მეტრო

EBRD თბილისის მეტროს რეაბილიტაციას 75 მილიონი ევროთი დააფინანსებს

95
(განახლებულია 15:58 01.05.2020)
სესხით გათვალისწინებულია თანამედროვე ტიპის 40 ვაგონის შეძენა და ასევე მეტროს სადგურებისა და გვირაბების აღდგენა.

თბილისი, 1 მაისი — Sputnik. ევროპის განვითარებისა და რეკონსტრუქციის ბანკი (EBRD) თბილისის მეტროპოლიტენის რეაბილიტაციისთვის 75 მლნ ევროს ოდენობით სესხს გამოყოფს, ნათქვამია ბანკის განცხადებაში. 

როგორც განცხადებაშია აღნიშნული, მეტროს რეაბილიტაცია და ახალი მოძრავი შემადგენლობები გააუმჯობესებს საზოგადოებრივი ტრანსპორტის საიმედოობას, უსაფრთხოებასა და ეფექტურობას და მგზავრებს კომფორტული და ეკოლოგიურად უსაფრთხო ტრანსპორტით უზრუნველყოფს. სესხით გათვალისწინებულია თანამედროვე ტიპის 40 ვაგონის შეძენა და ასევე მეტროს სადგურებისა და გვირაბების აღდგენა.

სესხი ორ ტრანშად იქნება წარმოდგენილი და იგი EBRD-ს და "მწვანე კლიმატის ფონდის" (GCF) თანადაფინანსებით განხორციელდება (65 მლნ – EBRD, 10 მლნ – GCF).

„მეტროპოლიტენის რეაბილიტაცია და ახალი მოძრავი შემადგენლობები გააუმჯობესებს საზოგადოებრივი ტრანსპორტის საიმედოობას და ამასთან მგზავრებს კომფორტული და ეკოლოგიურად უსაფრთხო ტრანსპორტით უზრუნველყოფს. თბილისში თითქმის 1,2 მილიონი ადამიანი ცხოვრობს და პიკის საათებში მოძრაობა გადატვირთულია. განახლებული მეტრო ხელს შეუწყობს კერძოდან საზოგადოებრივი ტრანსპორტის გამოყენებაზე გადართვას, რაც უზრუნველყოფს ჰაერის დაბინძურების საგრძნობ შემცირებას”, - ნათქვამია EBRD-ს განცხადებაში.

EBRD წამყვანი ინსტიტუციური ინვესტორია საქართველოში. ქვეყანაში ოპერირების დაწყების მომენტიდან ბანკმა 249 ფინანსურ, კორპორაციულ და ენერგეტიკულ პროექტში 3,7 მილიარდი ევროს ინვესტიცია განახორციელა. ინვესტიციების 87% კერძო სექტორზე მოდის.

ამჟამად თბილისის მეტროპოლიტენი ორ ხაზზე – ახმეტელი-ვარკეთილისა და საბურთალოს ხაზებზე 23 სადგურს ითვლის. ხაზის საერთო სიგრძეა 57 კილომეტრი (პირველი ხაზი - 40 კმ და მეორე - 17 კმ).

95
თემები:
თბილისი დღეს (1832)
საქართველოს პროკურატურა

ხუსკივაძე–კობალაძის მიმოწერა: პროკურატურა ახალ მტკიცებულებებს აqveynebs

11
(განახლებულია 18:46 04.12.2020)
გამოძიების მტკიცებით, გავრცელებული მიმოწერა ადასტურებს იმ ფაქტს, რომ ბრალდებულები მათთვის სასურველი შედეგის მისაღებად გობეჯიშვილს ემუქრებოდნენ.

თბილისი, 3 დეკემბერი – Sputnik. საქართველოს პროკურატურამ  ისნის საოლქო-საარჩევნო კომისიის თავმჯდომარის თეოდორე გობეჯიშვილის  გარდაცვალების საქმის გამოძიება დაასრულა და ახალი მტკიცებულებები გაასაჯაროვა იმასთან დაკავშირებით, რომ იგი სიკვდილამდე მიიყვანეს. 

გობეჯიშვილი 7 ნოემბერს საკუთარ ბინაში გარდაცვლილი იპოვეს.  წინასწარმა გამოძიებამ მის სიკვდილში იმავე კომისიის წევრების – აკაკი კობალაძისა და აკაკი ხუსკივაძის არაპირდაპირი ბრალეულობა დაადგინა. გამოძიების ვერსიით, გარდაცვალებამდე ერთი დღით ადრე ბრალდებულებმა ერთ–ერთი პოლიტიკური პარტიის სახელით გობეჯიშვილს 50 ათასი დოლარი შესთავაზეს, სანაცვლოდ კი თანამდებობის დემონსტრატიულად დატოვება და თითქოსდა გაყალბებული არჩევნების შესახებ განცხადების გაკეთება მოსთხოვეს. როდესაც გობეჯიშვილმა შეთავაზებაზე უარი განაცხადა, მას ანგარიშსწორებით დაემუქრნენ.

