გიორგი გახარია

გახარია: მარნეულის და ბოლნისის მუნიციპალიტეტები მკაცრი კარანტინის რეჟიმზე გადადიან

273
(განახლებულია 08:56 23.03.2020)
პრემიერის თქმით, ექიმები ხვალიდან მარნეულსა და ბოლნისში კარდაკარ ივლიან და შეამოწმებენ მოსახლეობას, რათა შესაძლო შემთხვევები გამოავლინონ.

თბილისი, 22 მარტი - Sputnik. მარნეულის და ბოლნისის მუნიციპალიტეტები დღეიდან მკაცრ საკარანტინე რეჟიმზე  გადადიან, განაცხადა საქართველოს პრემიერ-მინისტრმა გიორგი გახარიამ მთავრობის ადმინისტრაციაში გამართულ  საგანგებო ბრიფინგზე.

ორი მუნიციპალიტეტის ტერიტორიაზე მკაცრი კარანტინის შემოღება კორონავირუსის გამო შექმნილმა ვითარებამ გამოიწვია. პრემიერის განმარტებით,  მარნეულში დადასტურებული ინფიცირების შიდა გადაცემის შემთხვევა სარიტუალო ღონისძიების დროს მოხდა, რომელსაც რამდენიმე ათეული ადამიანი ესწრებოდა. 

„ჩვენი ეპიდემიოლოგების პროგნოზით შიდა გადაცემა მოხდა სარიტუალო ღონისძიების დროს, რომელსაც ესწრებოდა რამდენიმე ათეული ადამიანი, შესაბამისად, უნდა გვესმოდეს ის, რომ ჩვენმა ეპიდემიოლოგება დაადგინეს 490 საკონტაქტო პირი, ჯერ ეს არაფერს არ ნიშნავს და სიტუაცია არის რთული", – აღნიშნა გახარიამ.

საქართველოს პრემიერ–მინისტრის განცხადებით, მარნეულისა და ბოლნისის მუნიციპალიტეტებში დღეიდან იხურება ყველა ობიექტი, იკრძალება მოქალაქეების მიერ რაიონების დატოვება, ხელმისაწვდომი იქნება მხოლოდ მედიკამენტების, სურსათის და კრიტიკული ინფრასტრუქტურის სხვა ობიექტები.

გარდა ამისა, მარნეულის კლინიკა „ჯეოჰოსპიტალი" საკარანტინო რეჟიმზე სრულად არის გადასული, რომლის ტერიტორიაზეც უახლოეს პერიოდში განთავსდება საველე ჰოსპიტალი. „ავერსის" კლინიკა გააგრძელებს ფუნქციონირებას როგორც მულტიფუნქციური კლინიკა.

პრემიერის თქმით,  შესაძლო შემთხვევების გამოვლენის მიზნით, ხვალიდან ექიმები მოსახლეობას კარდაკარ დაივლიან და შეამოწმებენ.

გუშინ, მარნეულის მკვიდრი 62 წლის ქალი კორონავირუსის სიმპტომებით  მარნეულიდან თბილისის ინფექციურ კლინიკაში   გადმოიყვანეს. გავრცელებული ინფორმაციით, ინფიცირებულ პირს 90-ზე მეტ ადამიანთან ჰქონდა კონტაქტი. ვრცელდება ინფორმაცია, რომ ის მაღაზიაში მუშაობდა.

22 მარტის მონაცემებით, საქართველოში კორონავირუსით ინფიცირებულთა რიცხვმა 54-ს მიაღწია, კარანტინში 3 254 ადამიანია, კიდევ 233 ექიმების მეთვალყურეობის ქვეშ იმყოფება. ერთი პაციენტის მდგომარეობა უკიდურესად მძიმეა. რვა პაციენტი გამოჯანმრთელდა.

 

 

273
თემები:
კორონავირუსმა საქართველომდეც მოაღწია: ბოლო ცნობები (849)
ჯარიმა პარკირების წესების დარღვევისთვის

საჯარიმო ქვითრის ჩაბარების პროცედურა იცვლება

83
მოქმედი კანონმდებლობით, გზავნილის განმახორციელებელი ვალდებულია, პირის რეგისტრაციის მისამართზე მიიტანოს გზავნილი და ჩაუბარებლობის შემთხვევაში, შესაბამისი წერილობითი უკუგზავნილი შეადგინოს.

