ანზორ საკანდელიძე

ექსპერტები განგაშს ტეხენ თბილისი საშუალო სიმძლავრის მიწისძვრასაც კი ვერ გაუძლებს

1845
(განახლებულია 21:35 22.10.2019)
ტექნიკურ მეცნიერებათა დოქტორმა განმარტა, თუ რატომ ელოდება თბილისს კატასტროფა ძლიერი მიწისძვრის შემთხვევაში.

თბილისი, 18 ოქტომბერი – Sputnik. თბილისის საცხოვრებელი სახლების უმეტესობა არ შეესაბამება სეისმომედეგობის ნორმებს, ამიტომ ძლიერი მიწისძვრის შემთხვევაში დიდი მსხვერპლი იქნება, განაცხადა პროფესორმა ანზორ საკანდელიძემ. 

„Sputnik–საქართველოს“ მულტიმედიურ პრეს–ცენტრში გამართულ პრესკონფერენციაზე საკანდელიძემ ჩამოთვალა ის სახიფათო ფაქტორები, რომლებიც მოსახლეობას მიწისძვრის დროს ემუქრება.

ერთ–ერთი მთავარი პუნქტი შენობების მშენებლობაა, რომლებიც უსაფრთხოების ნორმებს არ შეესაბამება. როგორც პროფესორმა აღნიშნა, დარღვევები მას შემდეგ გახშირდა, რაც ყოფილმა მმართველმა პარტია „ერთიანმა ნაციონალურმა მოძრაობამ“ 2008 წელს გააუქმა კანონი, რომელიც საცხოვრებელ სახლებს შორის მინიმალურ დასაშვებ დაშორებას გულისხმობდა. ამ კანონის გაუქმების შემდეგ მანძილი სახლებს შორის პრაქტიკულად აღარ დარჩა, ისინი ერთმანეთთან ძალიან ახლოს დგანან.

„მრავალსართულიანი შენობები ორ–სამსართულიანი სახლების გვერდით ააშენეს. მრავალსართულიანმა შენობებმა დააზიანა დაბალი სახლების საძირკველი, რის გამოც ისინი ავარიული გახდა. ამ ყველაფერთან ერთად მაღალი შენობების აშენების გამო დაბალ სახლებში დღის შუქიც ვეღარ აღწევს, აღარ არის ბუნებრივი ვენტილაცია“, – განაცხადა საკანდელიძემ.

იმის გამო, რომ შენობები ავარიული ხდება – ჩნდება ბზარები, შენობებში ვეღარ აღწევს მზის შუქი, ვერ ნიავდება – მათი ფასი არა თუ განახევრდა, მეტიც – ბინები ასეთ სახლებში საერთოდ აღარ იყიდება, აცხადებს მეცნიერი.

შეიძლება მიწისძვრა არ იყოს ისეთი ძლიერი და მობინადრეებმა მოასწრონ სახლებიდან გამოსვლა, მაგრამ ქალაქში დასადგომი ადგილიც კი თითქმის აღარ დარჩა.

„ყველამ ვიცით, რომ მიწისძვრის დროს ხანძრებიც ჩნდება. წარმოიდგინეთ, რომ ეს ხდება ღამით და არ იცით, სად და როგორ წახვიდეთ. მით უფრო, რომ ახლა სახლები ძალიან მჭიდროდაა აშენებული. თუ ჩამოხვალთ, სად წახვალთ? ადგილი უბრალოდ არ იქნება. მსხვერპლი ძალიან დიდი იქნება, ეს დიდი ტრაგედია იქნება“, – აღნიშნა საკანდელიძემ პრესკონფერენციაზე.

ექსპერტის სიტყვებით, 2000–2010 წლებში, ანუ 10 წლის განმავლობაში მიწისძვრებს მთელ მსოფლიოში 43%-ით მეტი ადამიანი ემსხვერპლა, ვიდრე წინა 50 წლის მანძილზე – 1950–2000 წლებში. მიწისძვრები გახშირდა საქართველოსა და მის საზღვრებთან – აგვისტოდან მოყოლებული უკვე ათზე მეტი მიწისძვრა დაფიქსირდა.

1845
ლაბორატორია

კორონავირუსის ახალი შემთხვევები და ინფიცირების წყაროები

13
(განახლებულია 14:46 09.07.2020)
კორონავირუსული ინფექციით დაავადების შემთხვევებიდან უმეტესობა სატვირთო ავტომობილების მძღოლებს უკავშირდება

თბილისი, 9 ივლისი – Sputnik. საქართველოში ბოლო დღე–ღამეში კორონავირუსის ხუთი ახალი შემთხვევა გამოვლინდა და აქედან ოთხი სატვირთო ავტომობილის მძღოლია, კიდევ ერთი პაციენტი – კარანტინის ზონიდან, განუცხადა ჟურნალისტებს თბილისის ინფექციური საავადმყოფოს სამედიცინო დირექტორმა მარინა ეზუგბაიამ.

