ივანე მაჭავარიანი

საქართველოში პენსიები ყოველწლიურად გაიზრდება: ფინანსთა სამინისტროს ინიციატივა

971
(განახლებულია 14:24 29.04.2020)
პენსიის ინდექსაციის მინიმალური ოდენობა ასაკის მიხედვით 20-25 ლარს შეადგენს, თუმცა დანამატი ინფლაციის და ეკონომიკური ზრდის მიხედვით შეიძლება უფრო მეტიც იყოს.

თბილისი, 29 აპრილი - Sputnik. საქართველოს ფინანსთა სამინისტრო მიმართავს პარლამენტს კანონის მიღების თაობაზე პენსიის გაზრდის შესახებ ინფლაციისა და ეკონომიკური ზრდის მიხედვით, განაცხადა ფინანსთა მინისტრმა ივანე მაჭავარიანმა.

პენსიების პირველი მსგავსი გაზრდა 2021 წლის 1 იანვრისათვის არის დაგეგმილი. ასაკობრივი პენსიონრები 20-ლარიან საპენსიო დანამატს მიიღებენ, ხოლო 70 წელს ზემოთ პენსიონრები - 25 ლარის ოდენობით.

„მიუხედავად იმისა, რომ ბიუჯეტი განიცდის საკმაოდ დიდ გამოწვევებს, არათუ უარი არ ვთქვით ამ ინიციატივაზე, არამედ მიგვაჩნია, რომ დღევანდელ მოცემულობაში ეს მეტად მნიშვნელოვანი და აქტუალურია“, – განაცხადა მაჭავარიანმა ბრიფინგზე.

როგორ გაიზრდება პენსია

დღეისათვის საქართველოში ასაკობრივი პენსია ქალებს 60 წლიდან, ხოლო მამაკაცებს 65 წლიდან ენიშნებათ. საქართველოში პენსიას დაახლოებით 770,3 ათასი ადამიანი იღებს.

პენსია 220 ლარს შეადგენს. თუმცა უკვე 1 ივლისიდან დაახლოებით 406,2 ათასი 70 წელს ზემოთ ასაკის პენსიონერი პენსიასთან ერთად 30-ლარიან დანამატს მიიღებს.

მთავრობის ინიციატივით, მსგავსი განაწილება - 70 წლამდე და 70 წელს ზემოთ - პენსიების ინდექსაციის დროსაც შენარჩუნდება.

„ეს წესი შემდეგია: 70 წლამდე პენსიონერებისთვის, სულ მცირე, უნდა მოხდეს პენსიის ზრდა ინფლაციის გათვალისწინებით, ხოლო 70 წლის ზემოთ ინფლაციისა და პლუს ეკონომიკური ზრდის 80 პროცენტის გათვალისწინებით, თუმცა ასევე გვაქვს მინიმუმი დაწესებული აბსოლუტურ გამოსახულებაში, ეს არის 70 წლამდე პენსიონერებისთვის, სულ მცირე, 20 ლარი, ხოლო 70 წელზე ზემოთ – სულ მცირე, 25 ლარი. თუ წინა კრიტერიუმები ამ მაჩვენებელს, 20-25 ლარს გადააჭარბებს, მაშინ ის არის ძალაში, თუ არა, გარანტირებულად 20-25 ლარით გაიზრდება პენსიები“, – განაცხადა მინისტრმა.

ამასთან მან აღნიშნა, რომ „საქართველოს ისტორიაში ერთ მოცემულ წელს პრაქტიკულად არასდროს ყოფილა, რომ 20 ლარზე მეტად გაზრდილიყოს პენსია“ და გაზრდილი პენსია პირველად უკვე 2021 წლის 1 იანვრიდან გაიცემა.

პენსიების ინდექსაცია საქართველოსთვის საერთაშორისო სავალუტო ფონდის ერთ-ერთ რეკომენდაციას წარმოადგენს. ფონდის ანალიტიკოსების აზრით, საბაზო სახელმწიფო პენსიის ინდექსაციის წესების შემოღება პენსიონერების რეალური შემოსავლის გაზრდას და სიბერით გამოწვეული სიღარიბის შემცირებას შეუწყობს ხელს.

