თბილისი, 21 აპრილი — Sputnik. თბილისის ინფექციური საავადმყოფოს დირექტორმა თენგიზ ცერცვაძემ საქართველოში კორონავირუსით ინფიცირებულთა მკურნალობის შესახებ ისაუბრა.
ცერცვაძემ ვირუსის მკურნალობის ქართული პროტოკოლის შესახებ ოფიციალური განცხადების გაკეთება გადაწყვიტა მას შემდეგ, რაც აშშ-ში მოღვაწე ქართველმა ექიმმა ზურაბ გურულმა 17 აპრილს Facebook-გვერდზე გააკრიტიკა კორონავირუსთან ბრძოლის ქართული პროტოკოლი, განსაკუთრებით, პრეპარატ „პლაქვენილის“ გამოყენება.
ცერცვაძის თქმით, გურული საკუთარ პუბლიკაციაში ამბობს, თითქოს ქართული პროტოკოლი გულისხმობს „პლაქვენილის“ უსიმპტომო პაციენტებისთვის დანიშვნას, რომელთა კომპიუტერული ტომოგრაფია ნორმალურია და რომ ეს „აბსოლუტურად მიუღებელია“. ის ასევე ამბობს, რომ „პლაქვენილის“ პროფილაქტიკური მიზნებისთვის გამოყენება ყოვლად დაუშვებელია.
„ჩვენ ერთმნიშვნელოვნად ვაცხადებთ, რომ ყოველივე ეს 100%-იანი ტყუილი და მიზანმიმართული დეზინფორმაციაა. ბატონი გურული ტყუის და თან უსინდისოდ“, – განაცხადა ცერცვაძემ.
ცერცვაძის თქმით, ქართულ პროტოკოლში ნათლად წერია, რომ უსიმპტომო პაციენტები აღნიშნული პრეპარატით მკურნალობას არ საჭიროებენ, მას უნიშნავენ საშუალო, მძიმე ან ძალიან მძიმე პაციენტებს. პროტოკოლში ასევე წერია, რომ მოცემული პრეპარატის პროფილაქტიკური მიზნებისთვის გამოყენება კატეგორიულად აკრძალულია. მოცემული პროტოკოლი ყველასთვის ხელმისაწვდომია და ნებისმიერ მსურველს ჯანდაცვის სამინისტროს ვებ-გვერდზე შეუძლია გაეცნოს მას, აღნიშნა ცერცვაძემ.
ცერცვაძეს ასევე მოჰყავს რიგი უცხოური გამოცემების პუბლიკაციები, სადაც საქართველოს კორონავირუსთან ბრძოლას წარმატებულს უწოდებენ. ასევე მოჰყავს აშშ-ის ალერგიისა და ინფექციური დაავადებების ეროვნული ინსტიტუტის დირექტორის ენტონი ფაუჩის სიტყვები, რომელმაც 15 აპრილს ქართველ კოლეგებს შეტყობინება გამოუგზავნა: „ძალზე მიხარია ის, რომ საქართველო ძალიან კარგად აკონტროლებს აფეთქებას“.
„საქართველოში ყველა ავადმყოფის მკურნალობა ხდება ინდივიდუალური მიდგომით და ჩვენ არასდროს ვყოფილვართ მხოლოდ პლაქვენილის იმედად“, – აღნიშნა ცერცვაძემ და დასძინა, რომ ქართველი სპეციალისტები მუდმივად ეცნობიან ამ მიმართულებით კვლევებს და ბოლო სიახლეების საქმის კურსში არიან.
მისი განცხადებით, საქართველოში ასევე წარმატებით გამოიყენება პრეპარატი „ტოცილიზუმაბი“, გამოიყენება პროტეაზას ინჰიბიტორები (პრეპარატები „ლოპინავირი“, „რიტონავირი“, „დარუნავირი“ და „კობიცისტატი“).
გარდა ამისა, ცენტრი მზადაა გამოიყენოს ასევე პლაზმაფერეზი (COVID-19-სგან გამოჯანმრთელებულთა პლაზმა), ოზონოთერაპია და სხვა მეთოდები.
ქართველი სპეციალისტები დიდ ყურადღებას უთმობენ ასევე დაავადების სიმპტომური და დამხმარე თერაპიის მეთოდებს.
ბოლო მონაცემებით, საქართველოში კორონავირუსით ინფიცირებულთა რაოდენობამ 408-ს მიაღწია, საქართველოს სამი მოქალაქე კორონავირუსის დიაგნოზით უცხოეთიდან გადმოიყვანეს. გამოჯანმრთელდა 95 ადამიანი, გარდაიცვალა 4. კარანტინში იმყოფება 4 779, სტაციონარებში მეთვალყურეობის ქვეშ 561 პაციენტია.
