ტიმოთესუბნის ტაძარი

სათავსო უძველეს ქართულ ტაძარში პრობლემა მოგვარდა

107
(განახლებულია 22:32 20.08.2019)
სათავსოს ადგილას დაიდგმება სხვა, იდენტური დანიშნულების მქონე ხის კონსტრუქცია

თბილისი,  20 აგვისტო  — Sputnik.  ტიმოთესუბნის ყოვლადწმინდა ღვთისმშობლის მიძინების სახელობის სამონასტრო კომპლექსის ცენტრალური ტაძრის ინტერიერში მოწყობილი საყოფაცხოვრებო დანიშნულების სათავსო მოიხსნება, იუწყება საზოგადოებრივი მაუწყებლის პირველი არხი

ტაძარში უკანონო მშენებლობის შესახებ ინფორმაცია კულტურული მემკვიდრეობის დაცვის სააგენტოსთვის ცნობილი თვითმხილველების მიერ მიწოდებული ფოტოებით გახდა.

სწორედ მათ შეაყობინეს უწყებას უკანონო ქმედებების შესახებ.

სააგენტოს სპეციალისტებმა მას შემდეგ, რაც აღნიშნული ინფორმაცია გაიგეს, განაცხადეს,  რომ  საყოფაცხოვრებო დანიშნულების სათავსო ეროვნული კატეგორიის სტატუსის მქონე უძრავი ძეგლის ინტერიერთან სრულ შეუსაბამობაშია და მის კულტურულ ღირებულებას ხელყოფს.

„კარადას დაშლიან.  შეთანხმება  ადგილობრივ სასულიერო პირებსა და სააგენტოს სპეციალისტებს შორის მიღწეული იქნა. სახელმწიფო უწყების მიერ შემუშავებული რეკომენდაციების თანახმად, საკულტო ნაგებობაში მოეწყობა ახალი, იდენტური დანიშნულების მქონე ხის კონსტრუქცია, რაც ტაძრის მხატვრულ-არქიტექტურული იერსახის შესაბამისი იქნება“, – აღნიშნულია განცხადებაში.

ამასთან, სამუშაო ჯგუფის ვიზიტის შედეგად, დადგინდა, რომ  ინტერიერში საყოფაცხოვრებო დანიშნულების სათავსოს მოწყობას ძეგლის ფიზიკური დაზიანება არ გამოუწვევია, რაც სამართლებრივი პასუხისმგებლობის განსაზღვრის აუცილებლობას არ წარმოშობს.

ტიმოთესუბნის ღვთისმშობლის მიძინების სახელობის მონასტერი XII-XIII საუკუნეების მიჯნაზეა აგებული. ტაძარი ქართული მოვარდისფრო აგურითაა ნაგები. ეკლესია თორის მფლობელ შალვა ერისთავთ-ერისთავ ახალციხელის მიერაა აგებული.

ტაძრის მოხატულობა 1205-1216 წლებით თარიღდება. ფრესკების დიდი ნაწილი დღემდე შენარჩუნებულია. 2000-2006 წლებში ხელოვნების საერთაშორისო ცენტრის მიერ ფრესკებს გაწმენდისა და გამაგრების სარესტავრაციო სამუშაოები ჩაუტარდა. რესტავრაციის შემდეგ ამავე ცენტრმა ღვთისმშობლის ტაძარზე ჩატარებული პროექტი წარადგინა ევროგაერთიანების კულტურული მემკვიდრეობის პრიზზე – „ევროპა ნოსტრას“ ჯილდოზე, რის შედეგადაც პროექტმა ერთ-ერთი პრესტიჟული ჯილდო მოიპოვა.



107
თემები:
ქართული კულტურული მემკვიდრეობის ძეგლები (55)
ბიბლიოთეკა

ბიბლიოთეკები იხსნება: რა რეკომენდაციების შესრულება იქნება სავალდებულო

12
(განახლებულია 16:40 05.08.2020)
დაავადებათა კონტროლისა  ეროვნული ცენტრის ხელმძღვანელის განცხადებით,  არსებობს  ვირუსის წიგნით გადაცემის გარკვეული რისკები

თბილისი, 5 აგვისტო - Sputnik. უწყებათაშორისი საკოორდინაციო საბჭოს გადაწყვეტილებით, ბიბლიოთეკების მუშაობა, რომლებიც  კორონავირუსის ეპიდემიის გამო იყო დახურული, 15 სექტემბრიდან დასაშვები ხდება, რისთვისაც ჯანდაცვის სამინისტროს მიერ გაცემული რეკომენდაციების დაცვა იქნება აუცილებელი.