როგორ მიიღებენ დახმარებას თვითდასაქმებულები: რა უნდა ვიცოდეთ >>

საქართველო გახდება ერთ-ერთი პირველი ქვეყანა, რომელიც კორონავირუსის გავრცელებით გამოწვეული კრიზისის პერიოდში საერთაშორისო სავალუტო ფონდის დახმარებას მიიღებს. ტრანში ხელმისაწვდომი გახდება აღმასრულებელი საბჭოს გადაწყვეტილებისთანავე და სახელმწიფო ბიუჯეტი დაახლოებით 200 მლნ დოლარით შეივსება, რათა საქართველოს ხელისუფლებამ დააკმაყოფილოს გადაუდებელი სამედიცინო და სოციალურ-ეკონომიკური მოთხოვნილებები.

971
თემები:
სოციალური სფერო საქართველოში (182)
ხატია წერეთელი

„მასტერშეფში“ ამდენი დებილი სად ნახეთ?...“- ხატია წერეთელი კონკურსანტებს აკრიტიკებს

49
(განახლებულია 12:21 07.07.2020)
მომღერალმა ხატია წერეთელმა სოციალურ ქსელში პოპულარული კულინარიული შოუს მონაწილეები გააკრიტიკა. ნახეთ რამ გამოიწვია მისი გაღიზიანება

თბილისი, 7 ივლისი — Sputnik. მომღერალი ხატია წერეთელი სოციალურ ქსელში კულინარიული შოუს „მასტერშეფის“ მონაწილეებს აკრიტიკებს.

როგორც ჩანს, მომღერლის აღშფოთება მესხურ სამზარეულოსთან დაკავშირებით კონკურსანტების განცხადებებმა გამოიწვია.

„მასტერშეფი ამდენი დებილი სად ნახეთ? მესხური სამზარეულო მარტო ცომი რომ ჰგონიათ, მზად ვარ მოვიდე და მასტერკლასი ჩავატარო, ამით აქვთ პრეტენზია მასტერშეფობაზე? ამით ნადუდღნით ნუ შეურაცხყოფით მესხურ სამხარეულოს“, - წერს ხატია წერეთელი.

საზოგადოებრივ მაუწყებელზე „მასტერშეფის“ მესამე სეზონი მიმდინარეობს. ამ დროისთვის შერჩეული 11-დან გამარჯვებისთვის 7 კონკურსანტი იბრძვის.

კონკურსის ჟიური პოპულარული შეფები - ლუკა ნაჭყებია, კონსტანტინე თედელური და ლევან კობიაშვილი არიან.

ლუკა სურსათის ტექნოლოგია. ის 2010 წლიდან სურსათის ინდუსტრიაშია, სარესტორნო სფეროში კი 2012 წლიდან ჩაება. მისი კონსულტაციით 25-ზე მეტი კვების ობიექტი ამუშავდა; 2014 წლიდან დღემდე ასწავლის აგრარულ უნივერსიტეტსა და კულინარიულ აკადემიაში, ასევე ატარებს ლექციებს საერთაშორისო მასშტაბით.
არის რამდენიმე წიგნის თანაავტორი: „მესხური ტაბლა“, „მეგრული ტაბლა“, „ქართული გემო“.

კონსტანტინე სარესტორნო სფეროში 2005 წლიდანაა. იგი ყველასგან გამოირჩევა თავისი ექსტრავაგანტული კონცეპტ-სივრცეებით. არის რამდენიმე კონცეპტუალური სივრცის, მათ შორის რესტორან „შეფის ბებიას“დამაარსებელი; 2014 წელს პრეზიდენტის ადმინისტრაციის მიწვეული შეფი იყო; 2018 წელს გაიმარჯვა Gault&Millau-ს ნომინაციაში „ახალგაზრდა ტალანტი“. კონსტანტინე დღემდე აგრძელებს კულინარიულ მოღვაწეობას და ახალი გემოების ძიებას, როგორც დამოუკიდებელი შეფი.