თბილისი, 28 მაისი – Sputnik. პირებს, რომლებიც საჯარიმო ქვითრის ჩაბარებისას მის მიღებაზე უარს ორჯერ განაცხადებენ, ქვითრის ჩაბარება მაინც ჩაეთვლებათ, იუწყება საზოგადოებრივი მაუწყებლის პირველი არხი.

შესაბამისი ცვლილებები „ადმინისტრაციულ სამართალდარღვევათა კოდექსში“ შედის, მათი ინიციატორები ზაზა გაბუნია, მერაბ ქვარაია, კობა ლურსმანაშვილი და გოგა გულორდავა არიან.

ინიციატორების განმარტებით, ცვლილებების მომზადების მიზეზი არსებული პრაქტიკაა, რომელიც ცხადყოფს, რომ ჯარიმების აღსრულების მოქმედი მექანიზმი ეფექტური არ არის. კერძოდ, პრობლემურია პირისთვის საჯარიმო ქვითრის ჩაბარების პროცედურა.

„სამართალდამრღვევი მიმართავს სხვადასხვა ხერხს, რათა ხანდაზმულობის ვადის გასვლამდე, რომელიც მოქმედი კანონმდებლობით ექვს თვეს შეადგენს, თავი აარიდოს საჯარიმო ქვითრის ჩაბარებას. არსებული მონაცემებით, კალენდარული წლის განმავლობაში დაფიქსირებულ სამართალდარღვევებთან დაკავშირებით გაცემული ჯარიმების რაოდენობის მხოლოდ დაახლოებით 50 პროცენტის აღსრულება ხდება. შესაბამისად, აღნიშნული ნათლად წარმოაჩენს აღწერილი აღსრულების მექანიზმის არაეფექტურობას“, – აღნიშნულია კანონპროექტის განმარტებით ბარათში.

კანონპროექტის თანახმად, საჯარიმო ქვითარი ჩაბარებულად ჩაითვლება იმ შემთხვევაშიც, თუ მის მიღებაზე უარს იტყვიან სამართალდამრღვევი პირის ოჯახის წევრები. ესენი კი არიან – მეუღლე, შვილი, ნაშვილები, შვილიშვილი, შვილიშვილის შვილი და მისი შვილი, მშობელი და მშვილებელი, და, ძმა, დისწული, ძმისწული და მათი შვილები, ბებია და პაპა, ბებიის დედ-მამა და პაპის დედ-მამა, ბიძა, დეიდა, ბიცოლა, მამიდა და მასთან მუდმივად მცხოვრები სხვა სრულწლოვანი პირი.

მოქმედი კანონმდებლობით, გზავნილის განმახორციელებელი ვალდებულია, პირის რეგისტრაციის მისამართზე მიიტანოს გზავნილი და ჩაუბარებლობის შემთხვევაში, შესაბამისი წერილობითი უკუგზავნილი შეადგინოს.

83
თემები:
ტრანსპორტი საქართველოში
ამირან გამყრელიძე

რომელი ქვეყნებიდან ვერ მიიღებს საქართველო ტურისტებს - ამირან გამყრელიძე

110
(განახლებულია 21:01 28.05.2020)
საქართველო 1 ივლისიდან საერთაშორისო ტურისტების მიღებას გეგმავს, ხოლო 15 ივნისიდან კი შიდა ტურიზმის გახსნაა დაანონსებული.

თბილისი, 28 მაისი — Sputnik. კორონავირუსით მაღალდაზიანებული ქვეყნებიდან საქართველო ტურისტებს ჯერჯერობით ვერ მიიღებს, განუცხადა საზოგადოებრივი მაუწყებლის პირველ არხს დაავადებათა კონტროლის ეროვნული ცენტრის ხელმძღვანელმა, ამირან გამყრელიძემ.

