მომღერალმა ქეთა თოფურიამ, მას შემდეგ, რაც საკუთარი ბრენდის სახელით პირბადეების წარმოება დაიწყო, „ინსტაგრამზე“ ვიდეომიმართვა გაავრცელა. მისი თქმით, ყველაფერი ისე ხდება, როგორც ბიბლიაშია აღწერილი. „ვიღაცისთვის ეს სასაცილოა, ვიღაც ამას სერიოზულად აღიქვამს, სადაც წერია რომ იქნება მეორედ მოსვლა, აგრესია, სხვადასხვა პანდემიები, რომ ადამიანები იქნებიან იმდენად ბოროტად განწყობილნი ერთმანეთის მიმართ, რომ დაიწყება მესამე მსოფლიო ომი. ამიტომ მეგობრებო, გთხოვთ ძალიან, გთხოვთ ნუ გაბოროტდებით, ახლა არის ძალიან კარგი დრო, რომ გადავაფასოდ ღირებულებები, ტყუილად არაფერი ხდება, იყავით კეთილები“, – აცხადებს მომღერალი.
ქეთას ექსპერიმენტები ძალიან უყვარს. როგორც პირად ცხოვრებაში, ასევე გარეგნულ ცვლილებებში სელებრითებს შორის იგი უკონკურენტოა. მისი ცხოვრება ბევრ ადამიანს ხიბლავს, სტილს კი ბევრი მიმდევარი ჰყავს. ამიტომ მომღერალმა ახალი გამოწვევები მიიღო და დიზაინერობას შეუდგა. მის ტანსაცმლის ხაზს ketione ჰქვია და საკმაოდ პოპულარულია. მართალია, მომღერალმა რამდენიმე წელიწადში სამ პარტნიორთან ურთიერთობა ვერ დაალაგა, დიდ სკანდალებში გაეხვა, სამაგიეროდ მისმა კარიერულმა მიღწევებმა მაქსიმუმს მიაღწია.
ახლა, როცა მთელი მსოფლიო გაერთიანდა კორონავირუსთან საბრძოლველად, ქეთამ მოულოდნელი გადაწყვეტილება მიიღო – გადაწყვიტა საკუთარი ბრენდის ხაზით პირბადეები გამოუშვას. როგორც ვიდეოში აღნიშნავს, ნიღბებს სამედიცინო დანიშნულება არ აქვს. „ინსტაგრამის“ ამ ვიდეოზე უამრავი ნეგატიური კომენტარი დაიწერა. მომღერალს ურჩევენ, ან უფასოდ დაარიგოს ეს ნიღბები, ან ვირუსის ფონზე „ფულის გაკეთება“ შეწყვიტოს, რადგან სამედიცინო დანიშნულების გარეშე ნიღბების ტარებას აზრი არ აქვს.
ქეთა თოფურიას პირადი ცხოვრება ქართული და რუსული პრესის ყურადღების ცენტრში ხშირად ხვდება. რეპერ გუფთან დაშორების შემდეგ A'Studio-ს ქართველმა სოლისტმა პირობა დადო, რომ პირად ცხოვრებაზე არასდროს ილაპარაკებდა, თუმცა იტალიაში წასვლის წინ ერთ-ერთ ინტერვიუში ამომწურავი პასუხი გასცა გუფთან რომანისა და ქმართან დაშორების შესახებ გავრცელებულ ჭორებს. მოგვიანებით კი ახალ პარტნიორზე ალაპარაკდა. ქეთა თოფურიას ახალი რჩეული დიპლომატი ლევ დენგოვია. ქეთამ რუსულ გადაცემაში თქვა, რომ ახლანდელი რჩეული მინსკში გაიცნო.
ქეთა თოფურია რუსი და ქართველი ჟურნალისტების ერთ-ერთი გამორჩეული რესპონდენტია. სხვადასხვა ინტერნეტ-გამოცემებსა და ტელეგადაცემებში ქეთა თოფურია უამრავ ნახვას რამდენიმე საათში აგროვებს. რეიტინგული ვარსკვლავი სითამამით გამოირჩევა და რუსული ესტრადა A'Studio-სთან ერთად არაერთხელ დაიპყრო. რუსეთში გამგზავრების შემდეგ მალევე მომღერალმა ალა პუგაჩოვასგან აღიარება მოიპოვა, რაც დიდ სირთულეებთანაა დაკავშირებული და მხოლოდ განსაკუთრებული ვოკალის შემთხვევაში არის შესაძლებელი.