ახალი პაციენტების მდგომარეობა საშუალო სიმძიმისაა.

ოფიციალური მონაცემებით, ამჟამად კორონავირუსი საქართველოში 968 ადამიანს დაუდასტურდა. გამოჯანმრთელდა სულ 844 პაციენტი, ხოლო ბოლო დღე–ღამეში კლინიკებიდან გაეწერა სამი.

პანდემიის პერიოდში გარდაიცვალა 15 ადამიანი, კარანტინის რეჟიმში იმყოფება 4851, ხოლო სტაციონარებში ექიმების დაკვირვების ქვეშ 231 პაციენტია.

ასევე კორონავირუსის დიაგნოზით უცხოეთიდან სამშობლოში გადმოყვანილია საქართველოს სამი მოქალაქე.

საქართველოში კორონავირუსის პირველი შემთხვევა 26 თებერვალს დაფიქსირდა.

13
თემები:
COVID-19 საქართველოში
რთველი

„რქაწითელი" და „კახური მწვანე": მთავრობა რთველის სუბსიდირებას გეგმავს

28
(განახლებულია 14:10 09.07.2020)
მთავრობა რთველის სუბსიდირებაზე 60 მილიონ ლარს დახარჯავს, აუცილებლობის შემთხვევაში კი შეისყიდის კიდეც

თბილისი, 9 ივლისი — Sputnik. საქართველოს მთავრობა ქართული ყურძნის ჯიშების „რქაწითელისა" და „კახური მწვანის" სუბსიდირებას განახორციელებს, განაცხადა საქართველოს პრემიერ-მინისტრმა გიორგი გახარიამ მთავრობის სხდომაზე.

ღვინის ეროვნული სააგენტოს თავმჯდომარემ ლევან მეხუზლამ განაცხადა, რომ მთავრობის გადაწყვეტილებით, წელს რთველის სუბსიდირებაზე 60 მილიონი ლარი დაიხარჯება.

მეხუზლას თქმით, სუბსიდია, სავარაუდოდ, მხოლოდ „რქაწითელის" ჯიშის ყურძენს შეეხება. თუმცა, როგორც აღმოჩნდა, სიაში „კახური მწვანეც" აღმოჩნდა.

„მთავრობა რთველის სუბსიდირებას განახორციელებს, განსაკუთრებით ყურძნის ისეთი ჯიშების, როგორიცაა „რქაწითელი" და „კახური მწვანე", რომელთა ფასიც 80 თეთრზე დაბალი არ იქნება", - განაცხადა გახარიამ.

გახარიას თქმით, ფერმერული საქმიანობის სტიმულირება მთავრობის ანტიკრიზისული გეგმის ერთ-ერთი მიზნობრივი მიმართულებაა.

„ყველამ კარგად იცის, რომ მთავრობის ანტიკრიზისული გეგმის ერთ-ერთი მთავარი სამიზნე გახლავთ სოფელი, ფერმერი, ქართველი გლეხი. ჩვენ ყველაფერი გავაკეთეთ იმისთვის, რომ სხვადასხვა ინსტრუმენტით ამ ადამიანებს დავხმარებოდით, ქართველი ფერმერი გაგვეძლიერებინა კრიზისის პირობებში", - განაცხადა გახარიამ.

როგორც მან აღნიშნა, თუ აუცილებლობა იქნება, სახელმწიფო ყურძნის შესყიდვაშიც ჩაერთვება.

ამასთან, პრემიერმა მოკლე ექსკურსი გააკეთა და აღნიშნა, თუ რამდენად წარმატებული იყო გასული წლები ქართული მევენახეობისა და მეღვინეობისთვის.

„2019 წელი იყო რეკორდული - საქართველოდან 94 მილიონი ბოთლი ღვინის ექსპორტი განხორციელდა. რა თქმა უნდა, შიდა მოხმარებაც იზრდებოდა. 2012 წელს ქართულ ექსპორტში მეღვინეობის წილი მთლიანობაში დაახლოებით 2.5% იყო, დღეს კი 6%-ია", - განაცხადა გახარიამ..

საქართველოში რთველის სეზონი სექტემბრის მეორე ნახევრიდან იწყება. იმისთვის, რომ პანდემიის გამო გამოწვეული ეკონომიკური კრიზისი რთველზე არ აისახოს, საქართველოს ხელისუფლებამ მეღვინეობის დარგზე ანტიკრიზისული გეგმის ფარგლებში ზრუნვა გადაწყვიტა - აღნიშნული გადაწყვეტილება ივნისის დასაწყისში პრემიერის სოფლის მეურნეობის სამინისტროსა და შესაბამისი უწყებების წარმომადგენლებთან გამართულ სამუშაო შეხვედრაზე იქნა მიღებული..

28
თემები:
საქართველოს მთავრობა