დეზინფექცია

ბათუმის მუნიციპალურ ავტობუსებში სადეზინფექციო სითხის დისპენსერები დამონტაჟდა

53
(განახლებულია 18:32 26.03.2020)
ავტობუსში ასვლა-ჩამოსვლისას მგზავრებს ხელების სადეზინფექციო საშუალებით დამუშავების საშუალება მიეცათ. ამას გარდა, მუნიციპალურ ტრანსპორტს ყოველდღიურად უტარდება დეზინფექცია.

თბილისი, 26 მარტი – Sputnik. კორონავირუსის გავრცელების პრევენციული ღონისძიებების ფარგლებში ბათუმის მუნიციპალურ ავტობუსებში სადეზინფექციო სითხის დისპენსერები დამონტაჟდა, იუწყება „აჭარის ტელევიზია“.

26 მარტის ოფიციალური მონაცემებით, საქართველოში კორონავირუსით ინფიცირებულთა რაოდენობამ 77 ადამიანს მიაღწია, აქედან 7 პაციენტი ბათუმის ინფექციურ საავადმყოფოშია მოთავსებული. სულ გამოჯანმრთელდა 10. საკარანტინო სივრცეში იმყოფება 4346, სტაციონარებში მეთვალყურეობის ქვეშ კი 247 პაციენტია.

სადეზინფექციო სითხის დისპენსერები ბათუმში მოქმედ 120-ვე ავტობუსში დამონტაჟდა და ავტობუსში ასვლა-ჩამოსვლისას მგზავრებს ხელების სადეზინფექციო საშუალებით დამუშავების საშუალება მიეცათ. ამასთან, მუნიციპალურ ტრანსპორტს ყოველდღიურად უტარდება დეზინფექცია.

ბათუმის მერიამ, Covid-19-ის გავრცელების პრევენციის მიზნით, ტაქსებით გადაადგილების წესებიც შემოიღო, ხოლო ავტობუსების წინა ნაწილი, სადაც მძღოლები იმყოფებიან, გადაკეტა. 

გარდა ამისა, დღეს, 23:00 საათიდან ბათუმის ქუჩების დეზინფექცია დაიწყება. პირველ ეტაპზე ბათუმის ცენტრალური ნაწილის – რუსთაველის, პუშკინის, გოგებაშვილისა და გრიბოედოვის ქუჩებს შორის არსებული ყველა ქუჩის დეზინფექცია ჩატარდება. სპეციალური ხსნარით დამუშავდება ასევე აგრარული ბაზრის მიმდებარე ტერიტორია.

კორონავირუსის შესაძლო გავრცელების გამო აჭარა განსაკუთრებული მზადყოფნის რეჟიმზე გადავიდა. ბათუმის ინფექციური საავადმყოფოს პარალელურად საეჭვო სიმპტომების მქონე პირების მისაღებად მზადდება „მედალფას" კლინიკა და ქობულეთში „ევექსის" რეგიონული ჰოსპიტალი.

ბოლო მონაცემებით, აჭარაში კარანტინში 2000-მდე პირია მოთავსებული, თვითიზოლაციაში კი 100-ზე მეტი ადამიანი იმყოფება.

53
თემები:
კორონავირუსმა საქართველომდეც მოაღწია: ბოლო ცნობები (852)
ახალგაზრდა მეცნიერ-მკვლევარი ლაბორატორიაში

დღის სტატისტიკა: სად დაფიქსირდა კორონავირუსის ყველაზე მეტი შემთხვევა

0
საქართველოში ახალი კორონავირუსით დაავადებულთა რაოდენობა ბოლო დღე-ღამეში 1673-ით გაიზარდა და ინფიცირებულთა რაოდენობამ 38936-ს მიაღწია

თბილისი, 31 ოქტომბერი – Sputnik. საქართველოში ბოლო 24 საათში გამოვლენილი კორონავირუსის 1 673 შემთხვევიდან ყველაზე მეტი – 684 შემთხვევა თბილისში დაფიქსირდა, განაცხადა საქართველოს მთავრობის ადმინისტრაციის უფროსმა ნათია მეზვრიშვილმა.

ინფიცირებულთა შემთხვევების რაოდენობით მეორე ადგილზე კვლავ აჭარაა, შემდეგ კი – იმერეთის რეგიონი.

რეგიონების მიხედვით კორონავირუსით ინფიცირების სტატისტიკა ასეთია: აჭარაში - 351, იმერეთში - 214, ქვემო ქართლში - 75 შიდა ქართლში - 98, გურიაში - 41, სამეგრელოსა და ზემო სვანეთში - 86, კახეთში - 52, მცხეთა-მთიანეთში - 23, სამცხე-ჯავახეთში - 33, რაჭა-ლეჩხუმსა და ქვემო სვანეთში - 16.