საქართველო 1 ივლისიდან საერთაშორისო ტურისტების მიღებას გეგმავს, ხოლო 15 ივნისიდან კი შიდა ტურიზმის გახსნაა დაანონსებული.

„რა თქმა უნდა, ჯერ ვერ მივიღებთ ტურისტებს მაღალდაზიანებული ქვეყნებიდან. მიმდინარეობს მუშაობა იმ პროტოკოლზეც, როგორი უნდა იყოს ტურისტების მიღებისა და მათზე ეპიდზედამხედველობის დაკვირვების სისტემა, რათა მინიმუმამდე დავიყვანოთ ქვეყანაში ინფექციის შემოტანის რისკი. მოდით, ამ კითხვაზე პასუხს დავუბრუნდეთ ერთი კვირის, 10 დღის შემდეგ, როცა ამ საკითხზე უფრო მეტად ვიქნებით ჩამოყალიბებული“, - განაცხადა ამირან გამყრელიძემ.

მისივე თქმით, დაავადებათა კონტროლის ცენტრს აქვს თავისი რეკომენდაციები, მაგრამ საბოლოო გადაწყვეტილებას იღებს საკოორდინაციო საბჭო. 

„ჩამოვყალიბდებით წესებზე, რომელიც დამტკიცდება შესაბამისი მარეგულირებელი აქტით“, – აღნიშნა გამყრელიძემ.

პანდემიის გამო ახალი გამოწვევების ფონზე ხელისუფლების მიერ შემუშავებული კონცეფციის თანახმად, საქართველო იმიჯს შეიცვლის და პოზიციონირდება როგორც უსაფრთხო ქვეყანა.

ტურისტების მიღებამდე საქართველოს ხელისუფლება ტურიზმის მსოფლიო ორგანიზაციისა და ჯანმოს მიერ რეკომენდებული უსაფრთხოების სტანდარტების დანერგვას უზრუნველყოფს. ეს შეეხება როგორც აეროპორტებსა და საკონტროლო-გამშვებ პუნქტებს, ისე სასტუმროებს, გიდების მომსახურებას, კვების ობიექტების, ასევე ნებისმიერი სახეობის ტრანსპორტის მუშაობას.

კორონავირუსი საქართველოში: საგანგებო მდგომარეობის შემდეგ შეზღუდვების სრული სია/28 მაისი >>

საქართველოში ჩამოსული ტურისტები ე.წ. „მწვანე ზონებში“ დაისვენებენ. ტურისტული სექტორი და სასტუმროები უსაფრთხოების წესების დაცვის მიზნით ტურიზმის მსოფლიო ორგანიზაციისა და ჯანდაცვის მსოფლიო ორგანიზაციის მიერ შემუშავებულ სპეციალურ რეკომენდაციებს მიიღებენ.

მთავრობის გეგმის მიხედვით, საქართველოში ჩამოსული ტურისტები დაისვენებენ ისეთ კურორტებზე, როგორიცაა წყალტუბო, ბორჯომი, აბასთუმანი, ბაკურიანი, გუდაური, ბათუმი და ა.შ.

110
თემები:
COVID-19 საქართველოში
სომხეთში კარანტინი გახანგრძლივდა

საქართველოს მზად არის დაეხმაროს სომხეთს კორონავირუსთან ბრძოლაში

0
საქართველოს და სომხეთს ჯანდაცვის სფეროში თანამშრომლობის კარგი გამოცდილება გააჩნიათ, განაცხადა საქართველოს მთავარმა ეპიდემიოლოგმა

თბილისი, 28 მაისი — Sputnik. თუ სომხეთის დაავადებათა კონტროლის ცენტრის წარმომადგენლები ქართველ კოლეგებს დახმარებისთვის მიმართავენ, ისინი მას მიიღებენ, განაცხადა საქართველოს დაავადებათა კონტროლის ეროვნული ცენტრის ხელმძღვანელმა, ამირან გამყრელიძემ ონლაინ ბრიფინგზე.