ლევანი საქართველოს კულინარიული ფედერაციის პრეზიდენტი და მოლეკულური გასტრონომიის სპეციალისტია; მან სკოლის დამთავრებისთანავე დაიწყო კულინარიული საქმიანობა და დღეისათვის სარესტორნო სფეროში 26-წლიანი გამოცდილება აქვს. 2009 წლიდან არის ლექტორი კულინარიულ კოლეჯში „იკარუსი“, 2013-2016 წლებში კი აგრარულ უნივერსიტეტსა და კულინარიულ აკადემიაში ასწავლიდა ქართულ და მსოფლიო სამზარეულოს.

ლევანი წლების მანძილზე იყო საქართველოს საუკეთესო რესტორნების ბრენდ-შეფი: „მეამა“, „ბარბარესთან“, „ამბასადორი“, „ვერე პალასი“, „ქარავანი“, „ტერასა“ და ა.შ.

49
თემები:
სელებრითების ცხოვრება
აუზი

ფიტნეს–ცენტრებისა და საცურაო აუზების მფლობელებს პირობები წაუყენეს

38
(განახლებულია 12:20 07.07.2020)
საქართველოში არსებული გამაჯანსაღებელი ცენტრები საქმიანობის განახლებას  შემოწმების წარმატებით გავლის შემთხვევაში შეძლებენ

 

თბილისი, 7 ივლისი — Sputnik.  საქართველოში კორონავირუსის პანდემიის გამო შემოღებული უსაფრთხოების ზომების დაცვასთან დაკავშირებით საცურაო აუზებისა და სპორტული დარბაზების ინსპექტირება იწყება, იუწყება საზოგადოებრივი მაუწყებლის პირველი არხი. 

გამაჯანსაღებელმა ცენტრებმა რეგისტრაცია ჯანდაცვის სამინისტროს ვებგვერდზე უნდა გაიარონ. შემოწმების წარმატებით გავლის შემთხვევაში, ობიექტები საქმიანობას განაახლებენ.

რეგულაციების თანახმად, ფიტნეს–ცენტრებში ყოველ ექვს კვადრატულ მეტრზე დაიშვება ერთი ადამიანი. ამასთან, საშხაპეები ტიხრებით უნდა იყოს გამოყოფილი, კარადების გამოყენება ჭადრაკის პრინციპით უნდა მოხდეს, ხოლო პირსახოცები  ერთჯერადი შეფუთვის უნდა იყოს.

რაც შეეხება ჯგუფურ ვარჯიშებს,  დარბაზში ნებადართულია ერთდროულად არაუმეტეს 10 ადამიანის ყოფნა.

საქართველოს ჯანდაცვის სამინისტროს შრომის პირობების ინსპექტირების დეპარტამენტის უფროსის ბექა ფერაძის განცხადებით, შემოღებული რეგულაციები ვირუსისგან თითოეულ მოქალაქეს დაიცავს.

რაც შეეხება აუზებს, მოცემულ შემთხვევაში წყლის ლაბორატორიული კვლევები ჩატარდება. შეზლონგებზე აკრძალულია შეწოვადი რბილი მასალების გამოყენება. ამასთან, ყოველი გამოყენების შემდეგ შეზლონგების დეზინფექცია უნდა ჩატარდეს. 

საცურაო აუზების მფლობელები უკმაყოფილებას გამოთქვამდნენ იმის გამო, რომ ახალი წესების თანახმად, მათ ყოველდღიურად მოუწევდათ აუზებში წყლის 10%–ის შეცვლა. კერძო სექტორის წარმომადგენლებს კომპრომისული ვარიანტი შესთავაზეს.

 „ეს იყო გამოწვევა, რაზეც აქცენტს აკეთებდნენ აუზების წარმომადგენლები. ჩვენ გავითვალისწინეთ და გადავწყვიტეთ, რომ 24 საათის განმავლობაში წყლის 5%–ის შეცვლა იქნება აუცილებელი.  ამ გზით მოხდა მათი მოთხოვნის გათვალისწინება და  კომპრომისული ვარიანტის შეთავაზება“, – განაცხადა ბექა ფერაძემ.