მანამდე დაავადებათა კონტროლისა და საზოგადოებრივი ჯანმრთელობის ეროვნული ცენტრის ხელმძღვანელის მოადგილე პაატა იმნაძემ იმედი გამოთქვა, რომ ეს სფერო მალე გაიხსნება, თუმცა იმავდროულად აღნიშნა, რომ არსებობს ვირუსის წიგნით გადაცემის გარკვეული რისკები.

„სხვადასხვა კვლევებით რამდენიმე საათი რჩება ვირუსი ცოცხალი. ჩვენთან, სამწუხაროდ, გავრცელებულია წიგნის [დანერწყვილი თითებით] გადაფურცვლის ჩვევა, ესეც მაღალი რისკის ფაქტორია“, – აღნიშნა მან.

საქართველოს მთავრობის ინფორმაციით, შესაბამისი პროტოკოლი ბიბლიოთეკებთან დაკავშირებით უახლოეს დღეებში დამტკიცდება.

12
თემები:
COVID-19 საქართველოში
შატილი

შატილამდე მისასვლელი გზა უსაფრთხო და კომფორტული გახდება

26
(განახლებულია 16:17 05.08.2020)
საერთო ჯამში, შატილის მიმართულებით მიმდინარე 12 პროექტის ფარგლებში რეაბილიტაცია ჩაუტარდება გზის 86 კილომეტრ მონაკვეთსა და 15 ხიდს

თბილისი, 5 აგვისტო - Sputnik. შატილის მიმართულებით გზის რეაბილიტაციის სამუშაოები ინტენსიურ რეჟიმში მიმდინარეობს, ნათქვამია საავტომობილო გზების დეპარტამენტის მიერ გავრცელებულ განცხადებაში.

დეპარტამენტის ცნობით, მიუხედავად გეოლოგიური გამოწვევებისა, წელს შატილის მიმართულების გზაზე სამუშაოები ფაქტობრივად არ გაჩერებულა.

„პროექტის მიზანია, შატილამდე მისასვლელ გზაზე ავტოტრანსპორტის გადაადგილება გახდეს ბევრად უსაფრთხო, ვინაიდან არსებული გზა არის გრუნტის, ხშირად ვითარდება მეწყრული პროცესები და ორი ავტომანქანისთვის გვერდის ავლა პრაქტიკულად შეუძლებელია“, -აღნიშნულია განცხადებაში.

უწყების ინფორმაციით, გზის რეაბილიტაციის დასრულების შემდეგ შატილის მიმართულებით გზის პარამეტრები გაუმჯობესდება, გაფართოვდება გზის სავალი ნაწილი, მოეწყობა ბაგიროვანი ზღუდარები და გადაადგილება გაცილებით უსაფრთხო და კომფორტული გახდება.

გზის რეაბილიტაციის ერთი მონაკვეთი, „მთის გზების“ პროექტის ფარგლებში, სნო-ჯუთა- როშკა-შატილი-ომალო-ხადორის ხეობა-ბაწარა-ახმეტას   საავტომობილო გზის მშენებლობის შემადგენელი ნაწილია.

„მთის გზების“ პროექტის პარალელურად, გზის რეაბილიტაციის ორი  პროექტი მსოფლიო ბანკის, სამი პროექტი კი  სახელმწიფო ბიუჯეტის დაფინანსებით მიმდინარეობს.

ყველაზე პრობლემური – თუშეთის გზა ორ წელიწადში უსაფრთხო გახდება>>

საერთო ჯამში, შატილის მიმართულებით მიმდინარე 12 პროექტის ფარგლებში რეაბილიტაცია ჩაუტარდება  86 კმ. გზასა და 15 ხიდს. აღნიშნული პროექტების განხორციელებაზე  59 მლნ ლარზე მეტი დაიხარჯება.

შატილი შუასაუკუნეების ციხე-სოფელია, რომელიც 60–ზე მეტ კოშკს აერთიანებს, მდებარეობს ზღვის დონიდან 1400 მეტრზე. 2007 წლიდან შატილის კოშკები იუნესკოს მსოფლიო კულტურული მემკვიდრეობის საცდელ ნუსხაშია შეტანილი.

26
თემები:
საქართველოს ეკონომიკა