელეარხმა „ფორმულამ“. დადებითი გაშუქება შეადგენდა მთელი დროის 1%–ზე ოდნავ მეტს. ყველაზე მეტად პარტიას დადებითად იხსენებდა „TV პირველი“ და „კავკასია (2%). ყველაზე ნეგატიურად ეს პარტია გააშუქეს „იმედის“ ეთერში.

პარტიას „ლელო საქართველოსთვის“ ყველაზე მეტი დრო დაუთმო „TV პირველმა“. დადებითი გაშუქება შეადგენდა მხოლოდ 3%–ს. ყველაე მეტად დადებითად პარტია გააშუქა ტელეარხმა „კავკასია“ (21%).

ექს–პრეზიდენტ მიხეილ სააკაშვილს ყველაზე მეტი დრო დაუთმო „იმედმა“. ნეგატიური გაშუქება შეადგენდა 74%–ს.

მთავრობის მიმართ ყველაზე კრიტიკული ტონი ჰქონდა „მთავარ არხს“ – 72%, ხოლო ყველაზე დადებითი – Postv–ს – 33%.

„წინა წლების მსგავსად თითქმის ყველა არხზე პრობლემად რჩება სიღრმისეული, მოკვლევითი სიუჟეტების სიმცირე, რომლებიც დაკავშირებული იქნება საარჩევნო თემატიკასთან და ამომრჩეველს მეტად დაეხმარება ინფორმირებული არჩევანის გაკეთებაში“, – აღნიშნავენ დოკუმენტის ავტორები.

მედიამონიტორინგმა ასევე აჩვენა, რომ წინა წლებთან შედარებით გაიზარდა ეთიკური დარღვევების ფაქტები. როგორც წინა წლებში, თითქმის ყველა არხზე პრობლემას წარმოადგენს გენდერული სტერეოტიპები. როგორც დოკუმენტშია აღნიშნული, მთელი პერიოდის განმავლობაში დაფიქსირდა სექსისტური განცხადებების ტირაჟირების რამდენიმე შემთხვევა. სექსისტური განცხადების ავტორი პოლიტიკოსებთან ერთად ჟურნალისტებიც იყვნენ.

0
თემები:
საქართველოს საპარლამენტო არჩევნები 2020