როგორც ადრე თბილისის ინფექციური საავადმყოფოს დირექტორმა თენგიზ ცერცვაძემ განაცხადა, კორონავირუსის გავრცელების კუთხით უფრო დიდი საფრთხის შემცველია მასობრივი თავშეყრის ადგილები, ვიდრე ფიტნეს–ცენტრები და საცურაო აუზები.

კორონავირუსის გავრცელების პრევენციის მიზნით მთავრობის მიერ დაწესებული შეზღუდვების გაუქმების ექვსეტაპიანი გეგმის თანახმად, ფიტნეს–დარბაზებისა და საცურაო აუზების გახსნა ბოლო ეტაპზე იყო დაგეგმილი.

38
თემები:
COVID-19 საქართველოში
მეხანძრეები

სვანეთში ხანძარს მესამე დღეა ებრძვიან - ვიდეო

0
(განახლებულია 12:58 07.07.2020)
საგანგებო სიტუაციების მართვის სამსახურის ცნობით, ხანძრის ქრობის სამუშაოებს რთული რელიეფი, სიცხე და ძლიერი ქარი ართულებს, თუმცა ვითარება კონტროლს ექვემდებარება.

თბილისი, 7 ივლისი — Sputnik. მესტიის მუნიციპალიტეტის სოფელ ხაიშთან ტყის მასივში გაჩენილი ხანძრის ქრობის სამუშაოები უწყვეტ რეჟიმში მიმდინარეობს, იუწყება შინაგან საქმეთა სამინსიტროს საგანგებო სიტუაციების მართვის სამსახური.

უწყების ინფორმაციით, ადგილზე დილიდანაა მობილიზებული დამატებითი ძალები - როგორც სპეციალური ტექნიკა, ისე ცოცხალი ძალა. სვანეთში ხანძარს ებრძვის 110 მეხანძრე-მაშველი და შვიდი ერთეული სახანძრო-სამაშველო ტექნიკა.

რისკის ზონაში 11 ოჯახი ცხოვრობს. ძლიერი დაკვამლიანების გამო ამ ზონიდან ბავშვები გამოიყვანეს.

„ხანძრის ქრობის სამუშაოებს ართულებს რთული რელიეფი, სიცხე და ძლიერი ქარი. ხანძრის ქრობის სამუშაოები ადგილზე მესამე დღეა მიმდინარეობს. ამ დროისთვის სიტუაცია კონტროლს ექვემდებარება", -აღნიშნავენ უწყებაში.

მეხანძრე-მაშველთა ჯგუფები ხანძრის კერებთან მთელი ღამის განმავლობაში მუშაობდნენ. მუშაობა განაახლეს შინაგან სამინისტროს სასაზღვრო პოლიციის ვერტმფრენებმა. პროცესში დღეს დილიდან ჩაერთო მე-3 ვერტმფრენი.

სვანეთში შექმნილია სამუშაო შტაბი, რომელსაც საგანგებო სიტუაციების მართვის სამსახურის უფროსი თემურ მღებრიშვილი და უფროსის მოადგილე ლევან ღირსიაშვილი პირადად ხელმძღვანელობენ. ადგილზე ასევე იმყოფება სახანძრო-სამაშველო ძალების დეპარტამენტის უფროსი დავით სუხიშვილი.

საზოგადოებრივი უსაფრთხოების მართვის ცენტრ „112"-ში ხანძრის შესახებ ინფორმაცია 5 ივლისს დღის მეორე ნახევარში შევიდა. თვითმხილველის განცხადებით, ტყის მასივში შეინიშნებოდა ძლიერი დაკვამლიანება. ხანძარი სავარაუდოდ მეხის ჩამოვარდნის შედეგად გაჩნდა.

0
თემები:
დიდი ხანძრები საქართველოში