„დასრულდა ისნის N5 საოლქო-საარჩევნო კომისიის თავმჯდომარის თედო გობეჯიშვილის მიმართ ჯგუფურად განხორციელებული იძულების, მუქარისა და ქრთამის მიცემის ფაქტზე გამოძიება და სისხლის სამართლის საქმე არსებითად განსახილველად სასამართლოში წარიმართა“, – ნათქვამია პროკურატურის განცხადებაში.

პროკურატურამ ასევე გაავრცელა გობეჯიშვილთან კობალაძისა და ხუსკივაძის მიმოწერა, რაც გამოძიების მტკიცებით, მათ ბრალეულობას ადასტურებს.

გავრცელებული მიმოწერის სქრინის მიხედვით, კობალაძე გობეჯიშვილს უხსნის, რომ ყოფილი მმართველი პარტია „ერთიანი ნაციონალური მოძრაობის“ წარმომადგენელმა ხატია დეკანოიძემ იგი მათ სიაში შეიყვანა, რომლის დაკავებასაც ხელისუფლებაში მოსვლის შემდეგ გეგმავდნენ. გარდა ამისა, მიმოწერაში ქრთამზეც არის საუბარი.

პროკურატურის განმარტებით, გამოძიებას ასევე აქვს კობალაძისა და ხუსკივაძის ბრალეულობის სხვა მტკიცებულებებიც, რომელსაც უწყება სასამართლოს წარუდგენს.

ამ დროისთვის თავად კობალაძეს და ხუსკივაძეს  აღკვეთის ღონისძიების სახით პატიმრობა აქვთ შეფარდებული.

11
თემები:
შემთხვევები საქართველოში
საქართველოს შინაგან საქმეთა მინისტრი ვახტანგ გომელაური

ბადრი ესებუა, შესაძლოა, საერთაშორისო ძებნილად გამოცხადდეს

33
(განახლებულია 18:20 04.12.2020)
ვახტანგ გომელაური არ ეთანხმება მოსაზრებას ქვეყანაში კრიმინალური მდგომარეობის გაუარესების თაობაზე და საზოგადოებას სიმშვიდისკენ მოუწოდებს

თბილისი, 4 დეკემბერი - Sputnik. ზუგდიდში „საქართველოს ბანკის“ ფილიალზე მომხდარ თავდასხმაში ბრალდებული  ბადრი ესებუა, შესაძლოა, საერთაშორისო ძებნილად გამოცხადდეს, განაცხადა საქართველოს შინაგან საქმეთა მინსიტრმა ვახტანგ გომელაურმა ჟურნალისტებთან. 

21 ოქტომბერს შეიარაღებული პირი „საქართველოს ბანკის“ ზუგდიდის ფილიალში შეიჭრა და 43 ადამიანი მძევლად აიყვანა. ბოროტმოქმედმა ხელისუფლებისგან ნახევარი მილიონი დოლარი, ვერტმფრენი ან მანქანა, ასევე მისი უსაფრთხოების გარანტიები მოითხოვა. აღნიშნული მოთხოვნების დაკმაყოფილების შემდეგ მან ყველა მძევალი გაათავისუფლა და მიმალვა მოახერხა. მისი ადგილსამყოფელი ამ დრომდე უცნობია.

„ბადრი ესებუაზე ძებნაა გამოცხადებული და მისი ადგილსამყოფელის დადგენისა და დაკავების მიზნით ღონისძიებები ამ დრომდე ტარდება“, – განაცხადა გომელაურმა ჟურნალისტებთან.

მინისტრის განმარტებით, არასწორია საუბარი იმაზე, რომ ქვეყანაში კრიმინალის შემთხვევებმა იმატა.

„როდესაც იქნება 10 და 20 შემთხვევა, ეს იქნება შემთხვევების მომატების მანიშნებელი. ბანკებზე ყაჩაღური თავდასხმები ხდებოდა და ხდება ყოველდღიურად“, – აღნიშნა გომელაურმა.

შსს–მ ბანკზე თავდასხმის ფაქტი ტერორისტულ აქტად შეაფასა.

გამოძიება საქართველოს სისხლის სამართლის კოდექსის 236-ე, 323-ე და 329-ე მუხლებით მიმდინარეობს, რაც ტერორისტულ აქტს, მძევლად ხელში ჩაგდებას ტერორისტული მიზნით და ცეცხლსასროლი იარაღის უკანონოდ შეძენა-შენახვა-ტარებას გულისხმობს

33
თემები:
ზუგდიდში შეიარაღებულმა პირმა მძევლები აიყვანა