სომხეთის ჯანდაცვის მინისტრმა არსენ ტოროსიანმა ადრე განაცხადა, რომ ეპიდსაწინააღმდეგო სისტემა და ჯანდაცვა საქართველოში განსხვავდება სომხურისგან, თუმცა არა საუკეთესო მხრიდან. მან ასევე აღნიშნა, რომ სომხეთი საკუთარ სტატისტიკას გამჭვირვალედ ავრცელებს, ხოლო საქართველოში ინფიცირებულთა დათვლის მეთოდოლოგიაში ეჭვი შეიტანა.

„იცით, რომ ამ ერთი კვირის წინ იყო პატარა გაუგებრობა. ჩვენ მოძმე ერები ვართ, ერთმანეთს ყოველთვის მხარში ვუდგევართ და კარგი ურთიერთობა გვაქვს სომხეთის დაავადებათა კონტროლის ეროვნულ ცენტრთან... თუ სომხეთის დაავადებათა კონტროლის ცენტრი, როგორც დაავადებათა კონტროლის ცენტრს ჩვენ დაგვიყენებს საკითხს, რომ მათ სჭირდებათ რაიმე დახმარება, ის, რაც ჩვენი კომპეტენციის ფარგლებშია, იგივე ტესტირებასთან ან კიდევ სხვა საკითხებთან დაკავშირებით, ჩვენ მზად ვართ“, - განაცხადა გამყრელიძემ.

გამყრელიძემ უპასუხა ჟურნალისტის შეკითხვას, არის თუ არა მზად საქართველო კორონავირუსით დაავადებული პაციენტების მისაღებად.

„რაც შეეხება სამკურნალო პროცესს, მე დარწმუნებული ვარ, რომ საქართველოს მთავრობა და ჯანდაცვის სამინისტრო უარს კი არა პირიქით, ყველა ღონეს იხმარს თუ სომხეთს ეს დახმარება სჭირდება. პირველ რიგში, სომხეთის ჯანდაცვის სამინისტრომ უნდა დააყენოს ეს საკითხი და მაშინ დარწმუნებული ვარ, საქართველო სიამოვნებით მიიღებს. მოგეხსენებათ, ქართველები იყვნენ პირველები, რომლებიც სპიტაკის მიწისძვრის დროს ჩავიდნენ სპიტაკში სხვა ერებს შორის. ჩვენ მზად ვართ ყოველთვის“, – განაცხადა გამყრელიძემ.

ასევე, გამყრელიძის თქმით, საქართველოს და სომხეთს ჯანდაცვის სფეროში თანამშრომლობის კარგი გამოცდილება გააჩნიათ.

ბოლო დღე-ღამეში სომხეთში კორონავირუსით ინფიცირების 442 ახალი შემთხვევა გამოვლინდა. 28 მაისის მონაცემებით, ქვეყანაში იყო 8 216 დადასტურებული შემთხვევა, კორონავირუსით გამოწვეული გართულებების გამო გარდაიცვალა 113 ადამიანი, კორონავირუსის ინფექციის მქონე პაციენტების რაოდენობა, რომლებიც სხვა მიზეზებით დაიღუპნენ - 44.

ახალი მონაცემებით, გამოჯანმრთელდა 3 287 ადამიანი. მკურნალობას 4 772 პაციენტი გადის. ქვეყანაში სულ 54 931 ტესტი ჩატარდა.

რაც შეეხება საქართველოს, ამჟამად კორონავირუსი დადასტურებული აქვს 738 ადამიანს. გამოჯანმრთელებულთა რაოდენობამ 573-ს (77,95%) მიაღწია. კარანტინის რეჟიმში იმყოფება 3076, ხოლო სტაციონარებში დაკვირვების ქვეშ 250 პაციენტია. გარდაიცვალა 12 ადამიანი. მაისის ბოლოსთვის ჩატარდა 46 ათასი ტესტი, ყოველდღიურად ტესტი 1600 ადამიანს უტარდება.

დღეისათვის საქართველოში საგანგებო მდგომარეობის რეჟიმი მოხსნილია, თუმცა შეზღუდვების ნაწილი მაინც ძალაში რჩება.

0
თემები:
საქართველოს საგარეო პოლიტიკა