თბილისი, 23 მარტი — Sputnik. თანაინვესტირების ფონდის ერთ-ერთი დირექტორი თეა ჯოხაძე, რომელიც კორონავირუსით არის ინფიცირებული, სოციალურ ქსელში პოსტს აქვეყნებს. მისი ინფორმაციით, ის და მისი მეუღლე, ბიზნესმენი ბენო ქაშაკაშვილი თავს კარგად გრძნობენ და საზოგადოებას თანადგომისთვის მადლობას უხდიან.
მისი თქმით, კორონავირუსით 11 მარტს, მეგობრის გარდაცვალებიდან 40 დღის გასვლის თარიღთან დაკავშირებულ სადილზე დაინფიცირდა, სადაც მის გარდა 20 ადამიანი იმყოფებოდა. 15 მარტს კი დაავადებათა კონტროლის ცენტრიდან დაურეკეს და აცნობეს, რომ მის მეგობარს კორონავირუსი დაუდგინდა.
„კორონავირუსი ჩვენ გადაგვედო ქართველი მეგობრისგან, რომელიც ასევე არ ყოფილა უცხოეთში. ბენოს, ჩემს მეუღლეს კი მე გადავდე. ჩემი და ბენოს შემდგომ კონტაქტებს შორის, მადლობა ღმერთს, ჯერ არავის დაუდგინდა აღნიშნული ვირუსი. მე და ბენო თავს კარგად ვგრძნობთ და ძალიან მადლობელი ვართ იმ თანადგომისთვის, რომელსაც ბევრი თქვენგანისგან ვგრძნობთ", – წერს ჯოხაძე.
რამდენიმე დღის წინ მსახიობმა ია ფარულავამ სოციალურ ქსელში დაწერა, რომ ბიზმესმენი, რომელსაც კორონავირუსი დაუდასტურდა, ბენო ქაშაკაშვილია. მსახიობის თქმით, ბიზნესმენმა ვინაობის გამხელა თავად ისურვა. მისი თქმით, პაციენტი თავს კარგად გრძნობს.