თბილისი, 11 იანვარი — Sputnik. საქართველოში მარჯვენასაჭიან ავტომობილებზე განმეორებითი ტექდათვალიერების გავლისას 1 აპრილიდან საჭის გადატანის აკრძალვა ამოქმედდება, განუცხადა „Sputnik-საქართველოს“ ეკონომიკის სამინისტროს სახმელეთო ტრანსპორტის სააგენტოს ხელმძღვანელმა შალვა ურიადმყოფელმა.
საქართველოში საჭის გადატანა მარჯვენასაჭიან ავტომობილებში სავალდებულო არ არის.
როგორც ურიადმყოფელმა განაცხადა, მარჯვენასაჭიანი ავტომობილების მფლობელებს საჭის გადატანა 2020 წლის 1 აპრილამდე შეუძლიათ.
მარჯვენასაჭიანი ავტომობილები, პირველადი ტექნიკური დათვალიერების გავლის შემდეგ, გადატანილი საჭით მას განმეორებით ვერ გაივლიან.
გარდა ამისა, 1 აპრილიდან მარჯვენასაჭიანი ავტომობილები, რომლებსაც ევროპული სტანდარტების შეუსაბამო ფარები ექნებათ, ტექდათვალიერებას სპეციალური სტიკერების დაკვრის შემდეგაც ვერ გაივლიან.
პერიოდული სავალდებულო ტექნიკური ინსპექტირება 2018 წლის 1 იანვრიდან დაიწყო. პირველ ეტაპზე შემოწმდა სამგზავრო (8 ადგილის ზემოთ) და სატვირთო (3.5 ტ-ის ზემოთ) ავტომობილები; 1 ივლისიდან - სახელმწიფო უწყებებისა და იურიდიული პირების კუთვნილი ავტომანქანები; 1 ოქტომბრიდან 3 000 სმ3 და უფრო დიდი მოცულობის ძრავის მქონე ავტომობილები. 2019 წლის 1 იანვრიდან კი ტექდათვალიერების გავლა ყველა სატრანსპორტო საშუალებისთვის სავალდებულო გახდა.
მსუბუქი ავტომობილებისთვის მომსახურების ღირებულება 60 ლარი, სატვირთო ავტომობილებისთვის კი 100 ლარია.