„სამწუხაროდ, ბოლო 24 საათში გვაქვს გარდაცვალების შემთხვევებიც. 22 ადამიანი გარდაიცვალა, თბილისში - 10 ადამიანი, აჭარაში - 7, იმერეთში - 4, ხოლო სამცხე-ჯავახეთში - 1 ადამიანი. 2020 წლის 26 თებერვლიდან დღემდე სულ გვაქვს 307 გარდაცვალების შემთხვევა“, – განაცხადა მეზვრიშვილმა.

ამ დროისთვის საავადმყოფოებში 4 136 ადამიანი მკურნალობს, მათ შორის, თბილისის საავადმყოფოებში - 2 037, აჭარაში - 699. მძიმე პაციენტია 511, მათ შორის, თბილისში - 256, აჭარაში - 77. აქედან, ხელოვნური სუნთქვის აპარატზე არის 208 პირი - მათ შორის, თბილისში - 91, აჭარაში - 76.

კოვიდასტუმროში 2 245 ადამიანი გადის მკურნალობის კურსს, მათ შორის 1 145 - აჭარაში, ხოლო 822 - თბილისში. 9 531 მკურნალობს ბინაზე. საკარანტინე სივრცეში იმყოფება 3 001 ადამიანი, მათ შორის, თბილისში - 596, აჭარაში-1 435.

COVID-19 საქართველოში: რამდენი შემთხვევა გამოვლინდა ბოლო დღე-ღამეში>>

დღეის მდგომარეობით, თვითიზოლაციაში იმყოფება 30 467 პირი, საიდანაც თბილისში - 3 515 პირი, აჭარაში - 12 996, იმერეთში - 3 997.

საქართველოში კორონავირუსის პირველი შემთხვევა 26 თებერვალს დაფიქსირდა.

0
თემები:
COVID-19 საქართველოში
ციფრული ტექნოლოგიები

საგანმანათლებლო თამაშების საერთაშორისო ჰაკათონში საქართველოც მონაწილოებს

17
(განახლებულია 11:20 31.10.2020)
ჰაკათონში მონაწილეობის მიღება შეუძლიათ სხვადასხვა სფეროს წარმომადგენლებს — სტუდენტებს, მასწავლებლებს, მეწარმეებსა და ყველა სხვას, ვინც ციფრული განათლებით არის დაინტერესებული

თბილისი, 31 ოქტომბერი — Sputnik. საქართველო შეუერთდება საერთაშორისო პროექტ DigiEduHack–ის საგანმანათლებლო თამაშების ჰაკათონს, რომელიც მსოფლიოს მასშტაბით მიმდინარე წლის 12–13 ნოემბერს გაიმართება, იუწყებიან ორგანიზატორები.

DigiEduHack – ეს ინოვაციებისა და ტექნოლოგიების ევროპული ინსტიტუტის (EIT) ინიციატივაა ციფრული განათლების სფეროში ევროკომისიის სამოქმედო გეგმის ფარგლებში. ღონისძიების მიზანი რომელიც 2019 წლიდან იმართება, განათლებისთვის უკეთესი მომავლის შექმნაა.

ჰაკათონის მიმდინარეობისას მისი მონაწილეები ქმნიან საგანმანათლებლო თამაშებს და იგონებენ ამოცანების გადაჭრის ორიგინალურ გზებს. ადგილობრივი ჰაკათონის გამარჯვებულ გუნდს მიეცემა შესაძლებლობა, წარადგინოს თავისი იდეა DigiEduHack–ის ოფიციალურ საიტზე, სადაც მას საერთაშორისო ექსპერტები შეაფასებენ. საბოლოო გლობალური გამარჯვებული ხმის მიცემით გამოვლინდება.

კორონავირუსის პანდემიის გამო ჰაკათონი ონლაინ რეჟიმში გაიმართება. მასში მონაწილეობის მიღება შეუძლიათ სხვადასხვა სფეროს წარმომადგენლებს — სტუდენტებს, მასწავლებლებს, მეწარმეებსა და ყველა სხვას, ვინც ციფრული განათლებით არის დაინტერესებული.

რაც შეეხება ჰაკათონის თემას, მონაწილეებმა უნდა მოიფიქრონ, როგორ უნდა მოხდეს თამაშების ინტეგრირება სასწავლო პროცესში, ვინაიდან აღნიშნული მიმართულება ამარტივებს დისტანციური სწავლების მეთოდს და ხელს უწყობს უკეთესი შედეგების მიღწევას.

ჰაკათონის პროცესში მონაწილეებმა უნდა შექმნან საგანმანათლებლო თამაშების პროტოტიპები და წარმოადგინონ, როგორ სეიძლება ციფრულმა თამაშებმა და ინსტრუმენტებმა გაზარდოს საზოგადოების ჩართულობა ამ დარგში.

ღონისძიებაში მონაწილეობის მისაღებად აუცილებელია ინგლისური ენის ცოდნა, ვინაიდან გუნდებმა იდეა DigiEduHack–ის ოფიციალურ საიტზე უნდა წარადგინოს. რეგისტრაციის გავლა შესაძლებელია ამ ბმულზე 8 ნოემბრამდე.

17
თემები:
განათლება საქართველოში